1. A wa som piipl we a sorv Jeuova mait-a a wanda bout som a di taim?

 IT MEK wi fiil gud fi nuo se Jeuova lov im piipl dem an dem a mek im aat glad. Di Baibl se: “Jeuova lov im piipl dem kyaahn don.” (Sa. 149:4) Bot som a di taim, som a wi mait-a fiil a wie an a wanda ef Jeuova stil lov wi an ef wi a mek im aat glad. Bot aal piipl we did a worship Gad di rait wie iina Baibl taim did wanda bout dis som a di taim tu.​—1 Sam. 1:6-10; Juob 29:2, 4; Sa. 51:11.

2. A uu a mek Jeuova aat glad?

² Di Baibl mek wi si se aalduo wi no porfek, wi kyan stil du tingz we mek Jeuova api. An wi kyan du dis ef wi chos iina Jiizas Krais an baptaiz. (Jan 3:16) Wen wi du dat, wi mek evribadi si se wi ton we fram wi sin dem an se wi pramis Gad se wi a-go du wa im waahn wi fi du. (Aks 2:38; 3:19) An Jeuova api wen wi du dem sopm ya so dat wi an im kyan ton fren. So langks az wi du wa wi kyan du fi du wa wi pramis im se wi a-go du wen wi did gi wi laif tu im, wi a mek Jeuova aat glad an wi an im a-go bi gud fren.​—Sa. 25:14.

3. A wa a di kwestiyan dem we wi a-go get di ansa fa iina da lesn ya?

³ Bot wa mek som piipl mait-a fiil se dem naa mek Jeuova aat glad? An wa Jeuova du fi mek piipl si se dem a mek im aat glad? An wa wan Kristiyan kyan du fi nuo fi shuor se dem a du tingz fi mek Jeuova aat glad?

 WA MEK SOM PIIPL MAIT-A FIIL SE DEM NAA DU TINGZ FI MEK JEUOVA AAT GLAD?

4-5. Aalduo som a di taim wi fiil laik wi no wot notn, wa wi kyan nuo fi shuor se?

⁴ A nof a wi fiil laik se wi no wot notn fram wi a pikni. (Sa. 88:15) Wan breda we niem Adrián se: “Mi aalwiez fiil woklis. Fram we mi kyan memba fram mi a likl pikni, mi aalwiez a prie se mi fambili get fi go iina Paradais, bot mi did nuo fi shuor se mi neehn a-go riich de.” An Tony, we neehn gruo az wan Jeuova Witnis, se: “Mi mada an faada neva tel mi se dem lov mi yet, an dem neva tel mi se dem proud a mi niida. Bot dem aalwiez tel mi se mi kuda gwaan beta.”

⁵ Ef som a di taim wi fiil laik se wi no wot notn, wi fi memba se a Jeuova did jraa wi tu im. (Jan 6:44) Im si di gud wiez dem we wi av we wi no si iina wiself an im nuo wa a gwaan iina wi aat. (1 Sam. 16:7; 2 Kr. 6:30) So wi kyan biliiv Jeuova wen im se wi wot nof tu im.​—1 Jan 3:19, 20.

6. A ou di apasl Paal did fiil bout di sitn dem we im yuus tu du bifuo im lorn di chuut?

⁶ Som a wi mait-a stil fiil gilti bout som a di sitn dem we wi yuus tu du bifuo wi lorn di chuut. (1 Pii. 4:3) An nof piipl we a sorv Jeuova di rait wie stil a chrai aad fi no du di sitn dem we dem no fi du. Ef yu afi a chrai aad tu fi du wa rait, jos nuo se aal piipl we a sorv Jeuova fram lang taim did afi chrai aad tu. Laik aal di apasl Paal did afi chogl fi du wa rait tu. Im did fiil laik se im a wan sari kies fi chuu. (Ruo. 7:24) An wi nuo se Paal did sari fi di rang sitn dem we im did a du, an im tap du dem an baptaiz. Bot im did stil se “di res a di apasl dem beta dan [im]” an se “[im] a did di wos kain-a sina.”​—1 Kor. 15:9; 1 Tim. 1:15.

7. Wen it kom aan tu di bad sitn dem we wi du bifuo wi lorn di chuut, wa wi fi memba se?

⁷ Ef wi sari bout di bad sitn dem we wi du, Jeuova se im a-go paadn wi. (Sa. 86:5) So wi nuo fi shuor se ef wi riili sari bout di bad sitn dem we wi du, im a-go paadn wi fi chuu.​—Kol. 2:13.

8-9. Wa kyan elp wi wen wi fiil laik se wi kyaahn du aal a wa wi niid fi du fi mek Jeuova aat glad?

⁸ Aal a wi waahn fi du di sitn dem we Jeuova waahn wi fi du fi sorv im. Bot som piipl fiil se dem kyaahn du aal a wa dem fi du fi mek Jeuova api. Laik wan sista we niem Amanda se: “Mi aalwiez tingk se, ef mi a-go du aal a wa Jeuova waahn mi fi du, mi aalwiez afi de du muor dan wa mi a du. An nof taim, mi chrai fi du muor dan wa mi kyan riili du. An wen mi no get fi dwi’it, mi fiil se Jeuova beks wid mi laik ou mi beks wid miself.”

⁹ Wen wi fiil laik se wi kyaahn du aal a wa wi fi du fi mek Jeuova aat glad, wi fi memba se Jeuova no aad an faas. Im nuo wa wi kyan riili du. An so langks az wi du wi bes fi sorv Jeuova, im api wid dat. An wan neda ting wi kyan du a luk pan an tingk bout som piipl iina di Baibl we did sorv Jeuova wid aal a dem aat. Laik di apasl Paal. Im did wok aad fi wol iip a ier an chravl touzn an touzn mail fi elp staat op nof a di kanggrigieshan dem. Bot wan a di taim dem, im kudn du aal a wa im yuus tu du iina di priichin wok. Bot dat neehn miin tu se im neehn a mek Jeuova aat glad. Paal gwaan du wa im kuda du, an Jeuova did bles im fi dat. (Aks 28:30, 31) An a siem so som a di taim, tingz a-go apm iina wi laif we mek wi naa go kyan du aal a wa wi waahn fi du fi Jeuova. Bot aal Jeuova waahn fi nuo a  se wi a du wa wi a du fi di rait riizn. Mek wi luk pan som wie ou Jeuova shuo se im api wid wi.

WA JEUOVA DU FI SHUO WI SE WI A MEK IM AAT GLAD?

10. A ou wi kyan ier Jeuova a se wi a mek im aat glad? (Jan 16:27)

¹⁰ Im yuuz di Baibl. Jeuova lov fi mek di wan dem we a du wa im se nuo se im api wid dem. An iina di Baibl, a tuu difrant taim im tel Jiizas se im lov im an im api wid wa im a du. (Mat. 3:17; 17:5) Bot yu naa go ier Jeuova a taak tu yu laik ou im did taak tu Jiizas, kaa a di Baibl im a yuuz fi taak tu wi nou. So wi kyan nuo se wi a mek Jeuova aat glad wen wi riid wa Jiizas se iina Matyu, Maak, Luuk, an Jan. (Riid Jan 16:27.) Kaa Jiizas komiin siem wie laik im Faada, wen wi riid di sitn dem we Jiizas se tu im falara dem we neehn porfek, wi kyan tingk bout it laik se a wi Jeuova a taak tu.​—Jan 15:9, 15.

11. Wa mek wen wi a go chuu wan rof taim it no miin tu se Jeuova no api wid wi? (Jiemz 1:12)

¹¹ Im gi wi di sitn dem we wi niid. Jeuova wel waahn fi gi wi di sitn dem we wi niid fi liv. Bot som a di taim, im mait lou wi fi go chuu som rof taim laik Juob. (Juob 1:8-11) Bot ef wi a go chuu som chraiyal, it no miin tu se Jeuova no api wid wa wi a du, bot wa im a du a gi wi di chaans fi wi shuo umoch wi lov im an umoch wi chos im. (Riid Jiemz 1:12.) An wen wi a go chuu wi prablem dem, wi a-go si umoch im lov wi an umoch im a tek kier a wi.

12. Wa wi kyan lorn fram wa did apm wid Dmitrii?

¹² Luk pan wa did apm tu wan Breda we niem Dmitrii we kom fram Iezha. Im did luuz im wok an kudn fain no wok fi uol iip a mont. Bot im mek op im main se im a-go du aal we im kyan du iina di priichin wok fi shuo se im a chos iina Jeuova. Bot uol iip a mont paas an im stil neehn fain no wok. An im get so sik dat im en op iina bed an kudn kom out. An im staat fi wanda ef im a wan gud faada an ozban an ef im did stil a mek Jeuova aat glad. Den wan iivnin, im daata kya wan piis a piepa kom gi im wid Aizaiya 30:15 pan it, we se: “Wa a-go mek yu chrang a wen yu iizi yuself an shuo se yu chos iina mi.” An shi se, “Dadi, wen yu sad bad, jos memba da skripcha ya.” So Dmitrii get fi si se  Jeuova did stil a elp im fi mek shuor se im fambili av fuud fi iit, kluoz fi wier, an somwe fi liv. Im se: “Aal mi did niid fi du a iizi miself an shuo se mi chos iina mi Gad.” So ef yu a go chuu no prablem laik Dmitrii, jos nuo fi shuor se Jeuova a-go elp yu fi go chuu.

13. A uu an uu Jeuova mait-a yuuz fi mek wi si se wi stil a mek im aat glad, an ou dem mait-a dwi’it?

¹³ Im yuuz wi breda an sista dem fi elp wi. Jeuova yuuz wi breda an sista dem fi mek wi si se im api wid wi. Laik im mait mek dem se sopm tu wi di rait taim we mek wi fiil beta. An a dat did apm tu wan sista we kom fram Iezha we did a go chuu som uol iip a schres. Shi did luuz ar wok an shi get sik bad. An pan tap a dat, ar ozban go sin bad an kudn bi wan elda no muor. Shi se: “Mi did staat fi wanda ef mi du sitn rang an Jeuova no api wid mi agen.” So shi beg Jeuova fi mek ar si se shi stil a du tingz fi mek im aat glad. Shi se: “Di elda dem iina di kanggrigieshan taak wid mi an mek mi si se Jeuova stil lov mi.” An afta dat, shi aks Jeuova fi elp ar agen. An shi se: “Da siem die de, som breda an sista fram mi kanggrigieshan rait wan leta sen kom gi mi. An wen mi riid wa dem rait, it mek mi fiil beta kaa Jeuova ansa mi prieya.” So wi si se Jeuova yuuz wi breda an sista dem fi se tingz tu wi fi mek wi si se im api wid wa wi a du.​—Sa. 10:17.

14. Wa a wan neda wie we Jeuova shuo wi se wi stil a mek im aat glad an im lov wi?

¹⁴ Jeuova aal mek wi breda an sista dem jraa wi op som a di taim tu fi mek wi si se wi stil a mek im aat glad an im lov wi. Laik Jeuova did yuuz di apasl Paal fi rait 14 difrant leta tu di breda an sista dem dem taim de. An kaa Paal did lov di breda  an sista dem, im did afi jraa dem op iina som a di leta dem. Jeuova did mek Paal du dat kaa Jeuova komiin laik wan faada we lov im pikni dem an a-go jraa dem op wen a taim fi im jraa dem op. (Pr. 3:11, 12) So wen Jeuova yuuz sumadi fi jraa wi op, wi fi nuo se Jeuova a mek wi si se wi stil a mek im aat glad. (Iib. 12:6) Wa a som ada sitn we Jeuova du we mek wi si se im api wid wi?

WA A SOM ADA TINGZ WE SHUO SE WI STIL A MEK JEUOVA AAT GLAD?

15. A uu Jeuova gi im uoli spirit tu, an wa mek dis kyan mek wi fiil gud?

¹⁵ Jeuova gi di piipl dem we a mek im aat glad im uoli spirit. (Mat. 12:18) So yu kyan aks yuself da kwestiyan ya: ‘Di wie ou mi liv mi laif, mi get fi du tingz we shuo se mi av Gad uoli spirit?’ Laik yu fain se yu a tek yu taim wid piipl muor dan bifuo yu did lorn di chuut? Kaa di muor wi get fi du dem sitn ya we shuo se wi av Gad uoli spirit, a di muor wi get fi si se Jeuova api wid wi.​—Luk pan di paat we niem “ The Fruitage of the Spirit Is . . . ”

16. A uu Jeuova a yuuz fi priich di gud nyuuz, an ou dat mek yu fiil? (1 Tesaluoniyan 2:4)

¹⁶ Jeuova api fi sen di wan dem we a mek im aat api wid di mesij bout di gud nyuuz. (Riid 1 Tesaluoniyan 2:4.) Luk ou it did mek wan sista we niem Jocelyn fiil gud wen shi du dis. Shi se wan die shi git op an fiil sad bad. Shi se: “Mi fiil laik se mi neehn av no chrent iina mi fi du notn fi nobadi. Bot mi a did wan paiyanier, an da die de a did mi sorvis die, so mi prie tu Jeuova an go a sorvis.” Da siem maanin de, Jocelyn taak tu wan nais uman we niem Mieri, we did redi fi stodi di Baibl. An kopl mont afta dat, Mieri tel ar se wen shi kom nak pan ar duor, shi did a prie tu Gad fi elp ar. Wen Jocelyn tingk bout wa apm, shi se, “Mi fiil laik se Jeuova did a se, ‘Mi api wid yu mi gyal!’” Wi nuo se a no evritaim wi go a sorvis wi a-go get sumadi laik Mieri fi taak tu, bot wi kyan nuo fi shuor se Jeuova api wen wi du wi bes fi tel ada piipl bout di gud nyuuz.

17. Wa wi kyan lorn fram wa Vicky did se bout ou Jiizas did kom gi op im laif fi wi sin dem? (Saam 5:12)

¹⁷ Kaa Jiizas did kom ded fi wi, it mek  Jeuova kyan paadn di wan dem we Im api wid di sitn dem we dem a du. (1 Tim. 2:5, 6) Bot wa ef wi stil fiil laik se Jeuova no api wid di sitn dem we wi a du aalduo wi biliiv se im did sen im Bwai Pikni fi kom ded fi wi an wi baptaiz? Wa wi fi memba a dat a no aal di taim wi a-go fiil di rait wie bout tingz. Bot wi kyan aalwiez chos Jeuova kaa im nuo se di wan dem we biliiv se Jiizas kom ded fi dem a du wa rait, an im pramis dem se im a-go bles dem. (Riid Saam 5:12; Ruo. 3:26) Wen Vicky tingk bout ou Jiizas kom ded fi wi, it elp ar. Wan die afta shi tingk bout it, shi se: “Jeuova a tek im taim wid mi. . . . Bot it did stil komiin laik mi a se tu im se: ‘Yu no lov so moch fi lov sumadi laka mi. Iivn duo yu Bwai Pikni ded fi di uol a wi, mi a sin so moch mi no tingk wa im du kyan kova fi mi sin dem.’” Bot wen shi sidong an tingk bout ou Jeuova sen im Bwai Pikni fi kom ded fi wi, it mek ar si se Jeuova riili lov ar. So wen wi sidong an tingk bout ou Jeuova sen im Bwai Pikni fi kom ded fi wi, it a-go mek wi si se Jeuova riili lov wi tu.

18. Ef wi gwaan lov wi Faada Jeuova, wa wi kyan nuo fi shuor se?

¹⁸ Aalduo wi mait-a chrai aad fi du di sitn dem we da lesn ya se wi fi du, wi mait-a stil fiil a wie som a di taim an a wanda ef di sitn dem we wi a du riili a mek Jeuova aat glad. Ef dat apm tu yu stil, jos memba se Jeuova api wid “evribadi we lov im.” (Jmz. 1:12) So gwaan jraa nier tu Jeuova, an chrai an si ou im a mek yu nuo se yu stil a mek im aat glad. Aalwiez memba se Jeuova “no de faar fram non a wi.”​—Aks 17:27.