1. Wa Jeuova waahn aal a di piipl dem we a worship im fi du? (Luk pan di picha tu.)

 WEN wi niid sumadi fi osh wi an tel wi wa fi du, di uol a wi nuo se wi kyan aalwiez ton tu Jeuova kaa im a di wan we tel wi se “no tap prie.” (1 Tes. 5:17) Wi kyan go aks im fi elp wi wid eniting we wi waahn im fi elp wi wid iina wi laif. (Pr. 3:5, 6) An kaa im so gud an kain tu wi im lou wi fi prie tu im eni mount a taim wi waahn fi prie tu im.

2. Wa wi a-go luk pan iina da lesn ya?

² Aalduo wi tangk Jeuova se wi kyan prie tu im, kaa wi av so moch sitn fi du evridie wi mait-a fain it aad fi fain di taim fi prie tu im. An wi mait-a fain it aad fi nuo wa fi se wen wi a prie tu im. Bot wi api se wi kyan fain tingz iina di Baibl we kyan elp wi. Iina da lesn ya, wi a-go luk pan wa Jiizas did du an si ou wi kyan du laik im an fain taim fi prie. An wi a-go luk pan faiv sitn we wi kyan prie bout we kyan mek wi prieya dem beta.

3. Wen it kom aan tu prieya, wa Jiizas did nuo?

³ Jiizas did nuo se Jeuova lov it wen piipl prie tu Im. Kaa lang bifuo im kom pan di ort im did si ou im Faada ansa piipl prieya laik Ana, Dievid, an Ilaija wen dem prie tu Im fram dem aat. (1 Sam. 1:10, 11, 20;  1 Ki. 19:4-6; Sa. 32:5) So wi si wa mek Jiizas tel im falara dem se dem fi aalwiez a prie tu Jeuova an nuo se im a-go lisn tu dem.​—Mat. 7:7-11.

4. Wen wi luk pan ou Jiizas did prie, wa wi lorn se?

⁴ Wen Jiizas did de pan di ort, im did mek shuor se im fain taim fi prie, an im falara dem kuda si se dis a sitn we im du we dem kuda fala. An a wol iip a taim im prie wen im a du di wok we Jeuova sen im fi du. An im wuda afi fain taim fi prie kaa nof taim uol iip a piipl wuda de roun im ar im wuda bizi a du di wok we Jeuova sen im fi du. (Maak 6:31, 45, 46) Jiizas wuda get op orli orli iina di maanin so dat im kuda prie wich paat nobadi no de. (Maak 1:35) An wan taim im prie fi di uol nait wen im did av sitn big fi du. (Luuk 6:12, 13) Di nait bifuo Jiizas ded, im did a tingk bout di aadis wok we Jeuova sen im kom ya fi go du, an so da nait de bifuo im ded im did prie uol iip a taim tu Jeuova.​—Mat. 26:39, 42, 44.

5. Ou wi kyan du laik Jiizas wen wi a prie?

⁵ Wen wi luk pan wa Jiizas du, it mek wi si se no mata ou bizi wi bi wi fi fain taim fi prie. So wi mait-a afi get op orli iina di maanin an prie ar dwi’it iina di iivnin. Wen wi fain taim fi prie, wi mek Jeuova si se wi api se wi kyan taak tu im. Wan sista we niem Lynne did memba di fos taim shi did lorn se shi kuda did taak tu Gad. Shi se: “Wen mi lorn se mi kuda taak tu Jeuova enitaim mi waahn, it mek im komiin laik wan gud fren tu mi an im mek mi waahn fi prie tu im gud.” A mait-a so yu fiil tu. So mek wi luk pan faiv gud sitn we wi kyan prie bout.

6. Azkaadn tu Revilieshan 4:10, 11, a wa Jeuova fi get?

⁶ Priez Jeuova. Jan did get wan vijan we im si 24 elda iina evn a worship Jeuova. Im did si dem a priez Jeuova an a se Jeuova fi get “di priez an ana an powa.” (Riid Revilieshan  4:10, 11.) Aal di ienjel dem av nof difrant difrant riizn fi gi Jeuova di priez an di ana kaa dem de a evn wid im. So dem wuda si di sitn dem we im a du an get fi nuo im gud gud. An wen dem si aal a dis, it mek dem waahn fi priez im.​—Juob 38:4-7.

7. Wa an wa wi kyan priez Jeuova fa?

⁷ Wi waahn fi mek shuor se wi priez Jeuova wen wi a prie tu im an mek im nuo se wi lov im an wi glad fi wa im du fi wi. Wen wi a riid an stodi di Baibl, wi fi tek taim an chrai an si di gud wiez dem we Jeuova av we wi riili lov. (Juob 37:23; Ruo. 11:33) Den wi fi tel im bout ou wi fiil bout im wiez dem. Den wi fi priez Jeuova tu fi aal a wa im a du fi wi an di breda an sista dem kaa im aalwiez a tek kier a wi an protek wi.​—1 Sam. 1:27; 2:1, 2.

8. Wa a som a di sitn dem we wi fi tangk Jeuova fa? (1 Tesaluoniyan 5:18)

⁸ Tangk Jeuova. Wi av uol iip a tingz we wi kyan tangk Jeuova fa wen wi a prie. (Riid 1 Tesaluoniyan 5:18.) Wi kyan tangk im fi aal a di gud sitn dem we wi av; an wen yu tingk bout it, aal a di gud sitn dem we wi av a im it kom fram. (Jmz. 1:17) Wi kyan tangk im fi ou im mek di ort priti an fi aal a di nais sitn dem we im mek we de pan it. Wi kyan mek im nuo se wi tangk im fi di laif we im gi wi, an fi wi fambili an fren dem, an fi gi wi sitn gud fi luk faawod tu iina di fyuucha, an fi mek wi an im kyan bi gud gud fren.

9. Wa mek wi mait-a afi wok aad fi tangk Jeuova fi aal a wa im du fi wi?

⁹ Wi mait-a afi wok aad aad fi tingk bout wa wi kyan tangk Jeuova fa iina wi laif. Iina dis ya worl ya we wi liv iina, nof taim piipl no tingk bout tingz we dem kyan gi tangks fa. Ef wi fi du laik dem den wen wi prie tu Jeuova aal wi a-go a du a aks im fi tingz. Fi mek shuor se wi no du dat, wi afi wok aad fi tangk Jeuova fi aal a wa im du fi wi.​—Luuk 6:45.

10. Kaa wan sista did lov fi gi tangks, ou it did elp ar fi go chuu ar prablem dem? (Luk pan di picha tu.)

¹⁰ Wen wi lov fi gi tangks it kyan elp wi fi go chuu wi prablem dem. Tingk bout Kyung-sook. Di tuori bout fi ar laif did kom iina The Watchtower fi Janiweri 15, 2015. Shi did av long kyansa an shi did se: “Dis did lik mi aad an mi did fiil laik se mi neehn av notn fi liv fa an mi did fried bad.” Shi se wa elp ar fi diil wid it a dat a nait taim bifuo shi go a ar bed, shi go pan ar oustap an prie loud bout faiv difrant sitn we shi  did tangk Jeuova fa fi da die de. Dat did mek ar fiil gud an it did mek ar tel Jeuova umoch shi lov im. Dis did mek ar si ou Jeuova a tek kier a di piipl dem we a sorv im. An it did mek ar si se wi av nof muor sitn fi tangk Jeuova fa dan di mount a prablem dem we wi av. Jos laik Kyung-sook, wi av uol iip a sitn we wi kyan tangk Jeuova fa aal wen wi a go chuu wi prablem dem. Wen wi prie an tangk im fi aal a di gud sitn dem we im a du fi wi, it mek wi tan op chrang an diil wid wi prablem dem.

11. Afta Jiizas go a evn, wa mek im falara dem wuda afi no friedi-friedi?

¹¹ Aks Jeuova fi elp yu no fi fried wen yu a priich. Jos bifuo Jiizas go a evn, im mek im apasl dem memba se dem av di wok fi priich bout im “iina Jeruusilem, Judiya, Samieriya an aal uova di worl.” (Aks 1:8; Luuk 24:46-48) An likl afta dat, di Juu liida dem kech Piita an Jan an kyari dem go iina wan miitn wid dem, an dem tel dem se dem fi tap priich an waan dem aaf. (Aks 4:18, 21) Bot wa Piita an Jan did du?

12. Azkaadn tu Aks 4:29, 31, wa Jiizas falara dem did du?

¹² Afta di Juu liida dem waan aaf Piita an Jan, dem se: “Unu joj fi unuself wa unu tingk it rait fi du iina Gad yai, fi du we unu se, ar fi du we Gad se? Kaaz wi kyaahn tap taak bout di sitn dem we wi did si an ier.” (Aks 4:19, 20) Afta dem let go Piita an Jan, Jiizas falara dem staat fi prie tu Jeuova loud loud an aks im fi elp dem fi du wa im waahn dem fi du. Dem prie an se: “Elp yu sorvant dem fi pred yu mesij an no fried a notn.” An Jeuova du wa dem aks im fi du.​—Riid Aks 4:29, 31.

13. Wa wi kyan lorn fram wa did apm tu Jin-hyuk?

¹³ Laik ef di govament tel wi no fi priich, wi kyan du laik Jiizas falara dem. Tingk bout Jin-hyuk we dem did put iina prizn kaa im neehn waahn fi go fait iina dem waar. Wen im did de iina prizn, dem did gi’im di jab fi tek kier a som a di prizna dem we a dem wan iina dem sel. Im neehn fi taak tu dem bout notn we na’av notn fi du wid di wok we dem sen im de fi du an bout notn we av fi du wid di Baibl. Bot im aks Jeuova fi elp im fi no fried fi taak op bout di chuut wen im get di chaans fi dwi’it. (Aks 5:29) Im se: “Jeuova du wa mi aks im fa an im mek mi no fried. An im mek mi nuo ou fi staat stodi wid som a di prizna dem fi faiv minit a dem sel duor. An iina di nait mi wuda rait som leta fi gi tu di man dem iina di maanin.” A siem so wi nuo se Jeuova a-go elp wi fi du di priichin wok. So laik Jin-hyuk, wi kyan prie tu im fi mek wi no fried an fi mek wi waiz.

14. Wa kyan elp wi wen wi a diil wid wi prablem dem? (Saam 37:3, 5)

¹⁴ Aks Jeuova fi elp yu fi diil wid yu prablem dem. Nof a wi naa fiil rait iina wi badi ar iina wi main. An fi som a wi sumadi fi wi ded, ar wi fambili a go chuu wan rof taim, ar piipl a fait gens wi kaaz a wa wi biliiv iina, ar wi a diil wid som ada kain-a prablem. An wen  siknis a go roun ar waar an dem ting de a gwaan, it mek tingz aada fi wi. Wa yu fi du a prie tu Jeuova an tel im aal a wa a gwaan wid yu jos laik ou yu wuda tel wan fren wa a gwaan wid yu, an nuo fi shuor se Jeuova ‘a-go elp yu.’​—Riid Saam 37:3, 5.

15. Ou wen wi prie it kyan elp wi ‘fi no gi op’? Tel wi wa did apm tu Kristie.

¹⁵ Ef wi no tap prie no mata wa, it a-go elp wi fi ‘no gi op wen chobl tek wi.’ (Ruo. 12:12) Jeuova nuo wa di piipl dem we a sorv im a go chuu​—im ier di wan dem we a beg fi im elp. (Sa. 145:18, 19) Wan 29 ier uol paiyanier sista we niem Kristie fain out fi arself se Jeuova a-go elp wi fi chuu. Aal av a sodn shi get sik, so it mek ar sad bad, an den shi go fain out se ar mada sik bad tu an suun ded. Shi se: “Mi prie aad tu Jeuova fi gi mi di chrent fi go chuu evridie. So mi mek shuor se mi no mis di miitn dem an mi uona Baibl stodi.” An shi se: “Wen mi fiil laik mi de iina wan daak uol an mi prie tu Jeuova, a dat elp mi. An mi nuo se Jeuova did aalwiez de de fi mi an dat mek mi fiil gud. Aalduo mi neva get beta siem taim Jeuova gi mi wan piis iina mi aat.” Mek wi aalwiez memba se “[Jeuova] nuo ou fi siev piipl we gud iina im yai fram di chraiyal . . . dem we dem fies.”​—2 Pii. 2:9.

16. Wa mek wi niid Jeuova fi elp wi fi no du notn bad?

¹⁶ Aks Jeuova fi elp yu fi no fies notn we kyan kaaz yu fi sin. Yu si kaaz wi no porfek, evridie wi afi fait aad fi no du notn rang. An Sietan a du wa im kyan du fi mek dis aad fi wi. Wan a di ting dem we im chrai fi yuuz fi doti op wi main a di doti muuvi dem an di doti  myuuzik dem an dem ting de. Dem de sitn de kyan mek wi tingk bout aal kain-a bad sitn an kyan mek wi sin bad tu.​—Maak 7:21-23; Jmz. 1:14, 15.

17. Afta wi prie tu Jeuova fi elp wi fi no du notn rang, wa wi fi du? (Luk pan di picha tu.)

¹⁷ Fi no du notn rang wi a-go niid Jeuova fi elp wi an dis a wa di Laad prieya did se wen it se: “No mek wi fies notn we wi kaaz wi fi sin, bot protek wi fram di wikid wan.” (Mat. 6:13) Aalduo Jeuova waahn fi elp wi, wi afi aks im fi elp wi, an wi fi du di sitn dem we wi prie bout, an wi fi du aal a wa wi kyan du so dat wi no staat fi tingk laik ou Sietan waahn wi fi tingk. (Sa. 97:10) Wen wi riid di Baibl an stodi it, it a-go elp wi fi tingk bout som gud sitn. An wen wi go a wi miitn an fiil sorvis, it a-go elp wi tu. An wen wi du aal a dis, Jeuova mek wi nuo se im naa go gi wi muor dan wi kyan manij.​—1 Kor. 10:12, 13.

18. Wen it kom aan tu prieya, wa di uol a wi fi du?

¹⁸ Kaa wi a liv iina di laas die dem wen di worl so wikid, evri wan a wi afi prie aad aad fi Jeuova elp wi fi du wa im waahn wi fi du. So wi fi fain di taim fi prie tu Jeuova fram wi aat evridie kaa Jeuova waahn wi ‘fi tel im evriting we a gwaan iina wi aat.’ (Sa. 62:8) Wen yu a prie tu Jeuova yu fi priez im an tangk im fi aal a wa im du fi yu. An yu fi aks im fi elp yu fi no fried wen yu a priich. An yu fi beg im fi elp yu wen yu a diil wid yu prablem dem an fi no gi iin tu di bad sitn dem we yu mait-a waahn fi du. No mek nobadi ar notn tap yu fram prie tu Jeuova aafn. Bot yu mait-a wanda ou Jeuova ansa wi prieya dem. A dat wi a-go taak bout iina di neks lesn.