Iina 2022 aal uova di nyuuz, yu did a ier bout waar, an yu did a ier bout ou piipl did a fain it aad fi get wok an a av aal kain-a moni prablem, an evri minit ya’a ier bout wan neda staam ar faiya ar sitn laik dat we a mash op di plies. A onggl di Baibl kyan mek wi andastan wa mek dem ting ya did a gwaan an wa dem riili miin.

Di ting dem we gwaan iina 2022—wa mek dem apm, an wa dem riili miin?

 Di ting dem we gwaan iina 2022 mek wi nuo se wi a liv iina di taim we di Baibl kaal “di laas die dem.” (2 Timoti 3:1) A iina 1914 di laas die dem did staat. Di Baibl tel wi bout tingz we wudaana gwaan iina fi wi taim an a di sed ting dem wi si a gwaan ya nou. Mek wi luk pan som a dem:

 “Waar.”​—Matyu 24:6.

•   “Iina 2022 Di Wikid Sitn We Niem Waar Did Staat Op Bak Iina Yuurop.” a

 “Fuud a-go shaat.”​—Matyu 24:7.

•   “2022: Wan Ier Wen Uol Iip A Piipl Did A Staav.” b

 “Aal kain-a siknis a-go kil aaf piipl.”​—Luuk 21:11.

•   “Di siknis we dem kaal puoliyo did kom bak, mongkipaks staat op, an KUOVID did stil a kil aaf piipl. Aal a dis mek wi si se it stil iizi iizi fi piipl kech aal kain-a siknis fram dem wan aneda we kyan kil dem aaf.” c

 ‘Som torbl sitn we mek piipl fried.’​—Luuk 21:11.

•   “Uol iip a piipl a-go memba se iina di Soma paat a 2022, uol iip a tingz did gwaan wid di weda we neehn naamal at aal. Laik som iit we neehn naamal, taim wen no rien neehn a faal iina som plies, taim wen tu moch rien a faal iina som plies, an iina som ada plies som torbl torbl faiya did a bon dong di plies. An dem ting de kil aaf nof nof piipl an mek nof nof muor piipl afi muuv we fram wich paat dem liv.” d

 “Govament get ton uova.”​—Luuk 21:9.

•   “Iina 2022 uol iip a piipl get beks bad an did a blak ruod an a demanschriet gens govament iina difrant difrant konchri kaaz a ou tingz a get aad an ou di sitn dem we dem niid fi liv a get diera an diera. Piipl did a fait fi jostis bifuo bot it ton op iina 2022.” e

So wa a-go gwaan neks ier?

 Wel nobadi kyaahn go tel yu egzakli wa a-go gwaan iina 2023. Bot wa wi nuo a dat suun suun Gad Kindom, dat a Gad govament we de a evn, a-go saat out aal a di prablem dem we a gwaan iina da worl ya. (Daniyel 2:44) Bot Gad govament naa go jos get rid a di prablem dem we mek piipl sofa, it a-go get rid a aal a we a kaaz dem prablem de tu an it a-go mek shuor se wa Gad waahn fi apm pan ort apm.​—Matyu 6:9, 10.

 So wi a beg unu fi du wa Jiizas se aal a wi fi du an gwaan “kip wach” an yu a-go si ou di sitn dem we di Baibl se wuda apm, a dem a apm fi chuu. (Maak 13:37) Lingk wi ef yu waahn nuo muor bout ou di Baibl kyan elp yu ya nou an ou it kyan elp yu an yu fambili fi av sitn gud fi luk faawod tu fi di fyuucha.