1-2. Azkaadn tu Saam 25:14, ef wi waahn wi an Jeuova fi bi gud gud fren, wa wi fi du?

 YU WAAHN wan fren we a-go lov an de de fi yu no mata wa, no chuu? Bot tel mi sopm, yu no wuda waahn wan fren we rispek yu tu? An a dat di mien skripcha fi da lesn ya a taak bout wen it se di wan dem we dem an Jeuova a gud gud fren afi “av nof rispek fi im.”​—Riid Saam 25:14.

² No mata ou lang wi a sorv Jeuova fa, aal a wi fi av nof rispek fi im. Bot wa wi kyan du fi shuo se wi av nof rispek fi im? Mek wi luk pan di kain-a rispek we wi fi av fi Jeuova fram man laik Obidaiya, an fram di liida fi di priis dem we did niem Jeyaiyada, an fram di king we did niem Jewuo’ash.

3. Tel wi ou it kyan elp yu kaa yu fried fi du sitn.

³ Somtaim sumadi gwaan laik dem rispek sumadi kaa dem fried a dem. Bot di rispek we wi av fi Gad, a no kaaz wi fried a im, bot a kaa wi fried fi du sitn we a-go mek im fiil bad. So muor taim it no bad fi wi fiil fried, kaa tingk bout it, kaa yu fried fi jrap dong iina wan goli yu naa go waak nier di ej, no chuu? An a das wai wen sitn a apm we yu nuo se yu kyan get ort, yu a-go ron kaaz yu fried. An kaa wi fried fi mek notn mash op wi an wi gud fren, wi chrai fi no se notn ar du notn we a-go ort dem.

4. Ou Sietan waahn wi fi fiil bout Jeuova?

⁴ Sietan waahn wi fi fried fi Jeuova. Im waahn wi fi fiil laik ou Elifaz did fiil, laik se wi kyaahn du notn fi mek Jeuova api an laik se Jeuova jos a wiet fi wi du sitn fi ponish wi. (Juob 4:18, 19) Sietan waahn wi fi fried fi Jeuova  so moch dat wi tap sorv im. Wa kyan elp wi fi no fiil so a wen wi a sorv Jeuova kaa wi rispek im an wi naa sorv im jos kaa wi fried a im.

5. Wa mek sumadi a-go av nof rispek fi Jeuova?

⁵ Di sumadi we riili rispek Jeuova a kaa dem lov im an no waahn du notn fi ort im. An a dat de kain-a rispek de Jiizas did av fi Jeuova. (Iib. 5:7) Im neehn fried a Jeuova an fiil laik se im kudn du notn fi mek Im api. (Aiz. 11:2, 3) Jiizas did du wa im Faada se im fi du kaa im did lov im. (Jan 14:21, 31) A so wi fi lov an rispek Jeuova tu, kaa wi nuo se im lov wi, an im waiz, an im fier, an a im av aal a di powa. An wi nuo se Jeuova lov wi, an di sitn dem we wi du kyan ort im ar mek im api.​—Sa. 78:41; Pr. 27:11.

6. Wa a wan sitn we wi kyan du fi elp wi fi rispek Jeuova muor? (Saam 34:11)

⁶ Wi no baan a rispek Gad; a sitn we wi afi lorn fi du. (Riid Saam 34:11.) Wen wi luk pan di sitn dem we Jeuova mek, it kyan elp wi fi rispek im. Wen wi luk pan “di sitn dem we im mek,” dem mek wi si umoch im lov wi an ou waiz im bi, an a dat a-go mek wi rispek im an lov im muor. (Ruo. 1:20) Wan sista we niem Adrienne se, “Wen mi luk pan di sitn dem we Jeuova mek, mi kyan si ou im waiz, an it mek mi si se wa im tel mi fi du a di bes ting.” Kaa shi tingk bout di sitn dem we Jeuova mek, it mek ar se, “Mi naa go mek notn kom bitwiin mi an Jeuova kaa a im gi mi laif.” Iina da wiik ya, yu tingk yu kyan sidong an tingk bout sitn we Jeuova mek? Wen yu du dat, it a-go mek yu rispek an lov Jeuova muor.​—Sa. 111:2, 3.

7. Ou wen wi prie aafn it kyan elp wi fi av nof rispek fi Jeuova?

⁷ Wan neda sitn we wi kyan du fi elp wi fi rispek Jeuova muor a fi prie tu im aafn. Kaa di muor wi prie tu im, a di muor im a-go komiin laik wan riil sumadi tu wi. Evritaim wen wi a go chuu wi chraiyal dem an wi aks im fi gi wi di chrent fi go chuu, wi si ou im powaful. An wen wi prie an tangk im fi sen im Bwai Pikni fi kom ded fi wi, wi memba umoch im lov wi. An wen wi beg Jeuova fi im elp wi wid eni prablem we wi av, im mek wi nuo ou waiz im bi. Wen wi prie tu Jeuova bout dem sitn de, it mek wi rispek im muor, an it mek wi no waahn du notn we a-go mash op we wi av wid im.

8. Wa kyan elp wi fi gwaan av nof rispek fi Jeuova?

⁸ Wen wi stodi di Baibl an fain out bout piipl we did rispek Jeuova an som we neehn rispek im, it kyan elp wi fi gwaan av nof rispek fi Jeuova. Mek wi taak bout tuu sumadi we did rispek Jeuova an du wa im se. Dem a Obidaiya, uu did inchaaj a King Ieyab ous, an di liida fi di priis dem we niem Jeyaiyada. An den wi a-go luk pan wan king fram Juuda we niem Jewuo’ash, we did a rispek Jeuova an du wa Im se bot den im tap.

9. Kaa Obidaiya did rispek Jeuova an neehn waahn du notn fi ort im, ou dat did elp im? (1 Kingz 18:3, 12)

⁹ Di fos taim di Baibl taak bout Obidaiya, b it se im did a wan man we av nof rispek fi Jeuova. (Riid 1 Kingz 18:3, 12.) An yu si kaa im av nof rispek fi Jeuova, dat mek im anis so it mek piipl kuda chos  im. So di king put im inchaaj a im ous. (Luk pan Niimaiya 7:2.) Kaa Obidaiya did av nof rispek fi Jeuova an neehn waahn du notn fi ort im, it mek im briev. An im did niid fi briev kaa King Ieyab, we did a ruul iina fi’im taim, did wikid bad. Di Baibl mek wi nuo se im did wosa dan aal a di ada king dem we did de bout bifuo im. (1 Ki. 16:30) An King Ieyab waif we niem Jezibel, we worship Bieyal, did iet Jeuova bad. So shi did a chrai fi kil aaf di uol a di piipl dem we did a worship im wich paat shi de iina Izrel. Shi did aal kil aaf uol iip a Jeuova prafit dem. (1 Ki. 18:4) So wi si se Obidaiya did a worship Jeuova iina wan taim wen tingz did wikid.

10. Wa Obidaiya did du fi mek wi si se im did briev?

¹⁰ Wen Jezibel did a chrai fi kil aaf di uol a Gad prafit dem, Obidaiya did aid aaf 100 a dem. So im put bout 50 iina wan kiev an 50 iina wan neda kiev an gi dem bred an waata. So dis mek wi si se im did briev. (1 Ki. 18:13, 14) An memba se ef dem did fain out wa im a du, dem wuda kil im aaf tu. An im did a jos sumadi laik wi, so im neehn waahn fi ded. Bot wi si se im did lov Jeuova an im piipl dem muor dan ou im lov im uona self.

11. Ou di breda an sista dem we de bout nou a du tingz laik Obidaiya? (Luk pan di picha tu.)

¹¹ Nof a wi breda an sista dem liv somwe we di priichin wok anda lakdong. Jos laik Obidaiya, dem rispek di govament dem iina di konchri we dem liv, bot dem mek shuor se a Jeuova wan dem worship. (Mat. 22:21) Dem du tingz fi shuo se dem rispek Jeuova an dem no waahn du notn fi ort im. So ef di govament dem aks dem fi du sitn we Jeuova no waahn dem fi du, dem naa go dwi’it. (Aks 5:29) So dem stil a-go priich an go a dem miitn dem anda di kwaiyat. (Mat. 10:16, 28) Dem a-go mek shuor se dem breda an sista dem a get di ting dem we dem fi get fi jraa kluosa tu Jeuova. An a dis wan breda we niem Henri, we did liv iina wan paat a Afrika we di wok did anda lakdong, did du. Im did se im wuda kyari di buk an pamplet dem go gi di breda an sista dem. Im rait se: “Mi did fried fi taak tu piipl ino, so a  mos kaa mi did av nof rispek fi Jeuova mek mi briev op an du wa mi niid fi du.” Yu tingk yu kyan briev laik Henri? Ye, yu kyan du laik im ef yu av nof rispek fi Jeuova an no waahn du notn fi ort im.

12. Wa Jeyaiyada an im waif did du fi shuo se a wa Jeuova waahn dem fi du dem a-go du?

¹² Kaa Jeyaiyada did av nof rispek fi Jeuova an neehn waahn du notn fi ort im, it mek im stik tu Jeuova an elp di piipl dem fi worship Jeuova. An wi kuda si dis wen Jezibel pikni wi niem Atalaiya chrai fi tek uova an staat fi ruul iina Juuda. An wi kuda si wa mek di piipl dem did fried a ar kaa shi did wikid bad. An kaa shi did wel waahn fi ruul, shi chrai fi kil aaf di uol a ar granson dem we kuda did en op ruul. (2 Kr. 22:10, 11) Shi neehn get fi kil wan a ar granson we niem Jewuo’ash kaa Jeyaiyada waif we niem Jeyoshabet did siev im. Shi an ar ozban did aid di bwai an tek kier a im so dat wan a Dievid pikni dem kuda stil bi king. So wi si se Jeyaiyada did a du wa Jeuova waahn im fi du an no wa Atalaiya waahn im fi du; im neehn fried a Atalaiya.​—Pr. 29:25.

13. Wen Jewuo’ash ton sevn, wa Jeyaiyada did du fi shuo se a wa Jeuova waahn im fi du im a du?

¹³ Wen Jewuo’ash ton sevn, Jeyaiyada du sitn agen fi shuo se a wa Jeuova waahn fi apm a dat im a-go du. So im plan se im a-go mek Jewuo’ash ton king kaaz a im did av di rait fi bi king. Bot dis did a wan big ting kaa im nuo se ef Ataliaya kech im shi wuda mek dem kil im. Bot wi si se Jeuova did a bles im kaa im get fi du wa im waahn fi du, an di liida fi di chraib dem an di Liivait dem did a bak im tu. So dem mek Jewuo’ash ton king an dem kil Ataliaya. (2 Kr. 23:1-5, 11, 12, 15; 24:1) So Jeyaiyada mek wan pramis tu Jeuova se di king an di piipl dem a-go stik tu Jeuova. (2 Ki. 11:17) An Jeyaiyada did mek som gyaadi gyaad di giet dem fi Jeuova ous so nobadi we naa du wa Jeuova no waahn dem fi du kyaahn komiin.​—2 Kr. 23:19.

14. Kaa Jeyaiyada did du tingz fi big op Jeuova, a ou Jeuova did big im op?

¹⁴ Bifuo aal a dem sitn ya apm, Jeuova did se im a-go big op di wan dem we big im op, an a dat im did du fi Jeyaiyada. (1 Sam. 2:30) Laik wan a di ting dem we im du a mek dem rait dong wa Jeyaiyada did du iina di Baibl so dat wi kyan lorn fram it tide. (Ruo. 15:4) An wen Jeyaiyada ded, Jeuova mek shuor se dem beri im iina wan wie we shuo se Im a big im op, kaa Jeuova mek dem beri im iina Dievid siti wich paat dem beri Dievid an di ada king dem. An dis a kaa a wa im did du fi di Izrelait piipl dem an kaa im did av nof rispek fi Jeuova an im ous.​—2 Kr. 24:15, 16.

15. Di tuori bout Jeyaiyada, wa wi kyan lorn fram it? (Luk pan di picha tu.)

¹⁵ Di tuori bout Jeyaiyada kyan elp aal a wi fi rispek Jeuova an du wa im waahn wi fi du. Som a di elda dem kyan du laik Jeyaiyada an tek kier a Jeuova piipl dem. (Aks 20:28) An fi di wan dem we op iina iej, dem kyan lorn fi av nof rispek fi Jeuova an stik tu im, an mek Jeuova yuuz dem fi du wa im waahn dem fi du kaa Jeuova av nof wok fi dem du. An fi di yong piipl dem, dem kyan luk pan ou Jeuova did chriit Jeyaiyada an du laik Jeuova an chriit di wan dem we op iina iej wid rispek, speshali di wan dem we du uol iip fi Jeuova fi uol iip a ierz. (Pr. 16:31)  An den aal a wi kyan du laik di liida dem fi di chraib dem an di Liivait dem uu did bak Jeyaiyada. So wi fi sopuot ‘di wan dem we a liid wi’ an du wa dem tel wi fi du.​—Iib. 13:17.

16. Wa King Jewuo’ash did du we shuo se im kudn mek op im main fi imself?

¹⁶ Kaaz a aal a di gud sitn dem we Jeyaiyada did a du, it did du Jewuo’ash gud wen im ton king. (2 Ki. 12:2) An so im did waahn fi du di sitn dem we Jeuova waahn im fi du. Bot afta Jeyaiyada ded, Jewuo’ash staat fi fala som a di king dem bwai pikni dem we did tap sorv Jeuova an staat fi ton piipl gens im. An kaa a dat, im an di piipl dem staat fi worship di faalz gad dem. (2 Kr. 24:4, 17, 18) Dis did ort Jeuova bad, so Jeuova sen som difrant difrant prafit fi chrai an mek dem tap du wa dem a du, bot dem neehn a lisn tu dem. Nat iivn Jeyaiyada son Zakaraiya dem neehn lisn tu, we did a wan priis an wan prafit an Jewuo’ash kozn. Tingk bout it, a Zakaraiya fambili did mek dem neehn kil Jewuo’ash, an insted-a Jewuo’ash mek Zakaraiya si se im tangk dem, im mek dem kil im.​—2 Kr. 22:11; 24:19-22.

17. Kaaz Jewuo’ash did wikid, wa did apm tu im?

¹⁷ Kaa Jewuo’ash did tap du tingz fi shuo se im rispek Jeuova an im naa go du notn fi ort im, tingz neehn ton out gud fi im. Jeuova did mek wi nuo se di piipl  dem we iet im an ton we fram im, im naa go av notn fi du wid dem. (1 Sam. 2:30) Sieka dat, di Siriyan dem did kom iin wid fi dem likl aami an mash op Jewuo’ash big aami, an Jewuo’ash did get mash op tu iina da waar de. An afta di Siriyan suoja dem go we, som a Jewuo’ash uona man dem kil im kaaz im did mek dem kil Zakaraiya. Kaaz a di wikid sitn dem we im did du, dem nat iivn beri im iina di plies we dem beri di king dem.​—2 Kr. 24:23-25; luk pan di stodi nuot fi Matyu 23:35, NWT bout “son of Barachiah.”

18. Azkaadn tu Jerimaiya 17:7, 8, wa wi fi du so dat wi no komiin laik Jewuo’ash?

¹⁸ Wa wi kyan lorn fram wa did apm tu Jewuo’ash? Jewuo’ash did komiin laik wan chrii we di ruut no go dong iina di grong diip so dem did afi yuuz stik fi kach it op. Jeyaiyada did komiin laik da stik de fi Jewuo’ash. So afta im ded, som piipl we yuus tu sorv Jeuova an a chrai tap ada piipl fram sorv im tu, taak tu Jewuo’ash an dem mek Jewuo’ash tombl dong laik di chrii we briiz bluo dong, an mek im tap sorv Jeuova. Aal a dis mek wi si se wi fi rispek Jeuova fi wiself an no bikaa a wa nobadi els a du ar kaa a wa wi uona fambili a du. So dat wi kyan tan op chrang an gwaan sorv Jeuova an no du notn fi ort im, wi fi mek shuor se wi du wi uona Baibl stodi, an tingk bout di sitn dem we wi riid, an prie tu Jeuova aafn.​—Riid Jerimaiya 17:7, 8; Kol. 2:6, 7.

19. Wa Jeuova aks wi fi du?

¹⁹ Jeuova naa go aks wi fi du notn we im nuo wi kyaahn du. Iikliiziyastiiz 12:13 tel wi wa im waahn wi fi du. It se: “Wi fi gi Gad nof rispek an du aal a wa im tel wi fi du kaaz a dat im put wi ya fi du.” So wen wi rispek Gad, wi a-go kyan go chuu eni prablem we mait-a kom dong pan wi an tan op chrang laik Obidaiya an Jeyaiyada. Notn naa go kyan tap wi an Jeuova fram bi fren.