1. Wa elp Jeuova piipl dem fi gwaan worship im?

 DI BAIBL mek wi nuo se iina fi wi taim “tingz a-go get aad aad.” (2 Tim. 3:1) Pan tap a aal a di prablem dem we evribadi a diil wid iina dem taim ya, Jeuova piipl dem afi go a diil wid piipl we a fait gens dem. Bot wan a di bigis ting we elp wi fi gwaan sorv Jeuova a dat wi nuo se Jeuova a “di Gad we kyaahn ded.”​—Jer. 10:10; 2 Tim. 1:12.

2. A ou Jeuova shuo se im a di Gad we kyaahn ded?

² Jeuova a luk fi si ou im kyan elp wi wid wi prablem dem, an im a di wan we a-go elp wi fi diil wid dem. (2 Kr. 16:9; Sa. 23:4) Wen wi memba se fi wi Gad Jeuova kyaahn ded, a it a-go elp wi wen wi a go chuu wi prablem dem. Mek wi luk pan ou wen King Dievid did memba dat it did elp im fi go chuu im prablem dem.

3. Wa Dievid did miin wen im se: “Fi mi Gad, Jeuova, no ded”?

³ Dievid did nuo Jeuova gud an a im im aalwiez dipen pan. Wen King Saal an di eda enimi dem we Dievid did av did a ron im dong fi kil im, im did prie tu Jeuova fi elp im. (Sa. 18:6) An afta Jeuova ansa im an siev im, Dievid se: “Fi mi Gad, Jeuova, no ded!” (Sa. 18:46) Wen Dievid se dem wod de, im neehn jos a se Gad de fi chuu. Wan a di buk dem we taak nof bout wa di Baibl se, se Dievid did riili a se a Jeuova “a di Gad we kyaahn ded, we aalwiez du tingz fi im piipl dem.” So kaaz a di sitn dem we Dievid did go chuu, im did nuo se Jeuova, im Gad alaiv, im no ded. An dat did push im fi gwaan sorv Jeuova an priez im.​—Sa. 18:28, 29, 49.

4. A ou it kyan elp wi wen wi memba se fi wi Gad no ded?

 ⁴ Kaa wi nuo fi shuor se fi wi Gad no ded, it a-go mek wi du aal a wa wi kyan du fi gwaan sorv im. An wi a-go kyan eng aan an tan op chrang wen wi a go chuu wi prablem dem an gwaan du di wok we im gi wi fi du. An it a-go mek wi mek op wi main se no mata wa, wi naa go lef Jeuova.

FI WI GAD A-GO GI WI DI CHRENT FI GO CHUU

5. Wa kyan elp wi fi go chuu wi prablem dem? (2 Korintiyan 4:7)

⁵ Wen wi memba se wi Gad Jeuova no ded, an im aalwiez de de fi elp wi no mata ou big ar likl wi prablem dem bi, it a-go elp wi fi go chuu dem. Wen yu tingk bout it, non a wi prablem dem we wi a go chuu no tuu big we Jeuova kyaahn elp wi wid dem, kaaz a im av aal a di powa an so im kyan gi wi di chrent we wi niid fi go chuu wi prablem dem. (Riid 2 Korintiyan 4:7.) So dat mek wi kyan go chuu wi prablem dem an na’afi a fret an a wori wori op wiself. Wen wi si ou Jeuova a elp wi wen wi a go chuu di likl ting dem iina wi laif, it mek wi si se wen wi go chuu no big prablem iina wi laif, im a-go de de fi elp wi tu.

6. Wen Dievid did yong, wa a som a di sitn dem we im did go chuu we mek im chos iina Jeuova muor?

⁶ Tingk bout tuu a di sitn dem we Dievid did go chuu we did elp im fi chos iina Jeuova. Wen Dievid did a wan likl yuut a luk afta im faada shiip dem, wan a di taim wan bier did tek we wan a di shiip dem, an wan neda taim wan laiyan did tek we wan a dem. An dem tuu taim de, Dievid did ron dem dong an tek we bak im shiip fram dem. Bot im neehn tek di big op fi imself, im did nuo se a Jeuova elp im. (1 Sam. 17:34-37) Dievid aalwiez memba dem sitn ya we im did go chuu, an wen im du dat, it mek im nuo fi shuor se fi’im Gad a-go gi im di chrent fi go chuu iina di fyuucha.

7. Kaa Dievid did luk pan tingz di rait wie, ou dat did elp im fi go op tu Golaiyat?

⁷ Wen Dievid a did stil wan tiinieja, im go a di kyamp we di Izrelait suoja dem did de, an im did si se di suoja dem did fried bad kaa di Filistiin dem did av wan suoja, we a wan jaiyant we niem Golaiyat, we did a mak di Izrelait suoja dem. (1 Sam. 17:10, 11) Di Izrelait suoja dem did fried bad kaa dem did a tingk bout ou Golaiyat big. An pan tap a dat, di ada Filistiin suoja dem did a mak dem tu. (1 Sam. 17:24, 25) Bot Dievid neehn fried, kaa di wie ou im si it, a se a Jeuova dem did a mak, no di Izrelait dem. (1 Sam. 17:26) An kaa Dievid did a tingk bout Jeuova, im did nuo fi shuor se Jeuova a-go elp im jos laik ou Im did elp im wen di animal dem tek we im shiip dem. So im go op tu Golaiyat, an wi nuo se im did win!​—1 Sam. 17:45-51.

8. Wa kyan elp wi fi chos iina Jeuova muor wen wi a go chuu wi prablem dem? (Luk pan di picha tu.)

⁸ Ef wi memba se fi wi Gad Jeuova no ded an im a-go aalwiez de de fi wi, it a-go kyan elp wi fi go chuu wi prablem dem. (Sa. 118:6) An wa kyan elp wi fi du dat a wen wi memba di ting dem we Jeuova du aredi. Wi kyan riid som tuori iina di Baibl bout piipl we did a worship Jeuova we im siev. (Aiz. 37:17, 33-37) An wi kyan luk pan som tuori bout som piipl we Jeuova did elp out iina fi wi taim pan jw.org. An yu kyan tingk bout som a di sitn dem we Jeuova du fi yu aredi tu. An no wori se notn big no apm iina yu laif, laik yu afi de fait aaf laiyan an bier laka Dievid. An wen  yu tingk bout it, Jeuova aalwiez de de fi yu. An memba se a im jraa yu tu im. (Jan 6:44) An a kaaz a wa im du mek yu stil a sorv im ya nou. An yu kyan aks im fi elp yu fi memba som a di taim dem wen yu did prie tu im an im ansa yu, an fi mek yu memba wen yu did a go chuu som rof taim an im did de de fi yu. Wen yu tingk bout dem sitn de, it a-go mek yu nuo fi shuor se Jeuova a-go aalwiez de de fi yu.

9. Wa kyan elp wi fi luk pan tingz di rait wie wen wi a go chuu wi prablem dem? (Pravorbz 27:11)

⁹ Wen wi memba se fi wi Gad, Jeuova, no ded, it a-go elp wi fi luk pan tingz iina di rait wie wen wi a go chuu wi prablem dem. Laik bies pan wa wi du wen wi a go chuu wi prablem dem, it kyan gi Jeuova wan ansa fi gi Sietan kaa Sietan kliem se wen wi a go chuu wi prablem dem, wi a-go tap sorv Jeuova. (Juob 1:10, 11; riid Pravorbz 27:11.) Bot wen wi go chuu wi prablem dem an no tap sorv Jeuova, wi shuo se wi lov im an se Sietan a wan laiyad. Wich wan a dem sitn ya yu a go chuu rait ya nou? Govament a fait gens yu kaaz a wa yu biliiv iina? Ar yu a go chuu moni prablem ya nou? Ar di piipl dem we yu a priich tu no waahn ier wa yu a se? Ar a sitn els yu a go chuu? Ef a so it go, memba se ou yu diil wid wa yu a go chuu a-go gi yu wan chaans fi mek Jeuova api. An memba se Jeuova naa go mek yu go chuu muo dan wa yu kyan manij. (1 Kor. 10:13) Im a-go gi yu di chrent fi go chuu.

FI WI GAD WE NO DED A-GO BLES WI

10. A wa Jeuova a-go du fi di piipl dem we a worship im?

¹⁰ Jeuova a-go du som wol iip a gud sitn fi di wan dem we a worship im. (Iib. 11:6) Rait ya nou im a elp wi fi api an fi av piis iina wi aat, an iina di fyuucha im a-go mek wi kyan liv fi eva. Wi kyan put wi pat pan faiya se Jeuova a-go gi wi aal a di sitn dem we im pramis wi kaaz im wel waahn fi dwi’it an im av di powa fi dwi’it tu. An kaa wi nuo se Jeuova a-go du wa im se im  a-go du, dat push wi fi du evriting wi kyan du fi sorv im jos laik ou im piipl dem we did a sorv im aredi did du. Mek wi luk pan Timoti we di Baibl tel wi bout.​—Iib. 6:10-12.

11. Wa mek Timoti did du aal a wa im kuda du fi di breda an sista dem? (1 Timoti 4:10)

¹¹ Riid 1 Timoti 4:10. Timoti did chos di Gad we kyaahn ded. So dis did mek im du aal we im kuda du fi Gad. Laik di apasl Paal did tel im se im fi wok aad so dat im kyan du di priichin wok gud an so dat im kyan tiich di breda an sista dem gud tu. An im did fi du wa rait so dat aal a di breda an sista dem, no mata ef dem yong ar ef dem uol, kyan fala im. Im did get som sitn fi du tu we no so iizi fi du. Laik im did fi jraa op di breda an sista dem we did fi get jraa op iina wan nais wie. (1 Tim. 4:11-16; 2 Tim. 4:1-5) An Timoti did nuo fi shuor se aal ef ada piipl no si wa im a du an tangk im fi it, Jeuova si wa im a du an Im a-go bles im fi di wok we im a du.​—Ruo. 2:6, 7.

12. Wa kyan elp di elda dem fi du aal a wa dem kyan du fi Jeuova? (Luk pan di picha tu.)

¹² Di elda dem tide kyan nuo fi shuor se Jeuova si an nuo aal a di aad wok we dem a du fi im. An pan tap a di wok we dem a du iina di kanggrigieshan fi tek kier a di breda an sista dem an fi priich an tiich, nof a di elda dem a elp fi bil Kindom Aal an dem ting de, an a elp out wen orikien an dem ting de gwaan. An yu av som ada elda we dem pik fi go luk fi di breda an sista dem wen dem de iina aspital, an dem pik som a dem fi elp wi wen dem waahn wi fi tek blod. Di elda dem we a wok aad nuo se a Jeuova pik dem fi tek kier a di breda an sista dem iina di kanggrigieshan. An kaaz a dat, dem a du aal a wa dem kyan du fi du di wok we Jeuova gi dem fi du. An dem nuo se dem a-go get wol iip a blesn kaaz a di wok we dem a du.​—Kol. 3:23, 24.

13. A ou Jeuova fiil bout aal a di sitn dem we wi a du fi sorv im?

 ¹³ A no aal a wi kyan ton elda, bot aal a wi av sitn we wi kyan gi tu Jeuova. An it mek Jeuova api wen wi du aal we wi kyan du fi sorv im. An wen wi gi wi moni an ada tingz fi elp out wid di priichin wok we a gwaan aal uova di worl no mata ou likl it bi, im si an nuo. An wen yu put op yu an fi ansa kwestiyan a miitn iivn duo yu mait-a shai, dat mek im api tu. An ef wi paadn sumadi we du wi sitn, dat mek im fiil gud. An ef yu kyaahn du aal a wa yu yuus tu du fi Jeuova, yu kyan nuo fi shuor se im stil lov yu an api fi di likl we yu kyan du an a-go bles yu fi dwi’it.​—Luuk 21:1-4.

FI WI GAD JEUOVA, NO LEF IM

14. Wa mek wen wi stie kluos tu Jeuova it kyan elp wi fi no du notn fi ort im? (Luk pan di picha tu.)

¹⁴ Wen wi nuo fi shuor se Jeuova a wan riil sumadi, wi naa go waahn du notn fi ort im. An a di siem ting wid Juozif, im neehn waahn fi du notn we Jeuova no waahn im fi du, so im neehn get miks op iina no kain-a seks sin kaa im did nuo se Jeuova a wan riil sumadi we im no waahn fi ort. (Jen. 39:9) Wen wi prie tu Jeuova an stodi im Wod di Baibl, dis mek wi si se Jeuova a wan riil sumadi an wi a-go a get kluosa an kluosa tu im. So jos laik Juozif, wi an Jeuova a-go ton gud gud fren an wi naa go du notn we Jeuova no waahn wi fi du.​—Jmz. 4:8.

15. Wa wi kyan lorn fram wa di Izrelait dem did du wen dem did de iina di wildanes? (Iibruu 3:12)

¹⁵ It iizi fi di piipl dem we no memba se Jeuova a wan riil sumadi fi tap sorv im. Tingk bout wa did apm tu di Izrelait dem wen dem did de iina di wildanes. Iivn duo dem did nuo se Jeuova de fi chuu, dem did stil staat fi wanda ef Jeuova a-go gi dem di sitn dem we dem niid fi liv. So dem did aal staat fi grombl grombl an se Jeuova no riili de mongks dem. (Ek. 17:2, 7) An likl afta dat, dem tap du wa  Gad waahn dem fi du. Bot wi no waahn fi du laik dem. Wa dem du elp wi fi si wa wi no fi du.​—Riid Iibruu 3:12.

16. Wa wi mait-a si a gwaan roun wi we mait-a mek wi wanda ef it mek sens fi wi gwaan sorv Gad?

¹⁶ Di sitn dem we di piipl dem we naa sorv Jeuova a du mek it aada fi wi du di sitn dem we Jeuova waahn wi fi du so dat wi kyan stie kluos tu im. An nof piipl no biliiv se Gad de fi chuu. An nof a di taim it luk laik se tingz a gwaan fi di wan dem we naa du wa Jeuova waahn dem fi du, an wen wi si dat, wi mait-a staat fi wanda ef it mek sens fi wi gwaan sorv Jeuova. A no laik se wi a-go se Gad no de fi chuu, bot wi mait staat fi wanda ef im riili a du tingz fi elp wi. Di man we rait Saam 73 did a wanda bout dis tu kaa im did si di piipl dem we liv roun im we naa du wa Gad waahn dem fi du stil api, so im did staat fi wanda ef it mek sens fi im gwaan sorv Gad.​—Sa. 73:11-13.

17. Wa a-go elp wi fi gwaan sorv Jeuova?

¹⁷ Wa did elp di man we rait da Saamz ya fi staat luk pan tingz iina di rait wie a dat im sidong an tingk bout wa wuda apm tu di wan dem we tap sorv Jeuova. (Sa. 73:18, 19, 27) An wan neda ting we im tingk bout a ou it elp im kaa im a sorv Gad. (Sa. 73:24) Wen wi sidong an tingk bout aal a di gud sitn dem we Jeuova du fi wi aredi an ou wi laif wuda tan ef wi naa sorv im, it a-go elp wi fi gwaan sorv Jeuova laik da man ya. Kaa afta im du dat, im mek wi si se di bes ting fi im du a fi gwaan sorv Jeuova.​—Sa. 73:28.

18. Wa mek wi na’afi fried fi go chuu di sitn dem we a-go apm iina di fyuucha?

¹⁸ No mata di prablem dem we wi a go chuu ya nou, wi kyan go chuu dem kaa wi a “sorv Gad, di riil Gad we no ded.” (1 Tes. 1:9) An im du tingz aredi we shuo se im de de fi di piipl dem we a sorv im. An im stil a du tingz fi shuo se im de de fi di wan dem we a sorv im nou. An suun suun wi afi go go chuu di wos sofarieshan. Bot im a-go elp wi fi go chuu. (Aiz. 41:10) ‘Dat mek aal a wi shuor shuor wen wi se, “Di Laad a di wan we elp mi an mi naa go fried a notn.”’​—Iib. 13:5, 6.