1. Wen wi de a wok ar skuul, wa dem mait-a aks wi bout?

 YU MAIT-A fiil likl fried wen sumadi we yu wok wid ar sumadi we yu go a skuul wid aks yu bout wa yu biliiv iina. An yu na’afi fiil no wie bout dat, kaa a so nof a wi fiil tu. Bot kaa dem aks yu bout wa yu biliiv iina, it mait-a elp yu fi si wa da sumadi de a tingk bout an wa dem biliiv iina, an dat wuda mek it iiziya fi yu fi tel dem bout di gud sitn dem we di Baibl taak bout. Bot somtaim, di wie ou dem aks yu bout wa yu biliiv iina komiin laik a aagyu dem waahn fi aagyu wid yu. No mek dat fraitn yu duo kaa memba ino, nof piipl ier bie lai bout wa wi biliiv. (Aks 28:22) Pan tap a dat, wi a liv “iina di laas die dem” we nof piipl waahn fi du dem uona ting, an “a-go gwaan laik dem a wail daag” tu.​—2 Tim. 3:1, 3.

2. Wa mek wi waahn fi bi jengkl an kain tu piipl?

² Wen yu jengkl an kain tu piipl, a dat a-go elp yu wen sumadi a aagyu wid yu kaaz a wa yu biliiv iina. Yu si wen yu jengkl an kain, yu naa go kwik fi get beks an yu a-go iizi yuself wen sumadi a aagyu wid yu an yu no nuo ou fi ansa dem. (Pr. 16:32) Bot, yu mait-a fiil se it no aalwiez iizi fi bi jengkl an kain. Mek wi luk pan wa kyan elp wi fi bi jengkl an kain tu piipl. An wi a-go luk pan wen sumadi a aagyu wid yu kaaz a wa yu biliiv iina, ou yu kyan ansa dem iina wan nais wie. An ef yu a wan mada ar wan faada, ou yu kyan elp yu pikni dem fi bi jengkl an kain wen dem a tan op fi wa dem biliiv iina?

3. Wa mek yu kyan se wen yu jengkl an kain tu piipl a chrang yu chrang? (2 Timoti 2:24, 25)

³ Yu afi chrang fi bi jengkl an kain tu piipl, kaa it no iizi fi kaam wiself wen tingz mek it aad fi wi du dat. A ‘Gad spirit’ a elp wi fi bi jengkl an kain tu piipl. (Gya. 5:22, 23) Yu si di wod  iina di Griik langwij we miin “jengkl,” a di siem wod dem yuuz fi taak bout wan wail aas we dem chrien fi piipl raid. So da aas de ton jengkl nou bot im stil chrang. So ou wi kyan komiin laik da aas de an jengkl an kain an tek wi taim wid piipl bot chrang tu? Wi aluon kyaahn mek wiself stie so, so wi afi prie fi Gad spirit fi elp wi. An wi si se wi kyan lorn fi bi jengkl an kain tu, kaa a nof a wi breda an sista dem jengkl an kain tu piipl wen dem a fait gens dem, an dis elp dem siem piipl de fi luk pan wi difrant. (Riid 2 Timoti 2:24, 25.) Wa kyan elp yu fi bi jengkl an kain tu piipl?

4. Wen wi luk pan wa did gwaan wid Aizak, ou dat kyan tiich wi fi bi jengkl an kain?

⁴ Som a di tuori dem we de iina di Baibl mek wi si wa mek it gud fi wi jengkl an kain tu piipl. Laik di tuori we tel wi bout Aizak wen im did liv iina di plies we di Filistiin dem did a ruul uova we niem Jiiraar. Im did av som bad main nieba we did a blak op di wel dem we im faada sorvant dem did dig out. Aizak neehn fait fi kip dem wel ya, wa im du a dat im an im fambili muuv we fram de-so an go dig som muo wel somwe els. (Jen. 26:12-18) Bot di Filistiin dem did stil kom an se di waata we de iina dem wel ya a fi dem tu. Dat stil neehn mek Aizak galang bad. (Jen. 26:19-25) Im kuda du aal a dat kaaz a wa im did lorn fram im mada an faada. Laik Iebriyam aalwiez a liv iina piis wid ada piipl an im mada Siera did “jengkl an kwaiyat.”​—1 Pii. 3:4-6; Jen. 21:22-34.

5. Wen wi luk pan wa Max mada an faada did du, ou dat mek wi si se di mada an faada dem kyan tiich dem pikni fi jengkl an kain?

⁵ Unu we a mada an faada kyan tiich unu pikni dem tu bout wa mek it gud fi bi jengkl an kain, an ou fi taak tu piipl iina wan nais wie. Luk pan wa gwaan wid Max b we a 17. Wen im de a skuul an fiil sorvis, im did afi diil wid piipl we kwik fi get beks. So, im mada an faada did afi tek dem taim an elp im fi bi jengkl an kain wen im a diil wid dem piipl ya. Dem se, “Max a get fi andastan nou se wen piipl du tingz we mek im beks, it iiziya fi galang bad pan dem ar fi fait dem dan fi iizi imself.” So Max lorn ou fi bi jengkl an kain tu piipl.

6. Ou wen wi prie it kyan elp wi fi bi jengkl an kain wen wi a diil wid piipl?

⁶ Wen sumadi se som bad tingz bout Jeuova ar bout di Baibl we kyan kaaz wi fi get beks, wi fi prie tu Jeuova an aks im fi gi wi im uoli spirit an fi nuo ou fi ansa di sumadi iina wan nais wie. Bot wa ef afta wi ansa dem, wi si se wi kuda ansa dem iina wan beta wie? Wi kyan prie tu Jeuova agen an tingk bout ou wi kyan ansa dem beta wan neda taim. An wi a-go fain se Jeuova a-go gi wi im uoli spirit so dat wi kyan lorn ou fi kanchuol wiself an so dat wi no kwik fi get beks, an ou wi kyan jengkl an kain tu ada piipl.

7. Wen wi chrai fi memba sortn an sortn skripcha, ou it kyan elp wi fi taak tu piipl iina wan nais wie an tek taim wid dem tu? (Pravorbz 15:1, 18)

⁷ Wi av nof Baibl vors we kyan elp wi fi taak tu piipl iina wan nais wie wen tingz mek it aad fi wi fi du dat. An Gad spirit kyan mek wi memba dem vors ya. (Jan 14:26) Laik di buk a Pravorbz av som tingz we wi kyan riizn pan we kyan elp wi fi bi jengkl an kain tu piipl. (Riid Pravorbz 15:1, 18.) An it kyan elp wi tu fi si wa mek it gud fi wi kanchuol wiself wen wi fain it aad fi diil wid piipl iina wan jengkl an kain wie.​—Pr. 10:19; 17:27; 21:23; 25:15.

8. Wa mek wi fi tingk bout di riizn wa mek sumadi mait-a aks wi wan kwestiyan?

⁸ Wen wi andastan wa mek sumadi se wa dem se an du wa dem du, it kyan elp wi  wen dem a aagyu wid wi kaaz a di sitn dem we wi biliiv iina. (Pr. 19:11) An memba se ino, som a di taim wen sumadi aks wi wan kwestiyan, a mait-a sitn els dem waahn fi nuo wa mek dem aks wi da kwestiyan de. So bifuo wi ansa dem, wi fi memba se wi mait-a no nuo wa mek dem aks wi di kwestiyan we dem aks wi.​—Pr. 16:23.

9. Ou Gidiyan did ansa di man dem fram Iifriem we mek wi si se im did jengkl an kain an andastan wa mek dem fiil di wie ou dem fiil?

⁹ Luk pan ou Gidiyan did ansa di man dem we kom fram Iifriem we did beks wid im kaa im neehn kaal dem fi kom elp fait gens di Izrelait dem enimi. Wa yu tingk did riili mek dem get beks? Dem mait-a did beks kaa Gidiyan neehn kaal dem fos an dat mait-a mek dem fiil laik a dis Gidiyan did a dis dem. Wi no nuo fi shuor wa mek dem did beks, bot wa wi nuo a se Gidiyan did andastan wa mek dem fiil di wie ou dem did fiil, an so im ansa dem iina wan nais wie. An dis jos mek dem iizi demself.​—Joj. 8:1-3.

10. Wa kyan elp wi fi nuo ou fi ansa sumadi wen dem aks wi sitn bout wa wi biliiv iina? (1 Piita 3:15, NWT )

¹⁰ Wen it kom aan tu seks sin an dem ting de, sumadi we yu mait-a go skuul wid ar we yu wok wid mait-a av a prablem wid ou yu fiil bout dem sitn de. Aalduo wi a-go stil tan op chrang fi wa wi biliiv iina, wen  wi a mek dem nuo wa mek wi biliiv di sitn dem we wi biliiv wi fi stil rispek ou dem fiil. (Riid 1 Piita 3:15, NWT.) Wi fi chrai an fain out wa mek dem aks di kwestiyan we dem aks. Wen wi du dat, wi naa go fiil laik se dem aks di kwestiyan kaaz a wi dem av a prablem wid. Bot, no mata di riizn we mek dem aks di kwestiyan we dem aks, wi fi stil ansa dem iina wan nais wie. Wen wi du dat, it mait-a mek dem staat fi tingk iina wan difrant wie. Aal ef wi fiil laik se dem a fiesi demself wid wi, wi fi stil chriit dem iina wan kain wie.​—Ruo. 12:17.

11-12. (a) Wen wi a ansa wan kwestiyan we aad fi ansa, wa wi fi tingk bout? (Luk pan di picha tu.) (b) Tel wi ou wen sumadi aks wan kwestiyan it mait-a mek it iiziya fi wi taak tu dem bout wa wi biliiv iina.

¹¹ Laik, wa ef sumadi we wi wok wid aks wi wa mek wi no selibriet bortdie? Dem mait-a aks wi dat kaa dem fiil se kaa wi a wan Jeuova Witnis, wi kyaahn du notn fi enjai wiself. Ar dem mait-a fiil se kaa wi no selibriet bortdie, it mait-a mek di ada piipl dem we wi wok wid fiil a wie. Wi kyan mek di sumadi we aks wi di kwestiyan nuo se wi api se dem waahn evribadi fi wok tugeda iina piis, an a dat wi riili waahn tu. An wen wi du dat, it mait-a mek it iiziya fi wi tel dem wa di Baibl se bout bortdie.

¹² Wi kyan du di sed ting wen taim piipl aks wi som sitn we mait-a aad fi ansa. Laik, wa ef sumadi we wi go a skuul wid se di Jeuova Witnis dem fi chienj di wie ou dem fiil bout man we sliip wid man an uman we sliip wid uman? Dem mait-a se so kaa dem no riili nuo wa wi biliiv bout man we sliip wid man an uman we sliip wid uman. Ar dem mait-a av wan fren ar sumadi iina dem fambili we a du dem ting de tu. An dem mait-a fiil se wi iet piipl we a du dem kain-a ting de. Wa wi kyan du a mek dem nuo se wi lov evribadi, an wi nuo se evribadi afi mek op dem uona main bout wa dem waahn fi du wid fi dem laif. c (1 Pii. 2:17) Afta wi du dat, wi mait-a kyan tel dem ou it mek tingz beta fi wi wen wi du wa di Baibl se wen it kom aan tu seks sin an dem ting de.

13. Wa yu kyan du fi elp sumadi we biliiv se it no mek no sens fi biliiv se Gad de fi chuu?

¹³ Wen wi a taak tu sumadi we biliiv sitn difrant fram wa wi biliiv iina, wi no fi kwik fi tingk se wi nuo wa mek dem biliiv wa dem biliiv. (Taitos 3:2) Laik sumadi we yu go a skuul wid mait-a se it no mek no sens fi biliiv se Gad de fi chuu. Kaa dem se dat no mos miin tu se dem biliiv se wi kom fram wan likl sitn laik wa som a di piipl dem we stodi bout saiyantifik tingz biliiv. Dat a sitn we im mait-a neva iivn did a tingk bout. So insted-a fi kwik fi staat aagyu wid im bout dat, wa yu kyan du a tel im bout sitn we de pan di jw.org websait we kyan mek im get fi si ou Gad mek evriting. An afta dat, yu mait-a si se im redi fi taak bout di sitn dem we im si pan di websait. So wi si se wen wi taak tu piipl iina wan nais wie, it mait-a mek it iiziya fi dem staat tingk bout tingz iina wan difrant wie.

14. Ou Niall did yuuz wi websait fi elp di pikni iina im klaas fi si se wa im tingk bout di Jeuova Witnis dem a neehn chuu?

¹⁴ Wan tiinieja we niem Niall did yuuz di websait fi elp sumadi fi si se wa som piipl se bout di Jeuova Witnis dem a neehn chuu. Im se, “Wan a di pikni dem iina mi klaas aalwiez a se mi no biliiv iina saiyantifik tingz kaa mi biliiv di sitn dem iina wan buk we av bie mek op tuori iina it.” Wen da pikni ya neehn mek Niall get fi tel im wa im biliiv, Niall tel im fi go pan di jw.org websait an luk pan di paat we niem  “Science and the Bible.” Wen Niall get fi si se di pikni we did iina im klaas did go pan di websait, im si se im did redi fi taak tu im nou bout ou laif kom bout. Sitn laka dis mait-a apm tu yu tu.

15. Ou di mada an faada dem kyan elp dem pikni dem fi ansa di pikni dem we dem go a skuul wid iina wan nais wie wen dem av prablem wid sitn we dem biliiv iina?

¹⁵ Di mada an faada dem kyan tiich dem pikni dem fi si ou dem kyan ansa sumadi iina wan nais wie wen dem aks dem sitn bout wa dem biliiv iina. (Jmz. 3:13) Som a di mada an faada dem yuuz di taim wen dem av dem fambili Baibl stodi fi tiich dem pikni ou dem kyan ansa sumadi we av wan prablem wid wa dem biliiv iina. So, dem kyan taak bout som a di sitn dem we di tiicha dem ar di pikni dem mait-a aks dem wen dem de a skuul, an shuo dem ou dem kyan ansa dem iina wan nais wie.​—Luk pan di paat we niem “ Elp Yu Fambili Fi Si Ou Fi Ansa Kwestiyan We Piipl Mait-A Aks.”

16-17. Ou it elp di pikni dem wen dem praktis ou fi ansa wan kwestiyan bifuo sumadi aks dem it?

¹⁶ Di mada an faada dem kyan praktis wid dem pikni dem an mek dem si ou dem kyan elp sumadi fi si fi demself se di sitn dem we dem biliiv a di chuut. Di paat pan di websait we niem “Young People Ask” we av som difrant difrant tapik av som sitn we di yong piipl dem kyan du. Dem paat de di de fi elp di yong piipl dem fi si fi demself se di sitn dem we dem biliiv a chuu, an fi elp dem fi si ou dem kyan ansa sumadi fi demself. Wen di fambili dem luk pan dem paat ya tugeda, aal a dem wi get fi si ou dem kyan taak tu sumadi iina wan nais wie bout di sitn dem we dem biliiv.

 ¹⁷ Wan yong bwai we niem Matyu tel wi ou it elp im wen im mada an faada yuuz di fambili Baibl stodi fi praktis wid im fi si ou im kyan ansa kwestiyan we sumadi mait-a aks im wen im de a skuul. Im se: “Wi tingk bout di kwestiyan dem we piipl mait-a aks an den wi praktis ou mi kyan ansa dem bies pan di sitn dem we wi riid. Wen mi nuo wa mek mi biliiv wa mi biliiv, an ou mi kyan ansa sumadi, mi no wori so moch, an it mek it iiziya fi mi ansa di sumadi iina wan nais wie.”

18. Wa Koloshan 4:6 shuo wi se kyan apm wen wi taak tu piipl iina wan nais wie?

¹⁸ Wi nuo se wen wi ansa wan kwestiyan gud an wi mek di sumadi si wa mek wi biliiv wa wi biliiv dat no miin tu se dem a-go tek wa wi se. Bot, kaa wi taak tu dem iina wan nais wie, dat kyan elp fi mek tingz beta. (Riid Koloshan 4:6.) It kyan komiin laik wen wi a chuo wan baal gi sumadi, wi kyan fling di baal aad gi dem ar wi kyan tek taim an chuo it gi dem. Wen wi tek taim an chuo it gi dem, di ada sumadi a go kyan kech it, an dat a-go mek dem waahn fi gwaan plie wid wi. A siem so, wen wi a taak tu sumadi bout di sitn dem we wi biliiv an wi dwi’it iina wan nais wie, dem a-go waahn fi gwaan taak tu wi an lisn tu wa wi a se. Bot ef wi fain se di sumadi dis waahn fi mak wi an onggl shuo se a wa dem a se rait, wi na’afi di de a chat tu dem fi wan lang taim. (Pr. 26:4) Bot memba se a no evribadi a-go stie so, som piipl a-go riili waahn fi ier wa wi a se.

19. Wa mek wi fi taak tu piipl nais wen wi a taak op bout di sitn dem we wi biliiv iina?

¹⁹ Aal a wa wi dis luk pan mek wi si se a wan gud sitn wen wi chrai fi bi jengkl an kain an taak tu piipl iina wan nais wie. Prie tu Jeuova an aks im fi elp yu fi taak tu piipl nais aal wen dem aks yu sitn jos kaa dem waahn fi shuo yu se sopm we yu biliiv iina no mek no sens ar kaa dem waahn fi mak yu. An memba se wen yu ansa dem iina wan nais wie, aalduo unu no biliiv di siem ting, it no mek unu en op staat fi aagyu an kos unu wan aneda. An wen yu ansa wan kwestiyan iina wan nais wie an mek piipl si se yu rispek dem, it mait-a mek som piipl chienj di wie ou dem fiil bout wi an ou dem fiil bout di sitn dem we wi biliiv iina. Wi fi “aalwiez redi fi mek enibadi we waahn fi nuo, nuo wa mek [wi] biliiv di sitn we [wi] biliiv iina. Bot wen [wi] a ansa dem, [wi] fi dwi’it iina wan jengkl an nais wie, an mek dem si se [wi] av nof rispek fi dem.” (1 Pii. 3:15, NWT ) So wi si se wen wi taak tu piipl nais, a da taim de wi a-go si se wi chrang!