Di Baibl no mek wi nuo wa mek, bot it tel wi som sitn we mait-a elp wi fi si wa mek dem neehn go bak.

Wan ienjel did tel Mieri se shi wuda get pregnant an av wan biebi. Wen di ienjel tel Mieri dis, Mieri an Juozif did liv iina Nazaret we de iina Gyalalii. A de-so Juozif did kom fram. (Luuk 1:26-31; 2:4) Afta dat, wen dem kom bak fram Iijip, dem go baka Nazaret an a de-so dem gruo Jiizas. An a das wai im ton wan Nazariin. (Mat. 2:19-23) An a das wai wi kanek Jiizas, Juozif an Mieri tu Nazaret.

Wan a Mieri fambili did niem Ilizibet, an shi did liv iina Juuda. Ilizibet ozban did a wan priis we niem Zakaraiya an a dem did a Jan di Baptis mada an faada. (Luuk 1:5, 9, 13, 36) Mieri did go luk fi Ilizibet an stie wid ar fi chrii mont iina Juuda. Den Mieri go baka Nazaret. (Luuk 1:39, 40, 56) So Mieri did kain-a nuo ou di plies iina Juuda stie.

Afta dat, Juozif du wa di ruula se im fi du wen im se aal a di piipl dem “afi go a di toun we dem baan fi get dem niem rait dong.” So Juozif lef Nazaret an go a Betliyem, we dem kaal ‘Dievid siti’ an a de-so di prafit did rait dong se di Mesaiya wuda baan. (Luuk 2:3, 4; 1 Sam. 17:15; 20:6; Mai. 5:2) Afta Mieri av Jiizas de, Juozif neehn waahn ar fi chravl aal di wie go baka Nazaret wid di biebi. So dem stie iina Betliyem we did de bout siks mail fram Jeruusilem. So it wuda iiziya fi dem kyari di biebi go a Gad ous go gi op di sakrifais we dem fi gi op.​—Liv. 12:2, 6-8; Luuk 2:22-24.

Gad ienjel did tel Mieri se ar bwai pikni wuda get “di chuon wa im faada Dievid did av” an im wuda bi wan king. Mieri an Juozif mait-a did sidong an tingk se a wan big ting fi Jiizas baan iina Dievid siti. (Luuk 1:32, 33; 2:11, 17) So dem mait-a did tingk se it mek sens fi dem stie iina Betliyem an wiet fi Gad tel dem wa fi du.

Wi no nuo ou lang dem did de iina Betliyem fa wen di man dem we stodi bout di staar an dem ting de kom. Bot bai da taim de, aal a dem wudaana liv iina wan ous. So Jiizas wudn bi wan biebi, im wuda bi wan likl “pikni.” (Mat. 2:11) So it luk laik se dem neva go baka Nazaret, bot dem tan iina Betliyem an staat mek laif de-so.

Erad did gi aada fi dem “kil aaf aal a di bwai pikni dem we did iina Betliyem . . . aal a di pikni dem we did a tuu ier uol an anda tuu.” (Mat. 2:16) Bot Jeuova mek Juozif an Mieri nuo se dem fi git op an ron go a Iijip an dem tan de til Erad ded. Afta dat, Juozif kya im fambili go a Nazaret. Wa mek dem neehn go baka Betliyem? A mait-a kaa dem neehn waahn de wich paat Erad wikid son we niem Arkelos did de, kaa im did a ruul iina Judiya dem taim de. An dem did waahn fi du wa Gad se dem fi du. So wen dem de a Nazaret, Juozif kuda nou gruo Jiizas fi worship Jeuova di rait wie.​—Mat. 2:19-22; 13:55; Luuk 2:39, 52.

A wen Jiizas ded piipl kuda get di chaans fi go a evn, an bies pan wa wi nuo Juozif did ded bifuo Jiizas. So wen yu tingk bout it, Juozif a-go kom bak alaiv rait ya-so pan di ort. So dem taim de, wi kyan go taak tu im an aks im muor bout wa mek dem did tan iina Betliyem afta Jiizas did baan.