1. Likl bifuo Piita ded, wa Jeuova did mek im du?

 DI APASL Piita did sorv Jeuova fi uol iip a ier, an a nof tingz im did get fi du. Im fala Jiizas an im get fi staat fi priich tu di piipl dem we a no Juu. An im a did wan a di man dem we did de pan di Govanin Badi. An aal wen Piita did nuo se im suun ded, Jeuova gi im muo wok fi du. Fram bout di ier 62-64 C.E., Jeuova mek im rait 1 Piita an 2 Piita. Iina dem leta de, im mek di Kristiyan dem nuo se im waahn di sitn dem iina dem leta de fi elp dem afta im ded.​—2 Pii. 1:12-15.

2. Wa mek wi kyan se di breda an sista dem did get di leta dem we Piita rait a di rait taim?

² Wen Piita rait dem leta de, di breda an sista dem did ‘sad siek-a aal a di chraiyal dem we dem did a fies.’ (1 Pii. 1:6) An yu did av som wikid man iina di kanggrigieshan we did waahn fi staat tiich di breda an sista dem tingz we no go so an fi mek dem du aal kain-a seks sin an dem ting de. (2 Pii. 2:1, 2, 14) An dem Kristiyan de we did a liv iina Jeruusilem dem taim de did a liv iina ‘wan taim we suun don,’ kaa di Ruoman aami wuda suun kom fi mash op Jeruusilem. (1 Pii. 4:7) So di leta we Piita did rait dem Kristiyan de did elp dem fi si wa dem kuda du fi go chuu dem chraiyal de an di chraiyal dem we dem wuda afi go chuu iina di fyuucha tu. b

3. Wa mek wi fi riid an stodi di leta dem we Piita did rait?

³ Aalduo a di Kristiyan dem we weehn a liv iina dem taim de Piita did rait di leta dem tu, Jeuova mek dem leta  de, de iina di Baibl so dat wi kyan riid dem an lorn fram dem tu. (Ruo. 15:4) Kaa wi a liv iina wan taim nou tu we uol iip a seks sin an dem ting de a gwaan, an wi a go chuu wol iip a chraiyal tu we kyan mek it aad fi wi gwaan sorv Jeuova. An suun suun, wi a-go go chuu di wos sofarieshan we a-go wos dan wa dem Kristiyan de did go chuu dem taim de. Wi kyan fain som gud sitn iina dem leta de we Piita did rait we kyan elp wi fi aalwiez memba se Jeuova a-go get rid a da wikid worl ya an dem elp wi fi no fried fi du wa Jeuova waahn wi fi du kaaz a nobadi. An dem elp wi fi lov wi wan aneda wid aal a wi aat. An dem sitn ya kyan elp di elda dem tu fi si ou dem kyan tek kier a Jeuova piipl dem di rait wie.

4. Azkaadn tu 2 Piita 3:3, 4, wa kuda mek wi tap biliiv se Jeuova die suun kom?

⁴ Di piipl dem we liv roun wi tide no biliiv se di ting dem we di Baibl se a-go apm a-go apm fi chuu. An dem mait-a aal a mak wi an laaf aafa wi kaaz a wol iip a ier nou wi a priich se di worl suun don. An som a dem mait-a iivn se di worl naa go don. (Riid 2 Piita 3:3, 4.) Wen wi ier sumadi iina fiil sorvis, ar sumadi we wi wok wid, ar wan a wi fambili dem se sitn laka dat, it mait-a mek wi tap biliiv se Jeuova die suun kom. Bot Piita mek wi nuo wa kyan elp wi.

5. A wa kyan elp wi fi gwaan wiet pan di taim wen Jeuova a-go get rid a wikid piipl? (2 Piita 3:8, 9)

⁵ Tu som piipl, it mait-a komiin laik se Jeuova a tek im taim fi get rid a da wikid worl ya. Bot wa Piita se kyan mek wi memba se di wie ou Jeuova tingk bout taim difrant fram ou piipl tingk bout it. (Riid 2 Piita 3:8, 9.) Wan touzn ier komiin laik wan die tu Jeuova, so im jos a tek im taim wid wi kaa im no waahn nobadi fi ded. Bot wen di taim kom fi im get rid a da wikid worl ya, im a-go dwi’it. An wi a-go api se wi did yuuz di taim we wi av ya nou fi priich tu evribadi we wi kuda priich tu.

6. Wa kyan elp wi fi gwaan luk faawod fi di taim wen Jeuova a-go get rid a wikid piipl? (2 Piita 3:11, 12)

⁶ Piita tel wi se wi fi “luk faawod” fi Jeuova die kom. (Riid 2 Piita 3:11, 12.) Wi kyan du dat wen wi tek di taim evridie fi tingk bout aal a di nais sitn dem we wi a-go get iina di nyuu worl. Jos tingk bout yuself a sumel ier we kliin an fresh, an ou yu a iit bie fuud we gud fi yu, an se yu a si yu piipl dem kom bak alaiv, an yu a tiich di wan dem we liv lang lang taim bifuo wi bout ou di sitn dem we di Baibl se a-go apm did riili apm fi chuu. Wen yu tingk bout dem sitn ya, it a-go elp yu fi gwaan luk faawod fi Jeuova die. An it a-go mek wi shuor se wi a liv iina di laas die dem an se di en a da worl ya suun kom. An kaa ‘wi nuo wa di Baibl se’ a-go apm iina di fyuucha, wi naa go mek nobadi we wikid “kaaz [wi] fi chrie.”​—2 Pii. 3:17.

7. Kaa wi fried a wa piipl mait-a se ar du, wa it mait-a mek wi no du?

⁷ Kaa wi nuo se Jeuova die suun kom, it push wi fi priich an tel piipl bout di gud nyuuz. Bot som a di taim, wi mait-a fain it aad fi taak op, an dis a kaa som a di taim wi mait-a fried bout wa piipl mait-a du ar se. An a di siem ting did apm tu Piita. Pan di nait wen dem did a chrai Jiizas, Piita neehn taak op an mek dem nuo  se im a wan a Jiizas falara dem. An muo dan wan taim da sed nait de, im se im neehn nuo Jiizas. (Mat. 26:69-75) Bot afta dat, Piita siem wan kuda se: “No fried a notn, an no wori unuself.” (1 Pii. 3:14) So dis mek wi si se aalduo wi mait-a did fried fi taak op bout di gud nyuuz, wi kyan briev op wiself an dwi’it.

8. Wa kyan elp wi fi no fried fi taak op bout di gud nyuuz? (1 Piita 3:15, NWT )

⁸ Piita mek wi nuo wa kyan elp wi fi no fried a wa piipl mait-a du ar se wen im tel wi se: “Unu fi nuo iina unu aat se Jiizas Krais a di Laad.” (Riid 1 Piita 3:15, NWT.) So ef yu fiil fried fi taak op bout di gud nyuuz, yu fi memba se wi Laad an King, Jiizas, av wol iip a powa. Jos tingk bout im op iina evn, sidong pan im chuon a ruul wid wol iip a ienjel roun im. An memba se Gad “gi [im] powa uova evriting we a liv iina evn an pan ort,” an se ‘im a-go de wich paat wi de til taim don.’ (Mat. 28:18-20) Piita tel wi se wi fi “aalwiez redi” fi taak op bout di ting dem we wi biliiv iina. Yu wuda laik fi priich tu sumadi a wok, ar a skuul, ar wen yu de somwe els? Wa yu kyan du a tingk bout wen yu kyan go taak tu dem an wa yu kyan se tu dem. An yu fi prie an aks Jeuova fi elp yu fi briev an nuo fi shuor se im a-go elp yu fi no fried fi taak op bout im.​—Aks 4:29.

9. Wa Piita neehn du wan a di taim fi mek im breda an sista dem si se im lov dem? (Luk pan di picha tu.)

⁹ Piita did lorn ou fi mek ada piipl si se im lov dem kaa im did de de wen Jiizas se: “Mi a tel unu fi du sopm nyuu​—lov unu wan aneda. Sed wie mi lov unu, a so unu fi lov unu wan aneda.” (Jan 13:34) Bot aal afta dat apm, kaa Piita did fried a piipl, im neehn nyam wid di breda an sista dem we a neehn Juu. So kaa im neehn nyam wid dem, Paal kaal im wan “ipokrit.” (Gya. 2:11-14) Piita tek di jraa op we im get an lorn fram it. So iina im tuu leta dem, im tel wi se wi no fi onggl se wi lov wi breda an sista dem bot wi fi du tingz fi mek dem si se wi lov dem.

10. Wa mek wi ‘riili a-go lov wi breda an sista dem?’ Tel wi wa mek yu se so. (1 Piita 1:22)

¹⁰ Piita tel wi se wi fi “riili lov [wi] wan aneda.” (Riid 1 Piita 1:22.) An dis a kaa wi a “fala di riil mesij we dem tiich bout Krais Jiizas.” An wan neda ting we Gad Wod tiich wi a se “Gad no paashal.” (Aks 10:34, 35) An wi kyaahn se wi a du wa Jiizas se wi fi du ef a onggl som piipl wi a du tingz fa iina di kanggrigieshan fi mek dem si se wi lov dem. Wi nuo se wi a-go fiil kluosa tu som piipl dan som, jos laik ou Jiizas did shuo se im fiil kluosa tu som a im falara dem muo dan som. (Jan 13:23; 20:2) Bot Piita mek wi memba se wi fi chrai aad fi “riili lov [wi] wan aneda” laik ou wi wuda lov wi uona fambili.​—1 Pii. 2:17.

11. Ef wi “riili lov [wi] wan aneda wid aal a wi aat,” wa wi naa go du?

¹¹ Piita tel wi se wi fi “aalwiez riili lov [wi] wan aneda wid aal a [wi] aat.” Wen Piita se dis, im did a mek wi nuo se wi fi lov wi breda an sista dem aal wen it aad fi wi dwi’it. Laik aal ef wi breda ar wi sista du sitn we mek wi fiil bad ar we ort wi, di fos ting wi mait-a fiil fi du a fi du dem bak sitn. Bot Piita lorn fram Jiizas se wen wi du bak sumadi sitn fi ort dem, Gad naa go api wid dat. (Jan 18:10, 11) Piita rait se: “Wen sumadi du unu sopm, unu no fi du dem bak notn. An wen dem kos unu out, no bada kos dem aaf; insted-a dat unu fi aks Gad fi bles dem.” (1 Pii. 3:9) Ef yu riili lov piipl, it wi mek yu waahn fi bi kain tu dem an tingk bout dem iivn ef dem du sitn fi ort yu.

12. (a) Ef wi riili lov wi breda an wi sista dem, wa dat a-go push wi fi du? (b) Bies pan wa yu si iina di vidiyo we niem Preserve the Precious Gift of Unity, wa yu a-go chrai fi du?

¹² Iina di fos leta we Piita did rait, im se wi fi “riili lov [wi] wan aneda aal di taim an wid aal a [wi] aat.” An wen wi av da lov ya fi piipl, it a-go ‘kova op dem sin no mata ou it mait-a wol iip.’ (1 Pii. 4:8) Piita mait-a did memba wen im did a taak tu Jiizas bout ou fi paadn piipl, an dem taim de im mait-a did tingk se a wan gud sitn im wuda a du ef im paadn piipl fi “aal a sevn taim.” Bot Jiizas tel im se, a “uol a sevnti sevn taim” im fi paadn piipl. Dat miin tu se im fi aalwiez a paadn piipl. (Mat. 18:21, 22) Ef yu fain se it no so iizi fi yu paadn piipl, no bada fiil tuu bad kaa aal a wi we a sorv Jeuova no porfek. So dis a sitn we aal a wi afi chogl wid. Bot wa yu fi du a mek shuor se yu du di sitn dem we yu fi du fi paadn yu breda an yu sista dem so dat unu kyan liv iina piis. c

13. Wa mek it mait-a aad fi di elda dem tek kier a di breda an sista dem di wie ou dem fi dwi’it?

¹³ Afta Jiizas did kom bak alaiv, Piita no figet wa im tel im se. Im se: “Tek kier a mi shiip dem.” (Jan 21:16) Ef yu a wan elda, yu nuo se a dis yu fi du. Bot wi nuo se it mait-a aad fi di elda dem du dis som a di taim kaa dem av dem fambili fi tek kier a fos. Laik dem afi mek shuor se dem fambili av somwe fi liv, an fuud fi nyam, an fi mek shuor se evribadi iina di fambili fiil se dem lov dem, an se dem a du di sitn dem we Jeuova se dem fi du. Dem afi mek shuor se dem a priich tu, an se dem a du di paat dem we dem get fi du a di miitn dem, di sorkit miitn dem, an kanvenshan tu. Pan tap a dat, som a dem wok wid di breda dem we dem pik fi elp wi wen wi go a aspital. An som a dem elp wid di wok fi bil Kindom Aal an dem ting de iina di konchri we dem liv. So wi si se di elda dem av wol iip a wok fi du!

14. Wa kyan push di elda dem fi tek kier a Jeuova shiip dem? (1 Piita 5:1-4)

¹⁴ Piita tel im ada elda dem se dem fi “tek kier a di shiip dem we Gad gi [dem].” (Riid 1 Piita 5:1-4.) Ef yu a wan elda, wi nuo se yu lov yu breda an sista dem an yu waahn fi tek kier a dem. Bot somtaim, kaa yu av wol iip a sitn fi du an yu taiyad, yu mait-a fiil laik se yu kyaahn du aal a wa yu av fi du. Wa yu kyan du a prie tu Jeuova bout it. Piita rait an se: “Aal a uu fi sorv, fi sorv wid di chrent an powa we Gad gi unu.” (1 Pii. 4:11) Yu breda an sista dem mait-a a go chuu som tingz we dem naa go kyan get rid a iina da worl ya. Bot yu fi memba se “di Ed Shepad,” we a Jiizas Krais, kyan elp yu breda an sista dem muor dan wa yu kyan du. An im kyan elp dem nou an iina di nyuu worl we a-go kom. Aal Gad a aks di elda dem fi du a fi lov dem breda an sista dem, fi tek kier a dem, an fi “biyiev gud so dem wi waahn fala [dem].”

15. A wa wan elda did du so dat im kyan tek kier a Jeuova piipl dem? (Luk pan di picha tu.)

¹⁵ Wan breda we a elda fram lang taim, we niem William, se im nuo se a wan big ting fi di elda dem tek kier a Jeuova piipl dem. Wen KUOVID did staat, im an di  ada elda dem iina im kanggrigieshan did mek shuor se dem kaal di difrant difrant breda dem iina dem gruup evri wiik. Im se dem dwi’it kaa “nof a di breda an sista dem de a dem yaad a tingk bout difrant difrant tingz. An som a di taim dem kuda de tingk bout som sitn we mek dem fiil a wie.” Wen dis apm, William tek di taim fi lisn tu dem gud gud fi fain out wa an wa dem niid an wa an wa de pan dem main. Den afta dat, im luk fi som sitn we kyan elp dem. An muo taim im fain som vidiyo pan wi websait we kyan elp dem. Im se: “Mi fain se rait ya nou muo dan eva, di breda an sista dem niid elda we a-go tek kier a dem. Wi a wok aad fi elp piipl outa ruod fi lorn bout Jeuova, bot wi afi wok aad siem wie fi elp di breda an sista dem fi gwaan sorv Jeuova.”

16. Kaaz a wa wi lorn iina Fos an Sekan Piita, wa a som sitn we wi mait-a plan fi du?

¹⁶ Wi jos luk pan som a di sitn dem we Jeuova did mek Piita rait iina di tuu leta dem. An yu mait-a si sitn we yu waahn fi du beta wid. Laik yu mait-a fain se yu fi tingk muo bout di blesn dem we wi a-go get iina di nyuu worl. Ar se yu fi priich muo wen yu de a skuul, wok, ar somwe els. Ar yu mait-a si som tingz we yu kyan du fi mek yu breda an sista dem si se yu riili lov dem fram yu aat. An unu we a elda mait-a mek op unu main fi tek kier a Jeuova shiip dem no mata wa kaa unu waahn fi dwi’it. Wen yu luk pan yuself gud, yu mait-a si se yu niid fi du som tingz beta. Bot no mek dat mek yu gi op, kaa “di Laad gud” an im a-go elp yu fi du beta. (1 Pii. 2:3) Piita mek wi nuo se: “Gad . . . a-go fiks bak evriting fi unu agen. An di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.”​—1 Pii. 5:10.

17. Wa a-go apm ef wi gwaan sorv Jeuova an mek im chrien wi?

¹⁷ Wan a di taim, Piita did fiil laik se im neehn gud inof fi de roun Jiizas. (Luuk 5:8) Bot kaa Jeuova an Jiizas did elp im, Piita gwaan fala Jiizas. An kaaz a dat, Jeuova mek Piita get fi go iina “di Kindom a wi Laad an Sieviya Jiizas Krais​—di kindom we a-go laas fi eva an eva.” (2 Pii. 1:11) Wat a nais sitn Piita did get! A siem so ef yu gwaan sorv Jeuova no mata wa jos laik Piita, an gwaan mek Jeuova chrien yu, yu a-go get fi liv fi eva. An ‘Gad a-go siev yu kaa yu chos iina im.’​—1 Pii. 1:9.