1-2. Afta sumadi baptaiz, wa a som a di blesn dem we dem get?

 A WAN nais sitn wen wi baptaiz an ton paat a Jeuova fambili. Di wan dem we get fi du dat fiil laik ou Dievid did fiil wen im mek wi nuo se wen Jeuova pik sumadi fi kom nier tu im, da sumadi de a-go api.​—Sa. 65:4.

² A no eni an enibadi Jeuova pik fi bi paat a im fambili. Jos laik wa wi si iina di lesn bifuo da wan ya, Jeuova jraa nier tu di wan dem we waahn fi jraa nier tu im. (Jmz. 4:8) Wen yu prie an gi yu laif tu Jeuova an get baptaiz, yu a jraa niera an niera tu im iina wan speshal wie. An yu kyan nuo fi shuor se im a-go mek “nof blesn kom dong pan [yu] laik rien we kom dong fram evn, til [yu] no waahn notn muo.”​—Mal. 3:10; Jer. 17:7, 8.

3. Wa a som sitn we di wan dem we gi dem laif tu Jeuova an baptaiz afi a du? (Iikliiziyastiiz 5:4, 5)

³ Wen yu baptaiz, a staat yu staat fi sorv Jeuova. So yu a-go waahn fi du evriting we yu kyan du fi du wa yu pramis im se yu a-go du, aal wen tingz mait-a mek it aad fi yu du dat. (Riid Iikliiziyastiiz 5:4, 5.) An kaa yu a fala Jiizas, yu a-go chrai yu bes fi du di sitn dem we im se yu fi du. (Mat. 28:19, 20; 1 Pii. 2:21) Da lesn ya a-go elp yu fi gwaan fala Jiizas.

 NO TAP FALA JIIZAS AAL WEN YU A GO CHUU SOM CHRAIYAL AN WEN YU FIIL FI DU SOM SITN WE YU NO FI A DU

4. Wa di Baibl miin wen it se Jiizas falara dem wuda kya di “wudn puos we kom wid sofarieshan”? (Luuk 9:23)

⁴ A no laik se yu naa go av no muor prablem afta yu baptaiz. Matarafak, Jiizas did mek im falara dem nuo se dem wuda afi redi fi tek op di “wudn puos we kom wid sofarieshan,” an dem wuda afi redi fi du dat “evridie”. (Riid Luuk 9:23, NWT.) Jiizas neehn did se im falara dem wuda aalwiez de sofa, bot im did a se pan tap a di blesn dem we dem wuda get, dem wuda afi chogl chuu nof sitn tu.​—2 Tim. 3:12.

5. Wa a som a di blesn dem we Jiizas se di wan dem we gi op tingz fi fala im a-go get?

⁵ Fi mek Gad Kindom bi di big ting iina yu laif, yu mait-a did afi gi op sortn wok an ting, ar yu mait-a did afi diil wid yu fambili we did a mek tingz aad fi yu kaa yu did waahn kom sorv Jeuova. (Mat. 6:33) Ef yu did afi diil wid non a dem sitn ya, jos nuo se Jeuova si an nuo aal a di gud sitn dem we yu did du. (Iib. 6:10) An yu mait-a fiil laik ou Jiizas did fiil wen im se: “Nobadi no de bout we lef dem ous, breda, sista, mada, faada, pikni, ar ous an lan fi mi an di [gud nyuuz] we naa go get bak iina dem taim ya ous an lan, breda, sista, mada an pikni. Dem a-go get bak onjrid taim muor, an dem a-go get sofarieshan wid dem tu. An iina di taim we a-go kom, dem wi get fi liv fi eva.” (Maak 10:29, 30) Aal a di blesn dem we yu get muor dan eniting we yu gi op fi sorv Jeuova.​—Sa. 37:4.

6. Wa mek afta yu baptaiz yu stil afi fait fi no du aal kain-a rang sitn?

⁶ Afta yu baptaiz yu stil afi go fait fi no “du aal kain-a rang sitn.” (1 Jan 2:16) Kaa memba se yu a wan a Adam pikni dem so yu a stil wan sina. An som a di taim dem, yu mait-a fiil laik ou Paal did fiil wen im rait an se: “Iina mi aat, mi api bout di Laa we kom fram Gad. Bot fi mi badi a fala wan difrant laa, an da laa de a go gens di Laa we iina mi ed. Fi mi badi a fala sin laa, an it av mi laik prizna​—mi badi du evriting we it se.” (Ruo. 7:22, 23) An it mait-a mek yu fiil a wie kaa yu fiil laik fi du sitn rang som a di taim. Bot wen yu memba wa yu se tu Jeuova wen yu did gi yu laif tu im, it a-go gi yu di chrent fi tan op chrang an du wa rait wen sumadi a temp yu fi du wa rang. So ou it a-go mek tingz iiziya fi yu wen yu memba se yu gi yu laif tu Gad?

7. Kaa yu gi yu laif tu Jeuova, a ou it kyan elp yu fi gwaan du wa im waahn yu fi du?

⁷ Wen yu prie an gi yu laif tu Jeuova, a laik se yu a se ‘Nuo’ tu eniting we yu waahn fi du we Jeuova no waahn yu fi du. (Mat. 16:24, NWT ) So wen notn ar nobadi a tes fi si ef yu a-go du wa rang, yu naa go spen no taim a tingk bout wa yu fi du, kaa yu don mek op yu main aredi se a Jeuova yu a-go lisn tu an a im yu waahn fi mek api. So it a-go komiin laik yu a du laik Juob, kaa aalduo im did a go chuu som chraiyal, im mek op im main an se: “Mi rada ded fos dan ton mi bak pan Gad.”​—Juob 27:5.

8. Ou it kyan elp yu fi no du notn rang wen yu tingk bout wa yu prie an se tu Jeuova wen yu gi yu laif tu im?

⁸ Wen yu tingk bout wa yu did prie an se tu Jeuova wen yu gi yu laif tu im, it a-go elp yu fi tan op chrang an no du wa rang. Laik yu naa go mek sumadi els waif ar ozban fiil laik se yu waahn dem, kaa yu did don mek op yu main aredi se yu naa  go du notn laik dat. An kaa yu no mek yu aat go dong da ruod de iina di fos plies, yu na’afi diil wid di prablem dem we piipl afi diil wid afta dem du dat. Kaa yu a chrai aad fi no du notn rang.​—Pr. 4:14, 15.

9. Wen yu tingk bout di sitn dem we yu se wen yu prie an gi yu laif tu Jeuova, ou dat kyan elp yu fi mek wa Jeuova waahn yu fi du bi di big ting iina yu laif?

⁹ Ef sumadi a-go gi yu wan wok we a-go mek yu kyaahn go a yu miitn dem aafn, yu a-go nuo wa fi du kaa yu did mek op yu main lang bifuo dat bout wa yu a-go du ef sitn laka dis apm. So yu naa go bada tek da wok de an chrai fi mek it wok. Wen yu tingk bout ou Jiizas did mek op im main fi du wa im Faada se im fi du, yu a-go tan op chrang an no du notn we Jeuova no waahn yu fi du an yu a-go memba se a im yu gi yu laif tu.​—Mat. 4:10; Jan 8:29.

10. Afta yu baptaiz, ou Jeuova a-go elp yu fi no tap fala Jiizas?

¹⁰ Wen yu go chuu wan chraiyal, ar sitn ar sumadi a temp yu fi du sitn rang, it gi yu a chaans fi shuo se yu naa go tap fala Jiizas. An yu kyan nuo fi shuor se Jeuova a-go elp yu tu. Di Baibl se: “Gad gud, im naa go mek yu fies no sin an no gi yu wan wie fi diil wid it​—im naa go gi yu muor dan yu kyan manij.”​—1 Kor. 10:13.

WA KYAN ELP WI FI NO TAP FALA JIIZAS?

11. Wa a wan a di bes ting dem yu kyan du fi gwaan fala Jiizas? (Luk pan di picha tu.)

¹¹ Jiizas did sorv Jeuova wid di wol a im aat. An kaa im prie tu Jeuova aafn, it mek im stie kluos tu im. (Luuk 6:12) So ef yu riili waahn fi fala Jiizas afta yu baptaiz, yu fi aalwiez a du tingz fi jraa  niera tu Jeuova. Di Baibl se: “Mek wi gwaan uol aan pan wa Gad mek wi nuo aredi.” (Fil. 3:16) Nof taim, yu a-go ier wa di breda an sista dem go chuu so dem kyan du nof muor iina Jeuova wok. Laik dem mait-a did go a di School for Kingdom Evangelizers, ar som mait-a muuv go wich paat dem niid muor elp fi du di priichin wok. Ef yu kyan du non a dem sitn ya, chrai aad fi dwi’it kaa Jeuova piipl wel waahn fi du muor iina Jeuova wok. (Aks 16:9) Bot wa ef wi kyaahn du non a dem sitn ya rait ya nou? It no miin tu se yu no wot nof tu Jeuova laik dem breda an sista ya. Kaa di big ting a fi wi uol aan tait til di sofarieshan don. (Mat. 10:22) Memba se a wen yu du aal a we yu kyan du fi Jeuova, a dat a-go mek im api. Dis a wan a di ting dem we yu kyan du so dat yu kyan gwaan fala Jiizas afta yu baptaiz.​—Sa. 26:1.

12-13. Wa yu kyan du ef yu no fiil fi du di sitn dem laik ou yu yuus tu du? (1 Korintiyan 9:16, 17) (Luk pan di paat we niem “ Tan Iina Di Ries.”)

¹² Wa ef som a di taim yu fiil laik se yu naa prie fram yu aat an yu no lov fi du di priichin wok so moch agen laik ou yu yuus tu lov fi dwi’it? Ar wa ef yu no lov fi riid di Baibl laik ou yu yuus tu lov fi riid it? Ef yu staat fi fiil dem wie ya afta yu baptaiz, no fiil se a kaa yu no av Jeuova spirit no muor. Kaa memba se yu no porfek, so yu a-go fiil dem wie ya som a di taim. So ef dis a apm tu yu, tingk bout di apasl Paal. Aalduo im did a chrai aad fi fala Jiizas, im did nuo se a no aal di taim im did fiil dem wie ya. (Riid 1 Korintiyan 9:16, 17.) Im se: “Ef a no chuuz mi chuuz fi du it, den aal mi a du, a du di wok we Gad gi mi an chos mi fi  du.” So Paal did mek op im main se im a-go du di priichin wok no mata ou im fiil.

¹³ So no du notn kaaz a ou yu mait-a fiil dem taim de. Mek op yu main fi du di rait ting no mata ou yu fiil. Kaa wen yu du di rait sitn dem, yu a-go fiil beta afta dat. So wen yu gwaan du yu uona Baibl stodi, prie tu Jeuova, an go a yu miitn dem, an priich an dem sitn de, it a-go elp yu fi gwaan fala Jiizas afta yu baptaiz. An wen yu gwaan du dem sitn ya, it a-go push yu breda an sista dem fi eng aan an go chuu tu.​—1 Tes. 5:11.

“UNU FI LUK PAN UNUSELF. LUK AN TES”

14. Wa a som a di sitn dem we yu fi aalwiez a luk pan, an wa mek? (2 Korintiyan 13:5)

¹⁴ Afta yu baptaiz, it a-go du yu gud ef yu luk pan yuself aafn an si ou yu a gwaan. (Riid 2 Korintiyan 13:5.) So luk an si ef yu a prie evridie, ef yu a riid an a stodi di Baibl, ef yu a go a yu miitn dem, an fi si ef yu a du di priichin wok. An chrai an si ou yu kyan du muor iina dem sitn ya. So yu kyan aks yuself dem kwestiyan ya: ‘Mi kyan tel sumadi bout di mien ting dem we di Baibl a tiich? Wa mi kyan du fi mek mi kyan enjai di priichin wok som muo? Wen mi prie tu Jeuova, mi a tel im egzakli ou mi fiil an wa mi waahn? An wen mi prie tu im, mi a mek im si se a im mi chos iina? Mi a go a mi miitn dem aafn? An wa mi kyan du fi sidong an lisn gud wen mi go a miitn an fi put op mi an an ansa kwestiyan muor?’

15-16. Wen wi luk pan wa did gwaan wid Robert, ou dat kyan elp wi fi no du sitn we Jeuova no waahn wi fi du?

¹⁵ It gud fi luk pan yuself fi si som a di sitn dem we Jeuova waahn yu fi du we yu mait-a fain it aad fi du. Laik wan breda we niem Robert tel wi bout wa did apm tu im. Im se: “Wen mi did a bout 20 ier uol, mi did av wan likl wok a du som a di taim. Wan die afta wok don, wan a di uman dem we mi wok wid invait mi fi kom a ar yaad afta wi don wok. Shi tel mi se nobadi els naa go de a di yaad an ‘wi a-go av wan nais taim.’ Wen it dis apm, mi tel ar som likl riizn wa mek mi kudn kom, bot afta dat, mi tel ar wa mek mi naa go kom.” Robert no mek ar mek im du notn rang, an dat a sopm gud. Bot afta dat, Robert luk pan imself an si se im kuda du tingz beta. Im se: “Mi neva se nuo tu ar kwik laik ou Juozif did se nuo  tu Patifa waif kwik. (Jen. 39:7-9) Matarafak, mi did fraitn fi si ou mi did fain it aad fi tel ar nuo. Wa did apm mek mi si se mi fi du muor tingz fi mek mi an Jeuova get kluosa.”

¹⁶ It mait-a du yu gud ef yu luk pan yuself laik ou Robert did luk pan imself. Aal ef yu no en op a du sitn we sumadi ar sitn did a temp yu fi du, aks yuself da kwestiyan ya: ‘A ou lang it did tek mi fi se nuo?’ An ef yu si se yu kuda du beta, no biit op yuself. Jos api se yu riyalaiz se yu av sitn fi wok pan. Prie tu Jeuova bout it an du tingz so dat yu kyan tan op chrang an du di sitn dem we Jeuova waahn yu fi du.​—Sa. 139:23, 24.

17. Wa Jeuova niem did afi du wid wa did apm tu Robert?

¹⁷ A no onggl dat did apm tu Robert. Im se: “Afta mi tel ar nuo, shi se, ‘Yu paas di tes man!’ So mi aks ar wa shi miin bai dat. Shi se ar fren, we did a wan Jeuova Witnis, tel ar se aal a di yong piipl dem we a Jeuova Witnis a du sitn rang anda di kwaiyat ef dem get di chaans fi du it. So shi tel ar fren se shi wuda kom tes mi fi si wa mi wuda du. Nou mi api se mi du wa mi did du an big op Jeuova niem.”

18. A wa yu mek op yu main fi du afta yu baptaiz? (Luk pan di paat we niem “ Som Sitn We Yu A-Go Laik.”)

¹⁸ Wen yu prie tu Jeuova an gi yu laif tu im an baptaiz, yu shuo se yu waahn fi big op im niem no mata wa apm. An yu kyan nuo fi shuor se Jeuova nuo aal a di chraiyal dem we yu a go chuu an di sitn dem we im no waahn yu fi du we yu a mek shuor se yu no du. An im a-go bles yu fi dat. So yu kyan nuo fi shuor se, im a yuuz im uoli spirit fi gi yu di chrent fi no du dem ting de tu. (Luuk 11:11-13) Ye man, Jeuova a-go elp yu fi gwaan fala Jiizas afta yu baptaiz.