Yu wuda waahn fi get muor outa yu uona Baibl stodi? Yu kyan du dem sitn ya fi fain wan gud plies we a-go elp yu fi tingk bout wa yu a stodi muor:

• Pik wan nais plies. Chrai fi fain wan plies we niit an kliin an we av nof lait so yu kyan si wa yu a riid se. Yu kuda sidong roun wan tiebl ar fain wan nais plies outa duor fi dwi’it.

• Fain wan plies we nobadi no de. “Orli orli iina di maanin, . . . Jiizas get op an go fain wan plies we nobadi no de” so dat im kyan go prie. (Maak 1:35) Bot ef yu kyaahn fain no plies we nobadi no de, yu kyan mek yu fambili ar di sumadi dem we yu liv wid nuo wen yu plan fi du yu uona Baibl stodi, an aks dem ef dem kyan no chobl yu da taim de.

• Chrai aad fi kip yu main pan wa yu a stodi. Ef yu a yuuz yu fuon ar tablit fi du yu uona Baibl stodi, put it pan sailent ar ierplien muod so dat it no tek yu main aafa wa yu a stodi. An ef wen yu a stodi yu memba sitn we yu fi du, yu kyan rait it dong so dat yu no figet fi dwi’it lieta. Ef yu fain it aad fi kip yu main pan wa yu a stodi, it wuda gud fi tek a likl briek an go waak likl ar chrech likl.