1-2. Wa sumadi fi du ef dem waahn fi baptaiz?

 FI DI paas faiv ier, a muor dan wan miliyan piipl baptaiz an ton wan Jeuova Witnis. An nof a dem did lorn bout Jeuova fram dem a “likl pikni” laik Timoti. (2 Tim. 3:14, 15) An som a dem lorn bout Jeuova wen dem a big sumadi, som piipl aal lorn wen dem uol tu. Laik kopl ier ago, wan uman stodi di Baibl wid di Jeuova Witnis dem an baptaiz wen shi a 97!

² Ef yu a sumadi we a stodi di Baibl wid di Jeuova Witnis dem ar yu mada an faada a wan Jeuova Witnis an yu a plan fi get baptaiz, dat a sitn gud yu waahn fi du. Bot bifuo yu kyan baptaiz, yu afi prie tu Jeuova an tel im se yu a-go gi yu laif tu im. Iina da lesn ya, yu a-go lorn wa it miin fi gi yu laif tu Gad an it a-go mek yu si wa mek yu no fi mek notn tap yu fram gi yu laif tu Gad an fi baptaiz wen yu redi fi dwi’it.

WA IT MIIN FI GI YU LAIF TU GAD?

3. Tel wi bout som piipl we di Baibl tel wi bout we did bilang tu Gad.

³ Di Baibl tel wi bout piipl we bilang tu Gad kaa dem gi dem laif tu im ar kaa dem yuuz dem laif iina wan speshal wie fi im. Di Izrelait dem did a wan set a piipl we did bilang tu Jeuova, bot som a dem did gi dem laif tu im iina wan speshal wie. Laik yu did av Ieran we did wier wan guol sitn pan im torban, an dat shuo se a im Jeuova pik fi bi di liida fi di priis dem. (Liv. 8:9) Di Nazarait dem did gi dem laif tu Jeuova iina wan speshal  wie tu. Di wod “Nazarait” kom fram di Iibruu wod nazirʹ, we miin “Di Sumadi We Gi Dem Laif Tu Gad.” So di Laa we Gad gi Muoziz did mek dem nuo se dem neehn fi du sortn tingz.​—Nom. 6:2-8.

4. (a) Wen yu prie tu Jeuova an gi yu laif tu im, a wa yu riili a se yu a-go du? (b) Wa it riili miin fi figet bout wa yu waahn? (Luk pan di picha tu.)

⁴ Wen yu prie tu Jeuova an gi yu laif tu im, a se yu a se yu waahn fi fala Jiizas Krais an yu a-go mek di sitn dem we Gad waahn yu fi du bi di big ting iina yu laif. Kaa Jiizas did se: “Ef sumadi waahn fi ton wan a mi falara dem, dem afi figet bout wa dem waahn.” (Mat. 16:24) Iina di Griik langwij, di wod we miin fi “figet bout wa dem waahn” kuda miin se sumadi a-go se nuo tu di ting dem we dem waahn. Plos, sumadi we gi dem laif tu Jeuova a-go afi se nuo tu eniting we Jeuova no waahn dem fi du. (2 Kor. 5:14, 15) So dat miin tu se dem afi se nuo tu “di sitn dem we piipl du wen dem mek dem badi kanchuol dem” laik seks sin an dem sitn de. (Gya. 5:19-21; 1 Kor. 6:18) Yu tingk se kaaz yu naa du dem sitn de it a-go mek laif aad fi yu? Nuo sa! It naa go mek laif aad fi yu ef yu riili lov Jeuova an yu nuo fi shuor se di sitn dem we im tel yu fi du a fi yu uona gud. (Sa. 119:97; Aiz. 48:17, 18) Wan breda we niem Nicholas se: “Yu kyan luk pan di sitn dem we Jeuova a tel yu fi du laik se dem a di prizn baar dem we mek yu kyaahn get fi du wa yu waahn fi du. Ar yu kyan luk pan dem laik se dem a di baar dem pan wan laiyan kiej we a-go mek shuor se di laiyan kyaahn du notn tu yu.”

5. (a) A ou yu mek Jeuova nuo se yu a gi yu laif tu im? (b) Wen wi gi wi laif tu Jeuova, a ou it difrant fram wen wi baptaiz? (Luk pan di picha tu.)

 ⁵ Wen yu prie tu Jeuova an gi yu laif tu im, it miin tu se yu a-go gwaan ‘lov im wid aal a yu suol, wid aal a yu main, an wid aal a yu chrent.’ (Maak 12:30) Da pramis de a bitwiin yu an Jeuova. Bot yu si wen yu baptaiz, yu dwi’it so dat piipl kyan si se yu mek da pramis de tu Jeuova. Wen yu pramis Jeuova se yu a-go gi yu laif tu im, a sitn siiros dat. So yu fi waahn fi du wa yu pramis Jeuova, an Jeuova ekspek yu fi dwi’it tu.​—Iik. 5:4, 5.

WA MEK YU FI PRIE TU JEUOVA AN GI YU LAIF TU IM?

6. Wa push sumadi fi gi dem laif tu Jeuova?

⁶ Di mien riizn wa mek yu fi prie tu Jeuova an gi yu laif tu im a kaa yu lov im. An yu lov im kaa “im spirit . . . mek [yu] waiz an kyan andastan.” So di ting dem we yu lorn bout Jeuova mek yu lov im muor an muor. (Kol. 1:9) Wen yu stodi im wod a so yu nuo fi shuor se (1) Jeuova de fi chuu, (2) se wa iina di Baibl, a im it kom fram, an (3) se im a yuuz im aaganaizieshan fi mek wa im waahn fi apm apm.

7. Wa’a som a di sitn dem we wi fi a du bifuo wi gi wi laif tu Gad?

⁷ Di wan dem we gi dem laif tu Jeuova fi nuo di mien ting dem we di Baibl tiich. An dem fi a du di sitn dem we it se dem fi du. So dem a-go du aal we dem kyan du fi tel ada piipl bout di sitn dem we dem biliiv iina. (Mat. 28:19, 20) An dem a-go lov Jeuova muor an waahn fi sorv im wan. A dat yu  waahn fi du tu? Wen yu lov Jeuova da wie ya, yu naa go gi yu laif tu im an baptaiz jos kaa yu waahn fi mek di sumadi we stodi di Baibl wid yu ar yu mada an faada fiil gud, ar kaaz a dat yu fren dem a du.

8. Kaa yu tangk Jeuova fi aal a wa im du fi yu, wa dat a-go mek yu waahn fi du? (Saam 116:12-14)

⁸ Wen yu tingk bout aal a di gud sitn dem we Jeuova du fi yu, it onggl mek sens se yu gi yu laif tu im. (Riid Saam 116:12-14.) Di Baibl tel wi se Jeuova a di wan we gi wi “evri gud sitn​—di sitn dem we no av notn bad bout dem.” (Jmz. 1:17) Di bigis ting we im du fi wi a fi sen im Bwai Pikni Jiizas fi kom ded fi wi. An wen yu tingk bout it, a it mek yu an Jeuova kyan ton gud gud fren an a it mek yu kyan go get fi liv fi eva tu. (1 Jan 4:9, 10, 19) Wen yu gi yu laif tu Jeuova, yu a mek im si se yu tangk im fi mek im Bwai Pikni kom ded fi yu, an yu a tangk im fi aal a di ada gud sitn dem we im du fi yu tu. (Dyuu. 16:17; 2 Kor. 5:15) Wen wi riid lesn 46 paint 4 iina di buk we niem Yu Kyan Bi Api Nou An Fi Eva! wi a-go get fi nuo ou wi kyan tangk Jeuova fi aal a wa im du fi wi. An wi av wan chrii minit vidiyo iina da paat de we niem Som Sitn We Yu Kyan Gi Tu Gad.

YU REDI FI GI YU LAIF TU GAD AN BAPTAIZ?

9. Wa mek yu no fi mek nobadi fuos yu fi gi yu laif tu Gad?

⁹ Yu mait-a fiil se yu niid fi chienj op som tingz iina yu laif, ar yu mait-a niid muor taim fi du tingz fi shuo se yu a chos iina Jeuova muor bifuo yu kyan gi yu laif tu im an baptaiz. (Kol. 2:6, 7) A no evribadi a-go du di sitn dem we dem lorn siem taim, som piipl a-go tek langga fi dwi’it. Yu av som yong piipl we baptaiz wen dem a pikni, an yu av som we mait-a afi wiet til dem likl uolda bifuo dem kyan baptaiz. So gwaan si we yu kyan du fi du beta an no luk pan wa sumadi els a du.​—Gya. 6:4, 5. 

10. Ef yu fiil se yu no redi fi gi yu laif tu Gad an baptaiz yet, wa yu kyan du? (Luk pan di paat we niem “ Fi Di Wan Dem We Gruo Az Wan Jeuova Witnis.”)

¹⁰ Yu mait-a si se yu no redi fi gi yu laif tu Jeuova yet, bot stil plan fi dwi’it. Prie tu Jeuova fi elp yu fi chienj op wa yu fi chienj op so dat yu kyan gi yu laif tu im. (Fil. 2:13; 3:16) Nuo se Jeuova a-go ier yu wen yu prie tu im an im a-go ansa yu.​—1 Jan 5:14.

WA MEK SOM PIIPL FRIED FI GI DEM LAIF TU GAD AN BAPTAIZ

11. A ou Jeuova a-go elp wi fi gwaan du wa im waahn wi fi du?

¹¹ Som piipl mait-a fried fi gi dem laif tu Jeuova an baptaiz kaa dem fiil se dem mait-a du sitn rang an get put out a di kanggrigieshan. Ef a so yu fiil, nuo se Jeuova kyan gi yu evriting we yu niid so dat yu “kyan liv laik [fi im] piipl an eva du di sitn dem we wi mek im api.” (Kol. 1:10) Im a-go elp yu fi du wa rait. An wi si se im kyan du dat wen wi si ou im diil wid im piipl dem. (1 Kor. 10:13) An a das wai a no nof piipl get put out a di kanggrigieshan dem, kaa Jeuova a elp im piipl dem fi tan op chrang an du wa im waahn dem fi du.

12. Wa a som a di sitn dem wi fi du so dat wi no du notn rang we a-go mek wi get put out a di kanggrigieshan?

 ¹² Kaa nobadi no porfek, aal a wi fiil fi du sopm rang som a di taim. (Jmz. 1:14) Bot yu no mos afi du wa yu fiil fi du. An yu kyan kanchuol di wie ou yu liv yu laif. Yu kyan lorn ou fi kanchuol ou yu fiil aalduo som piipl mait-a se sumadi kyaahn kanchuol ou dem fiil. An yu si iivn ef yu fiil fi du sitn rang, yu no afi dwi’it. Prie tu Jeuova evridie an aks im fi elp yu, gwaan du yu uona Baibl stodi, go a di miitn dem, an tel piipl bout di sitn dem we yu biliiv iina. Wen yu du aal a dem sitn ya, it a-go elp yu fi tan op chrang so dat yu kyan du wa yu did tel Jeuova se yu a-go du wen yu gi yu laif tu im. An aalwiez memba se Jeuova a-go elp yu.​—Gya. 5:16.

13. Wa Juozif did du we wi kyan fala?

¹³ Wa yu fi du a plan wa yu a-go du bifuo yu fiil fi du sitn rang, an it a-go mek it iiziya fi du wa Jeuova waahn yu fi du. Di Baibl tel wi bout som piipl we neehn porfek we did du dat. Laik yu did av Juozif we Patifa waif did a chrai fi mek im sliip wid ar. Bot im did nuo wa im did a-go du. Di Baibl tel wi se “im no du it” an im se: “Ou mi fi du soch a wikid sitn an sin gens Gad?” (Jen. 39:8-10) So Juozif did tingk bout an nuo wa im did a-go du bifuo dis did apm, so it did mek it iiziya fi im du wa rait.

14. Wa kyan elp wi fi no du wa rang?

¹⁴ Yu kyan mek op yu main fram nou fi bi laik Juozif bifuo yu fiil fi du sitn rang? Lorn fi se nuo siem taim tu di sitn dem we Jeuova no laik an no tingk bout dem niida. (Sa. 97:10; 119:165) Wen yu du dat, it a-go iiziya fi yu du wa rait. Kaa yu a-go nuo wa yu fi du bifuo yu fiil fi du sitn rang.

15. Wa sumadi kyan du fi shuo se dem a luk “fi [Jeuova] aad aad”? (Iibruu 11:6)

¹⁵ Yu mait-a nuo se, ye, dis a di chuut an yu waahn fi sorv Jeuova wid aal a yu aat. Bot yu mait-a stil fiil laik se yu no redi fi gi yu laif tu Gad an baptaiz. Yu kyan du laik Dievid we did beg Jeuova se: “Mi Gad, luk iina mi aat an si uu mi riili bi. Luk diip iina mi aat an si di sitn  dem we mek mi fret an wori wori op miself. Luk an si ef mi av notn bout mi we mek mi waahn fi du wa rang. An shuo mi wa fi du so dat mi kyan get fi liv fi eva.” (Sa. 139:23, 24) Jeuova a-go bles di wan dem we “luk fi im aad aad.” So wen yu chrai aad fi du di sitn dem we yu fi du so dat yu kyan gi yu laif tu Jeuova an baptaiz, im a-go bles yu fi dat.​—Riid Iibruu 11:6.

NO TAP JRAA NIER TU JEUOVA

16-17. A ou Jeuova jraa di wan dem we dem mada an faada a Jeuova Witnis tu imself? (Jan 6:44)

¹⁶ Jiizas se a im Faada, Jeuova, a jraa im falara dem kom tu im. (Riid Jan 6:44.) Tingk bout ou dat nais, kaa wa it a se a dat Jeuova si sitn gud iina yu so im a jraa yu tu imself kaa im se dem wan ya we im jraa a fi im uon an dem speshal tu im. (Dyuu. 7:6) So a so im fiil bout yu tu.

¹⁷ Yu mada an faada a mait-a wan Jeuova Witnis, so yu mait-a fiil se yu jos a fala baka dem. Bot memba se di Baibl se: “Jraa nier Gad, an Gad wi jraa nier unu.” (Jmz. 4:8; 1 Kr. 28:9) So wen yu du wa yu fi du fi jraa nier tu Jeuova, im a-go jraa nier tu yu tu. Jeuova si yu fi uu yu bi, aal ef yu mada an faada a wan Jeuova Witnis. So wen yu du wa yu fi du fi sorv Jeuova fi yuself, im a-go jraa nier yu jos laik wa Jiemz 4:8 se.​—Luk pan 2 Tesaluoniyan 2:13.

18. A wa wi a-go luk pan iina di neks lesn? (Saam 40:8)

¹⁸ Wen yu gi yu laif tu Jeuova an baptaiz, yu a du laik Jiizas, kaa im did gi im laif tu Jeuova fi du eniting we Im waahn im fi du. (Riid Saam 40:8; Iib. 10:7) Iina di neks lesn, wi a-go luk pan wa kyan elp yu fi gwaan sorv Jeuova afta yu baptaiz.