1-2. A wa Jeuova wel waahn di wan dem we lov im an a stik tu im fi du?

 EF SUMADI aks yu se, ‘Yu an Jeuova a wa?’ Yu mait-a ansa dem se, ‘Jeuova a mi Faada, mi Gad, an mi Fren.’ An yu mait-a tel dem som wol iip a ada sitn bout Jeuova tu. Bot yu eva tingk bout Jeuova laik se im a sumadi we redi fi tek kier a yu wen yu kom iina im ous?

² Wen King Dievid did a taak bout ou Jeuova kluos tu di wan dem we lov im an stik tu im, im se it komiin laik wen sumadi tek iin sumadi a dem yaad an a tek kier a dem. Siek-a dat im aks Jeuova se: “Jeuova Gad, wa kain-a sumadi yu waahn iina fi yu ous? An uu kyan get fi liv pan fi yu uoli mountn?” (Sa. 15:1) Da skripcha ya mek wi nuo se wi kyan bi wan a di sumadi dem we Jeuova wel waahn iina im ous​—dat a fi bi wan a im fren. Dat nais, no chuu?

JEUOVA WAAHN WI FI KOM A IM OUS

3. A uu a did di fos sumadi we Jeuova invait iina im ous, an a ou dem did fiil bout dem wan aneda?

³ Bifuo Jeuova mek notn, im did de de bai imself. Bot afta dat, im mek im fos Bwai Pikni, an dat did komiin laik im invait di fos sumadi fi kom iina im ous. Dis did mek Jeuova api bad. An di Baibl mek wi nuo se Jeuova did “riili lov” im Bwai Pikni. An im Bwai Pikni “did api fi di de wid im.”​—Pr. 8:30.

4. A uu els Jeuova did invait fi kom iina im ous?

 ⁴ Afta dat, Jeuova mek di ienjel dem an invait dem fi kom iina im ous tu. Di Baibl kaal di ienjel dem “Gad son dem.” An dem api fi di de wid Jeuova. (Juob 38:7; Dan. 7:10) So aal a Gad fren dem did jos de a evn. Bot afta dat, im an som a di piipl dem pan di ort did ton fren tu: man laik Iinok, Nowa, Iebriyam, an Juob. An dem wan ya an Jeuova did ton fren kaa dem du wa im did waahn dem fi du.​—Jen. 5:24; 6:9; Juob 29:4; Aiz. 41:8.

5. Wa wi lorn fram wa rait dong a Iziikel 37:26, 27?

⁵ An fram dem taim de til nou, Jeuova aalwiez a invait im fren dem fi kom iina im ous. (Riid Iziikel 37:26, 27.) Iina di buk a Iziikel, wi lorn se Jeuova wel waahn di piipl dem we a worship im fi ton im gud fren, an im “mek wan pramis fi liv iina piis wid dem.” Wen Iziikel did rait dis, im did a taak bout wan taim wen di wan dem we get pik fi go a evn an di wan dem we a-go liv pan di ort a-go liv tugeda az wan iina Gad ous laik se dem a “wan gruup a shiip.” (Jan 10:16) An a dat a gwaan rait ya nou!

ENIWE WI DE GAD STIL KIER BOUT WI

6. A ou sumadi get fi kom iina Jeuova ous, an a wich paat im ous de?

⁶ Iina Baibl taim, wen sumadi tek iin sumadi iina dem ous, di sumadi wuda get likl res outa di son an rien an dem ting de. An di sumadi we tek dem iin wuda mek shuor se dem get tek kier a. A siem so wen wi gi wi laif tu Jeuova, it komiin laik se a tek im tek wi iina im ous. (Sa. 61:4) A wol iip a tingz im gi wi fi kip wi kluos tu im, an wi get fi ton fren wid wol iip a di piipl dem we iina im ous tu. Bot Jeuova ous no de a wan plies. An wi nuo dat kaaz wi mait-a go a wan difrant konchri fi go a wan speshal kanvenshan an get fi miit wol iip a piipl we a worship Gad iina im ous tu. So eni wich paat piipl de we a worship Jeuova an a du wa im waahn dem fi du, a de-so im ous de.​—Rev. 21:3.

7. Wa mek wi kyan se di wan dem we did a sorv Jeuova we ded an gaan stil de iina im ous? (Luk pan di picha tu.)

⁷ Bot wa bout di wan dem we did a sorv Jeuova we ded an gaan? Yu tingk dem wan de stil de iina Gad ous? Ye man! An wi kyan se dat kaa Jeuova stil  memba dem. Jiizas mek wi nuo se: “Iivn Muoziz shuo se di ded a-go kom bak alaiv. Wen di bush did a bon, im kaal [Jeuova] ‘Iebriyam Gad, Aizak Gad an Jiekob Gad.’ Im a no Gad fi di ded, bot fi uu a liv; kaaz fi Gad, di uol a dem alaiv.”​—Luuk 20:37, 38.

A WA A SOM BLESN WE WI GET, BOT WA AN WA WI AFI DU?

8. A wa a som blesn we wi get kaa wi de iina Gad ous?

⁸ Jos laik ou wan ous protek wi fram di rien an di son an dem ting de, a siem so Gad ous protek wi fram eniting we wuda mek wi an im no so kluos agen. An it mek wi luk faawod tu di gud sitn dem we wi a-go get iina di fyuucha. So wen wi kip kluos tu Jeuova, Sietan kyaahn du wi notn we a-go tap wi fram get aal a di blesn dem we Jeuova av pudong fi wi. (Sa. 31:23; 1 Jan 3:8) Iina di nyuu worl, Jeuova a-go mek shuor se notn no de de we a-go tap wi fram sorv im. An im a-go protek wi so dat wi no ded.​—Rev. 21:4.

9. Wa an wa wi afi du fi tan iina Jeuova ous?

⁹ Kaa wi an Jeuova a gud gud fren, it komiin laik se wi de iina im ous, an dat a sitn swiit, duont it? Bot ef wi a-go tan iina im ous, wi afi du di tingz dem we mek im api. No chuu se wen wi go a sumadi yaad, wi waahn fi du tingz we mek dem api wid wi? Laik ef dem waahn wi tek aaf wi shuuz bifuo wi kom iina dem ous, wi mek shuor se wi dwi’it. A siem so wi waahn fi nuo wa an wa Jeuova waahn wi fi du so dat wi kyan tan iina im ous. An a di lov we wi av fi Jeuova mek wi waahn fi ‘eva a du di sitn dem we mek im api.’ (Kol. 1:10) An wi fi memba se Jeuova a no onggl wi fren, bot im a wi Gad an wi Faada tu. So wi fi av nof rispek fi im. (Sa. 25:14) An wen wi memba dat, it a-go elp wi fi no paas wi plies ar du notn fi ort im. An dat a-go mek wi ‘nuo wa wi kyan du an wa wi kyaahn du wen wi a sorv Gad.’​—Mai. 6:8.

JEUOVA NEEHN PAASHAL WEN IM A DIIL WID DI IZRELAIT DEM

10-11. Wen wi luk pan ou Jeuova did diil wid di Izrelait dem wen dem did de iina di wildanes nier Mount Sainai, a ou dat mek wi nuo se im no paashal?

¹⁰ Jeuova no paashal, im chriit evribadi we de iina im ous di siem. (Ruo. 2:11) An wi kyan si dat wen wi luk pan ou im did diil wid di Izrelait dem wen dem did de iina di wildanes nier Mount Sainai.

¹¹ Afta Jeuova frii di Izrelait dem fram dong a Iijip, im pik som a di Liivait dem fi ton priis a im ous, an im did gi di ada Liivait dem wok fi du a im ous tu. Bot yu tingk se Jeuova did chriit dem wan de an di wan dem we liv nier tu im ous beta dan di res a di Izrelait dem? Nuo sa! Kaa wi nuo se Jeuova no paashal.

12. Wen taim di Izrelait dem did iina di wildanes, a ou Jeuova did shuo dem se im neehn paashal? (Eksidos 40:38) (Luk pan di picha tu.)

¹² No mata wich paat iina di kyamp di Izrelait dem did liv ar wa kain-a speshal wok dem did get fi du, aal a dem did get di chaans fi ton Jeuova gud gud fren. Laik Jeuova did mek shuor se aal a di Izrelait dem kuda si di kloud an di faiya we luk laik wan puos we did de uova im ous. (Riid Eksidos 40:38.) An wen di kloud staat fi muuv go somwe els, aal di wan dem we did liv faar fram Gad ous kuda si’it an staat fi pak op dem bag an pan,  an pul dong dem tent, an staat fi muuv wid di res a di piipl dem. (Nom. 9:15-23) An aal a di piipl dem kuda ier di loud soun wen dem bluo di tuu chompit dem we mek outa silva. An dat did mek dem nuo se a taim fi dem muuv. (Nom. 10:2) So no jos kaa sumadi liv niera tu Gad ous dat did miin tu se dem did kluosa tu Gad. Bot Jeuova did invait aal a di Izrelait dem fi kom iina im ous, an aal a dem kuda dipen pan im fi protek dem an fi mek dem nuo wa fi du. A siem so Jeuova lov im piipl dem tide, an a tek kier a dem, an a protek dem no mata wich paat iina di worl dem liv.

OU JEUOVA SHUO SE IM NO PAASHAL TIDE?

13. A wa a wan wie tide we Jeuova shuo se im no paashal?

¹³ Som a Jeuova piipl dem liv nier di worl ed afis ar nier wan a di branch afis dem. An som a dem get fi du som speshal wok a dem plies de tu. Kaaz a dat, dem get fi enjai nof a di ting dem we gwaan a dem plies de, an get fi spen taim wid di breda dem we a liid wi. An yu av som breda we a sorkit uovasiya an som breda an sista we yuuz muos a dem taim fi du som speshal wok fi Jeuova. Bot ef yu a no wan a dem sumadi ya, yu kyan nuo fi shuor se Jeuova lov evribadi we de iina im ous. An im a-go tek kier a evri wan a wi. (1 Pii. 5:7) Aal a Jeuova piipl dem a get di sitn dem we dem niid fi kip kluos tu im, an im a-go protek dem an mek dem nuo wa fi du.

14. Wa a wan neda wie ou Jeuova shuo se im no paashal?

¹⁴ Wan neda wie ou Jeuova shuo wi se im no paashal a dat im mek piipl aal uova di worl kyan get di Baibl fi riid. A chrii langwij di Baibl did rait iina fos, dat a Iibruu, Aramiek, an Griik. Bot no jos kaa sumadi kyan riid di Baibl  iina dem chrii langwij ya no miin tu se dem kluosa tu Gad dan di piipl dem we kyaahn riid dem langwij de.​—Mat. 11:25.

15. Wa els shuo se Jeuova no paashal? (Luk pan di picha tu.)

¹⁵ A no umoch skuulin wi get ar umoch langwij wi kyan taak mek Jeuova api wid wi. Kaa Jeuova tiich im piipl dem fi waiz no mata wich paat a di worl dem kom fram ar ou brait dem bi. Jeuova mek shuor se piipl kyan riid di Baibl iina wol iip a difrant difrant langwij. An kaaz a dat, piipl aal uova di worl kyan lorn bout Jeuova an chienj op dem laif an ton im fren.​—2 Tim. 3:16, 17.

GWAAN MEK JEUOVA API SO DAT YU KYAN TAN IINA IM OUS

16. Azkaadn tu Aks 10:34, 35, wa wi afi du fi tan iina Jeuova ous?

¹⁶ Fi Jeuova tek wi iina im ous a riili wan big ting. Kaa nobadi no kain laik Jeuova, an im lov wi kyaahn don, an im a di bes sumadi fi tek kier a wi. An muor dan dat, im no paashal an im tek iin aal a wi iina im ous no mata wich paat wi liv, ou wi gruo, ar umoch skuulin wi get, ar di kola a wi skin, an it no mata ou uol wi bi, ar ef wi a man ar uman. Bot a onggl di wan dem we a du di ting dem we Jeuova waahn dem fi du im a-go mek tan iina im ous.​—Riid Aks 10:34, 35.

17. A wich paat iina di Baibl tel wi muor bout ou wi kyan tan iina Jeuova ous?

¹⁷ Iina Saam 15:1, Dievid aks Jeuova se: “Jeuova Gad, wa kain-a sumadi yu waahn iina fi yu ous? An uu kyan get fi liv pan fi yu uoli mountn?” Jeuova did mek Dievid rait di ansa fi dem kwestiyan ya iina Saam chapta 15. Iina di neks lesn, wi a-go luk pan som a di sitn dem we wi afi du fi mek Jeuova api so dat wi kyan tan iina im ous.