1-2. Kaa Jeuova mek wi iina wan wie we wi muor api wen wi gi sumadi sopm dan wen sumadi gi wi sopm, ou dat kyan elp wi?

 JEUOVA mek wi iina wan wie so dat wi muor api wen wi gi sumadi sopm dan wen dem gi wi sopm. (Aks 20:35) Bot dat no miin tu se wi no api wen sumadi gi wi sopm, kaa wi nuo se wi api wen sumadi gi wi sopm bot wi muo api wen a wi gi sumadi sopm. An Jeuova mek wi da wie de fi wan riizn.

² Jeuova mek wi iina wan wie so dat wi kyan du tingz fi mek wiself api. Wen wi chrai fi si ou wi kyan elp piipl iina difrant difrant wie, wi a du tingz fi mek wiself muor api. A wan nais ting dat Jeuova mek wi kyan du, no chuu?​—Sa. 139:14.

3. Wa mek di Baibl se Jeuova a “di Gad we api”?

³ Di Baibl mek wi nuo se wi a-go api wen wi gi sumadi sitn, an dat mek sens kaa di Baibl tel wi se Jeuova a “di Gad we api.” (1 Tim. 1:11, NWT ) Im a di fos sumadi we eva gi nobadi notn an a im gi wi di bigis ting eva. Di apasl Paal mek wi nuo se a Jeuova “mek wi, gi wi laif, an mek wi kyan muuv bout.” (Aks 17:28) Matarafak, “evri gud sitn​—di sitn dem we no av notn bad bout dem” kom fram Jeuova.​—Jmz. 1:17.

4. Wa a-go elp wi fi riili fiil api?

⁴ Ef wi waahn fi fiil wa it komiin laik fi bi muor api wen wi gi sumadi sopm, wi kyan du laik Jeuova. (Ifii.  5:1) Wi a-go luk pan wa wi kyan du ef wi fiil laik se afta wi gi sumadi sopm wi no fiil laik dem riili tangk wi fi it. Wen wi luk pan dem sopm ya, dem a-go elp wi fi gwaan fiil gud wen wi gi sumadi sopm.

KAIN TU PIIPL LAIK JEUOVA

5. Wa a som a di sopm dem we Jeuova gi wi?

⁵ Si som sopm ya we Jeuova du fi shuo se im kain tu piipl: Im gi wi di ting dem we wi niid. Wi mait naa liv no big laif bot Jeuova mek shuor se wi av di ting dem we wi niid fi liv. Laik im mek wi kyan av fuud fi nyam, kluoz fi wier, an somwe fi liv. (Sa. 4:8; Mat. 6:31-33; 1 Tim. 6:6-8) An Jeuova no onggl gi wi dem sitn ya kaa im fiil se im afi gi wi dem. So wa mek im du dem sitn ya fi wi?

6. A wa wi lorn fram Matyu 6:25, 26, NWT?

⁶ Wi si se Jeuova du aal a dem sopm ya fi wi kaa im lov wi. Mek wi luk pan wa Jiizas did se iina Matyu 6:25, 26, NWT. (Riid.) Jiizas did a taak bout di ting dem we Jeuova mek. Wen im a taak bout di bod dem im se: “Dem no plaant notn an dem no riip notn an dem no gyada op notn niida.” Bot im mek wi nuo se: “Yu Faada we de iina evn stil gi dem fuud fi nyam.” An den im aks da kwestiyan ya: “Yu no tingk yu wot muor dan dem tu im?” Jiizas did a mek wi si se di piipl dem we a worship Jeuova wot muo tu im dan di animal dem. So ef Jeuova kier bout dem animal de, wi kyan nuo fi shuor se im a-go tek kier a wi. Jos laik ou wan faada tek kier a im fambili kaa im lov dem, a siem so Jeuova a tek kier a im fambili kaa im lov dem.​—Sa. 145:16; Mat. 6:32, NWT.

7. Wa a wan wie wi kyan du laik Jeuova an kain tu piipl? (Luk pan di picha tu.)

⁷ Jos laik Jeuova, wi kyan gi piipl tingz kaa wi lov dem. Ef yu nuo se wan breda ar wan sista na’av no fuud fi nyam ar niid kluoz fi wier, yu kyan mek Jeuova yuuz yu fi gi dem sopm. Nof piipl nuo se Jeuova Witnis elp out piipl wen orikien an dem ting de gwaan. Laik wen KUOVID-19 did a go roun, di breda an sista dem gi dem wan aneda fuud, kluoz an ada tingz we dem niid. An som a dem gi moni fi elp out wid di worl waid  wok. An da moni de elp out di breda an sista dem aal uova di worl. Dem du wa Iibruu 13:16 se dem fi du. It se: “No figet fi du wa gud, an fi shier we unu av, kaaz Gad lov dem kain-a sakrifais de.”

8. A wa a som a di sitn dem we Jeuova yuuz im chrent fi elp wi fi du? (Filipiyan 2:13)

⁸ A Jeuova gi wi di chrent. Jeuova chrang bad. An im api fi gi di wan dem we a worship im som a im chrent. (Riid Filipiyan 2:13.) Tingk bout it: Yu eva a go chuu wan aad taim an yu prie tu Jeuova fi gi yu di chrent fi go chuu? Ar yu eva prie tu im fi im elp yu fi no du sopm we yu no fi du, ar fi gi yu di chrent fi go chuu di die? Wen Jeuova ansa yu an gi yu di chrent fi go chuu, yu a-go fiil laik di prafit Aizaiya we se: “Im gi di sumadi we taiyad di chrent fi go aan, an fi di wan we naa no chrent fi du notn, im mek dem chrang bad.”​—Aizaiya 40:29.

9. A ou wi kyan du laik Jeuova an yuuz wi chrent fi elp ada piipl? (Luk pan di picha tu.)

⁹ Aalduo wi no porfek, wi kyan stil yuuz wi chrent laik Jeuova fi elp ada piipl. Laik ef wi nuo wan breda ar wan sista we op iina iej ar we kyaahn du nof tingz fi elp demself, wi kyan go a shap fi dem ar elp dem kliin dem ous an dem ting de. An wi kyan elp fi kliin op an fiks op di Kindom Aal ef wi kyan dwi’it. Wen wi yuuz wi chrent fi du dem sopm ya, wi a du laik Jeuova.

10. A ou wi kyan yuuz di ting dem we wi se fi elp ada piipl?

¹⁰ Wi kyan yuuz di ting dem we wi se fi elp ada piipl fi get di chrent we dem niid fi go aan. Yu nuo nobadi we yu kyan se sopm tu fi gi dem di chrent fi go aan, ar we a gwaan gud we yu kyan big op fi ou dem a gwaan? Ef yu nuo nobadi laik dat, yu kyan go luk fi dem ar kaal dem pan di fuon ar sen dem wan mesij. Yu na’afi tel dem notn wid no wol iip a big wod iina it. Wans yu se sopm we riili a kom fram yu aat, a mait-a jos wa dem niid fi elp dem fi gwaan sorv Jeuova an fi fiil beta.​—Pr. 12:25; Ifii. 4:29.

11. A wa Jeuova api fi du?

¹¹ Jeuova mek wi waiz. Di apasl Jiemz did rait se: “Ef sumadi no waiz, aal dem afi du a aks Gad an im wi mek dem waiz, kaaz Gad naa go uol bak notn fram dem.” (Jmz. 1:5.) So dis mek wi si se Jeuova no fried fi mek ada piipl waiz  tu. Wen im mek wi waiz, im “naa go uol bak notn fram [wi].” An im no dwi’it iina wan wie we mek wi fiil bad se im afi elp wi. Matarafak, im wel waahn wi fi aks im fi elp wi.​—Pr. 2:1-6.

12. Wa a som tingz we wi kyan du fi elp fi mek ada piipl waiz tu?

¹² Wi kyan du laik Jeuova an elp fi mek ada piipl waiz tu. (Sa. 32:8) Laik wi kyan elp di wan dem we jos staat go out iina sorvis fi kyan priich tu piipl an tiich dem gud. An di elda dem kyan elp di ministiiriyal sorvant dem an di breda dem we jos baptaiz fi si ou dem kyan du di ting dem we dem get fi du iina di kanggrigieshan. An di wan dem we nuo ou fi bil op an fiks op Kindom Aal an dem ting de kyan elp di wan dem we no nuo ou fi dwi’it fi du it gud.

13. Wen wi a tiich ada piipl, ou wi kyan dwi’it laik Jeuova?

¹³ Di wan dem we get fi tiich ada piipl fi du tingz fi dwi’it iina wan wie laik ou Jeuova wuda dwi’it. Kaa memba se wen Jeuova mek wi waiz, im no uol bak notn fram wi. A siem so wen wi a tiich sumadi sopm, wi no fi uol bak notn we wi nuo fram dem niida kaa wi mait-a fiil se dem mait-a en op kyan dwi’it beta dan wi an tek uova fram wi. An wi no fi se: “Nobadi neehn tiich mi fi dwi’it, so yu de pan yu uon wid dat.” A no so Jeuova piipl dem tan. Wi no fi onggl glad fi tiich piipl, bot wi fi glad fi du eniting we wi kyan du fi elp dem tu. (1 Tes. 2:8) An wi uop se afta wi tiich dem “dem kyan go tiich ada piipl.” (2 Tim. 2:1, 2) Wen wi du dem sopm de, wi a elp fi mek ada piipl api an dem a-go a elp fi mek ada piipl api tu.

WA WI FI DU EF IT LUK LAIK SE WEN WI GI SUMADI SITN, DEM NO TANGK WI FI IT?

14. Muo taim wen wi gi sumadi sopm, wa dem du?

¹⁴ Muor wail wen wi gi sumadi sitn, speshali wen a wi breda an sista dem, dem mek wi nuo umoch dem tangk wi fi it. Laik dem mait-a rait wan likl sopm ar du sopm els fi mek wi si se dem tangk wi. (Kol. 3:15) An wen wi get sopm we mek wi si se dem tangk wi, it mek wi api.

15. Ef sumadi no tangk wi fi wa wi du fi dem, wa wi fi memba se?

¹⁵ Jos nuo se a no evritaim wi gi sumadi sopm, ar du sopm fi sumadi, dem a-go tangk wi fi it. It mait-a iivn luk laik dem no kya bout wa wi du fi dem. Ef dat apm, wa wi kyan du so dat wi stil api an wi no get beks? Memba se di mien skripcha fi da lesn ya mek wi nuo se wen wi gi sumadi sopm, wi a-go muo api dan ef sumadi gi wi sopm. (Aks 20:35) So ou wi fiil afta wi gi sumadi sopm naa go av notn fi du wid wa dem du afta wi gi dem sopm ar du sopm fi dem. So wi fi api aal ef di sumadi luk laik se dem no tangk wi. Mek wi luk pan som tingz we kyan elp wi fi du dat.

16. Wa kyan elp wi fi gi piipl tingz an stil api?

¹⁶ Chrai fi du laik Jeuova. Jeuova eva a du gud fi piipl; aal fi di wan dem we naa tangk im fi it. (Mat. 5:43-48) An im pramis wi se wen wi gi piipl sopm “an no ekspek fi get bak notn,” im “a-go pie [wi] bak big taim.” (Luuk 6:35) Dat miin tu se aal ef sumadi no tangk wi fi notn we wi du fi dem, Jeuova a-go bles wi kaa wi a sumadi we api fi gi ada piipl tingz.​—Pr. 19:17; 2 Kor. 9:7.

17. A wa wi fi tingk bout wen wi a-go du sopm fi sumadi? (Luuk 14:12-14)

 ¹⁷ Wa Jiizas se a Luuk 14:12-14 (Riid) kyan elp wi wen wi a gi sumadi sopm. Laik wen wi a invait piipl fi kom a wi yaad fi kom nyam som fuud, wi fi tingk bout ef wi onggl a dwi’it fi di wan dem we kyan du bak sopm fi wi. An wi kyan luk pan wiself fi si ef a dat wi a du. Ef wi fain se a dat wi a du, wi kyan chrai fi du laik wa Jiizas se an du tingz fi piipl we mait-a kyaahn du bak notn fi wi. An dat a-go mek wi api kaa wi a du tingz laik ou Jeuova wuda dwi’it. An dis kyan elp wi fi stil api ef wi du sopm fi sumadi an dem no tangk wi fi it.

18. A wa mek wi no fi kwik fi tingk bad bout ada piipl?

¹⁸ No kwik fi tingk sitn bad bout ada piipl. (1 Kor. 13:7) Ef sumadi no tel wi tangks fi sitn we wi du fi dem, wi kyan aks wiself da kwestiyan ya: ‘Dem riili no tangk mi fi wa mi du fi dem, ar dem jos figet fi tel mi?’ An som piipl mait-a fain it aad fi tel sumadi ou dem fiil. An som mait-a shiem wen dem get elp, speshali wen a dem yuus tu elp ada piipl. Bot no mata di riizn we mek dem no du wa dem fi du, kaa wi lov wi breda an sista dem, wi a-go aalwiez api fi elp dem out.​—Ifii. 4:2.

19-20. Wa mek it gud fi wiet pan piipl afta wi du sitn gud fi dem? (Luk pan di picha tu.)

¹⁹ Wiet pan dem. King Salaman did rait se: “No fried fi fling out yu bred iina di waata, kaa iina di lang ron it a-go kom bak tu yu.” (Iik. 11:1) So dis a mek wi si se a mait-a aal lang afta wi du sopm fi sumadi dem mait-a shuo se dem tangk wi fi it. Wi a-go luk pan wa did apm tu wan sista we mek wi se dis.

²⁰ Wan sorkit uovasiya waif did rait wan kyaad gi wan sista we jos baptaiz, a tel ar se shi fi gwaan sorv Jeuova no  mata wa. Bout iet ier afta dat, di sista rait bak di sorkit uovasiya waif an se: “Mi jos afi mek yu nuo se di kyaad we yu did gi mi did elp mi fi uol iip a ier aalduo yu neehn nuo.” Shi se: “Wa yu did rait did nais, bot a di Baibl vors we yu did put iina it did riili toch mi aat an mi neva figet it.” a Afta shi rait an tel di sista som a di ting dem we shi go chuu, shi se: “Som a di taim mi did fiil laik se mi waahn fi kom outa di chuut, an mi fiil laik mi kudn manij no muor. Bot di vors we yu put iina di kyaad elp mi fi go aan.” An shi se: “Fi dem iet ier de, notn els neva elp mi fi stik tu Jeuova laik ou wa yu did rait iina da kyaad de did elp mi.” Di sorkit uovasiya waif mos did fiil gud afta shi get da leta de. So wi si se iina di lang ron, wa da sorkit uovasiya waif de did du did kom bak tu ar. An sopm laik dis kyan apm tu yu tu.

21. Wa mek yu mek op yu main fi kain tu piipl laik Jeuova?

²¹ Jos laik wa wi did se aredi, Jeuova mek wi iina wan wie we wi kyan fiil api wen wi gi sumadi sitn. Aalduo wi api wen wi get sopm fram sumadi, wi muor api wen wi gi sumadi sitn, speshali wen wi gi tu wi breda an sista dem. An wi api wen dem tel wi tangks. Bot ef dem no tel wi tangks, wi stil api se wi did du sopm fi dem. An wi fi aalwiez memba se Jeuova kyan gi wi wol iip muor dan wa wi did gi dem. (2 Kr. 25:9) Wi kyaahn kain laik Jeuova! An Jeuova a di bes sumadi fi pie wi bak fi wa wi du. So mek aal a wi mek op wi main fi gwaan du laik Jeuova an shier wa wi av wid piipl.