1. A wa Jiizas suun du?

 WI LIV iina wan taim wen som big tingz a-go apm, wen Jiizas a-go joj evribadi we liv pan di ort. An Jiizas did tel im falara dem di “sain” we fi luk out fa fi nuo wen im ton King iina evn, an fi nuo wen “di worl suun don.” (Mat. 24:3) Dem sopm ya we Jiizas se a-go apm de iina Matyu chapta 24 an 25, an di siem tuori dem de iina Maak chapta 13 an Luuk chapta 21 tu.

2. A wa wi a-go luk pan, an wa mek it a-go elp wi?

² Wi a-go luk pan chrii tuori we Jiizas did yuuz fi waan wi. Wan a dem a di tuori bout di shiip dem an di guot dem, an wan neda wan a bout di yong gyal dem we som a dem did waiz an som a dem did fu-fuul, an di wan we di maasta did gi im sorvant dem som bag a guol. Dem tuori ya elp wi fi si se a di sitn dem we sumadi du Jiizas a-go yuuz fi joj dem. An wi a-go luk pan wa wi kyan lorn fram dem tuori ya tu. Di fos wan we wi a-go luk pan a di wan bout di shiip dem an di guot dem.

DI SHIIP DEM AN DI GUOT DEM

3. A wen Jiizas a-go joj di piipl dem iina da worl ya?

³ Iina di tuori bout di shiip dem an di guot dem, Jiizas did a taak bout ou im did a-go joj di piipl dem bies pan wa dem du afta dem ier bout di gud nyuuz, an wa dem du fi shuo se dem a bak di wan dem we get pik fi go a evn. (Mat. 25:31-46) Dat a-go apm iina di ‘wos sofarieshan’ likl bifuo Aamagedan staat. (Mat. 24:21) Jos laik ou wan shepad put di shiip dem a wan difrant plies fram di guot dem, a siem so Jiizas a-go put di wan dem we stik tu di wan dem we get pik  fi go a evn a wan difrant plies fram di wan dem we neehn du dat.

4. Azkaadn tu Aizaiya 11:3, 4, wa mek wi kyan nuo fi shuor se Jiizas a-go joj piipl iina wan fier wie? (Luk pan di picha pan di kova tu.)

⁴ Di Baibl mek wi nuo se a Jiizas Jeuova pik fi joj piipl, an im a-go joj iina di rait wie. (Riid Aizaiya 11:3, 4.) Im a-go luk pan di sitn dem we sumadi du, an ou dem fiil bout di sitn dem we dem du, an di ting dem we dem se, an ou dem chriit di wan dem we get pik fi go a evn. (Mat. 12:36, 37; 25:40) An im a-go nuo di wan dem we did di de fi dem wan de. a Wen wi wok aad iina di priichin wok, dat a wan a di wie we wi shuo se wi di de fi dem. An Jiizas a-go se dem wan de we a bak di wan dem we get pik fi go a evn a “du wa Gad se rait,” an dem a-go get di chaans fi “liv fi eva.” (Mat. 25:46, NWT; Rev. 7:16, 17) Dis a wan nais sitn we dem a-go get kaaz a wa dem du. An kaa dem du di rait sitn dem we dem fi du, wen di wos sofarieshan a gwaan an afta dat, dem niem a-go tan iina “di buk we Gad rait di niem a di piipl dem we a-go liv fi eva an eva.”​—Rev. 20:15.

5. Wa wi lorn fram di tuori bout di shiip dem an di guot dem, an uu fi waahn lorn sopm fram da tuori ya?

⁵ Du tingz we shuo se yu a du wa rait an yu a du di sitn dem we Gad se. Di tuori we Jiizas did tel wi bout di shiip dem an di guot dem, did riili a taak bout di wan dem we a luk faawod fi liv pan di ort fi eva. An wan neda ting we dem kyan du fi shuo se dem a chos iina Gad a wen dem du di ting dem we di wan dem we get pik fi go a evn tel dem fi du. (Mat. 24:45) Bot dem wan de we a go a evn fi stil tek di waanin we da tuori ya a gi kaa Jiizas a luk pan di ting dem we dem du an wa mek dem du dem, an pan di sitn dem we dem se tu. An tuu a di ada tuori dem we Jiizas taak bout we wi a-go luk pan, av tingz iina it fi di wan dem we get pik fi go a evn. An wi kyan fain dem tuori ya a Matyu chapta 25. Mek wi luk pan di tuori bout di yong gyal dem we did waiz an di wan dem we did fu-fuul.

DI YONG GYAL DEM WE DID WAIZ AN DI WAN DEM WE DID FU-FUUL

6. Wa faiv a di yong gyal dem did du fi shuo se dem waiz? (Matyu 25:6-10)

⁶ Iina da tuori ya, Jiizas taak bout ten yong gyal we did go out go miit wan braidgruum. (Mat. 25:1-4) Aal a dem did waahn go a di wedn dina wid im. Jiizas tel wi se faiv a dem did “waiz” an faiv a dem did “fu-fuul”. Di wan dem we did waiz did redi op demself fi wen di braidgruum a-go kom. Aal ef im did kom liet iina di nait, dem wuda redi fi miit im. So dem did av ekschra ail so dat dem kuda ful op bak dem lamp ef wa iina it don. (Riid Matyu 25:6-10.) So wen di braidgruum kom, di wan dem we waiz kuda go a di wedn dina wid im. A siem so di wan dem we get pik fi go a evn a du tingz fi shuo se dem redi an a du wa rait til Jiizas Krais we a di braidgruum kom an se yes dem kyan kom ruul wid im iina im Kindom govament. b (Rev. 7:1-3) Bot wa apm tu di fu-fuul wan dem?

7. A wa did apm tu di faiv fu-fuul gyal dem, an wa mek?

⁷ Di faiv fu-fuul wan dem neehn redi wen di braidgruum kom. Dem lamp did suun out, an dem neehn av no muor  ail fi put iina it. So wen dem ier se di braidgruum suun kom, dem go we fi go bai muor ail. So wen di braidgruum kom, dem neehn di de. So “di wan dem we did redi go wid im wich paat di wedn dina did a kip. Den di sorvant dem lak di duor.” (Mat. 25:10) So afta dem kom bak an waahn fi go iin, di braidgruum tel dem se: “Mi no iivn nuo unu!” (Mat. 25:11, 12) Dem wan ya neehn redi op demself fi wiet fi di braidgruum fi kom. So wa di wan dem we get pik fi go a evn kyan lorn fram aal a dis?

8-9. Wa di wan dem we get pik fi go a evn kyan lorn fram di tuori bout di yong gyal dem? (Luk pan di picha tu.)

⁸ Du tingz fi shuo se yu a redi op yuself fi gwaan sorv Jeuova til da worl ya don. Jiizas neva did a tel wi se a tuu set a piipl get pik fi go a evn​—wan we a-go redi op demself til da worl ya don an wan we naa go redi. Bot im did a tel wi wa a-go apm tu di wan dem we naa go redi op demself fi go chuu tu di en a da worl ya. Im did a mek wi nuo se dem naa go get di sitn dem we dem a luk faawod fi get. (Jan 14:3, 4) So dat mek wi si se no mata ef wi a-go liv iina evn ar pan ort, wi fi tek di waanin we wi get fram di tuori bout di yong gyal dem. Aal a wi fi mek shuor se wi a kip wach an redi op wiself fi go chuu til da worl ya don.​—Mat. 24:13.

⁹ Afta Jiizas tel wi di tuori bout di yong gyal dem we mek wi si se wi fi redi op wiself, im tel wi di tuori bout di man dem we did get di bag a guol fram dem maasta. An da wan ya a-go mek wi si se wi no fi liezi.

DI BAG A GUOL DEM

10. Wa di tuu sorvant dem did du fi shuo se dem a wok aad fi dem maasta? (Matyu 25:19-23)

¹⁰ Iina di tuori bout di bag a guol dem, Jiizas did taak bout tuu sorvant we aalwiez wok aad fi dem maasta an wan neda wan we neva wok aad. (Mat. 25:14-18) Bifuo dem maasta go we, im gi dem som bag a guol we wot wol iip a moni. Kaa di tuu sorvant dem did wok aad fi mek muo moni  pan tap a wa di maasta did gi dem, bai di taim di maasta kom bak dem mek tuu taim di mount a moni we di maasta gi dem. So di maasta big dem op an se: “Kom kom nyam fuud an daans an praans wid mi.” (Riid Matyu 25:19-23.) Bot wa di ada sorvant did du wid di moni we di maasta gi im?

11. Wa did apm tu di sorvant we did ‘woklis an gud fi notn,’ an wa mek?

¹¹ Di neda sorvant we did get di wan bag a guol did ‘woklis an gud fi notn.’ Di maasta did tingk se di sorvant wuda mek muor moni pan im moni. Bot insted-a dat, di sorvant go aid di bag a guol iina di grong. Wen di maasta kom bak, di sorvant neehn av no braata pan im moni fi gi im. An im neehn av notn bout im kaa insted-a fi se sari se im neehn mek no muo moni pan tap a di maasta moni, im se di maasta “a wan aad man.” So di maasta neehn api wid im. An pan tap a dat, di maasta tek we di bag a guol we im did av an fling im outa im ous.​—Mat. 25:24, 26-30.

12. A uu komiin laik di tuu sorvant dem tide we a du wa dem maasta se dem fi du?

¹² Di wan dem we get pik fi go a evn we a du wa Jiizas se dem fi du, a dem komiin laik di tuu sorvant dem we du wa dem maasta se dem fi du. Dem maasta, Jiizas, tel dem se dem fi “kom kom nyam fuud an daans an praans wid [im].” Dat miin tu se afta dem ded an kom bak alaiv, dem a-go get fi liv a evn wid im. (Mat. 25:21, 23; Rev. 20:5b) Bot wa apm tu di woklis an gud fi notn sorvant a wan waanin fi di wan dem we get pik fi liv a evn. Wa mek wi se dat?

13-14. A wa di wan dem we get pik fi go a evn kyan lorn fram di tuori bout di bag a guol dem? (Luk pan di picha tu.)

¹³ Du tingz fi shuo se yu a wok aad. Iina di tuori bout di bag a guol an iina di tuori bout di yong gyal dem, Jiizas neehn de se di wan dem we get pik fi go a evn a-go ton woklis an gud fi notn. Bot im did a mek dem nuo wa wuda apm tu dem ef dem tap wok aad fi Jeuova. Kaa memba se “Gad kaal [dem] fi fala im an im pik  [dem] fi bi fi im piipl dem.” So ef dem no wok aad, dem naa go get fi go iina Gad Kindom we de a evn.​—2 Pii. 1:10.

¹⁴ Jiizas tuori bout di yong gyal dem an di tuori bout di bag a guol dem mek wi si klier klier se di wan dem we get pik fi go a evn afi du tingz fi redi op demself an fi wok aad iina di wok we Gad waahn wi fi du. Bot Jiizas did se muor tingz fi waan di wan dem we get pik fi go a evn. Wa im se a Matyu 24:40, 41 av fi du wid di taim wen im a-go joj di wan dem we a-go get pik fi go a evn tu.

A UU A-GO “GET TEK WE”?

15-16. Ou Matyu 24:40, 41 mek wi si se di wan dem we get pik fi go a evn niid fi gwaan wach an luk out?

¹⁵ Bifuo Jiizas did taak bout di chrii tuori dem, im did taak bout sitn els we av fi du wid di taim wen di wan dem we get pik fi go a evn a-go get joj fi nuo uu an uu Gad riili api wid. Im se tuu man a-go a wok outa bush an tuu uman a-go a grain grien. Aalduo it did luk laik se di tuu a dem a du di siem kain-a wok, Jiizas se wan a-go “get tek we lef di neda wan.” (Riid Matyu 24:40, 41.) Den im tel im falara dem se: “Mek shuor se unu eva a wach an a luk out, kaa unu no nuo a wich die unu Laad a-go kom bak.” (Mat. 24:42) An afta Jiizas tel wi di tuori bout di yong gyal dem, im did se sitn laik dat tu. (Mat. 25:13) So wen im did taak bout dis dem tuu taim ya, it did luk laik se a di siem ting im did a taak bout. Im did a se a onggl di wan dem we get pik fi go a evn we riili a du wa Gad waahn dem fi du, a-go “get tek we,” so dem a-go get fi ruul wid Jiizas iina Gad kindom govament.​—Jan 14:3.

¹⁶ Shuo se yu eva a wach an a luk out. Ef non a di wan dem we get pik fi go a evn no gwaan du wa dem fi du fi jraa kluos tu Jeuova an gwaan kip wach, dem naa go get fi go a evn wid di piipl dem ‘we Gad pik.’ (Mat. 24:31) An it no mata ef wi a-go liv a evn ar wi a-go liv pan di ort, aal a wi fi tek di waanin we Jiizas gi wi fi kip wach an gwaan wok aad fi du wa Gad waahn wi fi du.

17. Wa mek wi no fi mek it bada wi ef Jeuova pik som a di wan dem we a-go liv a evn iina fi wi taim?

¹⁷ Kaa wi get fi nuo Jeuova gud gud, wi nuo se im aalwiez joj piipl iina wan fier wie. So it no chobl wi se Jeuova pik som a di wan dem iina fi wi taim fi go a evn. c Kaa memba Jiizas did tel wi di tuori bout di wokman dem we did staat wok pan di griep faam, we som did staat wok orli iina di maanin an som liet iina di iivnin. (Mat. 20:1-16) Di wan dem we did get kaal fi kom pan di wok lieta iina di die did get di siem pie laik di wan dem we did staat wok orliya. A siem so it no mata wen di wan dem we get pik fi go a evn get pik, aal a dem a get fi go a evn ef dem du wa Jeuova Gad se dem fi du.

LISN TU DI WAANIN DEM WE WI GET

18-19. A wa a som a di sitn dem we wi lorn fram dem tuori ya we wi jos luk pan?

¹⁸ Bies pan wa wi taak bout aredi, wi lorn se di tuori bout di shiip dem an di guot dem kyan elp di wan dem we a luk faawod fi liv fi eva pan di ort fi du wa rait an du wa Jeuova se dem fi du​—nou an iina di taim wen di wos sofarieshan a gwaan. Dem taim de Jiizas a-go joj di wan dem we a du wa rait an gi dem di chaans “fi liv fi eva.”​—Mat. 25:46, NWT.

¹⁹ An wi did luk pan tuu tuori we Jiizas  did taak bout fi waan di wan dem we get pik fi go a evn. Iina di tuori bout di yong gyal dem we did waiz an di wan dem we did fu-fuul, a faiv a dem did shuo se dem waiz. Dem did du tingz fi redi op demself an gwaan wiet pan di braidgruum, an it neehn mata ou lang dem did afi wiet fa. Bot di wan dem we fu-fuul neehn redi op demself. So di braidgruum neva lou dem fi kom wich paat di wedn dina did a kip. A siem so wi afi redi op wiself an wiet fi Jiizas get rid a da wikid worl ya. An it no mata ou lang wi afi wiet fa. An iina di tuori bout di bag a guol dem, wi did luk pan ou di tuu sorvant dem we did du wa dem maasta se dem fi du wok aad fi im. An kaaz a dis im did api wid dem. Bot di maasta neehn waahn fi av notn fi du wid di sorvant we did woklis an gud fi notn. Dis shuo wi se wi fi bizi op wiself a du Jeuova wok til da worl ya don. An den wi did luk pan ou di wan dem we get pik fi go a evn fi shuo se dem eva a wach an a luk out, so dat Jiizas kyan ‘tek dem we’ an gi dem wa dem fi get a evn. Dem wan ya a luk faawod fi “get gyada op” fi miit Jiizas iina evn. Wen Aamagedan don, dem a-go bi Jiizas braid iina di Biebi Shiip wedn we di Baibl taak bout.​—2 Tes. 2:1; Rev. 19:9.

20. A wa Jeuova a-go du fi di wan dem we tek di waanin dem we im gi?

²⁰ Di taim suun kom wen Jiizas a-go joj evribadi, bot wi na’afi fried. Ef wi du wa wi Faada, Jeuova, se wi fi du den im a-go gi wi “di powa” so dat wi “kyan tan op infronta di Man we Gad pik.” (2 Kor. 4:7; Luuk 21:36) It no mata ef wi a-go liv iina evn ar wi a-go liv pan ort, wi a-go mek wi Faada api ef wi tek di waanin dem we iina di tuori dem we Jiizas tel wi. An kaa Jeuova gud an kain tu wi iivn duo wi no dizorv it, im a-go mek shuor se “[wi] niem rait dong iina di buk” we av iin di niem a di piipl dem we a-go get fi liv fi eva.​—Dan. 12:1; Rev. 3:5.