1-2. (a) Wa’a di kwestiyan dem we wi a-go get di ansa fa iina da lesn ya? (b) Wa mek wi nuo se Jeuova wel waahn fi elp wi?

 JEUOVA kyan elp wi fi go chuu wi prablem dem an im kyan elp wi fi api wen wi a du di wok we im gi wi fi du. Bot wa’a som a di sitn dem im du fi elp wi? An ou wi kyan mek shuor se wi tek aal a di elp im a gi wi? Wi a-go get di ansa fi dem kwestiyan ya iina da lesn ya. Bot bifuo wi luk pan di ansa dem, mek wi get di ansa fi da kwestiyan ya: Yu tingk Jeuova riili waahn fi elp wi?

² Wen wi luk pan sopm we di apasl Paal did se wen im rait wan leta tu di Iibruu Kristiyan dem, it elp wi fi get di ansa. Im se: “[Jeuova] a di wan we elp mi an mi naa go fried a notn. Wa nobadi kyan kom du mi, iihn?” (Iib. 13:6) Sitn we mek wi nuo wa som a di wod dem we rait dong iina di Baibl miin mek wi nuo se, “di wan we elp” a sumadi we ron go elp sumadi wen dem a baal out fi elp. Jos tingk bout Jeuova a ron go elp sumadi we a go chuu prablem. So dis mek wi nuo se Jeuova wel waahn fi bi di wan fi elp wi. So wen Jeuova de de wid wi, wi a-go eng aan an go chuu wi prablem dem an api tu.

3. Wa’a di chrii wie dem Jeuova a elp wi fi eng aan an go chuu wi prablem dem an stil api?

³ Wa’a som a di wie dem ou Jeuova elp wi fi eng aan an go chuu wi prablem dem an stil api? Wi kyan luk iina di Baibl buk a Aizaiya fi di ansa fi da kwestiyan ya. Nof a di sitn dem we Gad did mek Aizaiya rait dong bout wa a-go apm av fi du wid Gad piipl dem nowadiez tu. An wen Aizaiya  a taak bout Jeuova, im taak bout im iina wan wie we wi kyan andastan. Laik wen wi luk pan Aizaiya chapta 30, di wie ou im taak bout Jeuova iina it, mek it komiin laik se wi kyan si Jeuova a du tingz fi elp im piipl dem (1) wen im lisn tu wi gud gud an ansa wi wen wi prie tu im, (2) wen im tel wi ou fi liv wi laif, an (3) wen im a gi wi nof blesn nou an iina di fyuucha. Mek wi luk pan dem chrii wie ya ou Jeuova a elp wi.

4. (a) Wa Jeuova did se bout di Juu piipl dem iina di taim we Aizaiya did taak bout, an wa Im did mek apm tu dem? (b) Wa Jeuova did pramis di wan dem we did a chos iina im an a du wa im waahn dem fi du?(Aizaiya 30:18, 19)

⁴ Iina di fos paat a Aizaiya chapta 30 Jeuova se di Juu piipl dem “a som aad-iez pikni” we “en op a sin muor an muor.” An im se, ‘Dem piipl ya ton gens mi, dem piipl ya no waahn fi ier Jeuova laa dem.’ (Aiz. 30:1, 9) Kaa dem neehn a lisn tu Jeuova, Jeuova did se im wuda mek dem go chuu uol iip a prablem. (Aiz. 30:5, 17; Jer. 25:8-11) An a dat did apm wen di piipl dem fram Babilan did kom kyapcha dem. Bot a neehn aal a dem ton dem bak pan Jeuova, som a dem did a du wa Jeuova waahn dem fi du. So Aizaiya tel dem se tingz did a-go get beta fi dem kaa Jeuova wuda mek dem go baka Jeruusilem wich paat dem kom fram. (Riid Aizaiya 30:18, 19.) An a dat did apm. Jeuova lou dem fi go baka Jeruusilem. Bot a uol iip a ierz afta dat it did apm. An wi nuo se a so it go kaaz di skripcha se ‘Jeuova jos a gwaan tek im taim wid dem an a wiet pan dem fi du sitn gud fi dem.’ An wi si se a 70 ier dem did dong a Babilan fa bifuo dem did get fi go baka Jeruusilem. (Aiz. 10:21; Jer. 29:10) Wen dem did de a Babilan, dem did a baal kaa dem sad bad. Nou dat dem de a Jeruusilem dem a baal kaa dem api bad.

5. Wa Aizaiya 30:19 mek wi nuo se a-go apm?

⁵ It kyan mek wi fiil gud fi nuo se: “Wen yu a baal fi elp im a-go du sitn gud fi yu.” (Aiz. 30:19) Aizaiya mek wi nuo se Jeuova a lisn tu wi gud gud wen wi baal out tu Im, an wen wi prie tu Im Im a-go ansa wi kwik kwik. Aizaiya aal se: “Az yu baal so im a-go kom kom elp yu.” Dem wod ya mek wi memba se wi Faada Jeuova wel waahn fi elp di wan dem we a baal out tu im fi elp. Kaa wi nuo dis it a-go elp wi fi eng aan an go chuu wi prablem dem an stil api.

6. Ou di wod dem we Aizaiya yuuz mek wi si se Jeuova lisn tu evri singgl wan a wi wen wi prie tu im?

⁶ Wen wi luk pan da vors ya, wa els wi kyan lorn bout wi prieya dem? Jeuova lisn tu evri singgl wan a wi wen wi prie tu im. Wa mek wi se so? Wi se so bikaa iina di fos paat a Aizaiya chapta 30 it yuuz di wod “unu” kaa Jeuova did a taak tu di uol a im piipl dem wan taim. Bot iina vors 19 it yuuz di wod “yu” kaa Jeuova did a taak tu im piipl dem wan wan. Iina vors 19 Aizaiya se: “Notn naa go mek yu baal agen”, “im a-go du sitn gud fi yu”,“im a-go kom elp yu.” Jeuova a wan Faada we lov im pikni dem, so im naa go tel im bwai pikni ar gyal pikni se “yu fi chrang laik yu breda ar sista.” Nuo sa, im naa go du dat. Im chriit aal a wi difrant an im ier evri wan a wi wen wi prie tu im.​—Sa. 116:1; Aiz. 57:15.

7. Ou wa Aizaiya an Jiizas se elp wi fi si se wi no fi tap prie?

⁷ Wen wi prie tu Jeuova an tel im bout  sitn we a bada wi, di fos ting im mait-a du a gi wi di chrent fi diil wid it. An ef di prablem no go we kwik laik ou wi wuda waahn it fi go we, wi fi aks Jeuova uova an uova fi gi wi di chrent fi go chuu. An a dat im tel wi fi du. A dat Aizaiya did mek wi nuo wen im se: “No tap prie tu [Jeuova].” (Aiz. 62:7) So dat miin tu se wi fi a prie tu im so moch dat it komiin laka se wi naa gi’im no taim fi res. Wa Aizaiya tel wi mek wi memba di tuori we Jiizas did tel wi bout prieya iina Luuk 11:8-10, 13. Iina it Jiizas tel wi se wi ‘no fi tap’ prie an wi ‘no fi tap aks’ fi uoli spirit. Wi kyan aal aks Jeuova fi mek wi nuo wa a di rait ting fi du wen wi a mek op wi main fi du sitn.

8. Ou wa rait dong a Aizaiya 30:20, 21 did apm wen di Juu piipl dem go baka Jeruusilem?

⁸ Riid Aizaiya 30:20, 21. Wen di suoja dem fram Babilan did blak op roun Jeruusilem fi wan an a aaf ier, di piipl dem did av so moch prablem dat dem did get yuus tu it laik ou dem did yuus tu bred an waata. Bot iina vors 20 an 21, Jeuova did pramis di Juu piipl dem se ef dem riili ton we fram dem sin dem an ton tu Gad, im wuda kom kom siev dem. Aizaiya mek wi nuo se Jeuova a “di wan we a tiich [im piipl dem] ou fi liv [dem] laif.” An a dat Jeuova did du wen im frii dem. Kaa Jeuova did a tiich dem, dem kuda staat worship Jeuova iina di rait wie agen. So wi api se Jeuova a di wan we a tiich wi ou fi liv wi laif ya nou.

9. Wa a wan sitn Jeuova a yuuz fi tiich wi tide?

⁹ Aizaiya tel wi tuu difrant sitn we shuo wi tuu difrant wie ou Jeuova a tiich wi. Di fos ting Aizaiya se a dat ‘unu a-go si di wan we a tiich unu ou fi liv unu laif fi unuself’. Wen im se dis it mek wi fiil laik se Jeuova a tan op infronta wi an a tiich wi. Fi Jeuova a tiich wi ya nou a wan big ting dat. Bot ou im a tiich wi ya nou? Im a yuuz im aaganaizieshan fi tiich wi. An wi api se im aaganaizieshan mek wi nuo klier klier wa wi fi du. Im mek wi nuo wa fi du wen wi de a wi miitn dem, an wi kanvenshan dem, wen wi riid wi buk an pamplet dem, an wen wi wach di difrant difrant sopm dem pan JW Braadkyaastin. An im gi wi uol iip a ada tingz we elp wi fi eng aan an go chuu wi prablem dem an stil api.

10. Ou wi a ier Gad “vais fram baka [wi]” ya nou?

 ¹⁰ Di neks ting we Aizaiya did se we elp wi fi si di sekan ting we Jeuova a yuuz fi tiich wi a wen im se: “Unu a-go ier wid unu uona iez wan vais fram baka unu.” Wa im se ya-so mek wi tingk bout Jeuova laik im a waak baka wi an a shuo wi we fi go an a tel wi di rait ting dem fi du. Bot ou wi a ier Jeuova vais tide? Wen wi riid di Baibl, it komiin laik se wi ier Gad vais fram baka wi. Kaa Gad wod dem rait dong iina di Baibl fram lang lang taim, a das wai it komiin laik se it de baka wi.​—Aiz. 51:4.

11. Ef wi fi eng aan an go chuu wi prablem dem an stil api, wa wi afi du, an wa mek?

¹¹ Ou wi kyan mek shuor se wi a tek di tiichin we Jeuova a yuuz im aaganaizieshan an di Baibl fi gi wi? Aizaiya tel wi tuu difrant sitn. Wan, im se: “A dis a di rait wie fi go.” An tuu, im se: “Go da wie ya.” (Aiz. 30:21) So wi mait-a nuo “di rait wie fi go” bot a no onggl dat, wi afi “go da wie” de. Jeuova aaganaizieshan yuuz Gad Wod fi mek wi nuo wa Jeuova waahn wi fi du an dem mek wi nuo ou fi du wa Jeuova waahn wi fi du tu. So ef wi fi eng aan an go chuu wi prablem dem an stil api wi afi du dem tuu sitn ya. A onggl ef wi du dem tuu sitn ya, Jeuova a-go bles wi.

12. Azkaadn tu Aizaiya 30:23-26, a ou Jeuova wuda bles im piipl dem?

¹² Riid Aizaiya 30:23-26. A ou wa da skripcha ya se did apm wen di Juu dem we did de a Babilan kom baka Jeruusilem? Dem did get nof blesn fram Jeuova. So dem did av nof fuud fi nyam. Bot muor dan dat, fi elp dem fi worship im iina di rait wie agen im did gi dem uol iip a tingz fi mek dem jraa nier tu im. Bifuo da taim de dem neva get so moch tingz fi jraa nier tu Gad laik wa dem did get da taim de. Iina vors 26 it mek wi si se Jeuova gi dem muor lait wen im did mek dem andastan im Wod beta. (Aiz. 60:2) Kaa Jeuova did bles im piipl dem it did elp dem fi gwaan sorv im an api wen dem a sorv im, an it mek dem tan op chrang “kaa iina dem aat dem nuo se dem a du wa im waahn dem fi du.”​—Aiz. 65:14.

13. Ou wa Aizaiya did se bout ou Gad piipl a-go worship Im di rait wie agen a apm iina fi wi taim?

¹³ Wa Aizaiya did se bout ou Gad piipl a-go worship Im di rait wie agen? Wa dat av fi du wid wi tide? It av nof fi du wid wi tide kaa sins 1919 C.E., uol iip a miliyan a piipl kom outa Powaful Babilan, dat a di rilijan dem we naa worship Gad di rait  wie. Wen dem did iina dem faalz rilijan de it komiin laik se a prizn dem did de. Bot dem a go a wan lan we beta dan di lan we Jeuova did pramis di Izrelait dem, it komiin laik Jeuova kyari dem go a wan lan we dem a get aal a di gud sitn dem we im gi di piipl dem we a worship im. (Aiz. 51:3; 66:8) Bot wa a di lan we dem a get aal a di gud sitn dem we Jeuova a gi di piipl dem we a worship im?

14. Wa’a di lan we piipl a get aal di gud sitn dem we Jeuova a gi di piipl dem we a worship im, an a uu an uu de de? (Luk pan di paat we niem Dis Miin Se.)

¹⁴ So fram 1919 C.E., di wan dem we Gad pik fi go evn api fi de iina di lan we dem a get aal a di gud sitn dem we Jeuova a gi di piipl dem we a worship im. b An di wan dem we a-go get fi liv pan di ort fi eva, we di Baibl kaal di “ada shiip” de iina da siem lan de tu, an dem a get nof nof blesn fram Jeuova.​—Jan 10:16; Aiz. 25:6; 65:13.

15. A wich paat di lan we piipl a get aal a di gud sitn dem we Jeuova a gi di piipl dem we a worship im de?

¹⁵ Di lan we piipl a get aal a di gud sitn dem we Jeuova a gi di piipl dem we a worship im, a wich paat it de? Di piipl dem we worship Jeuova de aal uova di ort. So da lan ya de aal uova di worl. So no mata wich paat wi liv, di uol a wi de iina da lan de wen wi a du evriting we wi kyan du fi worship Gad di wie ou im se wi fi worship im.

16. Wa wi kyan luk pan so dat wi kyan si se Jeuova piipl dem we de iina im lan nais?

¹⁶ Fi stie iina da lan de, wan a di sitn dem we wi afi du a aalwiez a tangk Gad we mek wi paat a im kanggrigieshan dem we av piipl fram aal uova di worl. So ou wi kyan shuo im se wi tangk im? Wi kyan du dat wen wi tingk bout di nais wiez dem we wi breda an sista dem av an no tingk bout di bad wiez dem we dem av. (Jan 17:20, 21) Wa mek wi fi du dat? Tingk bout dis: Wen yu go iina wan faris, wi nuo se wi  a-go si uol iip a difrant difrant nais chrii. A siem so, wen wi go iina di lan we piipl a get aal a di gud sitn dem we Jeuova a gi di piipl dem we a worship im, it av uol iip a difrant difrant kain-a piipl we nais iin de we komiin laik di difrant difrant kain-a chrii dem. (Aiz. 44:4; 61:3) So wi fi mek shuor se wi a luk pan ou aal a di chrii dem luk priti tugeda an wi no dis a luk pan di likl chip-op chip-op we de pan di chrii dem we de roun wi. So wi no fi mek kaa wi no porfek ar kaa di breda an sista dem no porfek tap wi fram si ou nais aal a Jeuova piipl dem we a wok tugeda we de iina di difrant kanggrigieshan dem bi.

17. Wa evri wan a wi fi du fi elp wi breda an sista dem iina di kanggrigieshan fi liv tugeda az wan?

¹⁷ Wen wi du evriting we wi kyan du fi mek shuor se wi a liv iina piis wid evribadi wi a elp evribadi iina di kanggrigieshan fi liv tugeda az wan. (Mat. 5:9; Ruo. 12:18) Evritaim wen wi mek di fos muuv fi mek piis wid sumadi iina di kanggrigieshan wi a du sitn fi mek di lan we Jeuova piipl de iina luk gud. Wi fi memba se evribadi we iina da lan de a Jeuova jraa dem fi kom worship im de. (Jan 6:44) Jeuova mos api wen im si ou wi a wok aad fi du evriting we wi kyan du fi mek evribadi iina di kanggrigieshan liv iina piis!​—Aiz. 26:3; Agai 2:7

18. A wa wi fi sidong an tingk bout, an wa mek?

¹⁸ Jeuova a gi di wan dem we a sorv im uol iip a blesn. So wa wi fi du so dat wi kyan get som a dem blesn ya? Wan ting we wi kyan du a sidong an tingk bout di sitn dem we wi riid an stodi bout iina Gad Wod an iina di buk an pamplet dem we wi av. Wen wi du dis, it wi mek wi av som gud wiez an it wi mek wi “lov [wi] wan aneda laik breda an sista.” (Ruo. 12:10) Wen wi tingk bout ou Jeuova a bles wi ya nou, it mek wi an im get kluosa. An wen wi tingk bout di blesn dem we Jeuova a-go gi wi iina di fyuucha, it a-go mek wi nuo se wi a-go kyan sorv im fi eva. Wen wi du aal a dem sitn ya, it wi elp wi fi api wen wi a sorv Jeuova ya nou.

19. (a) Azkaadn tu Aizaiya 30;18, wa wi shuor se? (b) Wa a-go elp wi fi eng aan an go chuu wi prablem dem an stil api?

¹⁹ Jeuova a-go “du sitn gud” fi wi an get rid a di wikid piipl dem outa da worl ya. (Aiz. 30:18) Wi nuo fi shuor se Jeuova a wan “Gad we fier.” Im naa go lou Sietan worl fi de bout wan die langga dan wa fier. (Aiz. 25:9) Wi a gwaan wiet pan Jeuova fi wen im redi fi siev wi. Iina di miin taim, wi mek op wi main fi gwaan prie an stodi Gad Wod an du wa it se wi fi du, an sidong an tingk bout ou Gad a bles wi nou. Wen wi du aal dem sitn de, Jeuova a-go elp wi fi eng aan an go chuu wi prablem dem an stil api wen wi a worship im.