1. Wa did mek tingz aad fi Jewuo’ash, Ozaiya, an Josaiya?

 A OU yu wuda fiil ef yu ton di king uova Jeuova piipl dem wen yu a jos wan likl pikni? An wa yu wuda du ef yu av da powa de? Di Baibl mek wi nuo bout som yong piipl we did ton king iina Juuda. Laik yu did av Jewuo’ash, we did staat fi ruul wen im a dis 7. An yu av Ozaiya we did staat ruul wen im a 16, an Josaiya did staat ruul wen im a 8. Dis mos did aad fi dem. Bot aalduo it mait-a neehn iizi fi dem, Jeuova an som ada piipl did elp dem fi du uol iip a gud sitn.

2. Wa mek wi fi stodi bout wa apm wid Jewuo’ash, Ozaiya, an Josaiya?

² Wi a no king an kwiin, bot wi kyan lorn nof fram wa Jewuo’ash, Ozaiya an Josaiya did du. Dem did du som gud sitn, bot dem did du som bad sitn tu. Wen wi luk pan wa dem did du, wi a-go si wa mek wi no fi kip bad kompni, an wa mek wi fi ombl, an wa mek wi fi gwaan fain out wa Jeuova waahn wi fi du an dwi’it.

3. Ou Jeyaiyada did elp Jewuo’ash fi mek op im main fi du som gud sitn?

³ Du som gud sitn laik Jewuo’ash. Wen Jewuo’ash did yong, im du som gud sitn. Jewuo’ash faada ded wen im a likl pikni, an Jeyaiyada, uu a did di liida fi di priis dem, gruo im an tiich im uol iip a sitn bout Jeuova. Kaaz im did lisn tu wa Jeyaiyada tel im fi du, Jewuo’ash mek op im main fi worship Jeuova an im did a elp piipl fi worship Jeuova tu. Im aal saat out tingz fi dem fiks op bak Gad ous.​—2 Kr. 24:1, 2, 4, 13, 14.

4. Ou it elp wi wen wi lov di sitn dem we Jeuova se wi fi du an du dem? (Pravorbz 2:1, 10-12)

⁴ Ef yu mada an faada ar sumadi els a tiich yu fi lov Jeuova an fi du wa im waahn yu fi du, den a sitn gud dat  dem a du fi yu. (Riid Pravorbz 2:1, 10-12.) Di mada an faada dem kyan du difrant tingz fi tiich dem pikni dem. Luk pan wa wan sista we niem Katya faada did du fi elp ar fi du di rait sitn dem. Evridie wen ar faada a kyari ar go skuul, im taak bout di skripcha we wi get fi riid fi di die wid ar. Katya se: “Wa wi taak bout aalwiez elp mi fi du di rait ting wen eni likl prablem kom op iina di die.” Bot somtaim yu mait-a fiil laik se di sitn dem we yu mada an faada se yu fi du an no fi du we bies aafa di Baibl a tap yu fram du di sitn dem we yu laik. Bot wa kyan elp yu fi tek di elp we dem gi yu? Wan sista we niem Anastasia se wa elp ar a se ar mada an faada tel ar wa mek dem mek dem ruul de. Shi se: “Wa dem du elp mi fi si se dem ruul de a no sitn fi mek mi fiil laik se mi iina prizn, bot a sitn fi protek mi.”

5. Ou Jeuova an yu mada an faada gweehn fiil wen yu du sortn tingz? (Pravorbz 22:6; 23:15, 24, 25)

⁵ Wen yu du di sitn dem we yu mada an faada a tiich yu fram di Baibl, it a-go mek dem api. An muor dan dat, yu a-go mek Jeuova api, an yu an im a-go get kluos kluos. (Riid Pravorbz 22:6; 23:15, 24, 25.) Dat mek yu waahn fi du laik wa Jewuo’ash did du wen im did yong, no chuu?

6. A uu Jewuo’ash did staat fi lisn tu, an wa apm kaaz a dat? (2 Kranikl 24:17, 18)

⁶ Yu fi lorn fram di bad sitn dem we Jewuo’ash did du. Afta Jeyaiyada ded, Jewuo’ash staat fi kip bad kompni. (Riid 2 Kranikl 24:17, 18.) Im mek op im main fi lisn tu som tap-a-tap man iina Juuda we neva lov Jeuova. An yu mait-a a tingk tu yu self se Jewuo’ash shuda kip we fram dem man de we neehn av notn gud bout dem. (Pr. 1:10) Im no onggl lisn tu dem, bot wen im kozn Zakaraiya kom fi tel im fi chienj im wiez, im mek dem kil im. (2 Kr. 24:20, 21; Mat. 23:35) Yu no si se wa im did du neehn mek no sens? Jewuo’ash did staat aaf gud ino, bot im tap sorv Jeuova an mek ada piipl tap sorv Jeuova tu, an im aal ton kila tu. An it en op se im uona sorvant dem kil im. (2 Kr. 24:22-25) Yu si ef im did gwaan lisn tu Jeuova an lisn tu di wan dem we lov Jeuova tu, im laif wuda betaraaf. Wa a som sitn we yu lorn fram wa did go dong wid Jewuo’ash?

7. A uu an uu yu fi pik fi bi yu fren? (Luk pan di picha tu.)

⁷ Wan ting we wi lorn fram di bad sitn  dem we Jewuo’ash did du a se wi niid fi pik fren we a-go elp wi fi lov Jeuova an elp wi fi waahn fi du di tingz dem we a-go mek im api. Wi an wi fren dem na’afi bi di siem iej ino. Memba se, Jeyaiyada did uolda dan Jewuo’ash. So tingk bout di fren dem we yu av an aks yuself dem kwestiyan ya: ‘Mi fren dem a elp mi fi chos iina Jeuova muor? Dem a elp mi fi du wa Jeuova waahn mi fi du? Dem a taak bout Jeuova an di ting dem we iina di Baibl? Dem a du wa Jeuova waahn dem fi du tu? Wen mi du sitn rang, dem mek mi nuo, ar dem jos tel mi wa mi waahn fi ier?’ (Pr. 27:5, 6, 17) Yu si ef yu fren dem no lov Jeuova, dem a no gud fren. Di fren dem we yu fi av a di wan dem we lov Jeuova. A dem kain-a fren de yu fi eng aan pan kaaz a dem a-go elp yu so dat tingz kyan wok out gud fi yu.​—Pr. 13:20.

8. Ef wi yuuz di intanet fi lingk op wid wi fren dem an ada piipl, wa wi fi tingk bout?

⁸ Yu mait-a waahn yuuz di intanet fi lingk op wid yu fren dem an ada piipl, an notn no rang wid dat. Bot nof piipl put op picha an vidiyo wid tingz we dem bai an we dem du pan di intanet fi mek piipl big dem op. Ef yu yuuz di intanet fi lingk op wid piipl, aks yuself dem kwestiyan ya: ‘Mi du dis kaa mi waahn piipl fi big mi op? Wen mi put op tingz, a kaa mi waahn fi elp ada piipl fi fiil gud ar a riili shuo aaf mi a shuo aaf? Mi a lou ada piipl panlain fi tel mi wa fi du, laik ou fi tingk, an ou fi taak, an ou fi gwaan?’ Breda Nathan Knorr, uu did de pan di Govanin Badi, se: “No du tingz jos kaa yu a chrai mek piipl api wid yu, kaa nobadi naa go en op api wid wa yu a du. Wa yu fi du a du tingz fi mek Jeuova api. An wen yu du dat, yu a-go mek di wan dem we lov Jeuova api wid wa yu a du tu.”

9. A wa Jeuova did elp Ozaiya fi du? (2 Kranikl 26:1-5)

⁹ Du som gud sitn laik Ozaiya. Wen di king we niem Ozaiya did yong, im did ombl, an im lorn fi av nof rispek fi Jeuova. Im ded wen im a did 68 ier uol, an im get nof blesn fram Jeuova fi muos a im laif. (Riid 2 Kranikl 26:1-5.) Wen som uol iip a ada konchri did a fait gens Jeruusilem, im fait dem aaf an win. An im du tingz fi mek shuor se dem sief. (2 Kr. 26:6-15) Ozaiya did glad se Jeuova elp im fi du aal a wa im du.​—Iik. 3:12, 13.

10. Wa did apm tu Ozaiya?

¹⁰ Yu fi lorn fram di bad sitn dem we Ozaiya did du. Kaaz Ozaiya did a king, im did yuus tu fi tel piipl wa fi du, an dis mait-a did mek im fiil se im kuda du eniting we im waahn fi du. Wi se so kaa wan die im go iina Gad ous an im jomp go bout im waahn bon swiit spais pan di alta, an dis a sitn we di king dem neehn fi du. (2 Kr. 26:16-18) Di liida fi di priis dem we niem Azaraiya did tel im se im rang, an kaaz a dis, Ozaiya did beks bad. A so Ozaiya tap du wa Jeuova waahn im fi du, an Jeuova ponish im wen Im mek im skin ton fasi-fasi. (2 Kr. 26:19-21) Ef im did stie ombl, im laif wuda ton out beta.

11. Wa kyan elp wi fi stie ombl? (Luk pan di picha tu.)

¹¹ Wen Ozaiya did get big an powaful, im figet se a Jeuova gi im evriting we im av. Dat tiich wi se wen taim wi get uol iip a blesn an nof tingz fi du fi Jeuova, wi fi memba se a im dem kom fram. So wen wi du uol iip a sitn iina Jeuova sorvis, wi no fi buos bout it, bot wi fi gi Jeuova di big op  fi aal a wa im elp wi fi du. b (1 Kor. 4:7) Wi fi ombl wiself an memba se wi no porfek, so som a di taim wi a-go niid sumadi fi karek wi. Wan 60 ad ier uol breda se: “Mi lorn fi laaf aafa miself wen mi mek wan likl mistiek. An wen sumadi karek mi kaa mi du som likl fuulinish, aal mi chrai fi du a lorn fram it an du beta.” Yu si wen taim wi ombl wiself an shuo se wi rispek Jeuova, tingz aalwiez wok out gud fi wi.​—Pr. 22:4.

12. Wa Josaiya did du wen im yong fi jraa niera an niera tu Jeuova? (2 Kranikl 34:1-3)

¹² Du som gud sitn laik Josaiya. Wen Josaiya a did wan tiinieja, im staat fi du tingz fi jraa niera tu Jeuova. Im did waahn fi lorn muor bout Jeuova an im did waahn fi du di ting dem we Jeuova waahn im fi du. Bot tingz neehn iizi fi Josaiya kaa im did waahn fi sorv Jeuova di rait an prapa wie wen nof piipl roun im did a worship faalz gad. An aal bifuo im ton 20, im did staat fi du tingz fi elp di piipl dem fi tap worship faalz gad.​—Riid 2 Kranikl 34:1-3.

13. Fi gi yu laif tu Gad, a wa it riili miin tu yu?

¹³ Yu si aal ef yu a wan yong sumadi, yu kyan mek op yu main fi du laik Josaiya an jraa niera an niera tu Jeuova an lorn bout Im wiez dem tu. An yu si wen yu du dat, it a-go push yu fi gi yu laif tu im. An wen yu gi yu laif tu Jeuova, wa dat miin? Luuk, we did baptaiz wen im a 14, gi wi di ansa wen im se: “Di bigis ting iina mi laif ya nou a fi sorv Jeuova, an mi a-go du evriting we mi kyan du fi mek im api.” (Maak 12:30) A wan gud ting dat ef yu waahn fi du laik Luuk.

14. Tel wi bout som yuut we a du laik King Josaiya.

¹⁴ Ef yu yong an a sorv Jeuova, wa a som a di prablem dem yu mait-a afi diil wid? Francesco c, we did get baptaiz wen im a 12, se di pikni dem iina fi’im klaas did a presha im fi yuuz di sitn we dem kaal ilekchranik sigaret fi viep. Wa elp im fi no dwi’it, a dat im did memba se ef im a viep,  im an Jeuova wudn kluos agen, an it kuda mek im sik tu. Riechel, we did baptaiz wen shi a 14, tel wi wa elp ar fi diil wid di difrant difrant prablem dem we shi afi diil wid a skuul. Shi se: “Eniting we mi lorn a skuul, mi chrai fi tingk bout wa it mek mi memba bout Jeuova an di Baibl. Laik ef mi iina wan klaas an dem a taak bout sitn we did apm fram lang taim, mi chrai fi tingk bout wan tuori we de iina di Baibl ar sitn we di Baibl se wuda apm bifuo it apm. Ar wen mi a taak tu sumadi, mi chrai fi tingk bout wan skripcha we mi kyan riid fi dem.” So di sitn dem we yu go chuu mait-a difrant fram di sitn dem we Josaiya did go chuu, bot yu kyan du laik im an shuo se yu waiz an a stik tu Jeuova. Yu si wen yu lorn fi diil wid difrant difrant prablem wen yu yong, it a-go elp yu fi nuo ou fi diil wid ada prablem wen yu get biga.

15. A wa did elp Josaiya fi sorv Jeuova? (2 Kranikl 34:14, 18-21)

¹⁵ Wen King Josaiya ton 26, im mek dem fiks op bak Gad ous. Wen dem a du dis, dem fain di buk we Jeuova Laa did de iina we im gi Muoziz. Wen Josaiya ier wa de iina da buk ya, it push im fi du di ting dem we it se im fi du. (Riid 2 Kranikl 34:14, 18-21.) Yu wuda laik fi riid di Baibl aafn? Yu mait-a a du dat aredi, bot yu a enjai it? Yu chrai fi rait dong di vors dem we kyan elp yu fi diil wid sitn iina yu laif? Luuk, we wi taak bout aredi, did av wan buk we im rait dong aal a di vors dem we im laik. Yu tingk se yu kuda du sopm laik dis tu we kuda elp yu fi memba di vors dem we yu laik ar di sitn dem we yu lorn fram dem? Di muor yu get fi nuo wa di Baibl a se an lov it a di muor yu a-go waahn fi sorv Jeuova. An jos laik King Josaiya, it a-go mek yu waahn fi du di sitn dem we iina di Baibl.

16. Wa mek Josaiya did en op du wan bad sitn, an wa wi kyan lorn fram dis?

¹⁶ Yu fi lorn fram di bad sitn dem we Josaiya  did du. Wen Josaiya did a bout 39, im did du sitn bad we mek im en op ded. Wa im du, a dat im chos iina imself muor dan ou im chos iina Jeuova wen im neva bada aks Jeuova fi mek im nuo wa fi du. (2 Kr. 35:20-25) Dis mek wi lorn se no mata ou uol wi bi ar ou lang wi a stodi di Baibl, wi afi du di sitn dem we a-go mek wi jraa niera an niera tu Jeuova, laik fi prie tu Jeuova aafn an aks im fi elp wi fi nuo wa fi du, an fi stodi im Wod. An wi fi lisn tu di breda an sista dem we chrang iina di chuut tu. Ef wi du aal a dis, den wi naa go en op a du aal kain-a bad sitn an wi a-go api tu.​—Jmz. 1:25.

17. Wa wi lorn fram wa did apm wid dem chrii king ya we did a ruul iina Juuda?

¹⁷ Wen sumadi yong, dem kyan du som uol iip a nais sitn. Wen wi luk iina di Baibl an wi si di ting dem we Jewuo’ash, Ozaiya, an Josaiya did du, wi si se yong piipl kyan du som uol iip a gud sitn wid dem laif an mek Jeuova api. Ye, dem yong king ya did mek som mistiek, an kaaz a dat tingz did ton out bad fi dem. Bot ef yu du di gud sitn dem laik we dem did du an no du di bad sitn dem we dem du, den yu kyan nuo fi shuor se yu a-go api wid yu laif.

18. Uu an uu iina di Baibl yu kyan lorn bout we kyan elp yu fi si se yu kyan api wid di wie ou yu liv yu laif? (Luk pan di picha tu.)

¹⁸ Di Baibl mek wi nuo bout som ada yong piipl we did jraa kluos tu Jeuova an uu im api wid, an wi get fi si se dem did api. Dievid a wan a dem yuut de. Wen im did yong, im du tingz we shuo se im waahn du wa Jeuova waahn im fi du. An wen im ton king, im stik tu Jeuova tu. Kopl taim im du som bad sitn ino, bot Jeuova did stil si im az sumadi we chos iina Im an a chrai fi du wa Im waahn im fi du. (1 Ki. 3:6; 9:4, 5; 14:8) Wen yu stodi bout ou Dievid liv im laif an ou im du aal a wa im kuda du fi Jeuova, dat kyan elp yu an push yu fi du di siem ting tu. Wan neda sitn we yu kyan du a stodi bout Maak ar Timoti. Dem tuu man ya did sorv Jeuova fram dem yong an Jeuova did api wid ou dem a liv dem laif, an dem did api tu.

19. A wa kain-a laif yu kyan av?

¹⁹ Di sitn dem we yu a du rait ya nou a-go mek yu laif ton out gud ar bad. Ef yu gwaan chos iina Jeuova an no iina yuself, den im a-go elp yu fi du som gud sitn iina laif. (Pr. 20:24) Yu kyan api wid di laif we yu a liv. An memba se Jeuova lov wa yu a du fi im rait ya nou. No beta wie no de fi liv yu laif dan fi sorv Jeuova we lov yu so moch.