Iina 2022, a 2.24 chriliyan U.S. dala di govament dem spen pan dem aami dem. A di fos it eva riich de-so, an nof a da moni de spen kaaz a di waar we a gwaan wid Rosha an Yuukrien. Dis a wa di Stockholm International Peace Research Institute (SIPRI) did se iina wan ripuot we did kom out iina Iepril 2023 bout wa did gwaan iina 2022:

•   Fi da ier de, di mount a moni we dem spen pan di aami dem iina Yuurop “did gu op bai 13 porsent. A di fos ier dis sins 1991 it a gu op bai so moch.”

•   “Outa aal a di konchri dem we spen di muos pan dem aami dem iina di worl, Rosha did de a nomba faiv. Nou dem muuv tu nomba chrii kaa di amount we dem spen did gu op bai bout ten porsent.”

•   Outa aal a di konchri dem, Merika did a spen di muos pan aami. Dem “spen nieli aaf a wa spen iina di uol worl.”

 Dakta Nan Tian, uu elp rait di SIPRI ripuot, se: “Di wie ou di govament dem a spen muo an muo pan dem aami dem iina dem taim ya a shuo wi se tingz iina di worl a get outa kanchuol.”

 Lang bifuo it apm, di Baibl mek wi nuo se di govament dem wid di muos powa wuda iina bie ron gens ting wid dem wan aneda an dem wuda iina uol iip a faitin-faitin wid dem wan aneda tu, an it shuo wi wa a di onggl ting we a-go gi wi riil piis.

•   Di Baibl tel wi se wi a liv iina di “taim wen di en de nier.”—Daniyel 8:19.

•   Iina di buk a Daniyel, it mek wi nuo se di taim wuda kom wen di govament dem wid di muos powa wuda iina wan ron gens ting fi pruuv a wich wan a dem a di badis. Kaa dem a “fait wid” dem wan aneda, dem wuda afi spen uol iip a moni a bil op dem aami dem.​—Daniyel 11:40, 42, 43.

 Fi lorn muo bout dis, wach da vidiyo ya we niem Tingz We Di Baibl Se A-Go Apm We Apm Fi Chuu—Daniyel Chapta 11.

•   Di Baibl mek wi nuo se Gad a-go get rid a dem govament ya. Im “a-go set op fi’im King fi ruul fi’im govament we naa go eva mash op. An nobadi naa go eva tek uova da govament de. An da govament de a-go don aal a di ada govament dem, an it wan gweehn ruul fi eva.”​—Daniyel 2:44.

•   Di govament dem kyaahn bring riil piis, a onggl Jeuova a Gad kyan du dat. A ou im a-go dwi’it? Suun suun, im a-go yuuz fi’im govament we de a evn fi get rid a aal a di sitn dem we dem yuuz fi fait waar, an im a-go get rid a waar tu.​—Saam 46:​8, 9.

 Ef yu waahn lorn muo bout wa Gad Kindom govament a-go du, riid dis: “Under God’s Kingdom ‘Peace Will Abound.’”