1. Wa uol iip a piipl lov bout di Jeuova Witnis dem wen dem kom a di miitn? (Luk pan di picha tu.)

 SE WAN man an im waif kom a di Kindom Aal fi di fos taim, an wen dem a go uom, di waif se tu ar ozban se, ‘Mi si se di Jeuova Witnis dem difrant fram ada piipl.’ Shi se dat kaa dem si umoch wi lov wi wan aneda an ou di breda an di sista dem did chriit dem gud wen dem did de a di miitn.

2. Wa mek som a wi breda an sista dem tap sorv Jeuova?

² Di wie ou wi lov wi wan aneda no naamal aalduo non a wi no porfek. (1 Jan 1:8) Bot di muor wi get fi nuo wi wan aneda a di muor wi get fi si wi wan aneda bad wiez dem. (Ruo. 3:23) An yu nuo se it sad fi se, wen som a wi breda an sista dem si dem wan aneda bad wiez, it mek dem tap sorv Jeuova.

3. Ou piipl a-go nuo di wan dem we riili a fala Jiizas? (Jan 13:34, 35)

³ Mek wi luk agen pan di mien skripcha fi da lesn ya. (Riid Jan 13:34, 35.) Bot a ou piipl a-go nuo se a wi riili a fala Jiizas? A no kaa wi porfek mek dem a-go nuo, bot a kaa wi riili lov wi wan aneda. An memba se Jiizas neehn se: ‘A so unu gweehn nuo se unu a fi mi falara.’ Bot im se: “A so piipl gweehn nuo se unu a fi mi falara.” An Jiizas mek wi nuo se a no onggl wi wuda si se wi lov wi wan aneda bot aal piipl outa ruod wuda si se wi riili lov wi wan aneda tu.

4. Wa som piipl mait-a waahn fi nuo bout di Kristiyan dem we a sorv Jeuova di rait wie?

⁴ Som piipl we a no Jeuova Witnis mait-a wanda: ‘Wa Jiizas did miin wen im se lov wuda mek piipl nuo uu a riili im falara?’ An dem mait-a waahn nuo, ‘A ou Jiizas did mek im apasl dem nuo se im lov dem? An ou dem kyan du laik Jiizas?’ Bot wen wi we a sorv Jeuova aredi tingk bout di ansa fi dem kwestiyan ya, it a-go elp wi fi lov wi wan aneda muor aal wen wi du sitn we ort wi wan aneda.​—Ifii. 5:2.

5. Wa Jiizas se a Jan 15:12, 13, tel wi a wa it miin.

⁵ Jiizas mek wi nuo klier klier se di wan dem we riili a fala im wuda av wan difrant kain-a lov fi dem wan aneda. (Riid Jan 15:12, 13.) Wi nuo se da lov ya wudn naamal kaa Jiizas did tel dem se: “Lov unu wan aneda siem laka ou mi lov unu.” Wen Jiizas did se dat, im did miin se da kain-a lov ya wuda mek wan Kristiyan iivn ded fi dem wan aneda. b

6. Wa di Baibl se we mek wi nuo se wi fi lov wi wan aneda?

⁶ Di Baibl mek wi si se fi shuo lov a wan big ting. An wi fain se a nof piipl lov dem difrant difrant skripcha ya we taak bout lov iina it, laik di wan we se: “Gad a lov.” (1 Jan 4:8) An wan neda wan we se: “Yu fi lov yu nieba siem laik ou yu lov yuself.” (Mat. 22:39) An di wan we se: “Lov kova op sin, no mata ou it mait-a uol iip.” (1 Pii. 4:8) An wan neda wan we mek wi nuo se: “Chuu lov neva eva tap​—it kyaahn ded.” (1 Kor. 13:8) Dem vors ya an som ada wan iina di Baibl mek wi si se aal a wi fi wok aad fi du tingz fi mek wi wan aneda si se wi lov wi wan aneda.

7. Wa mek Sietan kyaahn mek piipl lov dem wan aneda?

 ⁷ Uol iip a piipl waahn fi nuo ou dem kyan nuo wich choch a di rait choch kaa aal a di choch dem se dem a tiich di chuut bout Gad, bot yet stil aal a dem naa tiich di siem ting. An wi nuo se dis wuda apm kaa Sietan mek uol iip a choch de bout di plies. So dis mek it aad fi piipl nuo wich wan a sorv Gad di rait wie. Bot wa im kyaahn du a mek evribadi we iina di choch dem lov dem wan aneda no mata wich paat dem kom fram kaa a onggl Jeuova kyan du dat kaa lov kom fram im. So a onggl di wan dem we im a bles an we av im spirit kyan du dat. (1 Jan 4:7) An a dat mek Jiizas did se di wan dem we lov dem wan aneda no mata wa, a dem wan de a riili im falara.

8-9. Wen uol iip a piipl si ou di Jeuova Witnis dem lov dem wan aneda, wa it mek dem du?

⁸ Jos laik wa Jiizas did se, nof piipl nuo se wi a fala Jiizas kaa dem kyan si se wi riili lov wi wan aneda. Laik yu av wan breda we niem Ian, im memba se wen im did go a di fos kanvenshan a wan stiediyom wich paat im did liv, it did difrant fram wen im did go de kopl mont bifuo dat go wach wan giem. Im se: “Di Jeuova Witnis dem did av manaz an dem did jres nais, an di pikni dem did nuo ou fi biyiev demself.” An im se: “Di bigis ting we mi did si a dat dem luk laik se dem did av piis iina dem aat an notn neehn a bada dem, an a so mi did waahn fi fiil tu. Fi tel yu di chuut, mi no memba notn we dem did taak bout da die de bot wa mi aalwiez memba a ou di piipl dem did gwaan.” c Wi stie so kaa wi riili lov wi wan aneda an a das wai wi kain tu wi wan aneda an rispek wi wan aneda tu.

⁹ Yu did av wan breda we niem Jan, im did fiil laik Ian wen im did staat fi go a miitn. Im se: “Di piipl dem de did nais bad. Evribadi jos kom op an taak tu yu so, it did komiin laik dem porfek. Kaaz a ou dem did lov dem wan aneda, mi did shuor se mi did fain di wan dem we a sorv Gad di rait wie.” d Aal a wa dem piipl ya a se mek wi si se a di Jeuova Witnis dem riili a fala Jiizas.

10. Wen a wan gud taim fi mek wi breda an sista dem si umoch wi lov dem? (Luk pan di said paint tu.)

¹⁰ Jos laik wa wi did se aredi, non a wi we a sorv Jeuova no porfek, so som a di taim wi a-go se an du tingz we a-go bon wi wan aneda. e (Jmz. 3:2) An wen sitn laka dat apm, a dem taim de wi kyan du sitn fi mek wi breda ar sista si umoch wi lov dem. Wen tingz laik dis did apm tu Jiizas, wa wi kyan lorn fram ou im did diil wid it?​—Jan 13:15.

11. Wa a som a di bad wiez dem we Jiemz an Jan did av? (Luk pan di picha tu.)

¹¹ A no laik se Jiizas did waahn im falara dem fi porfek bot im did waahn dem fi chienj op dem bad wiez dem so dat Jeuova kuda api wid dem. Wan a di taim, tuu a im apasl dem we niem Jiemz an Jan did aks dem mada fi go aks Jiizas fi gi dem wan tap-a-tap pozishan iina Gad  Kindom. (Mat. 20:20, 21) Jiemz an Jan did mek wi si se dem did proud an se dem did waahn big laif.​—Pr. 16:18.

12. A onggl Jiemz an Jan wan did shuo se dem av bad wiez? Tel wi wa mek yu se so.

¹² Wen dis did apm a neehn Jiemz an Jan wan shuo se dem av bad wiez kaa “wen di ada ten falara dem ier dis, dem did beks wid di tuu breda dem.” (Mat. 20:24) Wi no nuo fi shuor ou tingz did go dong bot wi nuo se dem did se tingz we wuda bon dem wan aneda, laik: ‘A uu unu tingk unu bi fi a aks Jiizas fi gi unu di tap-a-tap pozishan iina Gad Kindom? Afta a no unu wan a wok aad wid Jiizas, wi a wok aad wid Jiizas tu. Afta unu no muo dan wi!’ Bot jos laik wa wi se, wi no nuo wa did go dong, bot wa wi nuo fi shuor a dat di ada apasl dem did mek wa Jiemz an Jan du mek dem figet se no mata wa, dem fi aalwiez lov dem wan aneda.

13. A wa Jiizas did du wen im si se im apasl dem did av som bad wiez? (Matyu 20:25-28)

¹³ Wi si se wen Jiizas apasl dem did de de a du dis, Jiizas neehn get beks wid dem an se im a-go luk fi som difrant apasl we ombl an we a-go lov dem wan aneda no mata wa. Jiizas neehn du dat kaa im did si se dem man ya a som gud man, so im tek im taim wid dem an elp dem fi si di rait ting we dem fi du. (Riid  Matyu 20:25-28.) An dis a neehn di fos taim ar di laas taim we im apasl dem chrai fi si wich wan a dem wuda av di tap-a-tap pozishan iina di gruup.​—Maak 9:34; Luuk 22:24.

14. A wa kain-a piipl di apasl dem did gruo roun?

¹⁴ Jiizas neehn beks wid im apasl dem, kaaz im did nuo uu dem bi. (Jan 2:24, 25) Jiizas did nuo se di choch liida dem we dem did gruo roun, di big ting fi dem a uu did av di tap-a-tap pozishan. (Mat. 23:6; luk pan di vidiyo we niem The Front Seats in the Synagogue we de iina di stodi nuot pan Matyu 23:6 NWT.) Dem liida ya fi di Juu dem choch did put demself uova ada piipl. f (Luuk 18:9-12) Jiizas did nuo se kaaz a dem man ya di apasl dem did gruo roun a das wai dem tan so. (Pr. 19:11) So im did nuo wa mek it did aad fi dem chienj. An a das wai im neehn jraa dem op tu moch kaa im did nuo se dem a did som gud man. So a das wai im tek im taim wid dem an elp dem fi ombl demself an no fi waahn no tap-a-tap pozishan, bot di bigis ting a dat dem fi gwaan lov dem wan aneda.

15. A wa wi lorn fram wa did go dong wid Jiemz an Jan?

¹⁵ A wol iip wi kyan lorn fram wa did go dong wid Jiemz an Jan. Dem neehn did fi aks fi no tap-a-tap pozishan iina Gad Kindom bot di ada apasl dem did rang wid ou dem did gwaan wid dem. Bot wi si se Jiizas did tek im taim wid di 12 a dem. Wa wi kyan lorn fram aal a dis? Wa wi lorn a dat di big ting a no onggl wa ada piipl du bot a ou wi diil wid it wen dem du sitn we no rait. Wen wi beks wid wi breda an sista dem kaaz a wa dem mait-a du ar se, wi kyan aks wiself dem kwestiyan ya: ‘A wa mek wa dem se bon mi so? Di wie mi gwaan mek mi si se mi av som bad wiez we mi niid fi get rid a? Di sumadi we du ar se sitn we mek mi beks, dem a go chuu wan rof taim? Aal ef di sumadi did riili waahn fi du sitn fi ort mi, mi kyan stil gwaan lov dem an paadn dem?’ Enitaim wi tek wi taim wid wi breda an sista dem an du tingz fi mek dem si se wi lov dem, a da taim de wi a shuo se wi riili a fala Jiizas.

16. Wa els wi kyan lorn fram ou Jiizas did chriit im apasl dem?

¹⁶ Di wie ou Jiizas did diil wid di apasl dem mek wi si se wi fi chrai an andastan wa a gwaan wid wi breda an sista dem. (Pr. 20:5) Ye, wi nuo wi kyaahn riid aat laik Jiizas bot wen taim dem du sopm we bon wi, wi fi stil tek taim wid dem. (Ifii. 4:1, 2; 1 Pii. 3:8) An it a-go iiziya fi wi ino ef wi nuo ou dem did gruo. Mek wi luk pan wan taim wen dis did apm.

17. Ou it did wok out gud fi wan sorkit uovasiya wen im did get fi nuo wan a di breda dem beta?

¹⁷ Wan sorkit uovasiya we did a wok iina di iis paat a Afrika memba wan breda we im did fiil se did av wan likl rof wie bout im. Wa yu tingk di sorkit uovasiya did du bout it? Im se: “Mi neehn kip we fram di breda bot wa mi tel miself se mi did a-go du a chrai fi nuo muor bout im.” Wen im fain out bout ou di breda gruo,  im get fi fain out wa mek di breda stie di wie ou im stie. An di sorkit uovasiya se: “Wen mi get fi fain out a ou di breda gruo an ou im wok aad fi get rid a som a di bad wiez dem we im did av fi sorv Jeuova, it mek mi riet im an wi ton gud gud fren.” So wi si se wen wi wok aad fi si wa mek som a wi breda an sista dem du som a di sitn dem we dem du, it a-go iiziya fi wi du tingz fi mek dem si se wi lov dem.

18. Wa a som kwestiyan we wi kyan aks wiself ef wi fiil se wan breda ar wan sista du sitn we ort wi? (Pravorbz 26:20)

¹⁸ Wi mait-a fiil laik se ef wan breda ar wan sista du sitn we ort wi, wi fi go taak tu dem bout it. Bot bifuo yu du dat, aks yuself dem kwestiyan ya: ‘Mi nuo evriting we did go dong?’ (Pr. 18:13) ‘Dem did riili waahn fi du sitn fi ort mi?’ (Iik. 7:20) ‘Mi eva du notn laik dat fi ort nobadi yet?’ (Iik. 7:21, 22) ‘Ef mi go tu di sumadi, mi a-go mek tingz beta ar wos?’ (Riid Pravorbz 26:20.) Wen wi tingk bout dem kwestiyan ya, it a-go mek wi si se ef wi riili lov wi breda an sista dem a no evriting we dem du we ort wi wi a-go mek a big ting outa it.

19. Wa yu mek op yu main fi du?

¹⁹ Ye, wi si se a di Jeuova Witnis dem a du tingz fi shuo se a dem a riili Jiizas falara. Bot evri wan a wi kyan shuo se wi a fala Jiizas wen wi redi fi gi op eniting fi mek wi breda an sista dem si se wi lov dem aalduo dem no porfek. An wen wi du dat, ada piipl wi si se a wi a sorv Gad di rait wie an dis wi mek dem waahn fi kom sorv Jeuova, di Gad a lov, wid wi. Mek aal a wi mek op wi main fi gwaan du tingz we a-go mek piipl si se wi a riili Jiizas falara.