YU FAIN it aad som a di taim fi du yu uona Baibl stodi aafn an fi mek it nais tu? Dat mait-a apm tu aal a wi som a di taim, bot tingk bout som tingz we wi du aafn laik fi bied. Ye, it mait-a aad fi bied wen yu taiyad, bot yu fiil gud afta yu don, no chuu? A siem so wi mait-a fain it aad fi du wi uona Baibl stodi, bot wen wi dwi’it, it mek wi fiil gud kaa it wuda komiin laik se wi a yuuz Gad Wod fi “wash [wi] an mek [wi] kliin.” (Ifii. 5:26) Mek wi luk pan som sitn we kyan elp wi:

• Plan wen yu a-go dwi’it. Wan a “di sitn dem we rait” we wi fi du a wi uona Baibl stodi, so wi fi mek shuor se wi dwi’it. (Fil. 1:10) Fi elp yu fi memba wen yu plan fi du yu uona Baibl stodi, yu kyan rait dong di die an taim wen yu plan fi dwi’it pan wan piis a piepa, an put it somwe we yu kyan si’it, laik pan yu frij ar somwe laik dat. Ar yu kyan set wan alaam pan yu fuon an dem ting de we kyan elp yu fi memba se a suun taim fi yu du yu uona Baibl stodi.

• Tingk bout ou lang yu kyan stodi fa. It iizi fi yu sidong an stodi fi wan lang taim? Ar yu kyan onggl dwi’it fi wan shaat taim? Yu nuo wa a gwaan wid yu beta dan enibadi els so yu nuo wa wi wok fi yu. So plan ou lang yu a-go stodi fa bies pan wa wok fi yu. Ef yu no fiil laik yu waahn stodi wen a taim fi yu dwi’it, yu kyan jos stodi fi ten minit. Wen yu stodi fi wan shaat taim, yu a-go get muor gud outa it dan ef yu neehn dwi’it non at aal. An wans yu staat fi dwi’it, yu mait-a lov it so moch dat yu staat get we iina it an waahn fi go langga.​—Fil. 2:13.

• Tingk bout wa yu a-go stodi bout. Ef yu fain se a wen yu redi fi stodi yu a wanda wa fi stodi, dat miin tu se yu mait-a naa yuuz “evri chaans [yu] get fi du sopm gud.” (Ifii. 5:16) So wa mek yu no rait dong som a di sitn dem we yu wuda laik fi stodi bout? Laik wen sopm a bada yu, rait it dong. An evritaim yu du yu uona Baibl stodi, yu kyan rait dong som muor tingz we yu wuda laik fi stodi bout.

• No du di sed ting evritaim. Yu no afi dwi’it fi di siem mount a taim evritaim, an yu no afi yuuz di siem sitn fi stodi evritaim niida. Di impuotant ting a no wen yu stodi,ar ou lang yu a stodi fa, ar wa yu stodi, bot di impuotant ting a se yu dwi’it aafn.

Ef wi du wi uona Baibl stodi evri wiik som uol iip a gud tingz a-go apm fi wi. Wi an Jeuova a-go get kluos kluos, an wi a-go nuo di rait wie ou fi du tingz, an wi a-go get chrangga an chrangga iina di sitn dem we wi biliiv iina, an wi a-go fiil gud tu.​—Jash. 1:8.