1-2. Ef yu waahn fi get baptaiz bot yu si se yu niid fi saat out yuself fi du it, wa mek yu no fi fiil no wie? (Luk pan di picha pan di kova.)

 EF YU waahn fi get baptaiz den dat a sitn gud. Yu fiil se yu redi fi baptaiz ya nou? Ef yu fiil so an di elda dem fiil so tu, den wen di neks taim kom roun wen piipl kyan baptaiz agen, no ich fi du it kaa wen yu du dis yu a-go kyan enjai wan gud gud laif a sorv Jeuova.

² Bot wa ef sumadi tel yu se yu no redi fi baptaiz yet, ar yu mait-a si dat fi yuself? No bada fiil no wie kaa weda yu yong ar yu op iina iej yu kyan du som sitn fi saat out yuself fi get baptaiz.

3. Wa di impuotant man we kom fram Iitiyuopiya did aks Filip se, an wa dis mek wi a wanda bout im? (Aks 8:36, 38)

³ Riid Aks 8:36, 38. Wan impuotant man we did kom fram Iitiyuopiya did aks Filip se: “Wa fi tap mi fram get baptaiz rait nou?” Ye, da man ya did waahn fi get baptaiz, bot yu tingk im did saat out imself fi get baptaiz?

4. Ou di man we kom fram Iitiyuopiya did shuo se im mek op im main fi gwaan lorn bout wa iina Gad Wod?

⁴ Di man we kom fram Iitiyuopiya “did go a Jeruusilem fi go worship Gad.” (Aks 8:27) So im neehn baan az wan Juu bot im did staat fi go a di Juu dem choch an worship Gad laik dem. An im mos did lorn bout Jeuova fram wa im did riid iina di paat a di Baibl we did rait iina di Iibruu langwij. Bot im neehn sekl wid wa im nuo, im did waahn fi lorn muor. Matarafak, wen Filip did miit im pan di ruod, Filip did si im a riid sitn we di prafit Aizaiya did rait. (Aks 8:28) Wa im did a riid neehn iizi fi andastan. So da man ya neehn jos waahn nuo di ting dem we iizi fi andastan iina Gad Wod bot im did waahn fi gwaan lorn bout di ting dem we no so iizi we de iina it tu.

5. Wa di man we kom fram Iitiyuopiya did du afta im lorn wa im lorn?

⁵ Da man ya a did wan impuotant man we did a wok fi di kwiin fi Iitiyuopiya we niem Kyandiis, “a im did inchaaj a aal a di moni fi Kyandiis.” (Aks 8:27) Kaaz a di wok we da man ya du, wi nuo se im did wel bizi bot dat neva tap im fram yuuz som a im taim fi worship Jeuova. Im neehn jos aarait wid a lorn wa im a lorn fram Gad Wod, bot im did du wa Gad Wod se im fi du. So im did lef Iitiyuopiya fi go wie a Jeruusilem so im kuda go worship a Gad ous. Fi chravl go a Jeruusilem wuda tek uol iip a moni, an it wuda tek nof taim tu. Bot kaa im did wel waahn fi worship Jeuova im du aal we im kuda du fi riich Jeruusilem.

6-7. Ou di lov we di man we kom fram Iitiyuopiya did av fi Jeuova kuda get chrangga an chrangga?

⁶ Di man we kom fram Iitiyuopiya did lorn som nyuu sitn fram Filip we im neehn nuo an im did niid fi nuo dem sitn ya, laik uu a did di Mesaiya. (Aks 8:34, 35) An it did riili mek im fiil gud fi lorn bout wa Jiizas did du fi im. Kaaz a dis, im neehn jos waahn fi gwaan worship Gad laik di Juu piipl dem. Wa im did lorn did mek im lov fi Jeuova an Jiizas get chrangga, an dis did push im fi waahn get baptaiz an ton wan a Jiizas falara. An kaa Filip did si se im did don saat out imself fi get baptaiz, im baptaiz im.

⁷ Ef yu du laik da man ya fram Iitiyuopiya yu kyan saat out yuself an get baptaiz tu. An wen yu du laik im an aks yuself se: “Wa fi tap mi fram get baptaiz rait nou?” yu kyan uol op yu ed an se: “Notn!” Rait ya nou wi a-go luk pan som a di sitn dem we di man we kom fram Iitiyuopiya did du an wa wi kyan du tu, laik im neva tap lorn bout di sitn dem we de iina Gad Wod, an im du wa it se im fi du, an im du wa im nuo se im did fi du fi mek im lov fi Gad get chrangga an chrangga.

8. Wa Jan 17:3 se yu fi du?

⁸ Riid Jan 17:3. Uol iip a wi did mek op wi main fi stodi di Baibl kaaz a wa Jiizas se iina da vors ya. A dat mek yu du it tu? Bot da sed vors ya tu mek wi nuo se wi no fi tap get fi “nuo. . . di onggl wan we a riili Gad.” (Iik. 3:11) So wi naa go eva tap lorn bout Jeuova aal wen wi a liv fi eva. An di muor wi lorn bout im a di muor wi an im a-go get kluosa an kluosa.​—Sa. 73:28.

9. Wa wi fi du afta wi lorn bout di ting dem we iizi fi andastan bout di chuut an Gad Wod?

⁹ Fi staat lorn bout Jeuova wi afi lorn di likl ting dem bout im fos. An a dis Paal did rait bout iina im leta tu di Iibruu Kristiyan dem, we im kaal di ting dem we iizi fi andastan iina Gad Wod “di fos sitn dem.” Im neva did a se ‘dem tingz de we wi don nuo aredi’ a no notn, bot im did a se dem sitn ya komiin laik milk we biebi jringk. (Iib. 5:12; 6:1) An im did a tel di Kristiyan dem se dem no fi jos sekl wid di ting dem we iizi fi andastan we iina Gad Wod, bot dem fi chrai fi get fi nuo di ting dem we aad fi andastan tu. So yu a shuo se yu wel waahn fi nuo di sitn dem we no so iizi fi andastan we de iina Gad Wod? An yu wel waahn fi gwaan nuo muor bout Jeuova an bout wa im waahn fi du fi wi?

10. Wa mek som piipl fain it aad fi stodi?

¹⁰ Uol iip a wi mait-a fain it aad fi stodi. A so yu fiil tu? Yu did lorn fi riid an stodi gud a skuul? An wen yu did a stodi, yu did lov fi du it an yu did fain se yu lorn uol iip, ar yu did fiil se yu an buk a no fren? Ef a so yu fiil, a no yu wan. Bot Jeuova kyan elp yu kaa im porfek an im a di bes tiicha we eva de bout.

11. Ou wi nuo se Jeuova a ‘di wan we a tiich wi ou fi liv wi laif’?

¹¹ Jeuova mek wi nuo se im a “di wan we tiich [wi] ou fi liv [wi] laif.” (Aiz. 30:20, 21) Jeuova a wan tiicha we tek taim wid di wan dem we im a tiich, an im kain tu dem, an im nuo wa de gwaan wid dem tu. An wan neda ting a dat im aalwiez a luk fi si di gud sitn dem we dem a du. (Sa. 130:3) Kaa memba ino, di brien we wi av, a im mek it, so im naa go aks wi fi du sitn we im nuo se wi kyaahn du. (Sa. 139:14) Jeuova mek wi iina wan wie we wi aalwiez waahn fi lorn, an im waahn wi fi gwaan lorn nyuu tingz fi eva an eva, an im waahn wi fi api wen wi a lorn tu. So it mek sens fi wi du wi bes ya nou fi shuo se wi “wel waahn” nuo muor bout di sitn dem we de iina di Baibl. (1 Pii. 2:2) So tingk bout som tingz we yu kyan du fi sorv Jeuova beta, an plan out wa yu kyan go du fi elp yu fi riid yu Baibl an stodi it evridie. (Jash. 1:8) An wen yu du dat, yu a-go si ou Jeuova a bles yu, an likl bai likl yu a-go staat fi lov fi riid an lorn bout Jeuova muor an muor.

12. Wen wi a du wi uona Baibl stodi, wa mek wi fi stodi bout Jiizas an ou im did liv im laif?

¹² Wen wi liv wi laif laik ou Jiizas did liv im laif, dat a-go elp wi fi sorv Jeuova di wie ou im waahn wi fi sorv im aal wen tingz aad. So wi fi spen di taim fi sidong an tingk bout ou Jiizas did priich an ou im did liv im laif. (1 Pii. 2:21) Jiizas did don tel wi se tingz naa go iizi fi di wan dem we a fala im. (Luuk 14:27, 28) Bot im did nuo se dem wuda du laik im an no tap chos iina Jeuova no mata wa. (Jan 16:33) So wi fi mek shuor se wi stodi bout ou Jiizas did liv im laif, an tingk bout som difrant difrant tingz we wi kyan du evridie fi liv wi laif laik im.

13. Wa yu fi aalwiez a aks Jeuova fa, an wa mek yu fi prie fi’it?

¹³ Bot fi jos nuo uol iip a tingz naa go elp wi. It onggl a-go elp wi wen wi yuuz di sitn dem we wi nuo fi lorn muo bout Jeuova an fi lov im an chos iina im. (1 Kor. 8:1-3) An wen yu a gwaan lorn muo bout Jeuova, yu fi aalwiez a aks im fi elp yu fi chos iina im muor. (Luuk 17:5) An wen yu chos iina Jeuova kaaz a wa yu lorn, it a-go elp yu fi du muor fi im.​—Jmz. 2:26.

14. Ou di apasl Piita did mek wi nuo se it impuotant fi wi du di sitn dem we wi a lorn? (Luk pan di picha tu.)

¹⁴ Di apasl Piita did mek wi nuo se it impuotant fi wi gwaan du di sitn dem we wi a lorn. Im did mek wi nuo dat wen im did taak bout Nowa. Im did se Jeuova did tel Nowa se im wuda bring wan flod fi don di wikid piipl dem iina Nowa taim. Bot jos fi nuo bout da flod de wudn elp Nowa an im fambili, im wuda afi du sitn bout wa im nuo. Piita tel wi se bifuo di flod kom “Nowa did a bil di big buot.” (1 Pii. 3:20) So Nowa an im fambili did du sitn bout wa dem did nuo wen dem lisn tu Gad an go bil di big buot. (Iib. 11:7) Wen Piita did a taak bout wa Nowa did du im se wa im did du “komiin laik baptizam we siev wi ya nou.” (1 Pii. 3:21) So di sitn dem we wi a du ya nou so das wi kyan baptaiz komiin laik di siem wok we Nowa an im fambili did du wen taim dem did a bil di big buot. So wa a som a di sitn dem yu niid fi du so dat yu kyan saat out yuself fi get baptaiz?

15. Wa sumadi kyan du fi shuo se dem ton we fram dem sin dem an dem riili sari fi wa dem du?

¹⁵ Wan sitn we wi afi du bifuo wi baptaiz a dat wi afi ton we fram wi sin dem an sari fi wa wi du. (Aks 2:37, 38) An wen wi riili ton we fram wi sin dem an sari fi wa wi du, a dat a-go elp wi fi riili chienj op wi laif. So yu tap du di bad sitn dem we Jeuova iet, laik seks sin, fi sumuok an yuuz jogz, an kos bad wod an dem sitn ya? (1 Kor. 6:9, 10; 2 Kor. 7:1; Ifii. 4:29) Ef yu no tap du dem bad sitn ya aredi yu fi chrai aad fi tap du dem sitn de. Wa yu kyan du a taak tu di sumadi we yu a stodi di Baibl wid ar yu kyan aks di elda dem iina di kanggrigieshan fi elp yu an shuo yu wa fi du. An ef yu a wan pikni we liv wid yu mada an faada, aks dem fi elp yu fi tap du di bad sitn dem we mait-a a tap yu fram baptaiz.

16. Wa a som a di sitn dem wi fi aalwiez a du fi elp wi fi kip kluos tu Jeuova?

¹⁶ Wi afi mek shuor se wi aalwiez a du di sitn dem we a-go elp wi fi kip kluos tu Jeuova, laik wi fi go a wi miitn dem, an wen wi go wi fi put op wi an an ansa kwestiyan tu. (Iib. 10:24, 25) An ef yu staat fi  priich wid di kanggrigieshan aredi, mek shuor se yu aalwiez a du dat kaa di muor yu priich tu piipl an tiich dem bout di gud nyuuz a di muor yu a-go lov it. (2 Tim. 4:5) An ef yu yong an stil a liv wid yu mada an faada, yu kyan aks yuself: ‘Mi mada an faada afi de tel mi fi go a miitn an fi go a fiil sorvis tu, ar a sitn we mi du kaa mi waahn fi du it?’ Wen yu du dem de sitn de kaa yu waahn fi du it, yu a shuo Jeuova se yu chos iina im an yu lov im an yu tangk im fi aal a wa im du fi yu. A so yu a-go shuo se yu a “liv [yu] laif fi Gad”. (2 Pii. 3:11; Iib. 13:15) Wen wi du tingz fi Jeuova an nobadi naa presha wi fi du it bot wi a du it fram wi aat, a dat mek Jeuova api. (Luk pan 2 Korintiyan 9:7.) An wi a du aal a dis kaa wi api fi gi Jeuova wi bes.

17-18. Wa a wan ting we a-go elp wi fi saat out wiself fi get baptaiz, an wa mek? (Pravorbz 3:3-6)

¹⁷ Wen wi a du di sitn dem fi saat out wiself fi get baptaiz, wi a-go fain se wi a-go afi chogl chuu uol iip a likl sitn. Laik piipl mait-a mak wi an laaf aafa wi kaa a wa wi biliiv iina, an yu av ada piipl we mait-a fait gens wi kaa a wa wi biliiv iina ar chriit wi bad an mek wi sofa. (2 Tim. 3:12) An sitn mait-a apm we shuo se wan doti wie we yu a wok aad fi get rid a stil de de wid yu. Ar kaa yu av uol iip a tingz fi saat out iina yu laif bifuo yu get baptaiz, yu mait-a fiil laik se yu taiyad an yu kyaahn bada kaa it no luk laik se yu a-go kyan get baptaiz fi nou. Wa a-go elp yu fi no gi op wen taim dem sitn ya apm? A di lov we yu av fi Jeuova a-go elp yu.

¹⁸ Outa aal a di wiez dem we yu av, di bes wan a se yu lov Jeuova. (Riid Pravorbz 3:3-6.) An wen wi lov im wid aal a wi aat, a dat a-go elp wi fi diil wid di prablem dem we wi av iina laif. Di Baibl mek wi nuo se di lov we Jeuova av fi di piipl dem we sorv im a wan lov we mek im stik tu dem fi eva. (Sa. 100:5) An kaa Jeuova mek wi wid di wiez dem we im av, wi kyan av da kain-a lov de tu. (Jen. 1:26) A ou yu kyan shuo Jeuova se yu av da kain-a lov de fi im?

19. Wa kyan elp yu fi riili api fi aal a wa Jeuova du fi yu? (Gyalieshan 2:20)

¹⁹ Di fos ting we yu afi du a tangk Jeuova fi aal a di sitn dem we im du fi yu. (1 Tes. 5:18) Evridie yu fi aks yuself se, ‘A  wa Jeuova du fi mi tide we shuo mi se im lov mi?’ An den yu fi prie an tangk Jeuova fi di difrant difrant sitn dem we yu did si se im du fi yu. Yu si wen yu tingk bout di difrant difrant sitn dem we Jeuova Gad du fi yu, it a-go mek yu fiil di siem wie ou Paal did fiil bout Jeuova. (Riid Gyalieshan 2:20.) Aks yuself, ‘Mi waahn shuo Jeuova se mi lov im tu?’ Wen yu lov Jeuova, a dat a-go elp yu fi no gi iin tu notn we kyan kaaz yu fi sin, an a it a-go elp yu fi eng aan an go chuu yu prablem dem. An a di lov we yu av fi Jeuova a-go elp yu fi gwaan du di sitn dem we a-go elp yu fi kip kluos tu im an shuo im se yu lov im evridie.

20. Wa yu fi du fi gi yu laif tu Jeuova, an wa mek dis a wan big ting?

²⁰ Kaa yu lov Jeuova so moch yu a-go prie wan speshal prieya fi gi yu laif tu im. Memba se a wan gud gud ting fi yu gi yu laif tu Jeuova kaa it miin se yu an im a-go kyan bi fren nou an fi eva. Wen yu gi yu laif tu Jeuova it miin se no mata wa a gwaan iina yu laif yu pramis se yu naa tap sorv im. Ye, fi gi yu laif tu Gad a no wan plie-plie ting, an a onggl wan taim aluon yu afi go se da speshal prieya ya​—yu naa go niid fi se it agen. Bot tingk bout dis: Outa aal a di sitn dem yu kuda mek op yu main fi du iina laif, notn no beta dan fi yu gi yu laif tu Jeuova. (Sa. 50:14) Sietan a-go chrai aad fi mek yu no lov Jeuova so moch agen so dat yu tap du wa Jeuova waahn yu fi du. Bot no mek Sietan mek yu ton yu bak pan Jeuova! (Juob 27:5) Di wie yu lov Jeuova, a dat a-go elp yu fi du aal a wa Jeuova waahn yu fi du sins yu gi yu laif tu im. An da chrang lov ya a-go elp yu fi jraa kluosa an kluosa tu im tu.

21. Wa mek wi kyan se wen wi baptaiz a no jos it dat?

²¹ Afta yu prie tu Jeuova fi gi yu laif tu im, taak tu di elda dem iina yu kanggrigieshan an mek dem nuo se yu don saat out yuself fi baptaiz. An memba se wen yu baptaiz, a no jos it dat​—a nou yu riili staat fi sorv Jeuova an yu a-go kyan sorv im fi eva. So tingk bout som difrant difrant tingz yu kyan du evridie fi mek yu lov fi Jeuova get chrangga an chrangga. An wen yu du aal a dis, it a-go elp yu fi saat out yuself fi get baptaiz. Da die ya wen yu baptaiz a-go bi wan nais nais die fi yu kaa nou yu staat liv fi Jeuova. So mek shuor se yu du aal we yu kyan du fi mek di lov we yu av fi Jeuova an im Bwai Pikni eva a get chrangga an chrangga.