Paul: Mi se wi did api so til! A did Novemba 1985, wi did de pan wi wie fi go a wi fos mishineri wok we dem gi wi fi du iina Laibiiriya we de iina Wes Afrika. Di plien lan iina Senigal. Den Anne se, “Iina no taim, likl uova a owa wi a-go de iina Laibiiriya!” Den wi ier uova di loud spiika: “Di piipl dem we a go a Laibiiriya afi go kom aafa di plien. Som piipl a fait gens di govament uova de an a das wai wi kyaahn lan de.” So fi di neks ten die wi did afi stie wid som mishineri we liv iina Senigal. An wi did a lisn tu di nyuuz bout wa did a gwaan a Laibiiriya we did a mek wi nuo se dem did a kil aaf wol iip a piipl an ou dem put di plies anda lak dong, an enibadi weehn a go gens dem, dem wuda shuut dem.

Anne: Mi an mi ozban lov di kwaiyat laif yu no. Matarafak wen mi a likl pikni dem kaal mi Wori Wori Anne. Dem taim de mi did aal fried fi kraas di ruod tu! Bot wi did mek op wi main se wi stil a-go go a Laibiiriya go du di wok we Jeuova gi wi fi du.

Paul: Mi an Anne did gruo op iina di siem ieriya iina di wes paat a Ingglan. An mi mada an mi faada an Anne mada aalwiez a tel wi se wi kyan paiyanier, so rait afta wi don ai skuul wi staat paiyanier. Dem did api fi nuo se wi did waahn yuuz muos a wi taim fi du wol iip fi Jeuova. Wen mi kech 19, mi get fi go a Betel. An afta wi marid iina 1982, di tuu a wi get fi stie a Betel.

Anne: Wi did lov fi wok a Betel ino, bot wi did aalwiez waahn fi priich we dem niid elp fi du di priichin wok. An kaa wi did a wok a Betel wid som breda an sista we yuus tu bi mishineri, an dem tel wi uol iip a nais sitn we apm tu dem wen dem did a du di mishineri wok, it did mek wi wel waahn fi go priich. So wi yuus tu prie evri nait fi wol a chrii ier bout dis, an wi did api bad wen iina 1985 wi get wan leta we se wi kyan go a klaas nomba 79 a Gilead! An ges wa! Afta dat, a Laibiiriya we de iina Wes Afrika dem sen wi.

Paul: Wi did de pan di fos plien we dem mek kom iina Laibiiriya. Dem did stil av di konchri anda lakdong an piipl did stil fried kaaz a wa a  gwaan. Eni ou wan kyaar bakfaiya, evribadi wuda baal out an skyata. So fi iizi wiself, wi wuda sidong tugeda an riid sopm outa di buk a Saamz evri nait. Bot wi did riili lov di wok we wi get fi du. Anne did a yuuz muos a ar taim a du di priichin wok, an mi did a wok a Betel wid breda John Charuk. a Im tiich mi nof nof tingz kaa im did a liv iina Laibiiriya fi wan lang taim so im wuda nuo muor bout di ting dem we di breda an sista dem wuda a go chuu.

Anne: Kaaz a di breda an sista dem, iina no taim wi get fi lov Laibiiriya. Di breda an sista dem did nais an iizi fi taak tu an dem lov Jeuova, so wi an dem did komiin laik fambili. An dem aalwiez taak tingz fi elp wi get chrangga iina wa wi biliiv iina. Fiil sorvis did nais! Ef wi a priich tu sumadi an wi go we kwik, dem wuda beks wid wi! Aal ef a pan di ruod said yu si dem, dem wuda a taak bout di Baibl. So yu kyan jos jomp iin an staat taak wid dem kaa dem lov fi taak bout di Baibl. An wi did av wol iip a piipl a stodi di Baibl wid til it did aal aad fi fain taim fi stodi wid evribadi. A dem de prablem de yu waahn fi av! It did jos nais!

Paul: Fi fuor ier, tingz did aarait iina di konchri. Bot iina 1989 evriting chienj kaa di piipl dem staat fait gens dem wan aneda. Pan Julai 2, 1990, di piipl dem we did a fait gens di govament tek uova wan plies we de nier Betel. An fi chrii mont wi kudn get fi taak tu nobadi we de outa di konchri, nat iivn wi fambili an nobadi we de a di worl ed afis. A bie kilin an faitin did a gwaan, fuud did shaat an dem did aal a riep aaf di uman dem tu. Dis did a apm iina di wol konchri an it did a galang fi 14 ier.

Anne: Som piipl fram wan chraib did a kil ada piipl fram wan neda chraib. An evriwe pan di ruod yu wuda si som piipl we a fait an kil aaf piipl wid som big gon, an dem did iina som kluoz we no luk naamal, an dem wuda go iina evri ous an tek we wa dem waahn. Som a dem se wen dem a kil piipl a laik se dem did a “kil chikin.” Dem blak di ruod an dem wuda kil enibadi we chrai fi paas chuu. An dem wuda pail op di ded badi dem, an dis did a gwaan nier Betel tu. Dem did aal kil aaf som a wi breda an sista dem an tuu a wi mishineri dem tu.

Ef di wan dem we a fait an a kil piipl fain out se di breda an sista dem a aid nobadi we kom fram di chraib we dem a kil out, dem wuda kil dem tu. Di mishineri dem an di wan dem we wok a Betel did aid di breda an sista dem tu. Som breda an sista did ron we lef dem yaad an kom a Betel. So dem kip som a dem dongstiez, an som a dem did de opstiez wid wi iina di ruum dem. An yu kuda biliiv se a sevn piipl iina wan fambili did iina fi wi ruum wid wi?

 Paul: Evridie di wan dem we did a fait an kil piipl did a chrai fi kom iina Betel fi fain out ef wi a aid nobadi. So wi wuda yuuz fuor sumadi fi mek wi nuo wa a gwaan. Wan breda an wan sista wuda de wach a di winda an tuu breda wuda go outa di giet go taak tu dem. Ef di tuu outa di giet av dem an infronta dem den wi wuda nuo se evriting gud, bot ef dem put dem an dem baka dem den dat wuda mek wi nuo se di wan dem we did a fait an kil piipl a gwaan bad. So di wan dem we de a di winda wuda ron an go aid di breda an sista dem kwik kwik.

Anne: Wan die di breda dem kudn tap dem fram kom iin. So mi an wan sista go iina di baachuum an lak op wiself iin de. It did av wan kobad iin de we av wan likl paat we sumadi kuda aid iina. So di sista kwiiz op arself go iin de go aid. Dem did av som gon an sitn, an dem fala baka mi go op a di ruum an dis staat fi biit dong di ruum duor. So Paul baal out an se: “Mi waif a yuuz di baachuum!” Bwai, fi tel yu di chuut, fi put di likl kova uova di aidin plies did naizi bad an it did tek likl taim fi set op bak di tingz dem pan di shelf. Mi did so fried mi staat fi chrimbl. Aal we did a go chuu mi ed a se, ‘A ou mi fi uopm op di duor an mi a chrimbl so?’ So mi prie tu Jeuova an beg im fi elp mi, an den mi uopm di duor an staat taak tu dem kaam kaam. Wan a dem push mi outa di wie an go chriet a di kobad an den im uopm it an staat fi go chuu di shelf dem. Im kudn biliiv se im neva fain nobadi. So im an di neda wan dem staat fi sorch di ada ruum dem bot dem no fain a suol.

Paul: Fi uol iip a mont wi neehn av moch fuud fi iit. Bot di sitn dem we Jeuova gi wi fi kip kluos tu im, a dat did a kip wi chrang. Muor taim wi neehn av no fuud fi nyam a maanin taim, so maanin worship a did di onggl “fuud” we wi did av, bot wi did api fi it kaa a it gi wi di chrent we wi did niid fi go aan.

Ef fuud an waata did don pan wi, wi wuda afi lef de, an di wan dem we wi did a aid kuda en op ded. Bot Jeuova aalwiez gi wi wa wi niid wen wi niid it. Im tek kier a wi an elp wi fi iizi wiself an no fried.

Di muor tingz iina di konchri did get wosa, a di muor Jeuova gi wi di chrent fi go aan. Nof taim wi breda an sista dem did afi ron fi dem laif, bot dem neva tap chos iina Jeuova an dem did kaam tu. Som a di breda an sista dem se dis did a elp dem so dat dem kyan “redi fi go chuu di wos sofarieshan.” Som a di elda dem an di yong breda dem did briev an dem du evriting we dem kuda du fi elp out di breda an sista dem. Di breda an sista dem we did afi lef dem yaad wuda stik tugeda. An kaa dem de somwe difrant, dem get di chaans fi priich tu piipl we dem wudn naamali priich tu. An dem wuda yuuz eniting we dem kuda fain iina di bush fi mek wan Kindom Aal an dem wuda kip miitn de. An di miitn dem elp dem wen it did luk laik se dem na’av notn a luk faawod tu. Di priichin wok we dem did a du elp dem fi go chuu tu. Wen wi did a gi  out fuud an kluoz an dem ting de, nof a di breda an sista dem wuda aks fi wan bag fi go priich, an mi a tel yu man, dat did toch wi aat. Som piipl we did a go chuu uol iip iina laif tu did lisn tu di gud nyuuz, an dem did fraitn fi si ou wid aal a wa did a gwaan wi did stil api. (Mat. 5:14-16) An kaa wi breda an sista dem did wok aad fi priich, it did elp som a di piipl dem we did a fait an kil piipl fi ton wi breda an sista tu.

Paul: Wi did afi lef Laibiiriya chrii taim fi wan likl wail an tuu ada taim wi did afi lef fi di wol ier. Wan sista we a mishineri se sopm we shuo ou wi fiil tu. Shi se: “Wen wi de a Gilead, dem did tiich wi se wi fi du Jeuova wok wid aal a wi aat an a dat wi did du. So wen wi lef wi breda an sista dem an nuo se dem a sofa, it did komiin laik se wi aat did a tier outa wi ches!” Bot wi glad se wi stil kuda elp out di breda an sista dem iina Laibiiriya an elp out iina di priichin wok wen wi did de a som ada konchri we de nier de.

Anne: Iina Mie 1996, di fuor a wi pak op iina wan branch kyaar wid som nof piepa an tingz bout di wok we a gwaan iina Laibiiriya. Wi did waahn fi jraiv go a wan siefa plies we did de bout 10 mail fram wi. Wen wi a jraiv, di man dem we did a fait an kil piipl faiya som shat iina di ier, an dem tap wi kyaar an tek chrii a wi outa di kyaar an jraiv aaf wid Paul iina it. Mi se, wi did shak bad! Bot aal av a sodn wi si Paul a waak chuu di kroud wid im ed a bliid. Di wie ou im did luk, it did komiin laik se a shuut dem did shuut im, bot wen wi tek a stak wi riyalaiz se ef dem did shuut im, im wudn a waak. Wa did apm a se wan a di man dem did lik im wen dem did a push im outa di kyaar. Wi did glad se a did jos wan likl kot im did get.

Den wi si wan aami chok we ful op a piipl we luk laik dem fried bad. So wi eng aan pan it tait tait. Den di jraiva staat op di chok an staat fi spiid chuu di plies, so wi nieli jrap aaf. So wi staat fi ala out tu im an tel im fi tap bot im did so fried im neehn did a lisn tu wi. Mi a tel yu man, wen wi riich wi did taiyad bad kaa wi did afi wol aan so tait an wi did fraitn so til, aal wi nii dem did a shiek.

Paul: Wi luk pan wi wan aneda iina wi doti tier op kluoz dem an a wanda tu wiself se a ou wi no ded. Wi did sliip iina wan fiil saida wan oul elikyapta we dem did shuut op shuut op, an a it siem wan kya wi go a Siera Liyuon di neks die. Wi did glad se wi no ded bot aal wi did a tingk bout a wi breda an sista dem we lef de.

Anne: Wen wi riich a Betel iina Friitoun we de iina Siera Liyuon, di breda an sista dem tek kier a wi an wi did fiil sief. Bot den mi staat fi memba som a di bad sitn dem we did apm wen mi de iina Laibiiriya. Iina di die taim, mi did aalwiez a luk roun kaaz mi fried se sitn bad wuda apm. It did komiin laik se mi stil neehn de somwe sief. Mi wuda aalwiez wiek op a nait taim, an mi wuda a chrimbl an kuol swet wuda a wash mi. Mi did fiil laik mi kudn briid. So Paul wuda og mi op an prie wid mi. Wi wuda sing som a di Kindom sang dem til mi tap chrimbl. Mi did fiil laik mi a mad an laik mi kudn bi wan mishineri agen.

Mi kyaahn figet wa apm afta dat. Da siem wiik de wi get tuu magaziin. Wan a dem a di Awake! fi Juun 8, 1996, an it did av wan paat iina it we niem “Coping With Panic Attacks.” It mek mi andastan wa did a apm tu mi. Di neda wan a The Wachtower fi Mie 15, 1996, an it did av wan paat iina it we niem “Where Do They Get Their Strength?” An yu did av wan picha a wan botaflai iin de we sitn did rang wid im tuu wing dem. Bot di Wachtowa elp mi fi andastan se da botaflai de kuda stil flai roun an fain fuud fi iit iivn duo im wing dem did stie so. So a siem so wen wi av Jeuova spirit wi kyan stil gwaan elp piipl iivn duo wi wiik kaa wi go chuu som bad tingz iina wi laif. Jeuova riili gi mi wa mi niid fi kip mi chrang di rait taim. (Mat. 24:45) So mi staat fi luk op som muor sitn laik dis an put dem tugeda iina wan fuolda. Dem did elp mi nof nof. An afta a wail, dem bad sitn de we did apm neehn bada mi so moch agen.

Paul: Yu si enitaim wi get di chaans fi go baka Laibiiriya, wi api bad. Bai di laas paat a 2004,  wi did a mishineri fi nieli 20 ier! Di waar did don an dem did plan fi mek wan branch afis. Den aal av a sodn wi get wan nyuu wok fi du.

Dis neehn iizi fi wi at aal kaa wi did get so kluos tu wi breda an sista dem. Wi did a wanda ou wi a-go manij widout dem. Wi si ou wen wi lef wi fambili an go a Gilead an dipen pan Jeuova, ou im bles wi an tek kier a wi. So wi nuo se im a-go du di siem ting fi wi iina da nyuu wok ya, so wi did redi fi go staat di wok. An a Gaana wi did fi go we neehn de tuu faar.

Anne: Wen wi did a lef Laibiiriya wi baal so til. Wi did fraitn wen wan breda we op iina iej we niem Frank tel wi se: “Yu fi figet bout wi!” Den im tel wi wa im miin wen im se: “Wi nuo se unu naa go figet bout wi, bot unu fi wok aad iina di nyuu wok we unu get fi du fram Jeuova. So tingk bout di breda an sista dem we unu a-go wok wid.” Wa im did se tu wi did elp wi fi mek som nyuu fren iina da konchri ya we a onggl likl bit a piipl did nuo wi.

Paul: Bot it neehn tek lang fi wi get fi lov di breda an sista dem we de iina Gaana. An a did nof Jeuova Witnis di de! Wi lorn nof fram dem breda an sista ya we did stik tu Jeuova an a shuo se dem a chos iina im. An den afta wi de a Gaana fi 13 ier, wi get wan neda wok we wi neehn a ekspek. Dem sen wi go a Kenya fi go wok a di Iis Afrika branch afis de. Iivn duo wi did mis wi fren dem we wi did get fi nuo, kwik a klak wi an dem breda an sista ya iina Kenya ton gud fren. An jos laik iina Gaana an Laibiiriya, wi did av nof priichin fi du iina Kenya.

Anne: Mi go chuu uol iip a tingz iina laif we mek mi fiil fried. Yu si wen yu liv iina som bad plies ar som bad sitn apm tu yu iina laif, it kyan mek yu fiil sik an fried an fiil laik yu kyaahn go aan no muo. Jeuova naa go wok mirikl fi protek wi fram aal a dem sitn ya. Wen mi ier gon shat an dem ting de, it mek mi beli batam bon mi an mi an dem jos fiil wiik. Bot mi lorn se mi fi dipen pan Jeuova fi elp mi an fi gi mi di chrent we mi niid, an im yuuz wi breda an sista dem fi du dat. An mi si se wen wi du wi uona Baibl stodi, prie, an go a wi miitn dem an dem ting de, a so Jeuova elp wi fi gwaan du di wok we im gi wi fi du.

Paul: Som piipl aks wi se ef wi lov di wok we wi get fi du. Wen wi tingk bout it, som a di konchri dem nais an aarait bot som av som tingz a gwaan de we no mek it so sief fi liv. Bot di ting we wi lov bout aal a dem difrant difrant konchri de a di breda an sista dem, dem komiin laik wi fambili. Iivn duo wi gruo difrant, wi komiin laik wi a di siem sumadi an aal a wi lov Jeuova. Wi did tingk se wi did go de fi mek dem get chrangga iina wa dem biliiv iina bot a dem mek wi fiil chrang.

Evri taim wi muuv go a wan neda plies, wi si se a Jeuova gi wi wi breda an sista dem we de aal uova di worl. So fram wi a paat a wan kanggrigieshan wi nuo se wi a paat a wan fambili we mek wi fiil sief. An wi nuo fi shuor se wi kyan dipen pan Jeuova fi gi wi di chrent we wi niid.​—Aiz. 40:28, 29.