1. Ou wi nuo se Jeuova waahn wi fi jraa nier tu im?

 JEUOVA waahn wi fi jraa nier tu im. (Jmz. 4:8) Im waahn fi bi wi Gad, wi Faada, an wi Fren. Im ansa wi prieya dem wen wi prie, an im elp wi wen wi a go chuu wi uol iip a prablem dem. Im a yuuz im aaganaizieshan fi tiich wi an kip wi sief. Bot wa wi afi du fi jraa nier tu Jeuova?

2. Wa an wa wi kyan du fi jraa nier tu Jeuova?

² Wen wi riid Gad Wod an tingk bout di sitn dem we wi a riid an wi prie tu im, a dem sitn ya a-go mek wi jraa kluos tu im. An wen wi du dem sitn ya, dem a-go mek wi lov im an shuo im se wi tangk im fi aal a di gud sitn dem we im du fi wi. An dem a-go push wi fi du di sitn dem we im se wi fi du an fi gi im di priez an big op we im fi get. (Rev. 4:11) Di muor wi get fi nuo Jeuova a di muor wi a-go chos iina im an di aaganaizieshan we im a yuuz fi elp wi.

3. A wa Sietan a yuuz fi chrai fi mek wi tap sorv Jeuova, bot wa a-go elp wi fi no lef Jeuova an im aaganaizieshan? (Saam 31:13, 14)

³ Di Devl a chrai fi mek wi tap sorv Jeuova, wos wen wi a go chuu uol iip a prablem. Bot wa im a du fi chrai tap wi? Im chrai fi du difrant difrant tingz so das likl bai likl wi tap chos iina Jeuova an im aaganaizieshan. Bot wa wi kyan du fi mek dat no apm? Wi fi mek shuor se wi nuo wa mek wi biliiv iina di sitn dem we wi biliiv iina, an wi a-go mek shuor se wi a chos iina Jeuova no mata wa. So wen wi du dem sopm ya wi naa go lef Jeuova an im aaganaizieshan.​—Riid Saam 31:13, 14.

4. Wa wi a-go luk pan iina da lesn ya?

 ⁴ Iina da lesn ya, wi a-go luk pan chrii sitn we no av notn fi du wid di kanggrigieshan we Sietan mait-a yuuz fi mek wi tap chos iina Jeuova an im aaganaizieshan. Ou dem sitn ya kyan tap wi fram sorv Jeuova? An wa wi kyan du fi no mek dat apm?

5. Wen yu a go chuu uol iip a prablem, ou dat kyan mek yu tap chos iina Jeuova an im aaganaizieshan?

⁵ Som a di prablem we wi mait-a av a wen wi fambili a fait gens wi ar wi na’av no wok agen. Bot ou dem sitn ya kyan mek wi tap chos iina Jeuova an im aaganaizieshan so dat wi tap sorv im? Wen wi a go chuu prablem fi wan lang taim, wi mait-a fiil se wi na’av notn a liv fa, laik se wi kyaahn go no muor. A dem sitn ya Sietan yuuz fi mek wi fiil laik se Jeuova no lov wi no muor. Im waahn wi fi fiil se a kaa wi a sorv Jeuova an kaa wi a paat a Im aaganaizieshan a dat mek wi a sofa. A sitn laik dis did apm tu som a di Izrelait piipl dem we did liv iina Iijip. Dem did biliiv se Jeuova did pik Muoziz an Ieran fi frii dem. (Ek. 4:29-31) Bot wen Fiero did staat fi du tingz fi mek tingz get aada fi dem, dem ton roun an staat bliem Muoziz an Ieran fi dem prablem dem. Dem did tel dem se: “Unu mek Fiero an im sorvant dem iet wi, an nou unu gi dem wan riizn mek dem waahn fi kil wi.” (Ek. 5:19-21) Yu kyan imajin? Dem man ya did a stik tu Jeuova an a du wa im se an dem stil did a bliem dem! So ef yu a go chuu som uol iip a prablem fram lang taim til nou, wa kyan elp yu fi gwaan chos iina Jeuova an im aaganaizieshan?

6. Wen wi si ou Abakok did go chuu im prablem dem, wa wi kyan lorn fram dat? (Abakok 3:17-19)

⁶ Prie tu Jeuova fram yu aat an tel im evriting we a gwaan wid yu an mek im elp yu. A uol iip a prablem di prafit we niem Abakok did go chuu, til aal wan a di taim im did a wanda ef Jeuova riili kier bout im. So im prie tu Jeuova an tel im ou im fiil. Im se: “A ou lang mi fi de ya a baal tu yu Jeuova fi yu elp mi an yu naa ier mi? . . . An wa mek yu no du sitn bout di piipl dem we a mek tingz aad fi ada piipl?” (Aba. 1:2, 3) Jeuova ier wa Abakok did a se an im ansa im. (Aba. 2:2, 3) Afta Abakok sidong an tingk bout ou Jeuova did siev Im piipl dem, im did api fi gwaan du Jeuova wok kaa nou im nuo se Jeuova did kier bout im, an Im wuda elp im fi go chuu eni prablem we im av. (Riid Abakok 3:17-19.) Wa wi kyan lorn fram dis? Wa wi lorn fram dis a dat wen wi a go chuu no prablem, wi fi prie tu Jeuova an tel im ou wi fiil an lou im fi elp wi. Wen yu du dat, yu kyan nuo fi shuor se Jeuova a-go gi yu di chrent fi go chuu yu prablem dem. An wen yu si umoch im a elp yu, yu a-go chos im muor an muor.

7. Wa wan a Shirley fambili did a chrai fi mek ar biliiv se bout Jeuova, an wa did elp ar fi gwaan chos iina Jeuova?

⁷ Gwaan du di sitn dem we a-go mek yu tan kluos tu Jeuova. A dat did elp wan sista we liv iina Papuwa Nyuu Gini we niem Shirley wen shi a go chuu ar prablem dem. b Ar fambili did puor an som a di taim, dem did fain it aad fi get fuud. Wan a di taim wan a ar fambili did a chrai aad fi mek shi no chos iina Jeuova no muo. Im se tu ar se: “Yu se Gad uoli spirit a elp yu, bot we di elp de? Yu fambili stil puor.  A wies yu a wies taim a priich.” Shirley se: “Mi did aks miself ef Gad riili kier bout wi ar im no kier bout wi. So siem taim mi prie tu Jeuova an tel im bout evriting we did de pan mi main, an mi gwaan riid di Baibl an wi buk an pamplet dem, an mi gwaan priich an ga’a mi miitn dem tu.” An iina no taim shi get fi si se Jeuova de de a tek kier a ar fambili kaa ar fambili neehn a ded fi onggri an dem did api tu. Shirley se: “Mi fiil se Jeuova did a ansa mi prieya dem.” (1 Tim. 6:6-8) Ef yu gwaan du di sitn dem we a-go elp yu fi kip kluos tu Jeuova, den yu naa go mek kaa yu a wanda ef Jeuova kier bout yu, ar di prablem dem we yu a go chuu mek yu tap sorv Jeuova.

8. Wa mait-a apm tu di breda dem we de iina Jeuova aaganaizieshan we a liid wi?

⁸ Somtaim wi enimi dem mait-a yuuz TV, riediyo an intanet an dem tingz de fi tel lai pan di breda dem we de iina Jeuova aaganaizieshan we a liid wi. (Sa. 31:13) Dem lak op som a di breda dem an se dem a kriminal. An a di siem ting did apm wen dem did tel lai pan di apasl Paal an lak im op. Bot a ou di Kristiyan dem we did de bout dem taim de did diil wid it?

9. Ou som a di Kristiyan dem did gwaan afta dem did fling di apasl Paal iina prizn?

⁹ Wen dem did lak op di apasl Paal dong a Ruom, som a di Kristiyan dem neehn de de fi im. (2 Tim. 1:8, 15) Wa mek? Yu tingk dem did shiem fi se dem nuo Paal kaa piipl se im a kriminal? (2 Tim. 2:8, 9) Ar dem did fried se dem wuda fling dem iina prizn tu? No mata wa did kaaz dem no fi di de fi Paal, Paal mos did fiil a wie, no chuu? Paal did go chuu nof prablem, an im did aal nieli ded fi dem. (Aks 20:18-21; 2 Kor. 1:8) Wi fi wok aad so wi no komiin laik di wan dem we neehn di de fi Paal wen dem did fling im iina prizn wen im wuda riili waahn  dem elp. Wa wi fi memba wen piipl a mek tingz aad fi di breda dem we a liid wi?

10. Wen dem a mek tingz aad fi di breda dem we a liid wi, wa wi fi memba an wa mek?

¹⁰ Wi fi memba wa mek piipl mek tingz aad fi wi an fling wi iina jiel an uu mek dem du dem sitn de. Sekan Timoti 3:12 se: “Enibadi we se dem a Gad piipl an a fala Gad, afi go chogl chuu nof sitn tu.” So wi no fi shak se Sietan a go afta di breda dem we a liid wi. Wa im waahn a fi dem breda de tap sorv Jeuova, an dat a-go mek wi fried fi gwaan sorv Jeuova tu.​—1 Pii. 5:8.

11. Wa wi lorn fram wa Onisiforos did du? (2 Timoti 1:16-18)

¹¹ Gwaan di de fi yu breda an sista dem an stik tu dem no mata wa. (Riid 2 Timoti 1:16-18.) Wan a di Kristiyan dem we did niem Onisiforos neva gwaan laik di wan dem we did shiem a Paal kaa im get lak op iina prizn. ‘Im neva shiem fi go luk fi Paal iina jiel’ an wen im fain im, im chrai fi si wa im kuda du fi elp im. Wen im du dat, im shuo se im wuda aal ded fi Paal. Wa wi kyan lorn fram wa im did du? Wi lorn se wi no fi mek kaa wi fried a piipl mek wi no di de fi wi breda an sista dem wen piipl a mek tingz aad fi dem, bot wi fi tan op fi dem an elp dem. (Pr. 17:17) Wi breda an sista dem waahn wi fi di de fi dem, an dem waahn wi fi du tingz fi shuo se wi lov dem.

12. Wa wi lorn fram wi breda an sista dem we de iina Rosha?

¹² Tingk bout wi breda an sista dem iina Rosha we did elp dem breda an sista dem we dem lak op. Wen di kuot kies a gwaan, nof a di breda an sista dem kom a di kuot fi mek dem si se dem di de fi dem. Wa wi lorn fram dat? Wi lorn se wen dem tel lai pan di breda dem we a liid wi, ar dem lak dem op, ar dem a mek tingz aad fi dem, wi no fi fried fi elp dem. Wi fi prie fi dem an elp fi tek kier a dem fambili, an luk fi som ada tingz we wi kyan du fi mek dem si se wi di de fi dem.​—Aks 12:5; 2 Kor. 1:10, 11.

13. Wen piipl a laaf aafa wi an a mak wi, ou dat kyan mek wi tap chos iina Jeuova an im aaganaizieshan?

¹³ Wi fambili dem we naa worship Jeuova, ar di piipl dem we wi wok wid, ar di pikni dem we wi go skuul wid mait-a laaf aafa wi an mak wi kaa wi a priich ar kaa wi a liv laik ou Jeuova waahn wi fi liv. (1 Pii. 4:4) Dem mait-a se: “Mi laik yu ino, bot mi no laik di choch we yu go kaa it komiin laik dem no nuo wa a gwaan iina di worl ya nou ya.” An som piipl mait-a no laik ou wi diil wid di wan dem we get put outa di kanggrigieshan, so dem mait-a se: “Ou kom yu se yu lov piipl an yu no diil wid sumadi kaa dem get put outa yu choch?” Wen wi ier piipl se dem sitn ya, dem mait-a mek wi staat fi wanda ef wa Jeuova se wi fi du rait. An wi mait-a a wanda ef wa Jeuova aks wi fi du tu moch ar ef Jeuova aaganaizieshan tuu aad. Ef yu a go chuu dem sitn ya, wa kyan elp yu fi stie kluos tu Jeuova an im aaganaizieshan?

14. Wa wi fi du wen ada piipl a laaf aafa wi an a mak wi kaa wi a liv ou Jeuova se wi fi liv? (Saam 119:50-52)

¹⁴ Mek op yu main fi du di sitn dem we Jeuova se rait aal di taim. Juob did du wa Jeuova se rait aalduo piipl did a laaf aafa im an a mak im fi wa im did a du. Aal wan a im frenimi dem did a chrai fi mek  im si se im na’afi du di sitn dem we Gad se im fi du kaa Gad no bizniz wid wa im a du. (Juob 4:17, 18; 22:3) Bot Juob did nuo se a lai im a tel. Im did nuo se wa Jeuova se rait, a dat rait an wa im se rang rang. So Juob did mek op im main fi du wa Gad se rait. Im neehn mek wa dem du ar se mek im tap du wa Jeuova se. (Juob 27:5, 6) Wa wi kyan lorn fram dis? Wi lorn se wi no fi mek kaa piipl a laaf aafa wi an mak wi mek wi staat fi wanda ef di sitn dem we Jeuova se wi fi du a di rait ting. Tingk bout som sitn we yu go chuu, an yu si ou wen yu du di sitn dem we Jeuova se yu fi du, tingz wok out gud fi yu. Mek op yu main se yu naa go lef Jeuova aaganaizieshan kaa it a elp wi fi du wa Gad se rait. An wen wi du dat, no mata umoch piipl a laaf aafa wi an a mak wi, wi naa go mek dat tap wi fram sorv Jeuova.​—Riid Saam 119:50-52.

15. Wa mek Brizit fambili did a mek tingz aad fi ar?

¹⁵ Luk pan wa did apm tu wan sista we liv iina Indiya we niem Brizit. Kaaz a di sitn dem we shi biliiv iina, ar fambili did a mak ar an a mek tingz aad fi ar. Likl afta shi baptaiz iina 1997, ar ozban we naa worship Jeuova did luuz im wok. So im mek op im main se im an Brizit an im gyal pikni dem fi go liv wid im mada an im faada. Dem did liv iina wan neda siti, bot Brizit prablem dem neva tap ya-so. Kaaz ar ozban neehn av no jab, shi did afi go wok fi main ar fambili. An pan tap a dat, di nieris Kindom Aal did de bout 350 kilomita (220 mail) fram we dem liv. An kaaz shi weehn a sorv Jeuova, ar ozban fambili did a mek tingz aad fi ar. An tingz did get so bad dat Brizit an ar fambili did afi muuv fram de. Den afta dat, aal av a sodn ar ozban ded, an den wan a ar gyal pikni dem did ded fram kyansa wen shi a jos 12 ier uol. An afta aal a dat, Brizit fambili dem bliem ar se a shi mek dem sitn ya apm kaa dem kliem se ef shi neva did ton wan Jeuova Witnis, non a dem bad sitn de wudn apm. Bot aalduo shi did a go chuu aal a dem sitn de, shi  stil did a chos iina Jeuova an a tan kluos tu im aaganaizieshan tu.

16. Ou Jeuova did bles Brizit kaa shi stik tu im an im aaganaizieshan?

¹⁶ Kaaz Brizit did liv so faar fram di Kindom Aal, wan Sorkit Uovasiya tel ar se shi fi priich tu di piipl dem we liv iina ar ieriya an fi kip miitn a ar yaad tu. Shi did fiil laik se shi kudn du it, bot shi lisn tu wa di breda se an shi staat fi priich tu piipl an kip miitn a ar yaad. An shi mek shuor se shi kip di fambili Baibl stodi wid ar daata dem tu. Yu si kaa a wa Brizit du, shi did get fi du nof Baibl stodi an som a dem get baptaiz. An iina 2005 shi ton wan regila paiyanier. Kaa shi chos iina Jeuova an shi stik tu im aaganaizieshan, shi get uol iip a blesn. Laik ar daata dem stil a sorv Jeuova, an a tuu kanggrigieshan nou de iina di ieriya we shi liv. Brizit nuo se a Jeuova gi ar di chrent we shi did niid fi go chuu ar prablem dem an eng aan aal wen ar fambili did a mek tingz aad fi ar.

17. Wa wi fi mek op wi main fi du?

¹⁷ Sietan waahn wi fi biliiv se wen wi a go chuu wi uol iip a prablem dem, Jeuova a-go lef wi. An im waahn wi fi biliiv se wen wi du tingz di wie ou Jeuova aaganaizieshan waahn wi fi du it, tingz onggl a-go get aada fi wi. An im waahn wi fi fiil fried wen dem tel lai pan di breda dem we a liid wi, ar wen dem mek tingz aad fi dem, an wen im mek dem fling dem iina prizn. Kaa im no waahn wi fi chos iina di ting dem we Jeuova se rait an iina im aaganaizieshan, im mek piipl laaf aafa wi an mak wi fi mek wi fiil a wie. Bot wi nuo wa im a du, so im kyaahn fuul wi. (2 Kor. 2:11) Bot mek op yu main se yu naa go lisn tu di lai dem we Sietan a tel, bot yu a-go stik tu Jeuova an im aaganaizieshan kaa memba se, Jeuova naa go lef yu. (Sa. 28:7) So no mek notn tap yu fram sorv Jeuova!​—Ruo. 8:35-39.

18. Wa wi a-go luk pan iina di neks lesn?

¹⁸ Iina da lesn ya, wi did luk pan som sitn we na’av notn fi du wid di kanggrigieshan we Sietan mait-a yuuz fi mek wi tap chos iina Jeuova an im aaganaizieshan. Bot som sitn mait-a apm iina di kanggrigieshan we mait-a mek it aad fi chos iina Jeuova an im aaganaizieshan. Iina di neks lesn wi a-go luk pan wa wi kyan du fi no mek dat apm.