A kaa Jiizas gi op im laif an pie wid im blod mek wi kyan get paadn fi wi sin dem. (Ifii. 1:7) Bot di Baibl tel wi tu se: “Bifuo Jiizas did kom, [Gad] neva ponish nobadi fi dem sin, im tek taim wid dem.” So dis a taak bout wen piipl did get paadn bifuo Jiizas kom gi im laif fi wi. (Ruo. 3:25) Bot a ou Jeuova kuda paadn piipl fi dem sin bifuo Jiizas gi im laif fi wi an stil se Im a wan Gad we aalwiez du wa rait an fier?

Yu si fram Jeuova did se im a-go sen im “pikni” fi kom siev aal a di piipl dem we biliiv iina im, it wuda komiin laik se Jiizas did don gi im laif fi piipl aredi. (Jen. 3:15; 22:18) Kaa Jeuova did nuo fi shuor se im wan dege-dege Bwai Pikni wuda redi fi kom gi im laif fi wi. (Gya. 4:4; Iib. 10:7-10) So wen Jiizas did de pan ort, Jeuova did gi im di powa fi paadn piipl fi dem sin bifuo im did gi op im laif fi dem. Jiizas kuda paadn di piipl dem we a chos iina Jeuova kaa im did nuo se im did a-go gi op im laif fi dem so dem wuda get paadn fi dem sin dem.​—Mat. 9:2-6.