1. A ou Piita did fiil, an wa im did se wen Jiizas did mek dem kech wol iip a fish?

 PIITA did de outa sii di wol nait a chrai kech som fish bot im neehn kech non. Bot iina di maanin, Jiizas se tu im se: “Go out iina diip waata, an chuo out di net fi kech fish.” (Luuk 5:4) Piita neehn tingk se im wuda kech no fish bot im du wa Jiizas se. Wen im jrap di net dem, kaaz a di mount a fish we dem did a kech, di net dem staat fi bos op. Den Piita si se Jiizas dis wok wan mirikl. Piita an di man dem we did di de wid im did “shak” wen dem si di wol iip a fish we dem kech. Piita se tu Jiizas se: “Kip we fram mi Laad kaaz mi a wan man we du nof rang!” (Luuk 5:6-9) Piita mait-a did se dis kaa im fiil se im neehn gud inof fi de roun Jiizas.

2. Wa mek it gud fi wi luk pan wa did apm wid Piita?

² A chuu, Piita a did “wan man we du nof rang.” Di Baibl mek wi nuo se a nof taim Piita se an du sitn we im sari bout. Dat apm tu yu somtaim tu? Yu a chrai aad fi get rid a som a di bad wiez dem we yu nuo se yu av? Yu a du sitn rang we yu a chrai aad fi tap du? Wen yu luk pan wa Piita did du, it kyan elp yu fi si se tingz a-go get beta. Wa mek wi se so? Tingk bout dis: Di Baibl neehn afi tel wi bout di sitn dem we Piita du rang. Bot wi si se it du dat. (2 Tim. 3:16, 17) Piita a did sumadi jos laik wi, an Jeuova did nuo se Piita neehn porfek. A siem so im nuo se wi no porfek tu. Bot im stil waahn wi fi chrai an tap du di likl sitn dem we wi nuo se wi no fi du.

3. Wa mek wi fi chrai aad fi gwaan sorv Jeuova?

 ³ Wi no fi tap chrai aad fi gwaan sorv Jeuova, kaa wi nuo se ef wi praktis aad fi du sitn wi kyan go du it gud. Laik ef sumadi waahn fi plie di gitaar gud dem afi spen wol iip a ier a praktis. An wen dem a praktis dem a-go mek nof mistiek, bot ef dem gwaan praktis, dem a-go plie di gitaar gud. An aal wen dem kyan plie gud gud, dem stil a-go mek mistiek som a di taim. Bot dat no miin tu se dem a-go tap plie. Dem a-go stil chrai fi plie beta. A siem so, aal wen wi fiil se wi tap du sitn we wi no fi du, wi mait-a en op du it agen. Bot wi stil a-go wok aad fi du beta. Aal a wi mait-a se ar du sitn we wi sari bout, bot dat no miin tu se wi a-go tap chrai fi du beta, kaa Jeuova a-go elp wi fi du beta. (1 Pii. 5:10) Mek wi luk pan ou Piita did chrai aad fi gwaan sorv Jeuova. Wen wi si ou Jiizas did tek im taim wid im, aalduo Piita did du nof rang sitn, dat kyan elp fi push wi fi gwaan sorv Jeuova.

4. Azkaadn tu Luuk 5:5-10, a wa Piita did se bout imself, an wa Jiizas did se fi elp im?

⁴ Di Baibl no mek wi nuo wa mek Piita se im a “wan man we du nof rang” ar wa kain-a rang sitn im did a taak bout. (Riid Luuk 5:5-10.) Bot Piita mait-a du som sitn we im neehn fi du fi chuu. An Jiizas kuda si se dem sitn ya kuda mek Piita fiil laik se im no gud inof fi bi wan a im falara. Bot Jiizas did nuo se Piita kuda gwaan du di sitn dem we rait. So Jiizas tel im se “no fried.” An kaa Piita did si se Jiizas did chos im, it did elp Piita fi di res a im laif. An so Piita an im breda Anju tap kech fish an staat fi fala Jiizas, an siek-a dat dem did get nof blesn.​—Maak 1:16-18.

5. Wa a som a di blesn dem we Piita did get kaa im neehn mek di wie ou im fiil bout imself tap im fram ton wan a Jiizas falara?

⁵ Kaa Piita did staat fi fala Jiizas, im get fi si im du wol iip a gud sitn. Laik im get fi si wen Jiizas mek piipl we sik get beta, an wen im did ron out di diiman dem outa piipl, an aal wen im mek piipl we ded kom bak alaiv. b (Mat 8:14-17; Maak 5:37, 41, 42) An Piita aal get fi si wan vijan a Jiizas a ruul iina Gad Kindom govament, an dis a sitn we im neehn figet. (Maak 9:1-8; 2 Pii. 1:16-18) So wi si  se Piita get fi si som sitn apm we im neehn nuo se im wuda get fi si. Im mos did fiil gud se im neehn mek di wie ou im fiil bout imself tap im fram get aal a dem blesn ya!

6. Yu tingk it did iizi fi Piita tap du di sitn dem we im neehn fi a du? Tel wi wa mek yu se so.

⁶ Wid aal a di sitn dem we Piita ier an si Jiizas du, im did stil afi chogl aad fi no du di sitn dem we im no fi du. Laik wen Jiizas tel dem se im wud afi sofa an ded jos laik wa di Baibl did se, Piita tel im se dis naa go apm tu im. (Maak 8:31-33) An a nof taim Piita an di ada apasl dem did a aagyu wid dem wan aneda bout wich wan a dem av di tap-a-tap pozishan. (Maak 9:33, 34) An di nait bifuo dem kil Jiizas, bifuo Piita tingk bout wa im a-go du bifuo im dwi’it, im chap aaf wan a di man dem iez. (Jan 18:10) An da siem nait de, kaa Piita did fried a piipl, a chrii taim im se im no nuo im fren Jiizas. (Maak 14:66-72) Afta im du dat, it mek im baal so til.​—Matyu 26:75.

7. Afta Jiizas did kom bak alaiv, wa Piita did get di chaans fi du?

⁷ Jiizas neehn mek wa Piita du mek im gi op pan im. So afta Jiizas kom bak alaiv, im gi Piita di chaans fi shuo im se im lov im. An Jiizas mek im nuo se im waahn im fi tek kier a im shiip dem. (Jan 21:15-17) An Piita mek im nuo se im wuda du wa im aks im fi du. An im a did wan a di fos wan dem we Gad spirit kom dong pan we did de iina Jeruusilem pan di die a Pentikas.

8. Wen Piita did de a Antiyak, a wa im did du rang?

⁸ Aal afta Piita did get pik fi go a evn, im stil did afi chrai aad fi gwaan sorv Jeuova. Piita did de de iina 36 C.E. wen Kaaniiliyos, we a neehn wan Juu, did get pik fi go a evn. An dat did mek it klier se “Gad no paashal” an se piipl we a no Juu kuda ton Kristiyan tu. (Aks 10:34, 44, 45) So afta dat, Piita did aarait fi nyam fuud wid di wan dem we a neehn Juu, an dat a sitn we im wuda neva du bifuo dat. (Gya. 2:12) Bot som a di Juu dem did stil fiil se sopm did rang wid dat. So wen som a di breda dem we did a Juu kom dong a Antiyak, Piita tap iit wid di wan dem we a neehn Juu kaa im neehn waahn fi du notn fi mek dem fiil a wie. An wen Paal si wa Piita a du, im jraa op Piita infronta di wol a dem. (Gya. 2:13, 14) Bot aalduo dis did apm, Piita neehn tap chrai aad fi gwaan sorv Jeuova. Bot a wa did elp im fi gwaan dwi’it?

9. Ou wa Jan 6:68, 69 se shuo se Piita riili nuo ou fi stik tu sumadi?

⁹ Piita did nuo ou fi riili stik tu sumadi, so im neehn mek notn tap im fram fala Jiizas. An wi si dis wen wan a di taim Jiizas se sitn we im falara dem neehn andastan. (Riid Jan 6:68, 69.) An nof a Jiizas falara dem neehn wiet fi fain out wa Jiizas a se, dem dis tap fala im. Bot Piita neehn du dat, kaa im nuo se Jiizas av “di mesij we kaaz piipl fi liv fi eva.”

10. Wa Jiizas did du we shuo se im did nuo se Piita wuda du di rait ting? (Luk pan di picha tu.)

¹⁰ Jiizas neva lef Piita niida. Pan di nait bifuo im ded, Jiizas did nuo se Piita an di ada apasl dem wuda ron we lef im. Jiizas did mek Piita nuo se im nuo se im wuda chos iina im agen. (Luuk 22:31, 32) Jiizas did nuo se ‘iina dem aat dem waahn du wa rait bot kaa dem a jos  piipl, a dat mek dem wiik.’ (Maak 14:38) So aal wen Piita se im neehn nuo Jiizas, Jiizas neehn gi op pan im. Wen Jiizas kom bak alaiv, im go taak tu Piita wen nobadi els neehn de de. (Maak 16:7; Luuk 24:34; 1 Kor. 15:5) Dat mos did mek Piita fiil gud!

11. Wa Jiizas did du fi mek Piita nuo se Jeuova wuda gi im di sitn dem we im niid fi liv?

¹¹ Jiizas did mek Piita nuo se Jeuova a-go gi im di sitn dem we im niid. Wen Jiizas kom bak alaiv, im wok wan neda mirikl an mek Piita an di ada apasl dem kech wol iip a fish agen. (Jan 21:4-6) Dis mek Piita si se it a-go iizi fi Jeuova gi im di sitn dem we im niid fi liv. Dat mait-a did mek Piita memba wen Jiizas did se Jeuova wuda tek kier a di wan dem we “mek Gad govament . . . bi di big ting iina [dem] laif.” (Mat. 6:33, NWT ) So Piita mek di priichin wok di big ting iina im laif. Pan Pentikas 33 C.E., im shuo se im neehn fried fi taak op fi mek piipl nuo bout Jiizas. An dat mek wol iip a piipl ton Jiizas falara tu. (Aks 2:14, 37-41) An afta dat, Piita elp di Samaritan dem an piipl we a no Juu fi lorn bout Jiizas so dat dem kuda fala im. (Aks 8:14-17; 10:44-48) Jeuova yuuz Piita iina wan big wie fi elp wol iip a piipl fi kom iina di kanggrigieshan.

12. Ef wi stil a chogl no fi du sitn we wi nuo wi no fi du, ou wa apm wid Piita kyan elp wi?

¹² Jeuova kyan elp wi fi gwaan sorv im no mata wa. Dis mait-a aad fi du, wos ef wi a chogl fi tap du sitn we wi no fi du. Somtaim it mait-a luk laik se wa wi afi diil wid muo dan wa Piita did afi diil wid. Bot Jeuova kyan elp wi so das wi no gi op. (Sa. 94:17-19) Laik wan breda, we yuus tu sliip wid man fi wol iip a ier bifuo im lorn di chuut an did tap du dem ting de, se somtaim im stil fain it aad fi tap tingk bout dem ting de. Bot wa elp im fi gwaan sorv Jeuova? Im se: “A Jeuova mek wi chrang.” An im se: “Kaa Jeuova yuuz im spirit fi elp mi . . . , mi get fi si se mi kyan sorv im di wie ou im waahn mi fi sorv im . . . An Jeuova stil a gwaan yuuz mi aalduo mi no porfek.”

13. Bies pan wa Aks 4:13, 29, 31 se, ou wi kyan du laik Piita? (Luk pan di picha tu.)

¹³ A nof taim kaa Piita fried a piipl  im du sitn we im no fi du. Bot kaa im prie an aks Jeuova fi elp im fi no fried a notn, Piita kuda briev op imself an du wa im fi du. (Riid Aks 4:13, 29, 31.) A siem so wi kyan du sitn we wi mait-a did fried fi du. Laik luk wa did apm tu Horst, wan breda we did liv iina Jormani wen Worl Waar 2 a gwaan. A muo dan wan taim wen im did de a skuul, kaaz im did fried, im se “Iel Hitler!” Bot im mada an faada neehn beks wid im kaaz a dat. Wa dem du a prie wid im an aks Jeuova fi gi im di chrent fi tan op chrang. Kaa im mada an faada an Jeuova did elp im, im get di chrent fi du di rait ting. Lang afta dat, Horst se: “Jeuova neva lef mi.” c

14. Ou di elda dem kyan elp di wan dem we fiil laik se it aad fi dem gwaan sorv Jeuova?

¹⁴ Jeuova an Jiizas naa go lef wi. Afta Piita did se im no nuo Jiizas, im did riich wan paint iina im laif ya nou, we im wuda afi go mek op im main ef im a-go gwaan fala Jiizas ar im a-go tap. Jiizas prie tu Jeuova fi Piita so dat im no tap biliiv. An Jiizas mek Piita nuo se im prie fi im an im nuo se im wuda elp di ada falara dem fi gwaan chos iina Jiizas. (Luuk 22:31, 32) Dis mos did mek Piita fiil gud wen im memba wa Jiizas did se tu im! So wen sitn apm an wi afi mek op wi main ef wi a-go gwaan sorv Jeuova ar ef wi a-go tap, Jeuova mait-a yuuz di elda dem we lov wi fi elp wi fi gwaan sorv im. (Ifii. 4:8, 11) Wen wan breda we niem Paal, we a wan elda fi wan lang taim, a chrai fi elp sumadi we fiil laik se dem fi tap  sorv Jeuova, im aalwiez chrai fi mek dem memba wa mek dem did staat fi sorv Jeuova iina di fos plies. An im elp dem fi memba se Jeuova lov dem an im a-go stik tu dem. An im se, “Mi si Jeuova elp dem wan de we did fiil laik se dem kudn gwaan sorv im kaaz a sopm we dem du, fi gwaan sorv im.”

15. Wen wi luk pan wa did apm wid Piita an Horst, ou dat mek wi si se wa Matyu 6:33 se a chuu?

¹⁵ Jos laik ou Jeuova did gi Piita an di ada apasl dem wa dem niid fi liv, a siem so wen wi put fi im ‘govament an di ting dem we im tel wi fi du’ fos iina wi laif, im wi gi wi di sitn dem we wi niid fi liv tu. (Mat. 6:33, NWT ) Afta Worl Waar 2, di breda we wi taak bout aredi we niem Horst, did waahn fi paiyanier. Bot im did puor bad, so im fiil laik se im wudn kyan tek kier a imself wen im a paiyanier. Bot wa im du a chrai fi si ou Jeuova wuda tek kier a im. So wan a di taim wen di sorkit uovasiya did de wid im kanggrigieshan, im spen di wol a di wiik iina sorvis wid dem. An im did fraitn wen di sorkit uovasiya gi im wan envilop wid wol iip a moni iina it we kuda tek kier a im fi wol iip a mont. An di sorkit uovasiya neehn mek im nuo a uu gi im di moni. Wen Horst get dis, it mek im memba se a Jeuova wuda tek kier a im. An fram da taim de, im mek Gad govament bi di big ting iina im laif.​—Mal. 3:10.

16. Wa mek wi fi luk pan di sitn dem we Piita did du an di sitn dem we im did rait dong iina dem leta de?

¹⁶ Piita mos did fiil gud se Jiizas neehn lef im afta im tel im se fi kip we fram im. Bot wa Jiizas du a gwaan elp Piita fi bi wan gud apasl we ada piipl kuda fala. An wi kyan lorn wol iip fram wa Jiizas did du fi elp Piita. An Piita rait dong som a di ting dem we im did lorn iina tuu leta we im sen go gi di kanggrigieshan dem bak iina dem taim de. An wi av dem leta de iina di Baibl tide. Iina di neks lesn, wi a-go luk pan som a di sitn dem we did elp Piita we de iina dem leta de an ou dem kyan elp wi tide.