1. Wa di Baibl se lov komiin laik?

 “DI WIE ou mi lov yu komiin laka faiya we a bliez, laka faiya fram Ja. Nat iivn flod waata kyan out di lov we mi av fi yu, no riva kyaahn wash it we.” b (Sang A Sal. 8:6, 7) Di wie ou da skripcha ya taak bout lov nais iihn! It a mek di wan dem we marid nuo se dem kyan lov dem wan aneda an no tap.

2. Wa wan man an wan uman we marid fi mek shuor se dem du so dat dem no tap lov dem wan aneda?

² Wan ozban an wan waif afi wok aad fi mek shuor se dem no tap lov dem wan aneda. Yu kyan se it komiin laka wan wud faiya. Wan wud faiya kyan bon an a galang a galang fi eva, bot yu afi gwaan put wud iina it. Ef yu no put no wud iina it di faiya a-go out. A siem so di lov we wan ozban an waif av kyan gwaan an gwaan fi eva an no tap. So dem afi wok aad fi mek shuor se it no ded .Bot som a di taim it mait-a fiil laik se dem no lov dem wan aneda so moch agen, wos wen dem av moni prablem, ar wan a dem sik, ar dem a wok aad fi gruo dem pikni dem. So ef yu marid, ou yu kyan mek da ‘faiya ya fram Jeuova’ no tap bliez? Iina da lesn ya, wi a-go luk pan chrii sitn we yu kyan du fi mek shuor se unu gwaan lov unu wan aneda an api wid unu wan aneda tu. c

3. Ou wen wan ozban an waif du tingz fi get kluosa an kluosa tu Jeuova it elp dem fi gwaan lov dem wan aneda? (Iikliiziyastiiz 4:12) (Luk pan di picha tu.)

³ Fi mek di “faiya fram Ja” no tap bon, wan ozban an wan waif afi wok aad fi mek shuor se dem tan kluos tu Jeuova. Ou dis kyan elp dem iina dem marid laif? Wen wan ozban an waif a gud fren wid Jeuova, dem a-go lisn tu wa im se an a dat a-go elp dem fi no ron op iina prablem we a-go mek dem no lov dem wan aneda agen. (Riid Iikliiziyastiiz 4:12.) Ef dem a piipl we lov Jeuova, dem a-go chrai fi du tingz laik ou im wuda dwi’it, laik dem a-go kain tu piipl, an dem a-go tek dem taim wid dem, an paadn dem. (Ifii. 4:32–5:1) Wan ozban an waif we av dem wiez ya a-go fain it iiziya fi lov dem wan aneda an dem a-go api. Wan sista we niem Lena, uu marid fi muor dan 25 ier, se: “It iizi fi lov an fi rispek sumadi we riili lov Jeuova tu.”

4. Wa mek a did Juozif an Mieri Jeuova did pik fi av di Mesaiya?

⁴ Mek wi luk pan tuu sumadi iina di Baibl we did lov Jeuova fi demself. Wen Jeuova did afi pik wan man an wan uman fi av di Mesaiya, outa a aal a di piipl dem we a Dievid fambili kom dong, a Juozif an Mieri im did pik. Jeuova did du dat kaaz di tuu a dem an im a fren. So Jeuova nuo se wen dem marid, di tuu a dem wuda du tingz di wie ou im waahn dem fi dwi’it. So ef unu marid, wa unu kyan lorn fram ou Juozif an Mieri did du tingz?

5. Wa di ozban dem kyan lorn fram Juozif?

⁵ Kaa Juozif did redi fi du eniting we Jeuova Gad tel im fi du, dat did mek im wan beta ozban. A bout chrii difrant taim Jeuova did tel im sitn fi du we did av fi du wid im fambili an im did redi fi du it aalduo it mait-a neehn iizi. (Mat. 1:20, 24; 2:13-15, 19-21) Kaa Juozif did du wa Jeuova tel im fi du, it did mek im kuda tek kier a im waif. Kaaz a aal a wa Juozif did du, dat did mek Mieri lov an rispek im. So ef yu a wan ozban, yu kyan du laik Juozif an luk iina di Baibl fi si ou yu kyan tek kier a yu fambili. d An wen yu du wa yu lorn se yu fi du aal wen it aad, it a-go mek yu waif si se yu lov ar. Wan sista we liv iina Vanuatu we did marid fi muor dan 20 ier se: “Wen mi ozban chrai fi fain out wa Jeuova waahn im fi du an dwi’it, dat mek mi rispek im muor. An it mek mi fiil sief an it mek mi chos wa im se wi fi du.”

6. Wa di waif dem kyan lorn fram Mieri?

 ⁶ Mieri an Jeuova did a fren, shi neehn did a sorv Jeuova jos kaaz Juozif did a sorv im. Shi did nuo wa Gad Wod se gud gud fi arself. (Luk pan di stodi nuot pan Luuk 1:46, NWT.) An shi tek di taim fi sidong an tingk bout wa shi riid. (Luuk 2:19, 51) Kaa Mieri lov Jeuova so moch, it did mek ar wan gud waif, an nof a di waif dem tide a du siem laik Mieri. Laik wan sista we niem Emiko se: “Wen mi neva marid, a mi yuus tu du di sitn dem we mek mi get kluos tu Jeuova. Bot afta mi marid an mi ozban staat fi du dem sitn de fi mi, it komiin laik mi did a chos iina Jeuova jos kaaz a wa im did a du. So mi si se mi did niid fi du tingz fi miself fi mek mi an Jeuova get kluosa an kluosa. So mi staat fi prie an riid mi Baibl an tingk bout wa mi riid fi miself.” (Gya. 6:5) So unu we a waif, wen unu gwaan du di ting dem fi mek unu an Jeuova get kluosa an kluosa, dat a-go mek unu ozban big unu op an lov unu muor an muor.​—Pr. 31:30.

7. Wa di ozban an waif dem kyan lorn bout worship fram Juozif an Mieri?

⁷ Juozif an Mieri did get fi si se wen dem worship Jeuova tugeda, it wuda mek dem fambili api. (Luuk 2:22-24, 41; 4:16) An kaa dem fambili did a get biga an biga, it mait-a did aada fi dem du dat, bot dem stil dwi’it. An di ozban an waif dem, speshali di wan dem we av pikni, kyan du laik Juozif an Mieri. It mait-a aad fi unu kip unu fambili Baibl stodi, an go a di miitn dem, an fi fain taim fi stodi tugeda. Bot wen unu du aal a dis tugeda, it a-go mek unu get kluosa an kluosa tu unu wan aneda. So unu fi mek fi worship Jeuova di big ting iina unu laif.

8. Wa wan ozban an waif we no so api wid dem wan aneda kyan du fi enjai dem fambili Baibl stodi?

⁸ Wa ef unu no so api wid unu wan aneda? Unu naa go waahn fi spen nof taim wid unu wan aneda bout unu a du fambili Baibl stodi. Ef a so unu fiil, no mek di fambili Baibl stodi tuu lang. Du sitn we di tuu a unu waahn fi du. Wen unu du dis, likl bai likl it a-go mek unu lov unu wan aneda muor an mek unu api fi worship Jeuova tugeda.

9. Wa mek tuu piipl we marid fi spen taim wid dem wan aneda?

⁹ Wen unu marid an unu spen nof taim wid unu wan aneda, unu a-go fain se unu a-go lov unu wan aneda muor an muor. Unu naa go git op wan die iina di ous an fain se unu no kluos tu unu wan aneda no muor. (Jen. 2:24) Lilia an Ruslan we marid fi muor dan 15 ier nou, likl afta dem marid dis a wa dem fain out se, dem se: “Wi fain out se wi wudn av uol iip a taim fi spen wid wi wan aneda laik we wi tingk wi wuda av. Evridie wi gaan a wok, wi av uol iip a ous wok fi du, an pan tap a dat, wi staat fi av pikni. So wi fain out se ef wi no chrai fi fain taim fi spen wid wi wan aneda, wi naa go fiil kluos tu wi wan aneda agen.”

10. Ou di wan dem we marid kyan du wa Ifiijan 5:15, 16 se dem fi du?

¹⁰ Wan ozban an waif fi saat out tingz so dat dem kyan spen nof taim wid dem wan aneda. (Riid Ifiijan 5:15, 16.) Wan breda iina Naijiiriya we niem Uzondu se: “Wen mi a saat out aal a wa fi du iina di taim we mi av, mi mek shuor se di taim  we mi fi spen wid mi waif iina it tu, an dat de a di tap a mi lis.” (Fil. 1:10) Anastasia, wan sorkit uovasiya waif iina Malduova se: “Mi chrai fi du di sitn dem we mi av fi du wen mi ozban a du fi’im wok wid di elda dem iina di difrant difrant kanggrigieshan dem an dem ting de so das wi kyan av taim fi spen wid wi wan aneda.” Bot wa ef wid aal a wa unu av fi du, unu fain se it aad fi plan out di taim fi spen wid unu wan aneda?

11. Wa a som a di sitn dem we Akwila an Prisila yuus tu du?

¹¹ Di wan dem we marid kyan lorn nof fram Akwila an Prisila. Di breda an sista dem iina fi dem taim did lov dem. (Ruo. 16:3, 4) Aalduo di Baibl no tel wi nof bout dem marid laif, it mek wi nuo se dem yuus tu wok an priich tugeda, an di tuu a dem yuus tu elp out ada piipl tu. (Aks 18:2, 3, 24-26) Az a matarafak, di Baibl aalwiez taak bout di tuu a dem wan taim.

12. Wa a som sitn we wan ozban an waif kyan du fi spen taim wid dem wan aneda? (Luk pan di picha tu.)

¹² Unu we marid, unu tingk unu kuda du som a di sitn dem we unu av fi du wid unu wan aneda laik Akwila an Prisila? Akwila an Prisila did priich tugeda. Unu kuda saat out tingz so dat unu kyan priich wid unu wan aneda tu? Akwila an Prisila yuus tu wok wid dem wan aneda tu. Ye, yu an di sumadi we yu marid tu mait-a no av di siem jab, bot unu tingk unu kuda du som a unu ouswok tugeda tu? (Iik. 4:9) Wen unu chrai fi du tingz wid unu wan aneda, unu a-go fiil laik unu a wan, an unu a-go get fi taak wid unu wan aneda nof. Robert an Linda marid fi muor dan 50 ier, an im se: “Fi tel yu di chuut, wi na’av nof taim fi enjai wiself tugeda, bot yu si wen mi a wash pliet an mi waif kom jrai dem, ar ef mi de outa duor a wiid op som graas an shi kom wok wid mi, mi fiil gud. Wen wi du tingz wid wi wan aneda, it mek wi get kluosa an kluosa an it mek wi lov wi wan aneda muor tu.”

13. Fi wan ozban an waif riili wok tugeda az wan, wa dem fi du?

¹³ Memba se kaa unu a liv iina di siem ous it no miin tu se unu a liv tugeda az wan. Wan waif we liv iina Brazil se: “Mi fain se kaa wi a liv iina di siem ous it no miin se wi a spen uol iip a taim wid wi wan aneda. Mi afi spen taim wid mi ozban a taak tu im an a lisn tu im.” An a dat Bruno an im waif we niem Tays du. Ier wa Bruno se, im se: “Wen wi a spen taim wid wi wan aneda, wi mek shuor se wi no av wi fuon dem wid wi so dat wi kyan enjai wi wan aneda kompni.”

14. Ef tuu sumadi we marid fain se dem no lov fi spen taim wid dem wan aneda, wa dem kyan du?

 ¹⁴ Bot wa ef unu fain se unu no lov fi spen nof taim wid unu wan aneda kaaz unu no laik di siem ting? Ar unu kyaahn tan unu wan aneda somtaim. Wa unu tingk unu kyan du? Memba di wud faiya we wi did taak bout aredi, it no jos staat fi bliez so, yu afi tek taim an put likl likl wud iina it fi it fi staat bliez, no chuu? A siem so unu afi spen likl likl taim wid unu wan aneda evridie, an mek shuor se eniting we unu du a sitn we di tuu a unu lov fi du an a no sitn we a-go kaaz prablem. (Jmz. 3:18) Wen unu staat fi du tingz likl likl, unu mait-a fain se unu staat fi lov unu wan aneda muor agen.

15. Wa mek tuu sumadi we marid afi rispek dem wan aneda ef dem no waahn dem lov fi ded?

¹⁵ Di tuu a unu we marid fi rispek unu wan aneda fi’it wok out. It komiin laik di briiz we wan wud faiya niid so dat it no ded. A siem so ef wan ozban an waif no rispek dem wan aneda, it a-go mek di lov we dem av fi dem wan aneda ded kwik kwik. Bot ef dem wok aad fi rispek dem wan aneda, dem lov a-go bliez. So di big ting a no ef yu fiil se yu a rispek di sumadi we yu marid tu, bot a ef dem fiil se yu a rispek dem. Penny an Aret marid fi muor dan 25 ier nou, an shi se: “Yu si kaa wi rispek wi wan aneda, it mek wi no fried fi de roun wi wan aneda iina di ous an fi tel wi wan aneda ou wi riili fiil bout tingz kaa wi nuo se wi kier bout ou di ada sumadi fiil bout tingz.” Wa yu kyan du fi mek di sumadi we yu marid tu fiil se yu rispek dem? Mek wi luk pan ou Iebriyam an Siera did du dat.

16. Wa di ozban dem kyan lorn fram ou Iebriyam did chriit im waif? (1 Piita 3:7) (Luk pan di picha tu.)

¹⁶ Di wie ou Iebriyam chriit Siera shuo se im rispek ar an im kier bout ou shi fiil bout tingz. Laik wan a di taim wen shi did schres out bad, shi did mek Iebriyam nuo ou shi fiil. Shi aal did a bliem im tu. Bot Iebriyam neva rof ar op kaa im did nuo se Siera aalwiez wok wid wa im se. So im lisn tu ar an im chrai fi fiks di prablem. (Jen. 16:5, 6) Wa wan ozban kyan lorn fram dis a se wen it kom aan tu di fambili, a im av di laas se. (1 Kor. 11:3) Bot dat no miin se im naa go tingk bout ou im waif fiil bout sopm bifuo im mek op im main bout wa di fambili fi du, wos wen a sitn fi du wid ar. Im a-go du dis kaa im lov ar. (1 Kor. 13:4, 5) An somtaim yu waif a-go schres out an waahn fi taak bout ou shi fiil. Wen yu lisn gud tu wa shi a se, yu a shuo se yu rispek ar. (Riid 1 Piita 3:7.) Angela an Dmitry marid fi  bout 30 ier nou. Angela tel wi wa ar ozban du fi mek ar si se im rispek ar, shi se: “Dmitry aalwiez lisn tu mi aal wen mi beks bout sitn. Aal som a di taim wen mi nat iivn nuo wa mek mi fiil di wie ou mi fiil bout sitn, im stil tek im taim wid mi.”

17. Wa di waif dem kyan lorn fram wa Siera did du? (1 Piita 3:5, 6)

¹⁷ Siera aalwiez wok wid wa Iebriyam se. A so shi shuo se shi rispek im. (Jen. 12:5) Tingk bout wan a di taim wen chrii man kom a Iebriyam yaad we im neehn plan fa, an im did waahn gi dem sitn fi iit. Im aks Siera fi tap wa shi a du an go luk bout som bred fi dem. (Jen. 18:6) An Siera du wa im se siem taim. Unu we a waif, unu kyan du laik Siera an wok wid wa unu ozban se im wuda waahn fi apm? Wen unu du dat, unu a mek unu marid laif get beta an beta. (Riid 1 Piita 3:5, 6.) Dmitry, we wi taak bout aredi, tel wi wa im waif du we mek im fiil laik se shi rispek im. Im se: “Mi riili laik ou Angela chrai aad fi wok wid eniting we mi se aal ef wi no fiil di siem wie bout it. An ef tingz no wok out di wie ou mi wuda waahn it fi wok out, shi no mek mi fiil bad kaaz a it.” Yu si wen sumadi rispek yu, it mek it iizi fi yu lov dem.

18. Ou it kyan elp wan ozban an waif wen dem wok aad fi mek shuor se dem lov no ded?

¹⁸ Aal a unu we marid an a sorv Jeuova ya nou ya, wa Sietan waahn fi du a mek unu no lov unu wan aneda no muor. Kaa im nuo se wen unu tap lov unu wan aneda, unu a-go tek taim lef Jeuova. Bot ef unu riili lov unu wan aneda, unu lov naa go ded. So lov unu wan aneda iina di kain-a wie we di Baibl bok we niem Sang A Salaman taak bout. Mek op unu main fi du wa Jeuova waahn unu fi du. Spen taim wid unu wan aneda an du tingz fi mek unu wan aneda si se unu rispek unu wan aneda. Wen unu du dat, unu marid laif a-go big op Jeuova​—di wan we mek wi so dat wi kyan lov wi wan aneda. An jos laik ou wen yu gwaan put wud iina wan faiya it kyan bon an no tap, a siem so di lov we unu av fi unu wan aneda a-go bon fi eva.