Mi baan 1934. An mi mada an faada kom fram Switsalan, bot dem muuv kom a Kyanada kom liv iina wan toun we niem Timinz we de iina Antieriyo. Bout iina 1939, mi mada staat fi riid di Wachtowa magaziin dem an staat fi go a di Jeuova Witnis miitn dem, an shi wuda kya mi an mi siks breda an sista dem. Likl afta dat, shi ton wan Jeuova Witnis.

Mi faada neva api wid wa mi mada a du, bot mi mada did lov wa shi a lorn an shi mek op ar main fi sorv Jeuova no mata wa. An shi du dat aal wen di wok did anda lak dong iina Kyanada iina di 1940’z. Aalduo mi faada wuda se tingz fi mek ar fiil bad, mi mada aalwiez shuo se shi rispek im an chriit im iina wan kain wie. Kaa shi du dis, it did elp mi an mi breda an sista dem fi staat sorv Jeuova tu. Mi api se afta a wail, mi faada neva fiil so bad se wi did a sorv Jeuova an im staat fi chriit wi beta.

Iina 1950 iina di soma, mi go a di Theocracy’s Increase Assembly we did kip iina Nyuu Yaak Siti. A da sorkit miitn de, mi get fi miit som breda an sista fram aal uova di worl an lisn tu som a di nais sitn dem we di breda an sista dem we did go a Gilead School av fi se. Dat did riili push mi fi waahn fi yuuz muos a mi taim fi du Jeuova wok. So wen mi go bak uom, mi sain op fi ton wan regila paiyanier. Di breda dem a di branch afis iina Kyanada rait mi bak an tel mi se mi wuda afi baptaiz fos. So pan Aktuoba 1, 1950, mi get baptaiz. An wan mont afta dat, mi ton wan regila paiyanier an dem sen mi go a wan plies we niem Kapuskazing. Da plies de did de uol iip a mail fram wich paat mi did liv.

 Iina di spring iina 1951, di breda dem a di branch afis aks di breda an sista dem we kuda taak French fi tingk bout fi muuv go a Kwibek kaa dem did niid uol iip a piipl fi priich de iina French. Kaa mi kuda taak French an Ingglish fram mi yong, mi tel di breda dem se mi wuda go. An dem sen mi go a Ruyin bot mi neehn nuo nobadi de. Aal mi av a wan ajres laik we mi did se aredi. Bot tingz did wok out gud, mi an Marcel ton gud gud fren. An mi did api fi priich iina Kwibek fi di neks fuor ier, an iina da taim de mi ton wan speshal paiyanier.

Wen mi de iina Kwibek mi did glad se dem invait mi fi go a di Gilead School klaas nomba 26 iina Sout Lansing iina Nyuu Yaak. Mi gradiyiet pan Febiweri 12, 1956, an dem did se mi fi go a di plies we niem Gaana b iina Wes Afrika. Bot bifuo mi kuda go, mi did afi go baka Kyanada fi kopl wiik til dem saat out mi viiza an dem ting de.

Bot a neehn kopl wiik mi did afi wiet fa. Mi did afi wiet fi sevn mont iina Toranto bifuo mi get di viiza an ada tingz fi flai out. Iina di miin taim, mi stie wid breda an sista Cripps, an mi get fi nuo dem daata we niem Sheila, an di tuu a wi staat fi lov wi wan aneda. Wen mi redi fi aks ar fi marid mi, a siem taim mi viiza kom. So mi an Sheila prie bout it an wi mek op wi main se mi fi go a Gaana, bot wi wuda gwaan rait leta tu wi wan aneda fi si ef wi kuda stil marid iina di fyuucha. Dat neehn iizi fi wi du, bot di wie ou tingz wok out mek wi si se wi du di rait ting.

It did tek mi bout wan mont fi riich a Akra iina Gaana. An mi did afi chravl pan wan chrien, an pan wan ship we kya gudz, an wan plien fi riich de. Wen mi riich de, dem aks mi fi bi wan dischrik uovasiya. An dat miin se mi wuda go aal bout iina Gaana an Aivri Kuos (we dem kaal Kuot Divwaa ya nou) an Tuogolan (we dem kaal Tuogo ya nou). Muos a di taim duo, a mi wan did a jraiv iina wan jiip we  di branch afis did gi mi. Bot mi a tel yu, mi did riili lov fi chravl an go luk fi di breda an sista dem!

Pan di wiiken dem, mi wuda go a di sorkit miitn dem. Bot wi neehn av no bildin fi kip dem sorkit miitn de, so wa di breda dem wuda du a bil op wan likl plies wid wan likl ruuf outa bambu an put som paam branch pan di tap so dat di breda dem kuda get likl shelta fram di son. An kaa wi neva av no frij, wi did kip som animal we wi kuda kil wen wi niid fi fiid di breda an sista dem a di sorkit miitn dem.

Som sitn did apm a di sorkit miitn dem we did mek wi laaf. Laik wan a di taim, wan breda we niem Herb Jennings, c we did a wan mishineri tu, did a gi wan taak wen wan bulkou get we an ron go iina di migl bitwiin wich paat di stiej did de an we di breda an sista dem sidong. So Herb tap taak an di bulkou luk laik se im no nuo wich paat im fi go. Bot fuor chrang breda uol im dong an kya im go bak wich paat dem saat out di fuud. An di breda an sista dem staat shout an klap di breda dem we kech di kou.

Pan di die dem we wi neva av no sorkit miitn, wi wuda go iina di vilij dem we de nier tu we wi a-go kip di sorkit miitn an shuo dem di muuvi we niem The New World Society in Action. Fi mek dem si di muuvi, wi wuda eng op wan wait shiit bitwiin tuu puol ar tuu chrii. Nof a di piipl dem did si’it an dem did lov it. Fi nof a dem, a did di fos taim dem eva si wan muuvi. An wen dem si di paat iina di muuvi we shuo se piipl a get baptaiz, dem wuda jomp op an klap wol iip. Da muuvi de did elp wol iip a piipl fi si se wi a wan aaganaizieshan we de aal uova di worl an a wok tugeda az wan.

Afta mi did de iina Afrika fi bout tuu ier, mi did api fi go a wan kanvenshan wid piipl fram aal uova di worl iina Nyuu Yaak Siti iina 1958, an mi glad bag did bos wen mi did get fi si Sheila. Shi did a wan speshal paiyanier iina Kwibek an shi kom a di kanvenshan. Wi did a rait tu wi wan aneda, bot laik ou wi did de iina di siem plies agen mi aks ar fi marid mi an shi se ye. So mi rait Breda Knorr d an aks im ef Sheila kuda go a di Gilead School so shi  kuda kom wok wid mi iina Afrika, an im se ye. Wen Sheila kom a Gaana, wi get marid iina Akra pan Aktuoba 3, 1959. Wi fiil se Jeuova did bles wi kaa wi did mek fi im bizniz bi di big ting iina wi laif.

Iina 1961 dem aks wi fi go a Kyamaruun. An kaa mi did a elp fi set op di nyuu branch afis, mi did av uol iip a wok fi du. An mi did av uol iip a tingz fi lorn kaa dem did aks mi fi bi di uovasiya a di branch afis. Bot iina 1965 wi fain out se Sheila pregnant. An mi naa tel yu no lai, it did aad fi nuo se di tuu a wi did a-go ton mada an faada. Bot jos wen wi staat fi fiil gud se wi a ton mada an faada an a saat out wiself fi go baka Kyanada, sopm bad apm.

Sheila luuz di biebi. An di dakta tel wi se di biebi a did wan bwai. A uova 50 ier dat nou, bot wi neva figet it. Bot aalduo it did mek wi sad bad, wi did stie iina Kyamaruun an gwaan du Jeuova wok an wi did riili lov it.

Di breda dem iina Kyamaruun did get wol iip a fait kaa dem neehn tek no said iina palitiks. An tingz did get wos iina ilekshan taim. Pan Mie 13, 1970, di govament lak dong di wok iina Kyamaruun. An di govament tek we di nais nais branch afis we wi did dis muuv iina 5 mont bifuo dat. An wan wiik afta dat, dem ron out aal a di mishineri dem out a di konchri. So aal mi an Sheila get ron out tu. Dat did riili aad fi wi kaa wi did lov di breda an sista dem an wi neehn nuo wa wuda apm tu dem afta wi gaan.

Fi siks mont afta dat, wi did de a di branch afis iina Frans. An wen mi did de de, mi chrai fi du evriting we mi kuda du fi di breda an sista dem iina Kyamaruun. Iina Disemba da siem ier de, dem sen wi go a di branch afis iina Naijiiriya kaa dem did staat fi tek kier a di wok iina Kyamaruun. Di breda an sista dem iina Naijiiriya did api fi av wi de an wi did api fi wok wid dem fi wol iip a ier.

Iina 1973 it did aad fi wi fi mek op wi main bout sitn we wi did afi du. Sheila did sik bad, so wen wi did de a wan kanvenshan iina Nyuu Yaak, shi staat fi baal an tel mi se: “Mi kyaahn manij no muor! Muos a di taim ya nou, mi jos fiil sik an pap dong.” Mi an ar did a du Jeuova wok iina Wes Afrika fi uova 14 ier. Mi did proud a ar yu si! Shi did a sorv Jeuova wid aal a ar aat. Bot wi did niid fi chienj op som tingz. So wi taak bout it an prie bout it wol iip, an den wi mek op wi main fi go baka Kyanada kaa a de-so mi kuda tek kier a ar beta. Bot mi a tel yu, it did aad fi wi fi lef mishineri wok an naa yuuz muos a wi taim fi du Jeuova wok. Mi a tel yu, it did riili brok wi aat.

Afta mi go baka Kyanada mi get wan wok wid wan a mi lang taim fren dem we sel kyaar iina wan toun we de nier Toranto. Wi rent wan apaatment an bai som yuuz fornicha, an  dat elp wi so dat wi kuda muuv an no uo nobadi notn. Wi neehn waahn no big laif, kaa wi did waahn fi go bak go yuuz muos a wi taim fi wok fi Jeuova ef wi get di chaans. An dat did apm faasa dan wa wi did tingk.

Dem did a bil wan nyuu Asembli Aal iina Naaval iina Antieriyo, an mi yuus tu go de a Satde die taim fi elp out. Likl afta dat, dem aks mi fi bi di Asembli Aal uovasiya. Sheila did a get beta likl likl, an wi did fiil se shi kuda elp mi wid da nyuu wok ya. So wi muuv go iina di Asembli Aal apaatment iina Juun 1974. An wi did riili api se wi kuda yuuz muos a wi taim agen fi du Jeuova wok!

Mi did riili api se Sheila did a get beta evridie. An tuu ier afta dat, wi did get fi go iina di sorkit wok a Manituoba iina Kyanada. Di winta dem did kuol bad, bot di breda an sista dem chriit wi nais an wi did api fi de roun dem. Wi lorn se it no mata wich paat yu de a du Jeuova wok, di big ting a dat wi a sorv im eniwe wi de.

Afta kopl ier iina di sorkit wok, dem aks wi fi kom a Betel iina Kyanada iina 1978. An likl afta dat, mi did afi lorn wan big lesn. Mi did av wan taak fi du iina French a wan speshal miitn iina Manchriyaal. Di taak did a fi wan an a aaf owa, bot it did buorin tu di breda an sista dem we did a lisn tu it. An wan breda fram di sorvis dipaatment kom taak tu mi bout it. Fi tel yu di chuut, a lang taim mi shuda nuo se mi a no sumadi we gi di bes taak, bot mi neva laik ou di breda did jraa mi op an im neehn big mi op fi notn we mi did du iina mi taak. Im jos taak bout aal a di bad sitn dem we mi did du. Bot a mi did rang fi wa mi did a tingk bout im an di wie ou im did a taak tu mi wen im did a jraa mi op.

Kopl die afta dat, wan breda we de pan di Branch Komitii kom taak tu mi bout wa did gwaan. Mi tel im se mi neehn tek di jraa op gud an mi fiil bad bout it. Afta dat, mi taak tu di breda we jraa mi op an im did fiil gud se mi kom tel im se mi sari fi ou mi did gwaan. Wa apm tiich mi se mi fi ombl, an mi naa go figet dat. (Pr. 16:18) A nof taim mi prie tu Jeuova bout dis an mi mek op mi main se enitaim sumadi jraa mi op mi a-go tek it.

Mi de a Betel iina Kyanada fi uova 40 ier nou, an mi de pan di Branch Komitii sins 1985. Sheila, mi waif we mi lov so moch, ded iina Febiweri 2021. An a no se mi onggl afi de diil wid ou mi mis ar bad bad, bot mi afi a diil wid di difrant difrant siknis dem we mi av tu. Bot kaa mi a du uol iip a wok fi Jeuova, an mi api a dwi’it, mi nat iivn si se di die dem jos a paas so. (Iik. 5:20) Bot aalduo som bad sitn did apm tu mi iina laif, a wol iip muor gud sitn did apm tu mi. Kaaz a 70 ier nou mi a yuuz muos a mi taim fi du Jeuova wok an mek it bi di big ting iina mi laif, mi riili fiil se mi av wan nais laif. Mi prie tu Jeuova se di yong breda an sista dem no tap mek Jeuova wok bi di big ting iina dem laif tu kaa mi shuor se dem a-go av wan nais nais laif we yu onggl kyan get ef yu a sorv Jeuova.