1-2. A wa mek di piipl dem we a sorv Jeuova api? (Jiemz 1:22-25)

 JEUOVA an im Bwai Pikni waahn wi fi api. Di man we did rait Saam 119:2 se: “Di piipl dem we du wa im se dem fi du a-go api, dem a di wan dem we sorch fi im wid aal a dem aat.” An Jiizas did se: “Di piipl dem we ier Gad wod an du we it se, a dem riili bles.”​—Luuk 11:28.

² Wi api se wi a worship Jeuova. An wan a di riizn wa mek wi api a kaa wi a riid Gad Wod, di Baibl, aafn an wi a du wa it tel wi fi du.​—Riid Jiemz 1:22-25.

3. A wa a som a di blesn dem we wi get wen wi riid Gad Wod an du wa it se?

³ Wi get wol iip a blesn wen wi riid Gad Wod an “du wa it se.” Wan a di blesn we wi a-go get a dat Jeuova a-go api wid wa wi a du, an dat a-go mek wi api tu. (Iik. 12:13) Wen wi du wa Gad Wod tel wi fi du, it mek wi api iina wi fambili an it mek wi an wi breda an sista dem iina wi kanggrigieshan ton gud fren. An yu mait fain se a dat a apm tu yu. An wen wi riid Gad Wod an du wa it se, wi naa go en op iina di prablem dem we di piipl dem we naa sorv Jeuova en op iina. An wi fiil laik ou King Dievid did fiil wen im sing bout Jeuova laa dem an di sitn dem we Jeuova tel wi fi du. Im se: “Ef dem du aal a wa yu se, dem a-go get uol iip a blesn.”​—Sa. 19:7-11.

4. A wa mek it naa go so iizi fi du wa Gad Wod se wi fi du?

⁴ No tingk se it a-go aalwiez iizi fi du di sitn dem we  Gad Wod se wi fi du, kaa wi av nof tingz fi du, an wi afi fain taim fi riid an stodi di Baibl fi nuo wa Jeuova waahn wi fi du. So mek wi luk pan som a di sitn dem we kyan elp wi fi riid Gad Wod aafn. An wi a-go luk pan wa kyan elp wi fi tingk bout di sitn dem we wi riid an si ou wi kyan du dem.

PLAN WAN TAIM FI RIID GAD WOD

5. A wa a som a di sitn dem we tek op nof a wi taim we wi afi du?

⁵ Jeuova piipl dem av nof tingz fi du. Wi spen nof taim a du di ting dem we Gad Wod se wi fi du. An nof a wi afi wok fi tek kier a wi fambili. (1 Tim. 5:8) Nof a wi av fambili we sik ar we op iina iej fi tek kier a. An aal a wi afi tek kier a wi self tu so dat wi no get sik. An pan tap a aal a dat, wi av difrant difrant tingz fi du iina di kanggrigieshan. Wan a di big sitn dem we wi av fi du a fi du aal we wi kyan du fi priich tu piipl. So wid aal a dem sitn ya we yu av fi du, a ou yu kyan go fain taim fi riid Gad Wod aafn an tingk bout di sitn dem we yu riid an du wa it se yu fi du?

6. Wa yu kyan du fi shuo se fi riid di Baibl a wan big ting iina yu laif? (Luk pan di picha tu.)

⁶ Wan a “di sitn dem we rait” we Kristiyan fi du a fi riid dem Baibl, so it fi bi wan big ting iina wi laif. (Fil. 1:10) Di fos Saam taak bout di man we api wen it se: “A Jeuova wod mek im api, an im riid Gad wod tu imself an tingk bout it die an nait.” (Sa. 1:1, 2) So dat mek wi si se wi fi plan wan taim fi riid Gad Wod. Wen a di bes taim fi yu plan fi riid di Baibl? Di bes taim naa go bi di siem fi evribadi. Di bes taim fi yu a-go bi di taim wen yu kyan go riid it aafn. Wan breda we niem Victor se: “Mi laik fi riid mi Baibl iina di maanin. Aalduo mi a no wan sumadi we lov fi get op orli iina di maanin, mi si se it kwaiyat dem taim de. So it iiziya fi mi tingk bout di sitn dem  we mi a riid dem taim de.” A di siem wie yu fiil tu? Aks yuself, ‘Wen a di bes taim fi mi riid di Baibl?’

TINGK BOUT DI SITN DEM WE YU A RIID

7-8. A wa mek wi mait-a no get evriting outa wa wi a riid? Tel wi wa it mait-a komiin laik.

⁷ Muor taim wi riid wol iip a tingz bot wi no sidong an tingk bout it. Yu eva fain se afta yu riid sitn, likl afta dat yu no memba wa yu riid? Dat apm tu aal a wi. An ef wi no main shaap, dis kyan apm wen wi a riid di Baibl tu. Wi mait-a se wi waahn fi riid som chapta iina di Baibl evridie an dat gud. A wan gud sitn fi plan wa wi a-go du an dwi’it. (1 Kor. 9:26) Wen wi plan fi staat fi riid di Baibl, a wan gud sitn dat, bot dat a onggl di staat. Ef wi waahn fi get sitn outa Gad Wod wi afi plan fi du muor dan jos riid it.

⁸ It wuda komiin laik dis: Wi niid rien fi faal so wi kyan get waata fi liv. Bot ef tu moch rien faal iina wan shaat taim wi wuda av tu moch waata pan di ort. An wen dat apm, it naa go du wi no gud ef muor rien a faal. Kaa di grong niid taim fi suok op di waata we faal pan it so dat tingz kyan gruo. A siem so, ef wi jos a riid wol iip a di chapta dem iina di Baibl, ar a go chuu it kwik kwik an wi naa sidong an tingk bout di sitn dem we wi a riid an memba dem an du di sitn dem we it se wi fi du, it naa go du wi no gud niida.​—Jmz. 1:24.

9. Wa yu fi du ef yu fain se wen yu a riid di Baibl yu a go chuu it tuu kwik?

⁹ Ef yu fain se wen yu a riid di Baibl yu a go chuu it kwik, chrai an tek yu taim an no go chuu it so kwik. An chrai an tingk bout wa yu a riid. Dis no afi aad fi du. Wa yu kyan du a plan muor taim fi riid an tingk bout wa yu a riid so dat yu kyan get taim fi tingk bout wa yu a riid. Ar yu kyan plan fi riid les so dat yu av muor taim fi tingk bout wa yu a riid.  Victor, we wi taak bout aredi, se: “Mi chrai fi no riid tu moch a di Baibl wan taim. Mi mait-a jos riid a wan chapta ar so. An kaa a iina di orli maanin mi riid it, wen mi a go chuu di die mi kyan tingk bout wa mi did riid.” It no mata wich wan a dem sitn ya a wok gud fi yu, di big ting a dat yu riid iina wan wie so dat yu kyan lorn fram wa yu a riid.​—Sa. 119:97; luk pan di paat we niem “ Som Kwestiyan We Wi Kyan Tingk Bout.”

10. Tel wi ou yu kyan yuuz wan skripcha laik 1 Tesaluoniyan 5:17, 18, fi du di sitn dem we yu a lorn fram di Baibl.

¹⁰ Di mien ting a dat wen yu riid di Baibl, yu fi chrai an du di sopm dem we it se yu fi du. So wen yu a riid it yu kyan aks yuself, ‘Ou mi kyan du wa it se mi fi du nou ar iina di fyuucha?’ Tingk bout dis: Ef yu a riid 1 Tesaluoniyan 5:17, 18 (Riid) yu kyan tap an tingk bout umoch taim yu prie an wa yu a prie bout. An yu kyan tingk bout di ting dem yu tangk Jeuova fa. Yu kyan miebi plan fi tangk Jeuova fi chrii tingz. Wen yu spen likl taim fi tingk bout wa yu a riid, it a-go elp yu fi andastan Gad Wod an fi du wa it se. An ef yu du dis evridie wid di sitn dem we yu riid iina Gad Wod, yu a-go bi sumadi we a du di sitn dem we Gad Wod se yu fi du. Bot wa ef it luk laik se a tu moch sitn de fi yu wok pan?

PLAN FI DU TINGZ WE YU NUO SE YU KYAN GO MANIJ

11. Tel wi wa mek som a di taim yu mait-a fiil laik se yu av tu moch sitn fi wok pan.

¹¹ Wen yu a riid di Baibl an a chrai fi du di ting dem we it se yu fi du, som a di taim it mait-a komiin laik se yu kyaahn manij fi du evriting we it se yu fi du. Laik tingk bout dis: Se tide yu a riid di Baibl an yu si se it se yu no fi chriit som piipl beta dan som piipl. (Jmz. 2:1-8) An yu si se dis a sopm we yu kyan chrai fi du beta. Dat gud! An den tumaro yu a riid wan neda paat a di Baibl an it mek yu si se yu fi tingk bout wa yu a se bifuo yu se it. (Jmz. 3:1-12) Kaa yu fain se som a di taim yu mait-a se tingz we ort ada piipl, yu mait-a mek op yu main se yu a-go chrai fi taak tingz fi mek piipl fiil beta. An den, di neks die wen yu a riid di Baibl agen yu lorn se yu no fi lov di sitn dem we iina di worl. (Jmz. 4:4-12) An yu riyalaiz se yu fi kierful wid di sitn dem we yu a wach an riid an lisn tu. Bai di fuot die, yu mait-a fiil laik se dem sitn ya tu moch fi yu du.

12. Wa mek yu no fi fiil no wie ef wen yu riid di Baibl yu si se yu afi staat du tingz difrant? (Luk pan di said paint tu.)

 ¹² Ef yu fain out se yu av wol iip a sitn fi wok pan, no fiil no wie. It onggl a shuo se yu av wan gud aat. Sumadi we ombl an anis wid demself a-go riid di Baibl fi si wa dem niid fi wok pan. a An memba se, fi bi wan nyuu sumadi a sitn we yu aalwiez afi go a chrai fi du. (Kol. 3:10) Bot wa a-go elp yu fi gwaan du wa Gad Wod tel yu fi du?

13. Wa yu kyan du so dat yu kyan get fi wok pan di ting dem we yu waahn fi wok pan? (Luk pan di picha tu.)

¹³ Wen yu fain out di ting dem we yu niid fi wok pan, no chrai fi du aal a dem siem taim, chrai fi du dem likl likl. (Pr. 11:2) Chrai an du dis: Rait dong di ting dem we yu niid fi wok pan, an den yu kyan pik wan ar tuu a dem fi wok pan fos, an wok pan di res a dem wan neda taim. Bot yu mait-a a wanda a wich wan a dem yu fi staat wok pan fos.

14. A wich wan a di sopm dem we yu waahn fi du yu kyan staat fi du fos?

¹⁴ Yu kyan chrai an staat wok pan di wan we a di iiziyis wan fi yu du, ar yu kyan staat wid di wan we naa go so iizi fi yu du. Wen yu nuo di wan we yu a-go wok pan, yu kyan luk iina di buk an pamplet dem, laik di Watch Tower Publications Index ar di Sitn We Di Jeuova Witnis Dem Kyan Yuuz Fi Luk Op Tingz. An prie tu Jeuova an aks im fi mek yu “waahn fi du di sitn dem we im waahn yu fi du,” an aks im fi gi yu “di chrent fi du dem tu.” (Fil. 2:13) An den chrai fi  du di sitn dem we yu lorn se yu fi du. An wen yu get fi du di fos ting we yu did waahn fi wok pan, it a-go mek yu waahn fi du di ada wan dem tu. Wen yu tingk bout it, yu si wen yu staat gwaan beta iina wan wie, it a-go mek yu waahn fi du som ada gud tingz we a-go mek yu wan beta Kristiyan. An den yu mait-a fain se it a-go iiziya fi du beta wen it kom aan tu som ada tingz.

MEK GAD WOD “WOK IINA AAL A UNU”

15. A ou Jeuova piipl dem difrant fram wol iip a di piipl dem we a riid di Baibl? (1 Tesaluoniyan 2:13)

¹⁵ Som piipl kliem se dem riid di Baibl wol iip a taim. Bot dat no miin tu se dem biliiv wa dem riid ar se dem a du di sitn dem we dem riid se dem fi du. Bot a no dat Jeuova piipl dem du. Dem a du laik di Kristiyan dem we did de bak iina Baibl taim, we “tek it fi wa it bi fi chuu​—Gad Wod.” An dem wok aad fi du wa it se dem fi du.​—Riid 1 Tesaluoniyan 2:13.

16. Wa kyan elp wi fi du wa Gad Wod se wi fi du?

¹⁶ It no aalwiez iizi fi wi riid an du wa Gad Wod se wi fi du, kaa it mait-a aad fi wi fain taim fi riid it. Ar wi mait-a bi sumadi we riid faas, so wi no get fi tingk bout wa wi riid. Ar wi mait-a fiil laik se wi av tu moch sitn fi wok pan wen wi riid it. No mata wa mek it aad fi yu, yu stil fi riid it an du wa it se yu fi du kaaz Jeuova a-go elp yu. So wi fi mek op wi main se wi a-go tek di elp we Jeuova a gi wi an no figet wa im Wod se, bot du wa it se. So wi nuo fi shuor se, di muor wi riid Gad Wod an du wa it se wi fi du, wi a-go api muor dan no ada taim iina wi laif.​—Jmz. 1:25.