1-2. Wa apm uol iip a taim wen piipl a baptaiz, an wa wi a-go luk pan iina da lesn ya?

 YU EVA si som piipl wen dem bout fi get baptaiz an ier ou dem ansa di tuu kwestiyan dem loud an chrang? Wen yu luk pan dem fambili an fren dem fies yu si ou dem api fi dem. An wen dem kom outa di waata, yu ier som loud klapin, an yu si se dem api fi baptaiz tu. Uol iip a touzn a piipl baptaiz evri wiik an ton wan Jeuova Witnis.

² Wa bout yu? Ef yu waahn fi baptaiz yu speshal kaa dis ya worl ya wikid bad bot yu stil a chrai fi fain out wa Jeuova waahn yu fi du so dat yu kyan dwi’it. (Sa. 14:1, 2) No mata ef yu yong ar yu op iina iej, da lesn ya a fi yu. An fi di wan dem we baptaiz aredi, da lesn ya a-go elp dem fi tan op chrang an no tap sorv Jeuova. So iina da lesn ya, wi a-go luk pan chrii riizn wa mek yu fi sorv Jeuova.

3. Wa mek di piipl dem we a sorv Jeuova lov di chuut an waahn fi du di sitn dem we rait iina fi’im yai? (Saam 119:128, 163)

³ Jeuova did tel im piipl dem se dem fi lov di chuut. (Zak. 8:19) Jiizas did tel im falara dem tu se dem fi chrai aad fi du wa rait iina Gad yai. (Mat. 5:6) Dis miin se wi fi waahn fi du wa rait iina Gad yai. Wi nuo se yu no lov fi du di wikid sitn dem we Gad iet. Bot wi nuo se yu lov di chuut an yu waahn fi du di sitn dem we rait iina Gad yai. (Riid Saam 119:128, 163.) So enibadi we tel lai komiin laka Sietan, uu a di ruula fi da worl ya. (Jan 8:44; 12:31) Fram Adam an Iiv de bout til nou Sietan a tel lai pan Gad. Im waahn wi fi fiil se Jeuova onggl a tingk bout imself, an im no anis, an im no waahn gud fi di piipl dem we im  a ruul uova. (Jen. 3:1, 4, 5) Di lai dem we Sietan a tel pan Jeuova stil a ton we piipl fram Jeuova. An kaa dem no lov di chuut Sietan mek dem du aal kain-a wikid sitn.​—Ruo. 1:25-31.

4. Wa Jeuova du fi mek wi si se im a di Gad a chuut? (Luk pan di picha tu.)

⁴ Jeuova a di Gad a chuut, so im mek enibadi we lov im nuo di chuut. (Sa. 31:5) So Sietan naa go kech dem wid im lai dem. A Jeuova mek dem lorn ou fi bi anis an im mek dem nuo wa rait so dat dem kyan dwi’it. Dis mek dem fiil gud bout demself. (Pr. 13:5, 6) Bot tingk bout it, fram yu a stodi di Baibl yu wuda se yu si im a du dat fi yu? Yu get fi si ou Jeuova waahn yu fi liv, an yu get fi si se di wie ou im waahn piipl fi liv a di bes wie dat. (Sa. 77:13) So a dat mek yu waahn fi du di sitn dem we Gad se rait. (Mat. 6:33) So nou yu waahn fi taak op bout di chuut an elp ada piipl fi si se a lai Sietan a tel pan Gad. Wa kyan elp yu fi du dat?

5. A wa kyan elp yu fi tan op fi di chuut an wa rait?

⁵ Yu kyan liv yu laif iina wan wie we shuo se yu a se: “Mi no biliiv di lai dem we Sietan a tel, an mi a-go shuo se mi biliiv di chuut. Mi waahn Jeuova fi ruul uova mi, an mi waahn fi du evriting we im se rait.” Bot wa kyan elp yu fi du dat? Yu kyan prie tu Jeuova an gi yu laif tu im an den baptaiz an mek ada piipl si se yu gi yu laif tu im. Wen yu lov di chuut an lov wa rait, a dat a-go push yu fi baptaiz.

6. Wa Saam 45:4 tel wi se Jiizas a-go du we mek wi lov im?

⁶ Si som riizn ya wa mek wi lov Jiizas. Saam 45:4 mek wi nuo som a di ting dem we Jiizas big op. (Riid.) Laik im lov di chuut, an im lov wen piipl ombl, an im lov wen piipl du wa rait iina Gad yai. So wi nuo se ef yu a sumadi we lov di chuut an lov di sitn dem we rait iina Gad yai, yu a-go lov Jiizas tu. An jos tingk bout ou Jiizas did tan op fi di chuut an fi di ting dem we rait. (Jan 18:37) Bot wa mek wi se Jiizas lov wen piipl ombl?

7. Wa yu lov bout di wie ou Jiizas ombl?

⁷ Wi si se Jiizas did ombl kaa wen nobadi chrai fi big im op im no tek di big op bot im aalwiez mek im Faada get di big  op. (Maak 10:17, 18; Jan 5:19) Ou dat mek yu fiil? It no mek yu lov im muor an waahn fi du tingz laik im? Bot wa mek Jiizas so ombl? Wi si se Jiizas ombl kaa im lov fi du tingz laik im Faada we ombl, an im lov im Faada tu. (Sa. 18:35; Iib. 1:3) An duohn it mek yu waahn fi get fi nuo Jiizas muor wen yu si se im du tingz jos laik ou im Faada wuda dwi’it?

8. Wa mek a Jiizas yu waahn fi bi yu King?

⁸ A Jiizas wi waahn fi ruul uova wi kaa a im Jeuova pik an chrien fi ruul uova wi. (Aiz. 50:4, 5) An jos tingk bout umoch Jiizas riili riili lov wi. (Jan 13:1) Kaa Jiizas a yu King yu fi lov im. An im mek wi nuo se di piipl dem we riili lov im a im an dem a fren, an a dem du wa im se. (Jan 14:15; 15:14, 15) A wan big ting fi bi Jeuova Bwai Pikni fren, no chuu?

9. Di riizn wa mek wan Kristiyan baptaiz, ou it komiin laik di riizn wa mek Jiizas baptaiz?

⁹ Wan a di ting dem we Jiizas tel im falara dem fi du a dat dem fi go baptaiz. (Mat. 28:19, 20) An a dat im did du. Som a di riizn wa mek Jiizas baptaiz difrant fram di riizn dem wa mek im falara dem baptaiz. (Luk pan di paat we niem “ Som A Di Riizn Wa Mek Jiizas Baptaiz Difrant Fram Som A Di Riizn Dem Wa Mek Im Falara Dem Baptaiz.”) Bot Jiizas baptaiz fi som a di sed riizn dem we mek im falara dem baptaiz. Wan riizn wa mek Jiizas did baptaiz a kaa im did waahn fi du di sitn dem we Jeuova waahn im fi du. (Iib. 10:7) A siem so Jiizas falara dem get baptaiz kaa dem waahn fi gi dem laif tu Jeuova. So nou dem a fala Jiizas an a yuuz dem laif fi du di sitn dem we Jeuova waahn dem fi du, no wa dem waahn fi du.

10. Wa mek kaa yu lov Jiizas yu a-go waahn fi baptaiz?

¹⁰ Yu lov Jiizas kaa yu nuo fi shuor se im a Gad wan dege-dege Bwai Pikni an a im a di wan we Jeuova pik fi ruul uova wi. An yu lov ou im du tingz jos laik ou Jeuova wuda dwi’it. An yu lorn ou im did mek uol iip a piipl we onggri nyam til dem beli ful, an ou im did osh piipl we did sad an mek dem fiil beta, an ou im did mek piipl we did sik get beta. (Mat. 14:14-21) An yu si ou im a ron tingz iina di kanggrigieshan rait ya nou. (Mat. 23:10) An yu nuo se iina di fyuucha, kaa im a King, im a-go du nof nof muor sitn fi wi. Bot wa yu kyan du fi mek im si se yu lov im? Wa yu kyan du a chrai fi du tingz ou im wuda dwi’it. (Jan 14:21) An yu kyan staat fi du dat wen yu gi yu laif tu Jeuova an baptaiz.

11. Wa yu wuda se a di bigis riizn wa mek yu fi baptaiz, an wa mek yu se so?

¹¹ Wa fi bi di bigis riizn wa mek yu fi baptaiz? Jiizas mek wi nuo di muos impuotant laa wen im se: “Yu fi lov di Laad we a yu Gad. Yu fi lov im wid aal a yu aat, yu fi lov im wid aal a yu suol, yu fi lov im wid aal a yu main, an yu fi lov im wid aal a yu chrent.” (Maak 12:30) A so yu lov Jeuova tu?

12. Wa mek yu lov Jeuova? (Luk pan di picha tu.)

¹² Yu av nof riizn wa mek yu fi lov Jeuova. Wan riizn a dat yu get fi si se “a [im] gi laif” an a im gi wi “evri gud sitn​—di sitn dem we no av notn bad bout dem.” (Sa. 36:9; Jmz. 1:17) Evriting we wi lov kom fram wi Gad we lov wi an kain tu wi.

13. Wa mek wen im mek im Bwai Pikni kom ded fi wi a wan a di bigis ting dat Gad kuda eva du fi wi?

¹³ Fi sen im Bwai Pikni kom ded fi wi a wan a di bigis ting dat Jeuova kuda eva du fi wi. Wi se dat kaa Jeuova an im Bwai Pikni kluos bad. Jiizas aal se: “Mi Faada lov mi” an “mi lov mi Faada.” (Jan 10:17; 14:31) An kaa dem did roun dem wan aneda fi uol iip a miliyan an miliyan a ierz dem get kluos kluos. (Pr. 8:22, 23, 30) Jeuova mos did fiil it bad fi si im Bwai Pikni sofa an ded. Bot a kaa im lov yu ino​—an evribadi els tu​—mek im gi op im wan dege-dege Bwai Pikni we im lov so moch so dat yu an ada piipl kyan get fi liv fi eva. (Jan 3:16; Gya. 2:20) Dis a di bigis riizn we mek wi lov Gad.

14. Wa a di bes ting yu kuda eva du wid yu laif?

¹⁴ Di muor yu get fi nuo bout Jeuova a di muor yu lov im. An wi nuo se wa yu wuda waahn a fi get kluosa an kluosa tu Jeuova rait ya nou an fi eva. An rait ya nou ya, yu kyan get kluos tu Jeuova, an a dat im waahn yu fi du, an wen yu du dat, it a-go mek im api. (Pr. 23:15, 16) An bies pan ou yu liv yu laif an di ting dem we yu taak bout, yu kyan mek im api tu. An wen yu du dat, it a-go mek im si se yu riili lov im. (1 Jan 5:3) Dis a-go bi di bes ting yu kuda eva du wid yu laif.

15. Wa yu kyan du fi mek Jeuova si se yu lov im?

¹⁵ Wa yu kyan du fi mek Jeuova si se yu lov im? Di fos ting yu kyan du a prie tu im an mek im nuo se yu waahn fi gi yu laif tu im. (Sa. 40:8) Wen yu baptaiz an mek ada piipl si se yu gi yu laif tu im, yu a-go fain se dis a di bes ting yu kuda eva du wid yu laif. Kaa yu naa go a liv an a du di sitn dem we yu waahn fi du bot yu a liv fi du di sitn dem we Jeuova waahn yu fi du, a dis a-go mek yu api. (Ruo. 14:8; 1 Pii. 4:1, 2) Dis a wan big ting, no chuu? An it a-go bi di bes ting yu kuda eva du wid yu laif. Wa mek yu kyan se so?

16. Azkaadn tu Saam 41:12, a wa Jeuova a-go du fi di piipl dem we gi dem laif tu im an a sorv im?

¹⁶ Nobadi no kain laik Jeuova. An no mata wa yu gi Jeuova, im a-go gi yu muor dan yu kuda eva gi tu im. (Maak 10:29, 30) Aalduo tingz so bad iina da worl ya, im kyan mek yu enjai laif rait ya nou ya. Ye man, afta yu baptaiz yu a-go get da swiit laif de. Yu a-go kyan sorv Jeuova we yu lov so moch fi eva. An yu a-go fain se evridie yu a-go lov im muor an muor. An jos laik ou im a-go a liv fi eva a siem so yu a-go liv fi eva tu.​—Riid Saam 41:12.

17. Wa yu kyan gi Jeuova we im no av aredi?

¹⁷ Wen yu gi yu laif tu Jeuova an get baptaiz, yu get fi gi im sopm we wot nof tu im. A Jeuova gi yu evriting gud iina yu laif we yu a enjai. So fi mek im si se yu tangk im fi wa im du yu kyan gi im sitn we im no av​—dat a fi mek im si se yu redi fi sorv im no mata wa. (Juob 1:8; 41:11; Pr. 27:11) Notn els no beta fi yu du wid yu laif dan fi yuuz it fi sorv Jeuova. Ye, a kaa yu lov Jeuova mek yu a-go get baptaiz.

18. Wa a som kwestiyan yu kyan aks yuself?

¹⁸ Ef sumadi aks yu se ef yu a-go baptaiz, a onggl yu wan kyan ansa dat de kwestiyan de. Wa yu kyan du a aks yuself,  ‘Wa fi tap mi fram get baptaiz?’ (Aks 8:36) Memba di chrii riizn dem we wi dis luk pan we fi mek yu waahn baptaiz. Di fos riizn a dat yu lov di chuut an yu lov fi du wa rait iina Gad yai. So aks yuself, ‘Mi waahn fi de bout wen evribadi we de bout a taak di chuut an a du wa rait?’ Di sekan riizn a dat yu lov Jiizas Krais. So aks yuself tu, ‘Mi waahn Gad Bwai Pikni fi bi mi King an mi waahn fi du tingz laik ou im wuda dwi’it?’ Di tord an di bigis riizn a kaa yu lov Jeuova. So aks yuself, ‘Mi waahn fi mek Jeuova api kaa mi a sorv im?’ Ef yu se yes tu aal a dem kwestiyan ya den wa mek yu naa baptaiz? Wa fi tap yu?​—Aks 16:33.

19. Wa mek yu no fi if-an-bot an wanda-wanda ef yu fi get baptaiz, an wa Jan 4:34 elp wi fi si se?

¹⁹ Ef yu a if-an-bot an wanda-wanda ef yu fi get baptaiz, memba wa Jiizas did se. (Riid Jan 4:34.) Im se fi du wa Jeuova waahn im fi du komiin laik fuud. Im se dis kaaz fuud a sitn we gud fi wi, an Jiizas did nuo se evriting we Jeuova waahn wi fi du gud fi wi tu. Jeuova no waahn wi fi du notn we a-go ort wi an wi nuo se Jeuova waahn wi fi get baptaiz. (Aks 2:38) So wi nuo fi shuor se ef wi du wa Jeuova waahn wi fi du an baptaiz im wi elp wi. Jos laka ou ef sumadi gi yu som nais nais fuud fi nyam yu wudn if-an-bot an wanda-wanda ef yu fi nyam it, a siem so ef wi nuo se fi baptaiz a sopm gud fi wi du, den yu naa go if-an-bot an wanda-wanda ef yu fi du it niida.

20. Wa wi a-go luk pan iina di neks lesn?

²⁰ Ef yu aks nof piipl wa a tap dem fram get baptaiz dem mait-a tel yu se dem no redi yet. Bot it gud fi nuo se di bigis ting yu kuda mek op yu main fi du a fi gi yu laif tu Jeuova an baptaiz. An wi nuo se dat a no sitn we yu kyan go dis git op an du kaa yu afi tingk bout it aad aad, an yu afi saat out yuself bifuo yu kyan baptaiz. Bot ef yu riili waahn fi baptaiz, ou yu kyan saat out yuself? A dat wi a-go taak bout iina di neks lesn.