DI LESN FI STODI 46
SANG 49 Mek Jeuova Aat Fiil Glad
Unu We A Breda—Unu A Du Di Sopm Dem We Unu Fi Du So Dat Unu Kyan Bi Wan Ministiiriyal Sorvant?
“Ef yu gi sumadi sopm, it mek yu muo api dan ef sumadi gi yu sopm.”—AKS 20:35.
A DIS WI A-GO LUK PAN
Wi a-go luk pan wa kyan elp fi push di breda dem we baptaiz fi waahn fi du di sopm dem we dem fi du so dat dem kyan bi wan ministiiriyal sorvant.
1. A ou di apasl Paal did fiil bout di ministiiriyal sorvant dem?
DI BREDA dem we a ministiiriyal sorvant iina di kanggrigieshan dem a du som big wok. Di apasl Paal did lov di wok we dem man ya a du kaa it did wot nof tu im. Laik wan a di taim wen Paal did a rait tu di breda an sista dem iina Filipai, wen im did a se oudi tu di elda dem, im sen wan speshal oudi fi di ministiiriyal sorvant dem tu.—Fil. 1:1.
2. A ou wan breda we niem Luis fiil bout di wok we im get fi du az wan ministiiriyal sorvant?
2 Wol iip a breda we baptaiz wel api fi ton wan ministiiriyal sorvant, weda dem yong ar dem op iina iej. Laik Devan a did 18 wen im ton wan ministiiriyal sorvant. An yu did av wan neda breda we niem Luis we ton wan ministiiriyal sorvant wen im a did likl uova 50. Im mek wi nuo ou nof breda we ton ministiiriyal sorvant fiil wen im se, “Wen mi tingk bout di lov we di breda an sista dem a shuo mi iina di kanggrigieshan, it mek mi fiil so gud fi nuo se mi a du di wok we mi get fi du az wan ministiiriyal sorvant!”
3. A wa a di kwestiyan dem we wi a-go luk pan?
3 Ef yu a wan breda we baptaiz an yu a no wan ministiiriyal sorvant yet, yu tingk yu kuda chrai fi du muor fi ton wan? A wa kyan push yu fi du dat? An wa a som a di sitn dem we di Baibl se yu fi du fi ton wan ministiiriyal sorvant? Iina da lesn ya, wi a-go luk pan di ansa fi dem kwestiyan de. Bot di fos ting wi a-go du a taak bout di kain-a wok we wan ministiiriyal sorvant du.
WA KAIN-A WOK WAN MINISTIIRIYAL SORVANT DU?
4. A wa a som a di sitn dem we wan ministiiriyal sorvant du? (Luk pan di picha tu.)
4 Wan ministiiriyal sorvant a wan breda uu baptaiz an Jeuova yuuz im uoli spirit fi pik im fi elp di elda dem tek kier a tingz iina di kanggrigieshan. Som a di ministiiriyal sorvant dem mek shuor se di breda an sista dem av dem buk an pamplet dem an nof plies fi wok iina sorvis. An som ada wan elp fi kliin di Kindom Aal an mek shuor se it luk gud. Som a dem elp di breda an sista dem iina difrant difrant wie, an tek kier a di soun an plie di vidiyo dem wen miitn a gwaan. So nof a di wok we dem ministiiriyal sorvant ya du a fi elp fi mek tingz ron gud iina di kanggrigieshan. Bot di bigis ting a dat dem breda ya lov Jeuova an a du di sitn dem we im se rait. An dem lov di breda an sista dem iina di kanggrigieshan tu. (Mat. 22:37-39) Bot wa a som a di sitn dem we wan breda we baptaiz fi du fi ton wan ministiiriyal sorvant?
Di ministiiriyal sorvant dem a du laik Jiizas an a du tingz fi elp dem breda an sista dem (Luk iina paragraaf 4)
5. Wa wan breda fi du ef dem waahn ton wan ministiiriyal sorvant?
5 Di Baibl mek wi si di wiez dem we wan breda fi av fi ton wan ministiiriyal sorvant. (1 Tim. 3:8-10, 12, 13) So yu kyan riid op dem skripcha de an si di sopm dem we it se yu fi du, an den chrai aad fi du dem so dat yu kyan ton wan ministiiriyal sorvant. Bot fos yu afi nuo wa mek yu riili waahn ton wan ministiiriyal sorvant.
WA MEK YU WAAHN FI TON WAN MINISTIIRIYAL SORVANT?
6. A wa fi push yu fi mek yu du eniting fi yu breda an sista dem? (Matyu 20:28; luk pan di picha tu.)
6 A kaa Jiizas did lov piipl an Jeuova mek im du wa im fi du. A dat mek im ombl imself an du tingz fi piipl we ada piipl mait-a neehn waahn fi du. An a im a di mien sumadi we wi fi a fala. (Riid Matyu 20:28; Jan 13:5, 14, 15) Ef a lov mek yu a du wa Jeuova waahn yu fi du, im a-go bles yu an elp yu fi ton wan ministiiriyal sorvant.—1 Kor. 16:14; 1 Pii. 5:5.
Jiizas du tingz fi ada piipl fi mek im apasl dem si se dem fi ombl demself an no chrai fi get no tap-a-tap pozishan fi ada piipl si dem (Luk iina paragraaf 6)
7. Wa mek wan breda no fi waahn du sortn tingz so dat ada piipl kyan big dem op?
7 Iina da worl ya, piipl aalwiez laik di piipl dem we wok aad fi du tingz so dat piipl kyan si dem an big dem. Bot a no dat a gwaan iina Jeuova aaganaizieshan. Wan breda fi du di sitn dem we dem du kaa dem lov piipl, jos laik Jiizas. Dem naa go du tingz fi mek piipl fiil se dem big an impuotant an fi get big op, ar kaa dem waahn fi ruul ada piipl. Ef dem mek sumadi laik dat ton wan ministiiriyal sorvant, wen dem aks dem fi du sortn likl tingz iina di kanggrigieshan, da breda de mait-a fiil se im tuu big an impuotant fi du dem sitn de, so im mait-a no waahn fi du dem. (Jan 10:12) So ef sumadi a wok aad fi du sopm fi big op demself, Jeuova naa go bles wa dem a du.—1 Kor. 10:24, 33; 13:4, 5.
8. Wa Jiizas did tel im apasl dem?
8 Aal som a Jiizas apasl dem did a du sortn tingz fi di rang riizn tu. Laik yu did av Jiemz an Jan we did aks Jiizas fi gi dem wan tap-a-tap pozishan iina im Kindom. Jiizas neehn big dem op fi wa dem did waahn fi du, bot im mek aal a di 12 apasl dem nuo se: “Ef nobadi waahn av tap pozishan mongks unu, dem afi sorv unu, an ef non a unu waahn kom fos, unu mos ton evribadi sliev.” (Maak 10:35-37, 43, 44) Di breda dem we a du wa dem a du kaa di breda an sista dem miin so moch tu dem an dem waahn fi elp dem, a-go bi wan blesn tu di kanggrigieshan.—1 Tes. 2:8.
WA KYAN MEK YU WAAHN FI DU MUOR FI YU BREDA AN SISTA DEM?
9. Wa kyan elp yu fi waahn fi du muor fi yu breda an sista dem?
9 Ye, a chuu se yu lov Jeuova an yu waahn fi elp yu breda an sista dem. Bot yu mait-a no fiil laik yu kyan tek aan muor wok fi ton wan ministiiriyal sorvant. Bot ef yu waahn fi du muor fi yu breda an sista dem, yu kyan tingk bout ou it a-go mek yu api wen yu du tingz fi dem. Jiizas did se: “Ef yu gi sumadi sopm, it mek yu muo api dan ef sumadi gi yu sopm.” (Aks 20:35) Di wie ou Jiizas liv im laif mek wi si se im did muo api wen im du tingz fi ada piipl, an di siem ting kyan apm tu yu.
10. A ou Jiizas did shuo se im did api fi du tingz fi elp piipl? (Maak 6:31-34)
10 Tingk bout ou Jiizas did shuo se im wel api fi elp piipl. (Riid Maak 6:31-34.) Wan a di taim, Jiizas an im apasl dem did taiyad bad. Dem did a go somwe we nobadi no de so dat dem kuda go res. Bot wol iip a piipl riich de bifuo dem, kaa dem did waahn Jiizas fi tiich dem sopm. Im kuda se nuo, kaa im an im apasl dem “kudn iivn get taim fi nyam.” An afta im tiich dem sitn, im kuda sen dem go we. Bot kaa Jiizas did lov piipl, “im tiich dem nof sitn.” An im dwi’it til “liet iina di iivnin.” (Maak 6:35) An a no kaa im did afi dwi’it mek im dwi’it, bot a kaa “im fiil sari fi dem.” Im did waahn fi tiich dem kaa im lov dem. Wen Jiizas elp ada piipl, it mek im wel api.
11. A wa Jiizas did du fi elp di piipl dem we did a lisn tu im? (Luk pan di picha tu.)
11 Jiizas neva jos tiich piipl, im du tingz fi elp dem tu. Laik im wok wan mirikl fi fiid wan kroud a piipl, an den im aks im falara dem fi gi out di fuud. (Maak 6:41) So im mek im falara dem si som a di ting dem we dem kyan du fi ada piipl—an a dem kain-a wok ya di ministiiriyal sorvant dem fi a du tu. Di apasl dem mos did api fi elp Jiizas gi out di fuud kaa “evribadi nyam til dem beli ful”! (Maak 6:42) Dis a no di onggl taim wen Jiizas du sopm fi ada piipl wen im did waahn fi du sitn els fi imself. Wi si se im yuuz di uol a im laif fi elp ada piipl. (Mat. 4:23; 8:16) It mek Jiizas api an im did fiil gud fi tiich ada piipl an du tingz fi shuo se im kier bout dem. A siem wie so di wan dem we waahn fi ton wan ministiiriyal sorvant a-go fiil wen dem gi op tingz we dem waahn fi demself so dat dem kyan elp ada piipl.
Wen yu lov Jeuova an yu waahn fi elp di breda an sista dem, it a-go push yu fi waahn fi du tingz fi dem (Luk iina paragraaf 11) a
12. Wa mek non a wi no fi fiil se wi na’av no yuus tu wi breda an sista dem iina di kanggrigieshan?
12 No fiil no wie ef yu fiil laik se yu kyaahn du notn gud kaa wi nuo se yu av som gud wiez we a-go mek yu kyan elp di breda an sista dem iina di kanggrigieshan. It mait du yu gud ef yu prie tu Jeuova an riid wa Paal se a 1 Korintiyan 12:12-30 kaa dat mek wi si se evribadi iina di kanggrigieshan av sitn we dem kyan du fi elp dem wan aneda. So ef yu fiil laik rait ya nou yu kyaahn ton wan ministiiriyal sorvant kaa yu kyaahn du sortn an sortn tingz, no fiil no wie. Wa yu kyan du a gwaan du wa yu kyan du fi Jeuova an yu breda an sista dem. An nuo se di elda dem a-go gi yu sitn fi du we dem nuo se yu kyan du.—Ruo. 12:4-8.
13. Wa wi kyan se bout di sitn dem we wan breda fi du fi ton wan ministiiriyal sorvant?
13 Wan neda riizn wa mek wan breda fi chrai du di sitn dem we dem kyan du fi ton wan ministiiriyal sorvant a kaaz di sitn dem we dem fi du a som sitn we evribadi we a wan Kristiyan fi du. Aal a wi fi jraa nier tu Jeuova, an aal a wi fi nuo we it fiil laik fi muor api wen wi gi sumadi sitn, an aal a wi fi a liv iina wan wie so dat ada piipl kyan fala wi. Wa a som sitn we wan breda kyan du fi ton wan ministiiriyal sorvant?
WA DEM FI DU EF DEM WAAHN FI TON WAN MINISTIIRIYAL SORVANT?
14. Wa it miin wen it se di ministiiriyal sorvant dem “fi bi sumadi we piipl rispek”? (1 Timoti 3:8-10, 12)
14 Mek wi luk pan som a di sitn dem we wan breda we waahn fi ton wan ministiiriyal sorvant fi du we de a 1 Timoti 3:8-10, 12. (Riid.) Wan ministiiriyal sorvant “fi bi sumadi we piipl rispek.” Dat no miin se im a-go av wan siiros fies aal di taim an no nuo ou fi laaf an enjai imself. (Iik. 3:1, 4) Bot ef yu a wan ministiiriyal sorvant yu fi wok aad fi du di sitn dem we yu get fi du. An ef piipl nuo se yu a sumadi we dem kyan chos an dipen pan, dem a-go av nof rispek fi yu.
15. Wa it miin wen it se sumadi “no fi tel wan sumadi sitn an go tel sumadi els sitn difrant” an se “dem no fi waahn waahn moni”?
15 “Dem no fi tel wan sumadi sitn an go tel sumadi els sitn difrant.” Dat miin tu se dem fi du tingz so dat ada piipl kyan chos dem. So yu naa go pramis sumadi fi du sitn an den no dwi’it, an yu naa go chrik op piipl niida. (Pr. 3:32) “Dem no fi waahn waahn moni.” Dat miin tu se wen yu a du bizniz wid nobadi an a diil wid moni, yu naa go du no banduulu bizniz. An yu no fi yuuz yu breda an sista dem fi mek moni niida.
16. (a) Wa it miin ‘fi no lov fi jringk tu moch?’ (b) Wa it miin wen it se “dem fi eng aan tait pan di chuu mesij we Gad shuo wi wid aal a dem aat an no fiek it”?
16 “Dem no fi lov jringk tu moch.” Dis miin tu se yu no fi jringk tu moch lika an piipl no fi a se yu a sumadi we kyan uol yu lika gud. “Dem fi eng aan tait pan di chuu mesij we Gad shuo wi wid aal a dem aat an no fiek it.” Yu a-go a du tingz laik ou Jeuova waahn yu fi dwi’it. Aalduo yu no porfek, yu a-go kyan fiil gud fi nuo se yu an Gad a fren.
17. Wen dem a “tes” wan breda, wa a som sitn we im kyan du fi shuo se im a sumadi we dem kyan chos? (1 Timoti 3:10; luk pan di picha tu.)
17 “Tes dem fos.” Dat miin tu se yu a sumadi we piipl kyan chos an kyan dipen pan. So wen di elda dem gi yu sitn fi du, mek shuor se yu du we dem se yu fi du laik ou dem se yu fi dwi’it an laik ou Jeuova aaganaizieshan se yu fi dwi’it tu. Chrai aad fi andastan di difrant difrant sitn dem we yu fi du an wen dem waahn yu fi don it. An wen yu du yu bes, di breda an sista dem iina yu kanggrigieshan wi api wid ou yu a gwaan. Ef yu a wan elda, luk out fi si di breda dem we yu kyan chrien. (Riid 1 Timoti 3:10.) Laik yu av no breda iina yu kanggrigieshan we a tiinieja ar yongga dan dat we a wok aad fi du dem uona Baibl stodi? An dem ansa kwestiyan a di miitn dem aafn an a go a fiil sorvis tu? Ef yu gi dem breda ya likl likl sitn fi du we dem kyan manij, den a so yu a “tes dem fos.” Den afta dem get biga, dem kyan ton wan ministiiriyal sorvant.
Wen di elda dem gi di breda dem we baptaiz likl likl tingz fi du, a so dem a “tes dem fos” (Luk iina paragraaf 17)
18. Wen it se “nobadi no fain notn rang wid dem,” wa it miin?
18 “Nobadi no fain notn rang wid dem.” Dat miin tu se nobadi kyaahn kom kom se yu a du notn rang. Ye, wi nuo se sumadi kyan tel lai pan yu an se yu du sitn we yu no du. Dat did apm tu Jiizas tu, an im mek wi nuo se a di siem ting a-go apm tu di piipl dem we a fala im tu. (Jan 15:20) Bot ef yu chrai fi du di rait ting laik Jiizas, di breda an sista dem iina di kanggrigieshan a-go nuo se yu a sumadi we dem kyan chos.—Mat. 11:19.
19. Wen di Baibl se “onggl av wan waif,” wa els it av fi du wid?
19 “Onggl av wan waif.” Ef yu a wan man we marid, yu fi du we Jeuova Gad se an onggl av wan waif. (Mat. 19:3-9) An yu no fi a du no seks sin niida. (Iib. 13:4) Bot a no onggl dat, yu fi stik tu yu waif wan. Yu no fi mek no ada uman fiil se yu waahn dem.—Juob 31:1.
20. Wa a som a di sitn dem we wan man a-go du fi shuo se im ‘kyan kanchuol im pikni dem an ron im uona ous?’
20 Dem fi “kyan kanchuol dem pikni dem an ron dem uona ous.” So ef yu a wan man we av wan fambili, yu fi tek da wok ya siiros. An mek shuor se yu a du yu fambili Baibl stodi evri wiik, an yu fi wok wid evribadi iina yu fambili iina fiil sorvis aafn. An yu fi elp yu pikni dem fi ton Jeuova fren. (Ifii. 6:4) Wen wan breda shuo se im kyan tek kier a im fambili, im a shuo se im a-go kyan tek kier a di breda an sista dem iina di kanggrigieshan tu.—Luk pan 1 Timoti 3:5.
21. Ef yu a no wan ministiiriyal sorvant ya nou, wa yu kyan du fi ton wan?
21 Ef yu a no wan ministiiriyal sorvant yet, wi a beg unu fi prie tu Jeuova an riid op di sopm dem iina da lesn ya fi si di ting dem we wan breda fi a du so dat dem kyan ton wan ministiiriyal sorvant, an chrai aad fi du dem. Tingk bout umoch yu lov Jeuova an yu breda an sista dem an umoch yu waahn fi elp dem. (1 Pii. 4:8, 10) An yu a-go fiil api kaa yu a du tingz fi elp yu breda an sista dem. Wi uop se Jeuova bles aal a we unu a du fi ton wan ministiiriyal sorvant!—Fil. 2:13.
SANG 17 Mi Waahn Dwi’it
a DIS A WA DI PICHA DEM PAN DI KOVA A SHUO WI: Pan di lef-an-said: Kaa Jiizas did ombl im du tingz fi im falara dem; pan di rait-an-said: Wan ministiiriyal sorvant a elp wan uol breda iina di kanggrigieshan.
