1. Wa wi nuo se a-go apm, bot wa wi shuor se Jeuova a-go du?

 WI NUO se wen wi a du di priichin wok piipl a-go fait gens wi an it mait aal get wosa. (Dan. 11:44; 2 Tim. 3:12; Rev. 16:21) Bot wi nuo se Jeuova a-go elp wi, an wi nuo dat kaa Jeuova aalwiez elp di piipl dem we a sorv im fi du di wok we im gi dem fi du no mata ou aad it mait-a luk. Mek wi luk pan ou Jeuova elp di prafit we niem Iziikel wen im did a priich tu di Juu dem we dem did kyapcha an kya dong a Babilan.

2. Ou Jeuova did se di piipl dem we Iziikel did afi priich tu did tan, an wa wi a-go luk pan iina da lesn ya? (Iziikel 2:3-6)

² Jeuova tel wi se di piipl dem we Iziikel did afi priich tu did “stoban” an “na’av no aat” an se dem “ton dem bak pan” im tu. Dem did komiin laka wen makabush iina yu skin an dem did wikid laik skaapiyan tu. Wi kyan si wa mek Jeuova did afi tel Iziikel muor dan wan taim se im “no fi fried a dem”. (Riid Iziikel 2:3-6.) Iziikel kuda gwaan priich kaa (1) a Jeuova did sen im, (2) im did av Gad spirit, an (3) Gad wod did elp im fi chos iina Gad muo. Ou dem chrii sitn ya did elp Iziikel, an ou dem a elp wi ya nou?

3. Wa Jeuova did se tu Iziikel we did elp im, an ou Jeuova did mek im nuo se Im a-go di de fi im?

³ Dis a wa Jeuova did tel Iziikel se. Im se: “Mi a sen yu.” (Izii. 2:3, 4) Iziikel mos did fiil chrang wen im ier dem wod de kaa im mos did memba se a dem siem kain-a wod ya Jeuova did se tu Muoziz an Aizaiya wen im did a pik dem fi ton im prafit. (Ek. 3:10; Aiz. 6:8) Im did aal nuo se  Jeuova did elp dem tuu prafit de fi go chuu dem prablem dem. So wen Jeuova tel Iziikel tuu taim se ‘im a sen im’, Iziikel kuda si wa mek im nuo se Jeuova wuda di de fi im. Pan tap a dat, iina di Baibl buk a Iziikel, a nof taim wi si it rait dong se Jeuova wod kom tu im. (Izii. 3:16) An a kopl taim tu iina da buk de it se Jeuova wod kom tu im agen. (Izii. 6:1) Iziikel mos did nuo se a Jeuova did sen im. An pan tap a dat, Iziikel faada did a wan priis, so im mos did tel im bout ou Jeuova did elp Im prafit dem bak iina di die fi nuo se Im a-go di de fi dem no mata wa. An Jeuova did tel Aizak, Jiekob, an Jerimaiya se im a-go di de wid dem.​—Jen. 26:24; 28:15; Jer. 1:8.

4. Wa Jeuova did tel Iziikel we did mek im chrang?

⁴ Jeuova did tel Iziikel se wen im go priich tu di Izrelait dem muos a dem wudn lisn. Jeuova tel im se: “Yu si di piipl dem iina Izrel, dem naa go lisn tu yu kaa dem no waahn fi lisn tu mi.” (Izii. 3:7) So wen dem no lisn tu Iziikel a riili Jeuova dem neehn a lisn tu. An dat did mek Iziikel nuo se a no kaa im neehn wan gud prafit mek dem neehn a lisn tu im. Jeuova did aal mek Iziikel nuo se wen di sitn dem we im se wuda apm apm fi chuu, di piipl “dem a-go nuo se wan prafit did de mongks dem.” (Izii. 2:5; 33:33) Wa Jeuova did tel Iziikel did mek im chrang so dat im kuda gwaan du wa im fi du an priich tu di piipl dem.

5. Azkaadn tu Aizaiya 44:8, a wa a-go mek wi tan op chrang?

⁵ A siem so tide wi tan op chrang laik Iziikel kaa wi nuo se a Jeuova sen wi. Im  big wi op wen im se wi a im “witnis.” (Aiz. 43:10) Jos laik ou Jeuova tel Iziikel se: “No fried,” a siem so im tel wi se wi “no fi fried” niida. Wa mek wi no fi fried a di piipl dem we a fait gens wi? Jos laik ou a Jeuova did sen Iziikel an Im did a sopuot im, a siem so wi nuo se a Jeuova sen wi an im a-go sopuot wi tu.​—Riid Aizaiya 44:8.

6. (a) Wa Jeuova du fi mek wi nuo se im a-go sopuot wi? (b) Wa elp wi fi fiil gud an tan op chrang wen wi a priich?

⁶ Jeuova mek wi nuo se im a-go sopuot wi. Laik jos bifuo im did se: “Unu a mi witnis,” im se: “Wen unu a go chuu di wata mi a-go di de wid unu, an wen unu a go chuu di riva dem mi naa go mek it kom dong pan unu. An wen unu a go chuu di faiya it naa go bon unu, di faiya nat iivn a-go toch unu likl bit.” (Aiz. 43:2) Aalduo somtaim wen wi a priich wi go chuu som prablem we komiin laka flod an som we komiin laka faiya, wi naa tap priich kaa Jeuova a elp wi. (Aiz. 41:13) Jos laik ou nof piipl neehn lisn tu Iziikel wen im did a priich, a siem so nof piipl naa lisn tu wi wen wi a priich. Bot wi fi memba se dat no miin tu se wi naa priich gud, an wi fiil gud fi nuo se wans wi gwaan priich Jeuova a-go api wid wa wi a du. Di apasl Paal did se: “[Evribadi] a-go get pie bies pan we dem du.” (1 Kor. 3:8; 4:1, 2) Wan sista we weehn a paiyanier fram lang taim se: “It mek mi fiil gud fi nuo se Jeuova a-go bles wi kaa a aal a di wok we wi du fi im.”

7. Enitaim Iziikel tingk bout di vijan we im did get, wa yu tingk it did du fi im? (Luk pan di picha pan di kova.)

⁷ Iziikel did si se Gad spirit kyan du eniting. Iina di vijan we im did get im did si som tingz we Gad a yuuz im spirit fi du, laik wen it a wok pan Im ienjel dem an laik wen it a wok pan di fuo big wiil we de pan Jeuova chuon we de pan fuo wiil. (Izii. 1:20, 21) Bot wa Iziikel did du wen im si aal a dis? Im se im did fraitn an api so til im jrap imself a grong an pudong im fies pan it. (Izii. 1:28) Afta dat, wen Iziikel tingk bout da vijan ya we im did get it, it mos did mek im tan op chrang kaa im nuo se Gad spirit wuda elp im fi du di priichin wok we im get fi du.

8-9. (a) Ou it did mek Iziikel fiil wen Jeuova tel im se fi git op? (b) An wa els Jeuova du fi gi Iziikel di chrent fi gwaan priich aalduo di piipl dem did stoban?

⁸ Jeuova did tel Iziikel se im fi tan op so Im kyan taak tu im. Dat did mek Iziikel fiil chrang so im kuda git op aafa di grong. Iziikel se Gad spirit gi im di chrent so im kuda tan op. (Izii. 2:1, 2) Afta dat an fi di res a taim wen Iziikel a priich, a Gad uoli spirit did a elp im. (Izii. 3:22; 8:1; 33:22; 37:1; 40:1) Gad spirit did gi Iziikel di chrent fi du di wok we Im gi’im​—fi priich tu di piipl dem we “stoban an na’av no aat.” (Izii. 3:7) Dis a wa Jeuova tel Iziikel se, im se: “Jos laik ou dem tan op chrang infronta yu fies an stoban an no waahn lisn, a siem so mi a-go mek yu tan op chrang infronta dem fies an tel dem wa mi a se. Mi a-go mek yu farid tof laik daiman, tofa dan wan flint stuon. Yu no fi fried a dem an yu no fi fried wen dem a skruu op dem fies an a gwaan laik dem bad.” (Izii. 3:8, 9) A laik Jeuova did a tel Iziikel se im no fi mek kaa di piipl dem stoban im tap priich kaa a Im a-go gi’im di chrent fi priich.

⁹ Afta dat Gad spirit kya Iziikel go a di  plies we im fi priich. Iziikel did rait se Gad spirit did de pan im, an a wan wiik it tek im fi tek iin an andastan di mesij we Gad gi’im fi priich so dat im kuda priich laik se im riili biliiv wa im a se. (Izii. 3:14, 15) Den Jeuova tel im fi go dong iina wan paat a di lan we did flat, an Jeuova spirit go pan im. (Izii. 3:23, 24) So nou Iziikel did redi fi go du di priichin wok.

10. Wa kain-a elp wi niid fi du di priichin wok, an wa mek wi niid it?

¹⁰ Wa kyan elp wi fi du di priichin wok? Di siem ting we did elp Iziikel kyan elp wi ya nou. Bifuo im did staat priich, Jeuova did gi im di chrent we im niid fi du it. An a di siem ting wid wi ya nou, a onggl ef wi av Gad spirit wi kyan du di priichin wok we wi get fi du. An wi nuo dat kaa Sietan a fait gens wi aad aad fi mek wi tap priich. (Rev. 12:17) Wen sumadi luk pan it, it mait-a komiin laik se wi kyaahn win Sietan, bot wi nuo se wen wi gwaan priich a so wi a-go win im! (Rev. 12:9-11) Wi nuo se dat a chuu kaa wen wi go priich wi a shuo se wi no fried a notn we Sietan a-go kom wid. So evritaim wi go priich Sietan luuz di fait. So di fak se wi stil a priich aalduo wi enimi dem a fait gens wi, it mek wi nuo se a Jeuova uoli spirit a elp wi an im api wid wa wi a du.​—Mat. 5:10-12; 1 Pii. 4:14.

11. Wa Gad a-go yuuz im spirit fi du fi wi, an wa wi kyan du fi mek shuor se im no tap gi wi it?

¹¹ Wen wi memba se Jeuova did mek Iziikel tan op chrang infronta dem fies an it komiin laik Im mek im farid tof laik daiman, it mek wi si se Gad spirit kyan elp wi fi gwaan du wi priichin wok no mata wa. (2 Kor. 4:7-9) So wa wi kyan du fi mek shuor se Gad no tap gi wi im spirit? Wi fi mek shuor se wi aalwiez a prie an aks Jeuova fi it an nuo se im a-go ier wi wen wi prie. Jiizas did tel im falara dem se dem fi “aks fi wa [dem] waahn,  . . . luk fi wa [dem] waahn, . . . nak pan di duor.” An wen wi du dat Jeuova a-go ‘gi di uoli spirit tu enibadi we aks im.’​—Luuk 11:9, 13; Aks 1:14; 2:4.

12. Azkaadn tu Iziikel 2:9–3:3, a wich paat di ruol op buk kom fram, an a wa rait dong iina it?

¹² A no onggl Gad spirit did elp Iziikel fi tan op chrang, bot Gad Wod did elp im fi tan op chrang tu. Iina wan vijan we Iziikel did get im si wan an wid wan ruol op buk iina it. (Riid Iziikel 2:9–3:3.) A wich paat di ruol op buk did kom fram? Wa did rait dong iina it? An ou it did elp Iziikel fi chos iina Gad muor? Fos ting, a Jeuova chuon di ruol op buk did kom fram. It kuda bi se Jeuova yuuz wan a di fuo ienjel dem we Iziikel did si fi gi im di ruol op buk. (Izii. 1:8; 10:7, 20) It did rait dong klier klier iina di ruol op buk di tingz dem we Iziikel did fi tel di piipl dem we did ton dem bak pan Gad bout wa Gad a-go du tu dem. (Izii. 2:7) Da mesij ya did rait pan di front an di bak a di ruol op buk.

13. Wa Jeuova did tel Iziikel fi du wid di ruol op buk, an wa mek it did ties swiit tu im?

¹³ Jeuova did tel Iziikel se fi nyam di ruol op buk an “ful op [im] beli wid it,” an a dat Iziikel did du. Bot wa dis did miin? Dis did miin se Iziikel did afi tek iin an andastan di mesij we im did fi priich bout. So im did riili afi biliiv wa da mesij de a se so it kuda push im fi gwaan priich. An den im fain out se di ruol op buk “did ties swiit laik oni.” (Izii. 3:3) It did ties swiit tu Iziikel kaa it did swiit im fi du Jeuova wok. (Sa. 19:8-11) Im did api se Jeuova did pik im fi bi im prafit.

14. Wa did elp Iziikel fi staat du di wok we Gad gi’im fi du?

¹⁴ Afta dat, Jeuova tel Iziikel dis, im se: “Lisn tu evriting we mi a tel yu se an tingk bout dem aad aad.” (Izii. 3:10) So Jeuova did a tel Iziikel se im fi memba di sitn dem we rait dong iina di ruol op buk an tingk bout wa it a se. Wen im du dat it wuda elp im fi chos iina Gad muor, an im wuda get fi andastan di mesij we Gad waahn im fi gi tu di piipl dem. (Izii. 3:11) So nou dat Iziikel did get fi andastan an biliiv wa Gad mesij a se, im did redi fi go priich an du di wok we Gad gi’im fi du.​—Luk pan Saam 19:14.

15. So dat wi no tap du di priichin wok, wa wi fi “tingk bout . . . aad aad”?

¹⁵ So dat wi no tap du di priichin wok, wi fi gwaan riid Gad wod so it kyan elp wi fi chos iina im muor. So wi fi “tingk . . . aad aad” bout evriting we Jeuova se tu wi. An nowadiez a di Baibl Jeuova a yuuz fi taak tu wi. Wa wi fi du fi mek shuor se wen wi a tingk bout tingz an a du eniting a di sitn dem we rait dong iina Gad Wod mek wi a du it?

16. Wa wi fi du wid Gad Wod, an ou wi kyan andastan wa it a se an chos iina Gad muor?

¹⁶ Jos laik wen wi nyam fuud wi afi sidong an mek it daijes ef wi waahn it fi du wi badi no gud, a siem so wen wi riid Gad Wod an wi sidong an tingk bout di sitn dem we wi a riid it a-go du wi gud. An a dat wi fi memba fram wa did apm wid Iziikel. Jeuova waahn wi fi “ful op [wi] beli wid it,” dat miin tu se im waahn wi fi andastan di sitn dem we iina im Wod gud. An wen wi prie an riid im Wod  an tingk bout di sitn dem we wi a riid, a dem sitn de a-go elp wi. Fos ting wi niid fi du a prie so dat wi aat kyan redi so dat wi kyan tek iin di sitn dem we Gad waahn wi fi nuo. Den wi fi riid sitn fram di Baibl. An den nou wi fi sidong an tingk bout di sitn dem we wi a riid. An wen wi du aal a dis, wa yu tingk a-go apm? Di muor wi tingk bout wa wi riid a di muor wi a-go andastan wa Gad Wod a se an wi a-go chos iina im muor.

17. Wa mek it impuotant fi wi riid di Baibl an tingk bout wa it a se?

¹⁷ Wa mek it impuotant fi wi riid di Baibl an tingk bout wa it a se? Wen wi du dat it a-go elp wi fi priich bout Gad Kindom ya nou, an it a-go elp wi fi priich di jojment mesij we wi mait-a afi go priich bout iina di fyuucha. An wen wi sidong an tingk bout di gud wiez dem we Jeuova av tu, wi an im a-go get kluosa an kluosa, an dat a-go bi sopm swiit kaa wi a-go fiil gud iina wiself.​—Sa. 119:103.

18. Di piipl dem we wi a priich tu, wa dem kyaahn go se an wa mek?

¹⁸ Ye, wi a no prafit laik Iziikel, bot wi naa tap priich di mesij we Jeuova gi wi fi priich we rait dong iina im Wod til Jeuova se a taim fi wi tap. Yu si wen jojment taim kom, di piipl dem we wi a priich tu kyaahn se nobadi neehn waan dem an dem kyaahn se Gad neehn pie dem no main niida. (Izii. 3:19; 18:23) Dem a-go nuo se di mesij we wi did a priich a Gad it kom fram.

19. Wa a-go elp wi fi tan op chrang an gwaan du di priichin wok?

¹⁹ Wa a-go elp wi fi tan op chrang an gwaan du di priichin wok? Di siem chrii ting dem we did elp Iziikel a dat a-go elp wi tu. Wi a gwaan priich kaa wi nuo se a Jeuova sen wi fi go du it, an kaa wi av im uoli spirit, an wi a du it kaa a fi’im Wod a elp wi fi chos iina im muor. Kaa Jeuova a elp wi fi du di priichin wok wi naa go tap priich “no mata wa.”​—Mat. 24:13.