1-2. A wa a som a di sitn dem we mait-a mek piipl chriit ada piipl bad?

 JIIZAS did tel wan tuori bout wan uman uufa ozban ded we did aalwiez a go tu wan joj an aks im fi gi ar jostis. An wi nuo se Jiizas falara dem did get wa da tuori ya a se kaa iina dem taim de piipl yuus tu chriit di puor piipl dem bad an tel lai pan dem. (Luuk 18:1-5) An wi andastan wa da tuori ya a se tu kaa sumadi mait-a tel lai pan wi ar chriit wi bad tu.

² Tide piipl mait-a chriit wi bad kaaz a di kola a wi skin ar kaaz a we wi kom fram. An wi aalwiez a si piipl a chriit piipl bad, so it no shak wi wen piipl no chriit wi fier. (Iik. 5:8) Bot wen di breda an sista dem chriit wi dem wie ya, a dat lik wi fi siks. Bot wi fi memba se wi breda an sista dem naa fait gens wi, a jos kaa dem no porfek. Wen wi luk pan ou Jiizas did diil wid it wen piipl did chriit im bad ar wen dem did tel lai pan im, it kyan elp wi. An ef wi riili tingk bout it, ef wi kyan tek wi taim wid piipl we chriit wi bad we naa sorv Jeuova, yu no tingk se wi fi tek wi taim wid wi breda an sista dem we a sorv Jeuova wid wi? A ou yu tingk Jeuova fiil wen piipl we naa sorv im chriit wi bad ar wen wi breda ar sista dem chriit wi bad? Yu tingk Jeuova kier bout wa wi a go chuu?

 3. Wa mek wi nuo se Jeuova fiil it fi wi wen wi a sofa an wen wi naa get no jostis?

³ Jeuova riili kier bout ou piipl chriit wi. “Jeuova lov fi chriit evribadi fier.” (Sa. 37:28) Jiizas did mek wi nuo  dis wen im se: “Gad wi mek shuor se dem get jostis kwik kwik,” an im a-go dwi’it di rait taim. (Luuk 18:7, 8) An suun suun im a-go get rid a eniting we a mek wi sofa an im a-go mek shuor se evribadi get jostis.​—Sa. 72:1, 2.

 4. A wa Jeuova gi wi fi elp wi tide?

⁴ Wi afi wiet fi di taim wen Jeuova a-go get rid a aal a wi prablem dem. Bot fi rait ya nou, Jeuova a-go elp wi fi diil wid di ting dem we wi a go chuu. (2 Pii. 3:13) An im tiich wi ou fi du di rait ting wen piipl chriit wi bad, an im yuuz im Bwai Pikni fi mek wi si di porfek wie ou wi kyan du dat. An im yuuz di Baibl tu fi shuo wi tingz we wi kyan du wen piipl no chriit wi rait.

KIERFUL BOUT WA YU DU WEN PIIPL CHRIIT YU BAD

 5. Wa mek wi fi kierful bout wa wi du wen piipl no chriit wi fier?

⁵ Wen piipl no chriit wi fier it kyan riili ort wi an mek wi fiil a wie. (Iik. 7:7) Dis did apm tu som a Jeuova piipl dem, laik tu Juob an Abakok. (Juob 6:2, 3; Aba. 1:1-3) Iivn duo it mait-a naamal fi fiil dem wie ya, wi stil afi kierful bout di sitn dem we wi du wen wi fiil dem wie ya kaa wi mait-a en op du sitn we mek wi luk laik fuul.

 6. Wa wi kyan lorn fram wa Absalam did du? (Luk pan di picha tu.)

⁶ Ef sumadi du wi sitn bad an wi chrai fi diil wid it wiself wi mait-a mek tingz wos. Laik tingk bout King Dievid bwai pikni, Absalam, we did beks bad kaa im aaf breda Amnan did riep im sista Tiemaar. An azkaadn tu di Laa we Muoziz did gi dem, Amnan did fi ded fi wa im du. (Liv. 20:17) Aalduo wi kuda si wa mek Absalam did beks bad, im neehn av no rait fi du wa im du.​—2 Sam. 13:20-23, 28, 29.

 7. Kaa piipl neva did a get no jostis, ou it did mek di man we rait Saam 73 fiil?

⁷ Wen it luk laik se di piipl dem we a du bie wikid sitn a get we wid it, wi mait-a wanda ef it mek sens wi du wa rait. Laik tingk bout di man we did rait Saam 73 uu did a luk pan ou tingz did a gwaan fi di wikid piipl dem kaaz a wa dem did a du tu di wan dem we a du wa rait. Im se: “Dem wan ya a di wikid piipl dem we  aalwiez av it iizi iina laif.” (Sa. 73:12) An wen im si se piipl naa get no jostis, im aalmuos fiil se it neehn mek no sens fi gwaan sorv Jeuova. Im se: “Di muor mi chrai fi figa out wa a gwaan, a di muor it bada mi.” (Sa. 73:14, 16) Matarafak im se: “Bot mi aalmuos ton we an tap du di sitn dem we rait. It wuda komiin laik se mi nieli slaid an jrap.” (Sa. 73:2) Sopm laik dis did apm tu wan breda we wi a-go kaal Alberto.

 8. A wa did apm tu wan breda kaa im neehn get no jostis?

⁸ Dem se Alberto did tiif som a di kanggrigieshan moni bot notn neehn go so at aal. Bot kaaz a dat, dem did mek im tap du di sitn dem we im yuus tu du iina di kanggrigieshan, an som a di breda an sista dem we did nuo bout it neehn iivn rispek im agen. Im se: “Mi neehn nuo wa fi du an mi did beks bad.” Im mek ou im did fiil kaaz im fi tap du di sitn dem we im fi du fi kip kluos tu Gad. So fi faiv ier im no priich an go a miitn wid di breda an sista dem. Dis mek wi si se wa apm tu Alberto kyan apm tu eni wan a wi ef wi get beks bad kaa sitn apm an wi no get no jostis.

 WEN YU NAA GET NO JOSTIS, DU LAIK WA JIIZAS DID DU

 9. A wa a som a di sitn dem we Jiizas did go chuu? (Luk pan di picha tu.)

⁹ Jiizas mek wi si di bes wie ou fi diil wid tingz wen wi naa get no jostis. Memba se a no onggl ada piipl did chriit im bad, im fambili did chriit im bad tu. Im fambili did se im a gwaan laik im mad. An di choch liida dem did se im did a wok wid di diiman dem. An di Ruoman suoja dem did laaf aafa im, biit biit im op, an den kil im. (Maak 3:21, 22; 14:55; 15:16-20, 35-37) Bot Jiizas go chuu aal a dem sitn ya an im neehn du bak notn tu dem. So wa wi kyan lorn fram Jiizas?

10. A ou Jiizas did diil wid it wen im neehn a get no jostis? (1 Piita 2:21-23)

¹⁰ Riid 1 Piita 2:21-23. a Jiizas mek wi si di bes ting we wi kyan du wen wi naa get no jostis. Im did nuo wen fi se sopm an wen no fi se notn. (Mat. 26:62-64) Wen sumadi se sitn bout im we no go so, im no aalwiez se bak notn. (Mat. 11:19) Wen di piipl dem we did a chriit im bad tel im at wod, im neva tel dem bak non, an im neva chretn fi du dem bak notn niida. Im iizi imself an im “gwaan put im chos iina Gad we joj evribadi bies pan wa dem du.” Jiizas did nuo se di big ting a ou Jeuova fiil bout tingz. Im nuo se Jeuova wuda diil wid tingz an mek evribadi get jostis di rait taim.

11. A wen a som a di taim wen wi afi kanchuol wa wi se? (Luk pan di picha dem tu.)

¹¹ Ef wi fain se sumadi naa chriit wi  fier, wi fi du laik Jiizas an kanchuol wa wi a se, kaa som a di sitn dem we mait-a apm tu wi a som likl sitn we wi kyan mek gwaan kaa wi mait-a en op se sitn we mek tingz wos. (Iik. 3:7; Jmz. 1:19, 20) An som a di taim dem wen wi si se dem naa chriit wi ar sumadi fier, wi mait-a niid fi taak op. Ar wi mait-a afi taak op wen wi a difen wa wi biliiv iina. (Aks 6:1, 2) An ef wi afi taak op, wi a-go chrai fi dwi’it iina wan wie we shuo se wi rispek di sumadi we wi a taak tu.​—1 Pii. 3:15, NWT. b

12. A ou wi kyan chos iina di “Gad we joj evribadi bies pan wa dem du”?

¹² Wi kyan du laik Jiizas tu wen wi put wi chos iina “Gad we joj evribadi bies pan wa dem du.” So ef sumadi se wi du sitn we wi no du an chriit wi bad, kaa wi nuo se Jeuova nuo di chuut wi kyan go chuu an wiet pan im fi saat out tingz. An wen wi lef tingz wid Jeuova, wi naa go get beks so bad dat wi staat fi av op nobadi iina wi aat an kip we fram dem. Kaa ef wi staat fi fiil dem wie ya, it kyan mek wi du tingz we wi wudn naamali du. An it kyan mek wi no api agen, an it kyan mek wi an Jeuova no fren agen niida.​—Sa. 37:8.

13. Wa kyan elp wi fi gwaan diil wid it wen piipl a chriit wi bad?

¹³ Wi nuo se wi naa go kyan du tingz porfek laik Jiizas. Som a di taim wi a-go se an du tingz we wi fiil bad bout. (Jmz. 3:2) An som a di sitn dem we a apm tu wi a-go mek wi fiil pien iina wi aat fi di res a wi laif iina da worl ya. An ef a dat a apm tu yu, jos nuo se Jeuova nuo wa yu a go chuu. An Jiizas go chuu nof sitn tu so im kyan go fiil it fi yu tu. (Iib. 4:15, 16) An Jeuova tel wi wa wi kyan du fi diil wid it wen piipl a chriit wi bad. Mek wi luk pan tuu vors iina di buk a Ruoman we kyan elp wi.

“LEF DEM TU GAD MEK IM JOJ DEM”

14. Ou wi kyan ‘lef tingz tu Gad’? (Ruoman 12:19)

¹⁴ Riid Ruoman 12:19. Di apasl Paal mek wi nuo se ef sumadi du wi sitn, wi no fi chrai du dem bak sitn bot wi fi “lef dem tu Gad mek im joj dem” wen im fiil se a di bes taim an iina di wie ou im waahn fi diil wid dem. Afta dem neehn chriit wan breda we niem Jan fier, im se: “Mi did afi chrai aad no fi chrai fi saat out tingz miself. Ruoman 12:19 did elp mi fi wiet pan Jeuova fi du wa im a du.”

15. Wa mek di bes ting fi wi du a wiet pan Jeuova fi diil wid tingz wen piipl naa chriit wi fier?

¹⁵ Wen wi wiet pan Jeuova fi diil wid tingz, it du wi gud. Wi naa go afi bada wiself a chrai fi diil wid tingz wiself kaa Jeuova redi fi elp wi. A laik im a se ‘Enitaim yu naa get no jostis, mi wi diil wid it fi yu.’ Jeuova se: “A fi mi jab fi mek piipl pie fi di rang we dem du.” So wi kyan nuo se Jeuova a-go diil wid it di bes wie. An a dis did elp Jan we wi taak bout aredi. Im se: “Ef mi fi jos wiet pan Jeuova, im a-go diil wid tingz beta dan ou mi kuda diil wid it.”

“BIIT WIKIDNIS WID GUD”

16-17. Wen wi prie tu Jeuova, a ou it kyan elp wi fi “biit wikidnis wid gud”? (Ruoman 12:21)

¹⁶ Riid Ruoman 12:21. Paal did tel di Kristiyan dem tu se dem fi “biit wikidnis wid gud.” Iina di sorman pan di mountn Jiizas se: “Yu fi gwaan lov yu enimi dem an yu fi prie fi di wan dem we a mek tingz  aad fi yu.” (Mat. 5:44, NWT ) An a dat Jiizas did du. Wen di Ruoman suoja dem did mek im sofa an wen dem niel im op pan di wudn puos fi im ded, Jiizas did mos fiil it wen im did afi go chuu aal a dem sitn de aalduo im neva du notn rang.

¹⁷ Jiizas did gwaan biit wikidnis wid gud. Im neva kos di suoja dem bot im prie fi dem. Im se: “Faada Gad paadn dem, dem no nuo wa dem a du.” (Luuk 23:34) Wen wi prie fi di piipl dem we a chriit wi bad, it wi mek wi no av dem op iina wi aat so moch an it wi aal mek wi chienj di wie ou wi fiil bout dem.

18. A ou it did elp Alberto an Jan wen dem prie tu Jeuova kaa piipl neehn a chriit dem fier?

¹⁸ Wen di tuu breda dem we wi taak bout iina da lesn ya prie tu Jeuova, it elp dem fi diil wid it wen piipl neehn a chriit dem fier. Alberto se: “Mi prie fi di breda dem we neehn a chriit mi rait. Mi aks Jeuova uol iip a taim fi elp mi fi go chuu an no fi aalwiez a tingk bout wa dem du mi.” An it fiil gud fi nuo se Alberto a sorv Jeuova agen. An Jan se: “A uol iip a taim mi did prie fi di breda we did du mi sitn. Wen mi prie fi im, it elp mi fi luk pan tingz iina di rait wie an no joj im. An it elp mi fi av piis iina mi main.”

19. Wa wi fi gwaan du til da worl ya don? (1 Piita 3:8, 9)

¹⁹ Wi no nuo som a di sitn dem we wi a-go go chuu bifuo da worl ya don, bot no mata wa apm tu wi, mek wi no tap prie tu Jeuova fi im elp wi. Mek wi du laik we Jiizas du wen piipl did a chriit im bad. An mek wi gwaan diil wid tingz di wie ou di Baibl se wi fi diil wid it. Ef wi du dem sitn ya, wi kyan nuo fi shuor se wi a-go get di blesn dem we Jeuova pramis wi.​—Riid 1 Piita 3:8, 9.