1-2. Wa mek wi fi waahn lorn bout di sitn dem we Samsn du?

 WEN yu ier di niem Samsn, yu mait-a tingk bout sumadi we chrang bad. An im did chrang fi chuu. Bot Samsn did du sitn wan a di taim we mek tingz ton out bad fi im an ada piipl. Bot aalduo im did du dat, wen Jeuova memba im, a no dat im memba bout im, im memba aal a di gud sitn dem we im du. An Im mek shuor se dem sitn de rait dong iina di Baibl so dat it kyan elp wi.

² A uol iip a tingz Jeuova did yuuz Samsn fi du fi elp im piipl dem. An uol iip a ier afta Samsn ded, Jeuova did mek Paal rait se Samsn a wan a di man dem we did riili chos iina im. (Iib. 11:32-34) Di wie ou Samsn dipen pan Jeuova, aal wen tingz did rof wid im, mek wi si se wi kyan dipen pan Jeuova tu aal wen tingz rof wid wi. So iina da lesn ya, wi a-go si ou wi kyan lorn fram di sitn dem we Samsn did du an ou di sitn dem we im du kyan elp wi fi tan op chrang no mata wa.

3. Wa kain-a wok Jeuova did pik Samsn fi du?

³ Wen Samsn did baan, di Filistiin dem did a ruul uova di Izrelait piipl dem an a mek tingz aad fi dem. (Joj. 13:1) Dis did mek di Izrelait piipl dem sofa bad, so Jeuova pik Samsn fi siev dem. (Joj. 13:5) An fi Samsn du da big wok ya we Jeuova pik im fi du, im did afi go dipen pan Jeuova nof nof fi dwi’it.

4. Wa Jeuova did du fi elp Samsn fi get we fram di Filistiin man dem? (Jojiz 15:14-16)

 ⁴ Mek wi luk pan wan a di taim dem wen Samsn did shuo se a Jeuova im a chos iina, an ou Jeuova did elp im. Wan a di taim wen Samsn did de a Liiyai iina Juuda, som Filistiin suoja did kom fi kyapcha im. Di man dem fram Juuda did fried a di Filistiin man dem, so dem tai op Samsn wid tuu piis a nyuu ruop an gi’im tu di Filistiin man dem. (Joj. 15:9-13) Bot Jeuova spirit kom dong pan Samsn. So im get fi bos di ruop aafa imself, an den im fain wan jakaas jaabuon we neehn ratn yet an yuuz it fi kil aaf 1,000 a di Filistiin man dem!​—Riid Jojiz 15:14-16.

5. Di fak se a wan jakaas jaabuon Samsn yuuz, ou dat shuo se a Jeuova im did a dipen pan?

⁵ Bot a wa mek Samsn did yuuz wan jakaas jaabuon? Dis a no sitn we piipl wuda naamali yuuz fi fait waar, bot Samsn did nuo se it no mata di wepan we im av, kaaz a Jeuova wuda elp im so langks im dipen pan Im. So Samsn yuuz wa im kuda yuuz fi du wa Jeuova waahn im fi du. An kaaz a Jeuova im a dipen pan, Jeuova mek im win.

6. Wen wi a du di wok we wi get fi du fi Jeuova, wa wi kyan lorn fram Samsn?

⁶ Wen wi get sopm fi du fi Jeuova an wi fiil laik se wi kyaahn manij, im kyan elp wi fi dwi’it iina wan wie we wi nat iivn did tingk im wuda elp wi, jos laik ou im did elp Samsn. Wi kyan nuo fi shuor se Jeuova a-go gi wi di chrent fi du im wok jos laik ou im did gi Samsn di chrent fi dwi’it, so langks a im wi a dipen pan fi elp wi.​—Pr. 16:3.

7. A wa som breda an sista did du we mek wi si se a Jeuova wi fi dipen pan fi mek wi nuo wa fi du?

⁷ Di wie ou nof a di breda an sista dem we bil wi Kindom Aal dem an so du tingz shuo se dem a chos iina Jeuova. Fos taim, a di breda an sista dem yuus tu jraa di plan dem fi di Kindom Aal dem an di ada plies dem we wi yuuz fi worship Jeuova. Bot kaa wol iip muor piipl staat  fi kom iina di kanggrigieshan dem, wi did afi chienj op di wie ou wi did a mek op wi bildin dem. So di breda dem we inchaaj prie tu Jeuova an staat fi du som difrant difrant tingz fi mek op dem plies ya. Wan a ting we dem du a bai som difrant difrant bildin an fiks dem op. Wan breda we niem Robert, we elp out wid da wok de aal uova di worl, se: “Wen wi did staat fi du dis, it neehn iizi kaaz a did sitn nyuu.” An im se: “Wa wi a du nou difrant fram ou wi yuus tu du tingz. Bot di breda an sista dem did kwik fi staat du tingz di wie ou dem did a lorn fi dwi’it, an siek-a dat, Jeuova bles dem.” Dis a jos wan wie ou Jeuova a elp im piipl dem fi du wa im waahn dem fi du. So laik dem breda an sista ya, wi fi mek shuor se a Jeuova wi a mek elp wi. An wi fi redi fi chienj di wie ou wi du tingz fi dwi’it di wie ou Jeuova waahn wi fi dwi’it.

8. Wen sitn did apm an Samsn did torsti bad, wa im did du?

⁸ Wen yu riid di Baibl, yu si som ada big sitn we Samsn did du. Laik wan a di taim, im wan kil wan laiyan an im kil 30 Filistiin man iina wan plies we niem Ashkilan. (Joj. 14:5, 6, 19) Samsn did nuo se a Jeuova elp im fi dwi’it. An wi nuo dis kaa wan a di taim afta im did kil aaf 1,000 a di Filistiin man dem an im did torsti bad, a Jeuova im did baal out tu fi gi im sitn fi jringk.​—Joj. 15:18.

9. Afta Samsn did baal out fi Jeuova elp im, wa Jeuova du? (Jojiz 15:19)

⁹ Afta Samsn baal out tu Jeuova fi elp im, Jeuova wok wan mirikl fi elp im. An afta Samsn jringk di waata, “im get bak chrang an staat fi fiil laik imself agen.” (Riid Jojiz 15:19.) An da plies de we Jeuova did mek fi Samsn get waata fram did de bout wol iip a ier afta dat, kaa Jeuova mek im prafit we niem Samwel rait bout it iina di buk a Jojiz. So wen di Izrelait piipl dem luk pan da waata de, dem wuda memba se a Jeuova dem fi dipen pan fi elp dem wen dem a go chuu dem prablem dem.

10. Wa a som sitn we wi fi du ef wi waahn Jeuova fi elp wi? (Luk pan di picha tu.)

¹⁰ No mata ou wi kyan du sitn gud, a stil Jeuova wi fi dipen pan. An no mata wa wi du fi Jeuova aredi, wi fi nuo se tingz onggl a-go wok out gud fi wi ef a Jeuova wi a dipen pan fi elp wi. Jos laik ou Samsn did get bak chrang an fiil laik imself agen wen im jringk di waata we Jeuova gi im, a siem so wen wi yuuz aal di sitn dem we Jeuova gi wi, wi a-go get chrang iina di sitn dem we wi biliiv iina.​—Mat. 11:28.

11. Wa a som sitn we yu fi du fi shuo se wi a tek aal a di elp we Jeuova a gi wi? Tel wi ou Aleksey did du dat.

¹¹ Mek wi luk pan wa did elp wan a wi breda dem we kom fram Rosha we niem Aleksey fi tan op chrang aalduo dem did a mek tingz aad fi im kaaz a wa im biliiv iina. Im an im waif mek shuor se dem du tingz fi kip dem kluos tu Jeuova. Im se: “Mi chrai fi mek shuor se mi du mi uona Baibl stodi an riid mi Baibl evridie. An evri maanin, mi an mi waif taak bout di ting dem iina di skripcha fi di die an prie tu Jeuova.” Dis mek wi si se a no wiself wi fi dipen pan, a Jeuova wi fi dipen pan. Ou wi kyan du dat? Wi kyan du dat wen wi du wi uona Baibl stodi an du di ada ting dem we a-go mek wi get chrang iina  di sitn dem we wi biliiv iina. An wen wi du dat, Jeuova a-go elp wi fi sorv im jos laik ou im did elp Samsn fi du wa im se.

12. A wa Samsn did du we im neehn fi du, an ou da taim ya did difrant fram di ada taim dem?

¹² Kaa Samsn neehn porfek, som a di taim im du tingz we im neehn fi du, an dat mek tingz ton out bad fi im an ada piipl. Wan a di ting we im did du a go lov aaf wan uman, we kom fram wan plies niem Suorek, we niem Dilaila. (Joj. 16:4) Bifuo dat, Samsn did fi marid tu wan Filistiin uman, bot da taim de a Jeuova did waahn im fi du dat kaa Im did a luk fi wan wie fi get rid a di Filistiin piipl dem. An wan neda taim afta dat, Samsn go iina wan uman ous we did a wan uor go stie iina di Filistiin siti we niem Gaaza. Da taim de, Jeuova did gi Samsn di powa fi tek aaf di big oul duor dem we did lak op di Filistiin dem siti an kya it we. (Joj. 14:1-4; 16:1-3) Bot tingz mait-a did difrant wen it kom aan tu Dilaila kaaz Dilaila mait-a did a wan Izrelait uman.

13. A wa Dilaila did du tu Samsn?

¹³ Di Filistiin man dem did gi Dilaila uol iip a moni fi shi sel out Samsn tu dem. Miebi a kaa im did lov ar so moch mek im kudn si wa shi a du. Wi no nuo a wa mek Samsn did riili gi iin tu Dilaila ino, bot Dilaila did a presha im uol iip fi tel ar a wa mek im so chrang, so im en op tel ar. An kaaz a dat, im en op no chrang agen. An fi a wail, im an Jeuova a neehn gud fren agen.​—Joj. 16:16-20.

14. A wa did apm tu Samsn kaa im chos Dilaila?

¹⁴ Kaa Samsn did chos Dilaila muor  dan ou im did chos iina Jeuova, it mek im go chuu som uol iip a rof taim. Laik di Filistiin man dem kyapcha im an blain im an put im iina prizn dong a Gaaza. Bifuo dis Samsn did shiem dem piipl ya, an nou dem ton im iina sliev fi grain grien. Den di Filistiin man dem shiem im agen wen dem av wan paati fi gi sakrifais tu dem faalz gad we niem Diegan. It did komiin laik dem a se a Diegan did elp dem fi kyapcha Samsn. So dem did kya Samsn a da paati de fi mak im an laaf aafa im.​—Joj. 16:21-25.

15. Wa Samsn did du fi shuo se im staat fi chos iina Jeuova agen? (Jojiz 16:28-30) (Luk pan di picha pan di kova.)

¹⁵ Iivn duo Samsn mek wan mistiek an du da bad sitn ya, im neehn tap sorv Jeuova, im stil du wa Jeuova waahn im fi du. So im luk fi wan wie fi fait aaf di Filistiin dem. (Riid Jojiz 16:28-30.) So Samsn beg Jeuova se: “Mek mi get fi du bak di Filistiin dem sitn.” So Jeuova ansa Samsn prieya an mek im get chrang agen. Siek-a dat, Samsn did kil uol iip muo Filistiin dis ya taim ya dan we im eva kil iina im laif.

16. Ou wi kyan du laik Samsn wen wi du sitn we wi neehn fi du?

¹⁶ Aalduo Samsn did go chuu som uol iip a bad sitn kaaz a wa im did du, im neva tap chrai fi du wa Jeuova waahn im fi du. So aal ef wi du sitn we wi afi get jraa op fa ar dem mek wi tap du sitn we wi yuus tu du fi Jeuova, wi no fi mek dat mek wi tap sorv Jeuova. Kaa memba ino, Jeuova no gi op pan wi. (Sa. 103:8-10) Yu si iivn wen wi mek mistiek, Jeuova stil kyan yuuz wi fi du wa im waahn wi fi du jos laik ou im did yuuz Samsn.

17-18. Wa yu laik bout ou Maikal did diil wid wa apm tu im? (Luk pan di picha tu.)

¹⁷ Luk pan wa did apm, tu wan breda we niem Maikal. Im did a du uol iip iina Jeuova sorvis an im a did wan ministiiriyal sorvant an regila paiyanier. Bot kaa im did du sitn we im neehn fi du, im did afi en op tap du dem sitn de fi Jeuova. Im se: “Bifuo dis, mi did bizi a wok fi Jeuova. Den aal av a sodn, it komiin laik se mi kudn du notn fi Jeuova agen. A no laik se mi did fiil laik se Jeuova wuda lef mi ino, bot mi did a wanda ef mi an im  wuda eva ton gud gud fren agen an ef mi wuda get fi staat du di sitn dem we mi yuus tu du fi im iina di kanggrigieshan agen.”

¹⁸ Maikal neehn gi op, an dat a did sitn gud. Im se: “Mi wok aad fi jraa kluosa tu Jeuova, laik mi prie tu im aafn, an mi stodi im Wod, an sidong an tingk bout wa mi stodi.” Afta som taim, Maikal staat fi du wa im yuus tu du fi Jeuova iina di kanggrigieshan agen. Nou im a wan elda an wan regila paiyanier. Im se: “Yu si di elp an di push we mi get fram di breda an sista dem, speshali di elda dem, it elp mi fi si se Jeuova stil lov mi. Mi fiil gud kaa mi kanchens naa bada mi wen mi a du wa Jeuova waahn mi fi du iina di kanggrigieshan. An dis we mi go chuu mek mi si se Jeuova a-go paadn enibadi we sari fi wa dem du an tap dwi’it.” A siem so wi nuo fi shuor se Jeuova a-go yuuz wi an im a-go bles wi tu iivn ef wi du sitn rang. Bot wi afi mek shuor se wi staat du di rait sitn an gwaan dipen pan Jeuova.​—Sa. 86:5; Pr. 28:13.

19. Ou wa did gwaan wid Samsn elp yu fi chos iina Gad muor?

¹⁹ Iina da lesn ya, wi luk pan som a di big sitn dem we gwaan iina Samsn laif. Wi nuo se im neehn porfek, bot aal wen im du wa im did du wid Dilaila, im neehn tap sorv Jeuova. An Jeuova neehn gi op pan im niida, Im yuuz im agen iina wan big wie. Jeuova did stil si im az wan man we chos iina im nof nof, an so Im mek im niem rait dong wid di ada piipl dem we niem rait dong iina Iibruu chapta 11 tu. It mek wi fiil gud fi nuo se Jeuova di de fi elp wi, wos wen wi fiil laik se wi kyaahn go aan no muor. Jos laik Samsn, mek wi beg Jeuova fi: “Du, memba mi, an gi mi di chrent.”​—Joj. 16:28.