1. Wa wi fi du ef wi no waahn fi ded wen Jeuova die kom?

 WEN di Baibl taak bout “Jeuova die” it a taak bout di taim wen Jeuova a-go get rid a di wan dem we a fait gens im an di taim wen im a-go siev im piipl dem, an dis a sitn we im du aredi. (Aiz. 13:1, 6; Izii. 13:5; Zef. 1:8) Bot iina fi wi taim, “Jeuova die” a-go staat wen di govament dem get rid a powaful Babilan, an da die de a-go don wid di Aamagedan waar. An ef wi no waahn fi ded iina da taim de, wi afi gwaan redi op wiself nou. Jiizas no onggl tel wi se wi fi redi op wiself fi di ‘wos sofarieshan,’ bot im mek wi nuo se wi fi ‘aalwiez redi’ fi’it.​—Mat. 24:21; Luuk 12:40.

2. Wa wi kyan lorn fram 1 Tesaluoniyan?

² Iina di fos leta we Paal did rait tu di Kristiyan dem we did de iina Tesalonaika, im did tel dem som uol iip a tuori fi elp dem fi redi op demself fi Jeuova die aalduo im nuo se da die de neehn did a-go kom iina fi dem taim. (2 Tes. 2:1-3) Bot im stil tel dem fi redi op demself fi da die de laik it did a-go kom di neda die, an wi kyan du di siem ting tu. Mek wi luk pan wa im did se bout dem sitn ya: (1) a ou Jeuova die a-go kom, (2) an uu a-go ded wen da die de kom, an (3) a wa wi kyan du fi redi op wiself fi da die de.

3. A ou Jeuova die a-go kom laik wan tiif iina di nait? (Luk pan di picha tu.)

³ “Jos laik ou wan tiif kom sodn iina di nait.” (1 Tes. 5:2, NWT ) Dis a di fos tuori Paal yuuz fi mek wi nuo ou Jeuova die a-go kom. Jos laik ou wan tiif kom iin kwik kwik an du  wa dem a du, an muor taim dem kom iina di nait, a siem so Jeuova die a-go kom sodn tu an nof piipl naa go de luk out fi’it. Aal di wan dem we a sorv Gad di rait wie a-go fraitn ou tingz chienj op kwik kwik, bot dem naa go get mash op laik di wikid piipl dem.

4. A ou Jeuova die a-go komiin laik wen wan uman bout fi av biebi an iina pien?

⁴ “Laik wen pien staat fi riich di uman we bout fi av biebi.” (1 Tes. 5:3) Wan uman we a-go av biebi naa go nuo wen di biebi a-go baan, bot shi nuo se shi a-go av biebi. An wen di biebi a baan, it a-go kom sodn an shi a-go iina uol iip a pien an shi kyaahn go du notn bout it. A siem so wi no nuo a wen Jeuova die a-go kom, bot wi nuo se it a kom. An wi nuo se Gad a-go get rid a di wikid piipl dem an dem kyaahn go du notn bout it; dem naa go get we.

5. A ou di wos sofarieshan komiin laik wen die jos a lait?

⁵ Jos laik wen die a lait. Di tord tuori we Paal did tel wi bout did taak bout som tiif we kom iina di nait. Bot iina da wan ya, Paal did se Jeuova die komiin laik wen die jos a lait. (1 Tes. 5:4) Wen dem tiif ya kom iina di nait, dem so bizi a tiif dat dem nat iivn riyalaiz se die suun lait, so die mait-a lait pan dem an mek piipl get fi si wa dem a du. A siem so di wos sofarieshan a-go shuo op di wan dem we a du di sitn dem we Gad no waahn dem fi du. Bot wi na’afi komiin laik dem, kaa wi a redi op wiself fi Jeuova die nou wen wi tap du eniting we wi a du we Jeuova no waahn wi fi du, an wi fi gwaan du di sitn dem “wa gud, rait an chuu.” (Ifii. 5:8-12) Paal tel wi bout tuu ada tuori we taak bout di wan dem we Gad a-go get rid a.

6. Wa mek wi se it komiin laik uol iip a piipl a sliip? (1 Tesaluoniyan 5:6, 7)

⁶ “Aal uu sliip.” (Riid 1 Tesaluoniyan 5:6, 7.) Paal se di wan dem we a-go ded wen Jeuova die kom komiin laik piipl we a sliip. Dem no nuo wa a gwaan roun dem an umoch aklak a chraik, so dem no nuo wa fi du wid demself. It komiin laik se uol iip a piipl a sliip an no nuo wa a gwaan wen it kom aan tu di sitn dem iina Gad Wod. (Ruo. 11:8) Aalduo dem si aal a wa a gwaan roun dem, dem no riyalaiz se wi a liv iina “di laas die dem,” an se di wos sofarieshan suun kom. Wen som big tingz gwaan iina di worl, it mait-a komiin laik se som piipl wiek op kaa dem waahn fi lorn bout Gad Kindom govament. Bot likl afta dat, nof a dem go rait bak go sliip. Aal som a dem we nuo se Jeuova die a-go kom tingk se it naa kom fi nou. (2 Pii. 3:3, 4) Bot yu si wi, kaa wi nuo se Jeuova die a get kluosa an kluosa, evridie wi chrai aad fi du wa di Baibl se an kip wi yai dem uopm.

7. Wa mek wi se di piipl dem we Jeuova a-go get rid a komiin laik dem jongk nou?

⁷ “Dem de we jongk aaf demself.” Di apasl Paal did se di wan dem we komiin laik dem jongk aaf demself a-go fiil it wen Jeuova die kom. Wen piipl jongk, dem kyaahn elp demself, dem du bie fuulinish. A siem so di wikid piipl dem naa lisn tu wa Jeuova se, dem a du bie fuulinish. So di sitn dem we dem a du a-go kaaz dem fi ded. Bot di wan dem we a Kristiyan a kip dem yai waid uopm. Dem naa gwaan laik se dem jongk. (1 Tes. 5:6) Sumadi we stodi bout di Baibl nof se “sumadi we no jongk kaam an kyan tingk chriet.” An so dem kyan mek op dem main fi du di rait sitn. Wi fi chrai an iizi wiself an tingk chriet so dat wi no get miks op iina palitiks an ada tingz we a gwaan iina di worl. An az wi get niera an niera tu Jeuova die, wi afi go fait aada an aada fi no miks op iina palitiks an dem ting de. Bot wi na’afi wori bout wa wi a-go du kaa Gad spirit a-go elp wi fi iizi wiself an tingk chriet, an it a-go elp wi fi du di rait sitn dem.​—Luuk 12:11, 12.

8. Azkaadn tu 1 Tesaluoniyan 5:8, wa wi fi du so dat wi kip wi yai uopm an tingk chriet? (Luk pan di picha tu.)

⁸ “Wier di metal ves. An . . . put aan di elmit.” Paal se jos laik ou wan suoja redi op imself fi waar, a siem so wi fi redi op wiself fi Jeuova die. (Riid 1 Tesaluoniyan 5:8.) Wans wan suoja lef out fi go waar, im afi aalwiez redi fi fait. A di siem ting wid wi, wi fi aalwiez redi fi Jeuova die, an wi du dat wen wi wier di metal ves we elp wi fi aalwiez chos iina Gad an fi lov im. An wi fi a wier wi elmit we a mek wi memba di sitn dem we wi a luk faawod fi get. Wen wi du aal a dis, it a-go elp wi nof nof.

9. Ou wi a kip sief kaaz wi a chos iina Gad?

⁹ Wen wan suoja av an di metal ves, it mek shuor se notn no apm tu im aat. A siem so wen wi chos iina Jeuova an lov im, it wi kip wi main an aat sief an it wi elp wi fi gwaan sorv Gad an fala Jiizas. An wen wi chos iina Jeuova wid aal a wi aat, im mek wi nuo se im a-go gi wi wa im pramis fi gi wi. (Iib. 11:6) An it wi mek wi du wa Jiizas se wi fi du aal ef wi a go chuu wan rof taim. Wen wi luk an si se piipl a go chuu prablem an dem stil a sorv Jeuova, it elp wi fi si se wi kyan chos iina Jeuova tu no mata wa wi a go chuu. An wi kyan fala di wan dem we put dem main pan Gad  Kindom an naa ron dong no big laif an uol iip a moni an ting. b

10. Kaa wi lov Gad an piipl, ou dat elp wi fi no tap priich?

¹⁰ Wi fi lov Jeuova wid aal a wi aat an dat wi elp wi fi gwaan kip wi yai uopm an tingk chriet. (Mat. 22:37-39) Wen wi lov Gad, dat a-go elp wi fi gwaan du di priichin wok no mata wa mait-a apm tu wi. (2 Tim. 1:7, 8) An kaa wi lov di piipl dem we wi a priich tu, wi a-go gwaan priich tu dem aal ef a di fuon wi afi yuuz ar rait leta. Wi no tap fiil se wan die di piipl dem we wi a priich tu mait-a chienj an staat du wa rait.​—Izii. 18:27, 28.

11. Wen wi lov wi breda an sista dem, ou it a-go elp wi? (1 Tesaluoniyan 5:11)

¹¹ A no onggl piipl we naa sorv Jeuova wi lov, wi lov wi breda an sista dem tu. Wi mek dem si se wi lov dem wen wi “elp [wi] wan aneda get chrang, . . . an gwaan bil op [wi] wan aneda.” (Riid 1 Tesaluoniyan 5:11.) Jos laik ou di suoja dem we a fait iina waar elp dem wan aneda fi get chrang, a so wi elp wi wan aneda fi get chrang tu. Ye, wan suoja mait-a ort wan a di neda suoja pan fi’im said, bot im neva miin fi dwi’it. A siem so wi naa go ort wi breda an sista dem fi spait ar ort dem kaa dem did du sitn fi ort wi. (1 Tes. 5:13, 15) An wi du tingz fi mek di breda dem we a liid wi iina di kanggrigieshan si se wi lov dem. (1 Tes. 5:12) Wen Paal did rait da leta ya, di Tesaluoniyan kanggrigieshan neehn de bout fi wan ier yet. So di man dem we a liid wuda mek mistiek somtaim, bot dem stil did fi rispek dem. Wen di wos sofarieshan kom, di elda dem we de iina fi wi kanggrigieshan afi go tel wi wa fi du muor dan bifuo kaa wi mait-a kyaahn ier fram di breda dem we de a di worl ed afis an di branch afis. So it mek sens fi wi lov wi elda dem an rispek dem ya nou. No mata wa apm, mek wi tingk chriet an no wach di mistiek  dem we dem ya breda ya mek. Bot wi fi memba se a Jeuova a yuuz Jiizas fi mek dem man ya nuo wa fi du.

12. Kaa wi av sitn gud a luk faawod tu, ou it a elp wi?

¹² Jos laik ou wan suoja yuuz di elmit fi protek im ed, a siem so kaa wi a luk faawod tu di taim wen Jeuova a-go siev wi, dat wi elp wi fi tingk chriet. An wi si se dis ya worl ya no av notn fi gi wi. (Fil. 3:8) So kaa wi av sitn gud a luk faawod fi get, it elp fi kip wi kaam. An a dat did apm tu Wallace an Laurinda uu de a Betel iina Afrika. Iina chrii wiik, Laurinda mada ded an Wallace faada ded. An kaa KUOVID did a go roun, dem kudn go baka dem yaad fi go luk fi dem fambili. Wallace rait an se: “Kaa mi nuo se ded piipl a-go kom bak alaiv, it elp mi fi tingk bout ou dem a-go stie wen dem kom bak iina di nyuu worl bot no ou dem did stie likl bifuo dem did ded. An dis elp fi kip mi kaam wen mi fiil sad bad kaaz a wa apm tu dem.”

13. Ef wi waahn Jeuova fi gi wi im uoli spirit, wa wi fi du?

¹³ ‘No uol dong ar shot op di uoli spirit.’ (1 Tes. 5:19) Paal se wen wi av Gad spirit, wi no fi uol it dong ar shot it op. Yu si wen wi av Gad spirit, it a-go mek wi wel waahn fi du wa rait an it a-go gi wi di chrent we wi niid fi du Jeuova wok. (Ruo. 12:11) So ef wi waahn Jeuova fi gi wi im uoli spirit, wi fi prie it, an stodi Gad Wod, an spen taim wid di piipl dem we de iina im aaganaizieshan. Wen wi du aal a dis, ‘Gad spirit’ a-go elp wi fi du som gud sitn.​—Gya. 5:22, 23.

14. Ef wi no waahn Jeuova fi tek we im uoli spirit fram wi, wa wi no fi du? (Luk pan di picha tu.)

¹⁴ Afta Jeuova gi wi im uoli spirit, wi fi mek shuor se wi ‘no uol dong ar shot op di uoli spirit.’ An memba se Jeuova onggl gi im uoli spirit tu di piipl dem we a tingk bout di sitn dem we kliin iina fi’im yai an a du di ting dem we kliin iina fi’im yai tu. So ef wi a tingk bout tingz we no rait an a du dem tu, Jeuova a-go tap gi wi im uoli  spirit. (1 Tes. 4:7, 8) So ef wi waahn fi mek shuor se wi aalwiez a get im uoli spirit, wi no fi luk “pan di sitn dem we di prafit dem se wuda apm laik se dem a fuulinish.” (1 Tes. 5:20, NWT ) Wen it taak bout di sitn dem “we di prafit dem se wuda apm” rait ya-so, it a taak bout di mesij dem we Gad spirit gi di prafit dem. An dis av fi du wid wa dem se bout Jeuova die an ou dem se it a-go kom sodn. Wi no fi fiil laik se Aamagedan naa go kom iina fi wi taim, bot wa wi fi du a tingk bout it laik it suun kom an du di rait sitn dem. So evridie wi fi “liv [wi] laif fi Gad.”​—2 Pii. 3:11, 12.

15. Wen di diiman dem mek piipl tel lai pan Jeuova piipl dem an im aaganaizieshan, wa wi fi du fi no mek it kech wi? (1 Tesaluoniyan 5:21)

¹⁵ Likl afta dis, di piipl dem we a fait gens Gad mait-a se: “Wi av piis an evriting sief.” (1 Tes. 5:3) Di diiman dem a-go mek uol iip a piipl tel lai pan Jeuova piipl dem, an dem a-go kech nof piipl wid it. (Rev. 16:13, 14) Wa bout wi? Wi naa go mek dem kech wi, wi a-go “tes evriting.” (Riid 1 Tesaluoniyan 5:21.) Iina di Griik langwij, di wod we dem yuuz fi “tes” did a taak bout wen piipl tes guol an silva an dem ting de fi mek shuor se dem riil. A siem so wen wi riid sitn ar ier sitn, wi afi tes it fi si ef a chuu. An dis a sitn we di piipl dem iina Tesalonaika did afi du, an wi afi dwi’it tu kaaz di wos sofarieshan suun kom. So wen wi riid ar ier sitn, wi no fi se, ‘Ye, a so it go fi chuu,’ bot wi fi yuuz wi ed an tingk bout wa wi ier an luk pan wa di Baibl an Jeuova aaganaizieshan se bout it. Wen wi du dat, wi naa go mek di diiman dem chrik wi op wid di lai dem an sitn dem we dem a kom wid.​—Pr. 14:15; 1 Tim. 4:1.

16. Wa wi shuor se a-go apm iina di fyuucha, an wa dis mek wi waahn fi du?

¹⁶ Wi nuo se Jeuova piipl dem a-go go chuu di wos sofarieshan. Bot wa bout yu an mi? Wi no nuo wa a-go apm tumaro. (Jmz. 4:14) Bot weda wi a-go mek it chuu di wos sofarieshan ar wi a-go ded bifuo it kom, wi nuo se wi a-go liv fi eva ef wi gwaan du wa Jeuova waahn wi fi du. An di wan dem we get pik fi go liv iina evn wid Jiizas a-go go de. An di ada shiip dem a-go liv iina Paradais pan di ort. So mek aal a wi gwaan tingk bout aal a di gud sitn dem we a-go apm iina di fyuucha an mek wi gwaan redi op wiself fi Jeuova die.