Pan Mie 23, 2023, wan tap-a-tap dakta iina Merika se di wie ou di yong piipl dem a yuuz di ap dem we dem yuuz fi chat tu piipl an kip op wid wa ada piipl a du a kaaz uol iip a prablem fi dem yuut de.

•   “Iivn duo dem ap ya av som gud tingz bout dem we kyan elp di pikni dem an di tiinieja dem, dem sed ap ya a schres dem out an a mek dem sad bad an naa tingk chriet.”​—Social Media and Youth Mental Health: The U.S. Surgeon General’s Advisory, 2023.

 Si som muo tingz ya we did kom op we mek dem si se dis a wan big prablem.

•   Fi di yong piipl dem we a 12 ier uol tu 15 ier uol “we spen muo dan 3 owa evridie pan dem ap de, it iiziya fi dem wori wori op demself, get sad bad an aal get aaf tu.”

•   Dem fain se som a di wan dem we a 14 ier uol, “ef dem spen uol iip muor taim a yuuz dem ap de, piipl bada-bada dem wen dem de panlain, dem no get nof sliip, dem no fiil laik dem luk gud, dem no fiil laik dem wot notn, an aal a dem ting ya a apm wid di gyal pikni dem muo dan di bwai dem.”

 Wa di mada an di faada dem kyan du fi protek dem pikni dem fram dem ting ya? Di Baibl tel wi som tingz we ef dem du dem, it wi wok.

 A yu afi disaid. A unu fi luk pan tingz an mek unu pikni nuo ef unu a-go mek dem yuuz dem ap ya ar ef yu naa go mek dem yuuz dem.

•   Dis a wa di Baibl se: “Tiich wan pikni fram im yong ou fi du di rait ting.”​—Pravorbz 22:6.

•   Fi fain out muor bout dis, riid dis: “Should My Child Use Social Media?”

 Ef yu disaid fi mek yu pikni dem yuuz di ap dem we dem yuuz fi chat tu piipl an kip op wid wa ada piipl a du, yu fi fain out di prablem dem we it kyan kaaz an mek shuor se yu nuo wa a gwaan wen yu pikni dem a yuuz dem ap ya. Ou yu kyan du dat?

 Kip yu pikni dem sief fram eniting we a-go korop dem main. Taak tu yu pikni dem an mek dem nuo ou dem kyan disaid ef sitn gud ar bad wen dem si ar ier it, an shuo dem ou fi kip faar fram di bad sitn dem.

•   Dis a wa di Baibl se: “Non a unu no fi get miks op iina naasi laif laik: man a sliip wid uman we a no im waif, man a sliip wid man, ar uman wid uman. Unu no fi waahnti-waahnti niida. Dem de sitn de no fi de mongks Gad piipl at aal at aal. No yuuz doti wod, an no bada wid aigl, kielis an fuul-fuul taak.”​—Ifiijan 5:3, 4.

•   Fi lorn bout som muor tingz we ef unu du dem, dem kyan elp unu, riid dis: “Teaching Your Teenager Social Media Safety.”

 No mek dem spen tu moch taim pan dem ap de. Unu fi disaid wen unu pikni dem kyan go pan dem ap de an umoch taim dem kyan spen pan dem.

•   Dis a wa di Baibl se: “Wach ou unu liv. . . . Ak laik se unu av sens. Evri chaans unu get fi du sopm gud, du it.”​—Ifiijan 5:15, 16.

•   Wach di waitbuod kaatuun we niem Yu Fi Nuo Wa Yu A Du Wen Yu A Diil Wid Piipl Panlain fi elp yu pikni andastan wa mek dem no fi spen tu moch taim pan dem ap de.