Wen wi a tingk bout wa wi waahn fi apm iina 2023, aal a wi waahn som gud tingz fi gwaan fi wi an wi fambili dem. Wa mek wi kyan nuo fi shuor se wi av som gud tingz we wi kyan luk faawod tu?

 Di Baibl mek wi nuo se aal a di prablem dem we wi av rait ya nou dem suun saat out. Di Baibl tel wi se “evriting we rait dong iina Gad Wod rait dong fi. . . elp push wi fi tan op chrang an no gi op so dat wi kyan gwaan luk fi get di sitn dem we Gad pramis wi.”—Ruoman 15:4.

•   Fi fain out muor bout di gud sitn dem we di Baibl se wi a-go get, riid dis: “A Real Hope for a Better Tomorrow.”

 Wen wi tingk bout di gud sitn dem we di Baibl se a-go apm, it kyan elp wi fi ‘tan todi jos laik wen di angka fi di ship jrap a di batam a di sii so di ship tan wan plies.’ (Iibruu 6:19) So wen wi tingk bout di gud sitn dem we a-go apm, it kyan elp wi fi diil wid di prablem dem we wi av rait ya nou, an it kyan elp wi fi luk pan tingz iina wan gud wie an dat kyan mek wi api nou an fi eva. Si som sitn ya we shuo wi ou di Baibl kyan elp wi ya nou:

•   Fain out ou di gud sitn dem we di Baibl se a-go apm did elp wan man we yuus tu jringk nof lika til im jongk. Wach da vidiyo ya Mi Did Taiyad A Di Wie Ou Mi Did A Liv.

•   Fain out ou di gud sitn dem we di Baibl se a-go apm kyan elp wi wen sumadi fi wi ded. Wach da vidiyo ya Sitn Fi Osh Di Wan Dem We Sumadi Fi Dem Ded.

 Uol iip a piipl waahn gud tingz fi apm iina dem laif, bot dem kyaahn put dem pat pan faiya fi non a dem sitn de. Bot wen it kom aan tu di gud sitn dem we di Baibl se a-go apm, wi kyan nuo fi shuor se dem gweehn apm fi chuu. Wa mek? Wi nuo dat kaa aal a di gud sitn dem we di Baibl se a-go apm, a Jeuova Gad a tel wi se dem a-go apm an Gad “no lai.” (Taitos 1:2) Jeuova a di onggl wan we kyan du aal a di sitn dem we im se im a-go du fi chuu kaaz im kyan du “evriting we im waahn fi du.”—Saam 135:5, 6.

 Wi wel waahn yu fi nuo bout di gud sitn dem we di Baibl se a-go apm kaaz wi nuo se it kyan elp yu. Wen yu “luk aad aad iina Gad Wod,” it kyan elp yu fi nuo fi shuor se di gud sitn dem we it se a-go apm a-go apm fi chuu. (Aks 17:11) So yu kyan go chek out da Baibl stodi ya we sumadi a-go elp yu fi du. Ye man, yu kyan av sitn gud fi luk faawod tu iina 2023!