1. Wa it miin fi kanchuol wiself? (2 Timoti 4:5)

 WEN sitn apm we ort wi bad, it kyan mek it aad fi stik tu Jeuova an im aaganaizieshan. Wa wi kyan du wen dat apm? Wa wi fi du a kanchuol wiself an kip wi yai dem uopm an tan op chrang fi wa wi biliiv. (Riid 2 Timoti 4:5.) Wi kanchuol wiself wen wi iizi wiself so dat wi kyan tingk chriet an chrai fi luk pan tingz di wie ou Jeuova luk pan it. Wen wi du dat, wi no mek di wie ou wi fiil bout tingz kanchuol wi.

2. Wa wi a-go luk pan iina da lesn ya?

² Iina di lesn bifuo da wan ya, wi did luk pan chrii sitn we no av notn fi du wid di kanggrigieshan we kuda mek it aad fi wi chos iina Jeuova an im aaganaizieshan. Iina da lesn ya, wi a-go luk pan chrii sitn iina di kanggrigieshan we kuda mek it aad fi wi stik tu Jeuova. Di fos wan a wen wi fiil se sumadi iina di kanggrigieshan chriit wi bad, di sekan wan a wen wi get ponish, an di tord wan a wen wi fain it aad fi diil wid di ting dem we Jeuova aaganaizieshan mait-a chienj op. Bot wa kyan elp wi fi kanchuol wiself an stik tu Jeuova an im aaganaizieshan wen sitn a apm iina di kanggrigieshan we ort wi bad?

3. Wa wi mait-a du ef wi fiil laik wan breda ar wan sista du sitn fi ort wi?

³ Yu eva fiil laik se wan breda ar wan sista iina di kanggrigieshan du sitn fi ort yu? Dem mait-a neehn waahn fi ort yu. (Ruo. 3:23; Jmz. 3:2) Aalduo dem mait-a neehn waahn fi ort yu, wa dem du stil bon yu. An kaaz a ou it a  bon yu, yu mait-a nat iivn a sliip a nait taim. Yu mait-a aal a aks yuself se, ‘Ef wan breda kyan du mi dis, dis a riili Jeuova aaganaizieshan?’ A so Sietan waahn wi fi fiil. (2 Kor. 2:11) Ef a so wi a fiil, it mait-a kaaz wi fi lef Jeuova an im aaganaizieshan. So ef wi fiil laik se wan breda ar sista chriit wi bad, wa wi kyan du fi kanchuol wiself an no tingk laik ou Sietan waahn wi fi tingk?

4. Wen dem did chriit Juozif bad wa did elp im fi kanchuol imself an wa wi kyan lorn fram wa im did du? (Jenisiz 50:19-21)

⁴ No kip op piipl iina yu aat. Wen Juozif did a wan tiinieja, im big breda dem did chriit im bad. Dem did iet im so bad, so til som a dem did waahn kil im. (Jen. 37:4, 18-22) Wa dem did en op du a sel im fi ton sliev. An kaa a dat fi bout 13 ier Juozif laif did ful op a bie prablem. Juozif kuda staat fi wanda ef Jeuova riili lov im an ef Im did lef im iina da taim ya wen im did wel waahn Im fi elp im. Bot Juozif neehn av op Jeuova, an im did kanchuol imself. Wen di taim did kom wen im kuda du bak im breda dem sitn, im did kanchuol imself an shuo dem se im lov dem an se im paadn dem. (Jen. 45:4, 5) Juozif kuda du dis kaa im did a tingk chriet, an im neehn a tingk bout im uona prablem dem, bot wa im did a tingk bout a wa Jeuova waahn fi apm. (Riid Jenisiz 50:19-21.) Wa wi kyan lorn fram dis? Ef sumadi iina di kanggrigieshan chriit yu bad, no bada av op Jeuova iina yu aat an fiil se im no bizniz wid yu agen. Insted-a dat, tingk bout wa im a du fi elp yu fi eng aan an diil wid yu prablem dem. Pan tap a dat, ef sumadi chriit yu bad, chrai fi kova op wa dem du wid lov.​—1 Pii. 4:8.

5. Wa Miqueas did du fi kanchuol imself wen im did fiil laik se som bredaz did chriit im bad?

⁵ Luk pan wa did apm wid wan elda we niem Miqueas we kom fram Sout Amerika. b Im did memba wan taim wen im did fiil laik se som a di breda dem we did a liid did chriit im bad. Im se: “Mi neva go chuu dem kain-a schres ya yet. Mi did fraitn. Mi kudn sliip a nait taim, an mi yuus tu baal kaa mi fiil laik se mi kudn du notn bout wa did a gwaan.” Bot iivn duo im did fiil so, Miqueas stil chrai aad fi kanchuol imself an ou im fiil. Im prie tu Jeuova uol iip fi im gi’im im uoli spirit fi mek im tan op chrang an go chuu. An im riid di buk an pamplet dem we kuda elp im. A wa wi lorn fram aal a dis? Wi lorn se ef yu fiil laik wan breda ar wan sista chriit yu bad, yu fi iizi yuself an chrai no fi tingk di wos bout tingz. Yu mait-a no nuo wa mek di sumadi se wa dem did se ar du wa dem did du. So wa yu fi du a prie tu Jeuova an aks im fi elp yu fi si tingz di wie ou di ada sumadi a luk pan tingz. Wen yu du dat, yu a-go tingk bout yu breda an sista iina wan gud wie, an yu naa go av dem op iina yu aat niida. (Pr. 19:11) Memba se Jeuova nuo wa yu a go chuu, an im a-go gi yu di chrent we yu niid fi go chuu.​—2 Kr. 16:9; Iik. 5:8.

6. Wa mek it impuotant fi wi si se a kaa Jeuova lov wi mek im ponish wi? (Iibruu 12:5, 6, 11)

⁶ Wen Jeuova ponish wi, it kyan mek wi sad bad. Bot ef wi onggl a tingk bout ou it mek wi fiil, wi a-go staat fi fiil laik se wi neehn du notn fi dem ponish wi. An so wi naa go get fi si se a kaa Jeuova lov wi a dat mek im ponish wi. (Riid Iibruu 12:5,  6, 11.) Ef wi mek ou wi fiil kanchuol wi, den Sietan a-go yuuz di wie ou wi fiil gens wi. Im no waahn wi fi tek di jraa op we Jeuova gi wi, an im waahn wi fi lef Jeuova an im kanggrigieshan tu. Ef yu get ponish, wa kyan elp yu fi gwaan kanchuol yuself?

7. (a) Wen wi luk pan di picha, afta Piita did tek di jraa op we im did get, wa a som a di sitn dem we Jeuova did yuuz im fi du? (b) Wa yu lorn fram wa Piita did du?

⁷ Tek di jraa op an staat du di rait ting. A muor dan wan taim Jiizas did afi jraa op Piita infronta di ada apasl dem. (Maak 8:33; Luuk 22:31-34) Wen dat apm Piita mos did fiil shiem, bot aalduo im did shiem im neva lef Jiizas. Im did tek di jraa op we im did get an im did lorn fram wa did apm. An kaaz Piita stik tu Jiizas, Jeuova bles im an gi im nof muor wok fi du iina di kanggrigieshan. (Jan 21:15-17; Aks 10:24-33; 1 Pii. 1:1) Wa wi kyan lorn fram wa did apm tu Piita? Wi lorn se wen wi get jraa op an wi fiil shiem, wi no fi onggl a luk pan dat, bot wi fi tek di jraa op we wi get an du di rait ting. An wen wi du dat, wi no onggl a elp wiself bot wi a elp wi breda an sista tu, an Jeuova a-go kyan yuuz wi.

8-9. Wen dem did jraa op Bernardo ou im did fiil, bot wa did elp im fi chienj ou im did fiil?

⁸ Luk pan wa did apm tu wan breda iina Muozambiik we niem Bernardo. Ou im did fiil wen dem did ponish im an neehn mek im bi wan elda no muo? Im se, “Mi did staat fi av op di breda dem kaa mi neehn laik di jraa op we mi did get.” Im did a wori muor bout ou di breda an sista dem iina di kanggrigieshan wuda fiil bout im. Im se, “A kopl mont it tek mi fi luk pan tingz di wie ou Jeuova luk pan it an fi chos iina im an im aaganaizieshan agen.” A wa did elp Bernardo fi staat fi luk pan tingz di wie ou Jeuova luk pan tingz?

⁹ Bernardo did chienj di wie ou im did a tingk bout tingz. Im se: “Wen mi did a wan elda, mi yuus tu yuuz di skripcha a Iibruu 12:7 fi elp di breda an sista dem fi si se wen Jeuova jraa dem op a kaa im lov dem. Den mi aks miself se, ‘A uu an uu fi du wa da skripcha ya se?’ No aal a Jeuova piipl dem​—aal mi tu?” Den Bernardo du som ada sitn fi elp im chos iina Jeuova muor an iina im aaganaizieshan. Im staat  du muor a di ting dem we im niid fi du fi jraa kluosa tu Jeuova, laik fi riid di Baibl an fi sidong an tingk bout wa im a riid. Aalduo im did fiil a wie fi de roun di breda an sista dem kaa a wa im fiil se dem mait-a a tingk bout im, im did stil a go sorvis wid dem, an ansa kwestiyan an dem ting de a di miitn dem. Afta a wail, dem pik im fi ton elda agen. So wa wi lorn fram dat a se ef dem afi ponish yu no mek kaa yu fiil shiem, yu no tek di jraa op an du wa yu niid fi du. c (Pr. 8:33; 22:4) Ef yu tek di jraa op an du wa yu fi du, yu kyan nuo se Jeuova a-go bles yu kaa yu stik tu im an im aaganaizieshan.

10. Wa mek som man iina Izrel did fain it aad fi stik tu Jeuova?

¹⁰ Jeuova aaganaizieshan mait-a chienj di wie ou dem waahn wi fi du tingz. An ef wi no main shaap, it mait-a mek wi lef Jeuova an im aaganaizieshan. Tingk bout wa did apm tu di Izrelait dem. Bifuo Muoziz did tel dem di Laa a did di man we a tek di liid iina dem fambili did a du wa di priis dem fi du. A dem wuda mek op di alta dem an gi Jeuova di sakrifais fi dem fambili. (Jen. 8:20, 21; 12:7; 26:25; 35:1, 6, 7; Juob 1:5) Bot afta Jeuova gi dem di Laa, a no di man dem we a di ed a dem fambili wudaana du dat no muor kaa nou, a som man fram Ieran fambili Jeuova did pik fi bi priis we wuda gi di sakrifais dem. Afta Jeuova se a dat fi gwaan, ef wan a di man dem we a di ed fi dem fambili, we a no wan a Ieran pikni ar pikni pikni dem staat fi du wa wan priis wuda du, Jeuova se dem fi kil im. d (Lev. 17:3-6, 8, 9) Yu tingk se a kaa Jeuova se a so tingz fi go nou mek Kuora, Dietan, Abairam, an 250 ada big man iina Izrel staat fi ton gens Muoziz an Ieran an fait gens dem? (Nom. 16:1-3) Wi kyaahn se fi shuor wa mek, bot wa wi nuo a dat Kuora an im kombolo dem neva stik tu Jeuova. Ef tingz chienj op iina Jeuova aaganaizieshan an yu no tingk se a so it fi go, wa yu kyan du?

11. Wa wi kyan lorn fram wa di Kowatait dem did du?

¹¹ Eni chienj we Jeuova aaganaizieshan mek, mek shuor se yu a dwi’it. Wen di Izrelait dem did a go chuu di wildanes, di Kowatait dem did av di big jab fi go infronta di piipl dem an kyari di baks we tan fi di pramis we Gad mek. (Nom. 3:29, 31; 10:33; Jash. 3:2-4) Bot wen di Izrelait dem riich iina di lan we Gad pramis dem, di Kowatait dem neehn av da big jab de fi du agen kaa dem neva did niid fi muuv di baks som moch agen. So bai di taim Salaman ton king, di Kowatait dem did get difrant wok fi du. Laik som a dem ton singa, an som a dem ton gyaadi, an som a dem tek kier a di bochri dem we dem kip di fuud an ada tingz. (1 Kr. 6:31-33; 26:1, 24) Wi no ier notn laik se di Kowatait dem did a kos an a se dem waahn big wok kaa a di fambili we dem kom fram so dem fi get big wok fi du. Wa wi kyan lorn fram dat? Wa wi lorn a dat wen Jeuova aaganaizieshan chienj op tingz, aal ef it av fi du  wid wa wi a du, wi fi du evriting fi shuo se wi a du wa Jeuova aaganaizieshan se wi fi du. Wi fi api fi du eni wok we Jeuova aaganaizieshan gi wi fi du. An memba se, a no di wok we wi a du fi Jeuova mek wi wot nof tu im bot a wen wi lisn tu im, a dat Jeuova lov.​—1 Sam. 15:22.

12. Ou Zaina did fiil wen dem did sen ar outa Betel?

¹² Luk pan wa did apm tu wan sista we niem Zaina. Shi did a du wan speshal kain-a wok iina Jeuova aaganaizieshan we shi did lov. Shi did a wok a Betel fi muo dan 23 ier an den dem sen ar fram Betel fi go paiyanier. Shi se: “Wen dem did du dat mi did shak bad. Mi did fiil laik se mi neehn av no yuus an mi did a wanda, ‘A wa mi du rang?’” An wos pan tap a ou shi did fiil aredi, som a di breda an sista dem iina di kanggrigieshan did staat fi tel ar se: “Ef yu did a du yu wok gud, di breda dem wudn sen yu outa Betel.” Kaa Zaina did fiil so bad, fi a wail evri nait shi baal. Bot shi se: “Mi neehn lou miself fi staat tingk se Jeuova an im aaganaizieshan no lov mi no muor.” Wa did elp Zaina fi kanchuol arself?

13. Wa Zaina did du fi staat fiil beta bout arself agen?

¹³ Zaina did staat fiil beta bout arself agen. A wa did elp ar? Shi did staat fi riid wi buk an pamplet dem we did elp ar fi diil wid som a di sitn dem we shi did a go chuu an dem elp ar fi eng aan. Di paat iina The Watchtower fi Febiweri 1, 2001, we niem “You Can Cope With Discouragement!” did elp ar uol iip. It did taak bout ou Maak we rait wan a di buk dem iina di Baibl did go chuu sopm laik wa shi did go chuu wen dem did chienj di wok we im did a du. Zaina se: “Wa mi riid bout Maak, it komiin laik di medisn we mi did niid fi fiil beta.” Zaina aal mek shuor se shi did tan kluos tu ar fren dem. So shi neva tap go a sorvis, an shi neehn a kip we fram di breda an sista dem, an shi neehn a fiil sari fi arself niida. Shi did get fi nuo se a Jeuova spirit a ron tingz iina im aaganaizieshan an se di wan dem we a liid did kier bout ar nof. An shi did get fi si se Jeuova aaganaizieshan  afi du wa it afi du fi du Jeuova wok.

14. Wa did apm we Vlado did fain aad fi wok wid, an wa did elp im?

¹⁴ Wan 73 ier uol elda we niem Vlado, we kom fram Slovieniya did fain it aad fi diil wid it wen dem did jain op im kanggrigieshan wid wan neda wan an lak dong di Kindom Aal we im did a go. Im se: “Mi kudn andastan wa mek dem lak dong dat de nais nais Kindom Aal de. It did bon mi man kaa wi did jos fiks op bak di Kindom Aal ino. Mi a wan kyaapinta, so a mi did mek som a did fornicha dem we de iin de. Pan tap a dat, di chienj we dem did mek did mek it aad fi di wan dem we de op iina iej.” A wa did elp Vlado fi wok wid di chienj dem we di aaganaizieshan did mek fi di kanggrigieshan we im did iina? Im se: “Wen yu wok wid wa Jeuova aaganaizieshan a du, wi aalwiez get nof blesn. Dem sitn ya we Jeuova aaganaizieshan a chienj op nou a mek wi get redi fi som ada tingz we a-go chienj iina di fyuucha.” Fi yu kanggrigieshan a wan a dem we did jain op wid wan neda wan, ar dem chienj di wok we yu yuus tu du iina Jeuova aaganaizieshan an yu a fain it aad fi diil wid it nou? Jos nuo se Jeuova nuo ou yu fiil. Bot wen yu wok wid wa Jeuova aaganaizieshan a du, an yu stik tu im an im aaganaizieshan, den im a-go bles yu.​—Sa. 18:25.

15. Wa wi kyan du fi kanchuol wiself wen wi a go chuu prablem iina di kanggrigieshan?

¹⁵ Wi nuo se kaa da wikid worl ya suun don, wi a-go av muor an muor prablem iina di kanggrigieshan. An dem prablem de kyan tes fi si ef wi a-go stik tu Jeuova. So wi fi gwaan kanchuol wiself. Ef wi fiil laik se wan breda ar wan sista chriit wi bad, wi no fi av dem op iina wi aat. An ef dem afi ponish wi, wi no fi mek kaa wi fiil shiem wi no du di rait ting. Wi fi tek di jraa op an staat fi du tingz di rait wie. An wen Jeuova aaganaizieshan chienj op tingz an wi mait-a no laik it, wi fi stil wok wid it an du wa dem se.

16. Wa kyan elp yu fi gwaan chos iina Jeuova an im aaganaizieshan?

¹⁶ Yu kyan gwaan chos iina Jeuova an im aaganaizieshan aal wen tingz apm we tes yu fi si ef yu a-go stik tu Jeuova. Bot fi yu stik tu Jeuova yu afi go kanchuol yuself, so yu afi go tingk bout wa yu a-go du an iizi yuself an no wori wori op yuself. Luk pan tingz di wie ou Jeuova luk pan tingz. An yu fi riid bout piipl iina di Baibl we go chuu sitn laik wa yu a go chuu an sidong an tingk bout wa yu riid. An prie tu Jeuova fi elp. An no kip we fram di breda an sista dem iina yu kanggrigieshan. Den no mata wa apm, Sietan naa go kyan tap yu fram sorv Jeuova an mek yu lef im aaganaizieshan.​—Jmz. 4:7.