Azkaadn tu 1 Korintiyan 15:8, Paal se: “Mi a di laas sumadi fi si im an im mek mi si im iivn duo mi komiin laik sumadi we baan di rang taim.” Wi yuus tu biliiv se Paal did a taak bout wen im did si Jiizas iina wan vijan wen Jiizas did big an powaful iina evn. Kaa im did si Jiizas iina evn, it did komiin laik se im ded an kom bak alaiv an get fi go a evn lang bifuo ada piipl we ded wuda get di chaans fi kom bak alaiv an go a evn an si Jiizas. Bot wen wi luk iina da skripcha ya som muo, wi si se a no dat it did miin.

Ye, Paal did a taak bout di tingz dem we did apm wen im did ton we fram di bad sitn dem we im did a du. Bot a wa im did miin wen im se im did “baan di rang taim”? Dat kuda miin difrant difrant sitn.

A kwik kwik im did tap du di bad sitn dem we im did a du an wol iip a tingz did go dong. Evribadi aalwiez fraitn wen wan pikni baan bifuo taim. So wen Saal (we dem did kaal Paal afta dat) did a go dong a Damaskos fi mek di Kristiyan dem we liv dong de sofa bad bad, im neehn tingk se im wuda si wan vijan wid Jiizas we did kom bak alaiv. A neehn Paal aluon did fraitn wid ou kwik im did ton we fram did bad sitn dem we im did a du, aal di Kristiyan dem we im did a-go mek tingz aad fa did fraitn tu. Pan tap a dat, kaaz a aal a di tingz dem we did a gwaan da taim de, Paal did aal blain fi wan likl wail.​—Aks 9:1-9, 17-19.

Im did ton we fram di bad sitn dem we im did a du a “di rang taim.” Di Jeruusilem Baibl se: “It did komiin laik se mi did baan wen nobadi neva nuo se mi wuda baan.” Wen Paal did ton we fram di bad sitn dem we im did a du, Jiizas did gaan baka evn aredi. Paal neehn si Jiizas wen im did de pan di ort laik di wan dem we im did a taak bout bifuo im did se dis. (1 Kor. 15:4-8) So wen Jiizas did mek Paal si im, da taim de it did komiin laik se a did “di rang taim.”

Im did ombl wen im did a taak bout imself. Azkaadn tu som man we stodi di langwij dem we di Baibl rait iina, dem se wa Paal did se ya so did shuo se im neehn tingk se im wot notn. Ef a dat Paal did miin, im did a se im neehn gud inof fi bi wan a Jiizas apasl dem. Az a matarafak, im se: “Di res a apasl dem beta dan mi. Mi no gud inof fi dem iivn kaal mi wan apasl kaaz mi yuus tu mek Gad piipl sofa bad bad an mi aal did kil aaf som a dem. Bot a chuu Gad gud an kain tu mi mek mi kyan du wa mi a du nou.”​—1 Kor. 15:9, 10.

So it luk laik se Paal kuda de taak bout ou Jiizas did jos kom tu im so, ar ou kwik im did ton we fram di bad sitn dem we im did a du, ar ou im neehn dizorv fi aal a dem gud sitn de apm tu im. No mata wa Paal did a taak bout, wi kuda si se im did api fi wa did apm tu im. Dat did mek im nuo fi shuor se Jiizas did kom bak alaiv. Wi kyan si wa mek aal di wail wen im did a priich an a tel piipl se Jiizas did kom bak alaiv, im aalwiez tel dem bout wa di apm tu im.​—Aks 22:6-11; 26:13-18