1-2. Wa a wan prablem we wi av tide we komiin laik wa Lat did go chuu?

 WEN wi si di bad sitn dem we di piipl dem iina da worl ya a du, wi fiil jos laik ou Lat did fiil. Da man de we did a du wa rait iina Gad yai “did taamentid iina im suol siek-a di doti laif we di wikid piipl dem roun im did a liv.” An wi fiil da wie ya tu kaa wi nuo se wi Faada Jeuova iet di bad sitn dem we piipl a du. (2 Pii. 2:7, 8) Kaaz Lat did lov Jeuova an av nof rispek fi im, a dat mek im neehn av notn fi du wid di doti laif we di piipl dem roun im did a liv. A siem wie so, nof a di piipl dem iina da worl ya na’av no rispek fi di sitn dem we Jeuova se rait. Bot iivn wid aal a dat, wi kyan stil du wa Jeuova se ef wi shuo se wi lov im an av nof rispek fi im.​—Pr. 14:2.

² Kaa im waahn fi elp wi fi lov im an av nof rispek fi im, Jeuova gi wi som tingz we kyan elp wi fi gwaan du dat iina di buk we niem Pravorbz. Evribadi we a Kristiyan, weda dem a man ar uman ar dem yong ar dem op iina iej, it a-go riili elp dem wen dem tek di taim fi tingk bout di gud sitn dem we de iina da buk de.

3. Azkaadn tu Pravorbz 17:3, wa mek wi fi mek shuor se wi a protek wi aat? (Luk pan di picha tu.)

³ Wan a di mien riizn wa mek wi fi protek wi aat fram di bad sitn dem a kaa Jeuova a di wan we nuo uu wi riili bi, so im no jos luk pan di tingz we piipl kyan si. (Riid Pravorbz 17:3.) Jeuova a-go lov wi wen wi chrai fi tingk bout di sitn dem we a-go mek wi waiz an mek wi kyan liv fi eva. (Jan 4:14) Wen wi du dat, wi naa go get miks op wid di bad sitn dem we Sietan an di wikid piipl dem iina da worl ya a du. (1 Jan 5:18, 19) Wen wi an Jeuova ton gud gud fren, wi a-go lov im an rispek  im muo an muo. Kaa wi no waahn du notn we a-go mek Jeuova fiil a wie, wi naa go iivn tingk bout fi du wa rang. Wen wi fiil fi du di bad sitn dem, wi fi aks wiself da kwestiyan ya, ‘Ou mi fi go du sitn we a-go ort di Sumadi we lov mi so moch?’​—1 Jan 4:9, 10.

4. Kaa shi av nof rispek fi Jeuova, ou dat did elp wan sista fi no du sitn we shi nuo se rang?

⁴ Wan sista we niem Maata we kom fram Kruoyiesha we did fiil fi get miks op iina seks sin wan taim se dis: “It did aad fi mi tingk chriet an kaa mi did a fiil fi go get miks op iina seks sin, mi did afi fait fi no dwi’it. Bot kaaz mi av nof rispek fi Jeuova a dat did elp mi.” b So ou dat did elp Maata? Shi se shi did tek di taim fi tingk bout wa wuda apm ef shi did du sitn bad. An a di sed ting wi kyan du. Wan a di wos ting we kuda apm a dat wi mek Jeuova sad an wi naa go get di chaans fi worship im fi eva.​—Jen. 6:5, 6.

5. Wa yu kyan lorn fram wa did gwaan wid Leo?

⁵ Wen wi av nof rispek fi Jeuova, wi naa go miks op wid piipl we a du di bad sitn dem. A dat wan breda we niem Leo we kom fram Kanggo did lorn. Fuo ier afta im baptaiz im did staat kip bad kompni. Im did tingk se so langks im naa du di bad sitn dem we dem did a du, notn neehn rang kaaz im neehn a sin. Bot kaaz a di bad kompni we im did a kip, im staat jringk tu moch lika an get miks op iina seks sin. Bot den im staat fi tingk bout wa im mada an faada did tiich im an ou im neehn api no muor kaaz im neehn a du wa Jeuova se im fi du. An kaaz a dat, im did staat tingk chriet agen. Di elda dem elp im an im kom bak kom sorv Jeuova. Nou im a wan elda an wan speshal paiyanier an im api.

6. A wich tuu “uman” wi a-go taak bout nou?

 ⁶ Mek wi luk pan Pravorbz chapta 9. Iina da chapta de, di Baibl tel wi bout di sitn dem we waiz an di sitn dem we fu-fuul an se dem komiin laik tuu uman. c Wen wi a luk pan dis, wi waahn fi memba se da worl ya we Sietan kanchuol eva a push tingz we av fi du wid seks sin an bluu muuvi an dem ting de. (Ifii. 4:19) So aal a wi afi av nof rispek fi Jeuova so dat wi no get miks op iina dem sitn de. (Pr. 16:6) So weda wi a uman ar wi a man, di sitn dem we de iina da chapta ya kyan elp wi. Di tuu uman dem we da chapta ya taak bout tel di wan dem we no nuo nof sitn fi kom spen som taim wid dem. It komiin laik di tuu a dem a se ‘Kom a mi yaad kom nyam som fuud wid mi.’ (Pr. 9:1, 5, 6, 13, 16, 17) Bot wa apm tu di wan dem we go a di fu-fuul uman yaad difrant fram wa apm tu di wan dem we go a di ada uman yaad.

7. Azkaadn tu Pravorbz 9:13-18, wa apm tu di wan dem we du wa di fu-fuul uman waahn dem fi du? (Luk pan di picha tu.)

⁷ Mek wi luk pan wa gwaan iina di fu-fuul uman yaad. (Riid Pravorbz 9:13-18.) Da uman ya a baal out tu di wan dem we no nuo nof se dem fi kom a fi ar yaad kom nyam wid ar. Bot wa apm tu di wan dem we go de? Yu waahn nuo se dem en op ded. Yu mait-a memba se iina som ada chapta we kom bifuo da wan ya iina Pravorbz it taak bout tingz iina da wie ya. Laik wi lorn bout wan kielis uman we a du aal kain-a seks sin, an enibadi we go iina fi ar ous en op ded. (Pr. 2:11-19) An iina Pravorbz 5:3-10 di Baibl waan wi bout wan neda kielis uman, an di piipl dem we go a fi ar yaad en op ded tu.

8. Wa wi afi mek op wi main bout?

⁸ Di wan dem we ier di fu-fuul uman a kaal dem afi go mek op dem main ef dem a-go lisn tu ar ar dem naa go dwi’it. An a di sed ting mait-a apm tu wi tu. Supuoz wi a wach TV ar a luk op tingz pan di intanet an wi si tingz we av fi du wid seks sin ar niekid picha ar dem sitn de, wa wi a-go du?

9-10. Wa mek wi no fi get miks op iina seks sin?

⁹ Wi av nof gud riizn wa mek wi no fi get miks op iina seks sin. Di fu-fuul uman a se, ‘A wen yu tiif waata an jringk it, it swiit.’ So wa mek wen di Baibl taak bout seks, som a di taim it taak bout waata tu? Di Baibl mek wi nuo se wen wan ozban an waif a du tingz  wid dem wan aneda we av fi du wid seks, a sopm we mek dem fiil gud, jos laik wen sumadi fiil gud wen dem jringk wan kuul glaas a waata. (Pr. 5:15-18) So wen di Baibl a taak bout waata we sumadi tiif, it a taak bout wen sumadi aid an go get miks op iina seks sin. Nof a di taim wen piipl get miks op iina seks sin a aid dem aid an dwi’it, jos laik wen sumadi go aid an go tiif sitn. An it mait-a swiit dem kaa dem fiil laik se dem get we wid it. Bot a jos fuul dem a fuul demself. Jeuova si an nuo evriting, an di wos ting we kuda eva apm tu wi a fi Jeuova no api wid wa wi a du. (1 Kor. 6:9, 10) Bot a no jos dat.

¹⁰ Wen sumadi get miks op iina seks sin, it kyan mek dem fiil shiem an laik se dem no wot notn. An pan tap a dat, dem mait-a get pregnant iivn duo dem neehn waahn dat fi apm, an it kyan aal mash op dem fambili laif tu. So wi si se it no mek no sens fi go iina di fu-fuul uman ous go nyam ar fuud. Wen sumadi get miks op iina seks sin, it kyan mash op wa dem av wid Jeuova. Bot a no onggl dat, nof a di taim dem piipl ya en op get aal kain-a siknis we mait-a kaaz dem fi ded tu. (Pr. 7:23, 26) An a dat mek di laas vors iina chapta 9 shuo wi se di wan dem we go iina di uman yaad en op ded. So wa mek so moch piipl du wa da uman ya waahn dem fi du iivn duo a bie bad tingz apm wen dem dwi’it?​—Pr. 9:13-18.

11. Wa mek wen sumadi wach bluu muuvi an dem ting de it kyan mash dem op?

¹¹ Wan a di tingz we wi no waahn fi kech wi a fi go luk pan niekid picha an bluu muuvi an dem ting de. Som piipl tingk se notn no rang wid dat, bot a no so it go at aal. Bluu muuvi an dem ting de kyan mash wi op, an ef wi staat wach dem, wi mait-a fain it aad fi tap. An wen sumadi luk pan dem sitn de, it no iizi fi dem figet it, an it no mek dem tap waahn fi du di sitn dem we rang. Bot a da taim de dem waahn fi go dwi’it. (Kol. 3:5; Jmz. 1:14, 15) So nof piipl we wach bluu muuvi an dem ting de go get miks op iina seks sin.

12. Ou wi shuo se wi no waahn av notn fi du wid no picha we mait-a mek wi tingk bout fi go miks op iina seks sin?

¹² So wa wi fi du ef wi a yuuz wi fuon an dem ting de an wi bok op pan wan niekid picha ar wan picha we a shuo sumadi a av seks? Wi fi tap luk pan it sed taim. Wen wi memba umoch wi lov Jeuova an ou wi no waahn notn fi mash op wa wi av wid im, dat wi elp wi. Yu av som picha an ting we piipl mait-a se notn no rang wid, bot wen sumadi luk pan dem it mait-a mek dem fiil laik dem waahn fi av seks. Wa mek wi no fi luk pan dem picha de? Kaaz wi no waahn fi a tingk bout notn we av fi du wid seks sin. (Mat. 5:28, 29) Wan breda we niem Dievid we a wan elda iina Tailan se dis: “Mi aks miself se: ‘Da picha ya naa riili shuo piipl a av seks, bot ou Jeuova wuda fiil ef mi gwaan luk pan it?’ Wen mi tingk bout tingz da wie ya, it elp mi fi du wa rait.”

13. Wa a-go elp wi fi du di sitn dem we waiz?

¹³ Wen wi av nof rispek fi Jeuova an no waahn du notn fi ort im, a dat a-go elp wi fi du di sitn dem we shuo se wi waiz. Di Baibl tel wi se wen wi av nof rispek fi Jeuova a so wi “a-go staat fi get waiz.” (Pr. 9:10) An a dat wi si iina di fos paat a Pravorbz chapta 9 we tel wi bout wan neda uman we komiin laik di sitn dem we waiz.

14. Wen wi riid Pravorbz 9:1-6, wa wi si se Jeuova waahn wi fi du?

¹⁴ Riid Pravorbz 9:1-6. Iina da paat ya, wi riid bout wa Jeuova waahn wi fi du. Im  a di Wan we mek wi an a onggl im nuo di sitn dem we riili waiz. (Pr. 2:6; Ruo. 16:27) Wen wi riid da paat ya, wi si se it a tel wi bout wan big ous we av sevn big kalom. Dis shuo wi se Jeuova kain an enibadi we waahn fi du wa im se, im api fi tek dem iina im fambili.

15. Wa Gad waahn wi fi du?

¹⁵ Jeuova kain bad, an im mek shuor se aal a im pikni dem av wa dem niid fi liv. An a dem wiez ya wi si iina di uman we komiin laik di sitn dem we waiz we Pravorbz chapta 9 taak bout. Di Baibl tel wi se da uman ya fiks op ar ous gud gud, laik shi kuk op di miit, miks op di wain, an fiks op ar tiebl. (Pr. 9:2, ftn.) An wen wi luk pan vors 4 an 5 wi si se di uman a tel di sumadi we no nuo nof fi kom nyam fi ar bred. Wa mek wi fi go a fi ar yaad an nyam di fuud we shi a gi wi? Wi fi du dat kaa Jeuova waahn im pikni dem fi shuo se dem waiz, an im waahn fi kip dem sief. Im no waahn wi fi go du di bad sitn dem we a-go ort wi jos so wi kyan lorn wa rait fram wa rang, kaaz im nuo se wi onggl a-go en op sari se wi dwi’it. So Jeuova mek di wan dem we a liv op nuo di waiz sitn dem we dem fi du. (Pr. 2:7) Wen wi av nof rispek fi Jeuova, wi a-go aalwiez waahn fi du di waiz sitn dem we im se wi fi du an dat a-go mek im api.​—Jmz. 1:25.

16. Kaaz Alain av nof rispek fi Gad ou dat did elp im fi du wa rait, an wa did apm kaaz a dat?

¹⁶ Mek wi luk pan wa did gwaan wid wan elda we niem Alain we a wan tiicha. Kaaz im av nof rispek fi Jeuova, it did elp im fi mek op im main fi du wa rait. Im se: “Nof a di piipl dem we mi wok wid tingk se bluu muuvi an dem ting de gud fi tiich di pikni dem bout seks.” Bot Alain neva mek dem fuul im. Im se: “Kaa mi av nof rispek fi Jeuova, mi mek dem nuo se mi naa wach dem ting de, an mi mek dem nuo wa mek tu.” Alain did shuo se im a tingk bout di sitn dem we waiz an im did a chrai fi du wa rait. (Pr. 9:6) Kaaz a wa Alain did du, som a di ada tiicha dem staat fi stodi di Baibl an ga’a miitn tu.

17-18. Wa a som a di gud ting dem we di wan dem we du di sitn dem we waiz a get rait ya nou, an wa dem a luk faawod fi get? (Luk pan di picha tu.)

¹⁷ Wen Jeuova tel wi bout dem tuu “uman” ya iina di Baibl, im riili a shuo wi ou wi kyan av wan gud laif nou an fi eva. Di wan dem we du wa di fu-fuul uman waahn dem fi du, dem a du aal kain-a seks sin an a tingk se dem riili a enjai dem laif, an dem naa si se dat a-go mash dem op. An kaaz a dat, dem a-go en op ded.​—Pr. 9:13, 17, 18.

¹⁸ Tingz riili difrant fi di wan dem we du  wa di uman we waiz aks dem fi du. Di wan dem we go a fi ar yaad go nyam get som nais fuud we gud fi dem, an da nais fuud de komiin laik di sitn dem we Jeuova gi wi fi kip kluos tu im. (Aiz. 65:13) Jeuova did tel di prafit we niem Aizaiya fi tel di piipl dem se dem fi lisn gud tu wa Im a se an dem fi nyam di gud sitn dem we Im gi dem. An wen dem du dat, dem a-go api bad. (Aiz. 55:1, 2) Rait ya nou, wi a lorn fi lov di sitn dem we Jeuova lov an fi iet di sitn dem we im iet. (Sa. 97:10) An it mek wi fiil gud wen wi tel ada piipl fi kom kom lorn di sitn dem we waiz tu. Wen wi du dat, it komiin laik wi de pan wan ai ai plies iina wan siti a baal out an a tel di wan dem we no nuo nof sitn se dem fi kom wich paat wi de. Di gud sitn dem we wi lorn a elp wi an di wan dem we lisn tu wi rait ya nou, an it a-go elp wi iina di fyuucha. Di waiz sitn dem we Jeuova se mek wi nuo wa fi du so dat wi kyan gwaan du wa rait an get fi liv fi eva.​—Pr. 9:3, 4, 6.

19. Bies pan wa Iikliiziyastiiz 12:13, 14 se, wa aal a wi fi mek op wi main fi du? (Luk pan di paat we niem “ Ou It Elp Wi Wen Wi Av Nof Rispek Fi Gad.”)

¹⁹ Riid Iikliiziyastiiz 12:13, 14. Iina dem laas diez ya, piipl a du aal kain-a tingz we no rait. Bot wen wi av nof rispek fi Jeuova, dat wi protek wi aat so dat wi kyan gwaan du wa rait an kip kluos tu im. An kaa wi av nof rispek fi im, it a-go push wi fi tel ada piipl fi kom lorn di sitn dem we waiz so dat it kyan elp dem tu.