Wa mek di man we di Baibl kaal Suo-an-so se it wuda mek im luuz we im av ef im marid tu Ruut? (Ruut 4:1, 6)

▪ Ef wan man, we did marid did de bout iina di taim wen di Baibl did a rait, did ded, wa wuda apm tu di lan we im ded an lef? Nobadi wuda de fi kyari di fambili niem? Di Laa we Jeuova did gi Muoziz gi wi di ansa fi dem kwestiyan ya.

Dem taim de, ef wan man ded ar im get so puor das im afi sel im lan, im breda ar wan a im fambili kuda du sitn ar bai bak di piis a lan, an dis wuda mek shuor se di lan tan iina di fambili.​—Liv. 25:23-28; Nom. 27:8-11.

So wen wan man ded, fi mek shuor se im niem no ded wid im, im breda wuda marid tu im waif, ar ef im no av wan breda wan neda man iina di fambili kuda marid tu ar, an a dis did apm wid Ruut. An dem wuda gi di pikni we dem av di niem a di wan we ded an im wuda get di ded lef lan. An dis a wan nais sitn we Jeuova mek kuda apm fi mek shuor se di uman wuda aarait.​—Dyuu. 25:5-7; Mat. 22:23-28.

Luk pan wa did gwaan wid Nayuomi, shi did marid tu wan man we niem Ilimilek. Wen im an di tuu bwai pikni we dem did av ded, shi neehn av nobadi fi tek kier a ar. (Ruut 1:1-5) Wen shi kom baka Juuda, shi tel ar daata-in-laa we niem Ruut fi aks Buowaz fi marid tu ar so dat dem kuda get bak di lan we ar ozban did ded lef kaa im did a wan kluos fambili memba tu Ilimilek. (Ruut 2:1, 19, 20; 3:1-4) Bot den Buowaz get fi si se wan man, we di Baibl kaal Suo-an-so, did de bout we av di rait muor dan im fi marid tu Ruut so das Nayuomi kuda get bak ar lan.​—Ruut 3:9, 12, 13.

Fos Suo-an-so se im wuda elp Nayuomi. (Ruut 4:1-4) Aalduo im si se im wuda afi spen som moni fi tek kier a ar it neehn so aad fi im du dat kaa im riyalaiz se Nayuomi kudn av no pikni so a im wuda get Ilimilek lan. So it luk tu im laik se tingz wuda wok out gud fi im iina di lang ron.

Bot wen Suo-an-so kech di riek an si se Ruut de de fi im marid tu, im chienj im main an se im kyaahn go marid tu ar agen so das dem kyan go get bak di lan we Ilimilek ded lef kaa im a tingk bout fi’im uona sitn dem we im av an wa im kuda luuz.​—Ruut 4:5, 6

Kaa ef Suo-an-so ar sumadi els did marid tu Ruut an shi av wan son, a da pikni de wuda get di lan we Ilimilek ded lef. Di Baibl no tel wi ou Suo-an-so kuda luuz di sitn dem we im av bot si som sitn ya we im kudaana tingk bout we mek im chienj im main.

• Fos ting, im kuda a fiil se im wudn get bak notn outa im moni we im wuda a spen pan Nayuomi an Ruut kaa Ilimilek piis a lan wuda go tu di bwai pikni we Ruut av, a no im wuda get it.

• An di sekan ting a das im wuda afi a tek kier a Nayuomi an Ruut.

• An di tord ting a das ef im did av no pikni bifuo im marid tu Ruut, eniting we im av wuda afi shier op wid dem pikni de an di pikni dem we im av wid Ruut.

• An di fuot ting a das ef Suo-an-so neehn av no pikni bifuo im marid tu Ruut an Ruut go av wan bwai pikni, eni lan we a did fi Ilimilek an eni lan we Suo-an-so av wuda go tu da bwai pikni de. So Suo-an-so neehn waahn fi luuz aal a dat fi elp Nayuomi. Im did prefa ef Buowaz, uu a did di neks man we did a wan kluos fambili memba, marid tu ar. An Buowaz did redi fi dwi’it kaa im did waahn di ded man fambili fi get bak wa im ded lef.​—Ruut 4:10.

So wi si se Suo-an-so did onggl a tingk bout fi’im uona fambili niem an di sitn dem we im av. Bot dat stil neehn wok out fi im kaa nobadi no nuo im niem tide. An tingk bout it, im kuda bi paat a di fambili we Jiizas Krais di Mesaiya kom fram. Bot kaa Suo-an-so did onggl a tingk bout imself a Buowaz get dat de blesn de. So kaaz Suo-an-so neehn elp sumadi we niid elp tingz neehn wok out gud fi im at aal!​—Mat. 1:5; Luuk 3:23, 32.