A no no mongki moni dem a spen pan waar.

•   “A $2.2 chriliyan spen siek-a aal a di waar dem we a gwaan aal uova di worl.”—The Washington Post, Febiweri 13, 2024.

 A no dis moni dem a luuz iina waar. Dem a luuz wol iip muo sitn. Laik tingk bout wa gwaan iina di waar a Yuukrien.

•   Di suoja dem. Fram di waar staat tuu ier ago, dem se a bout 500,000 suoja ded ar get ort iina di waar.

•   Di ada piipl dem we naa fait iina di waar. Di Yuunaitid Nieshan se a muo dan 28,000 piipl we naa fait iina di waar en op ded ar get ort kaaz a wa a gwaan. An wan a di big man dem iina di UN se: “Nobadi no nuo di aaf a wa dem piipl de afi de go chuu siek-a di waar.” a

 A no likl sofa piipl sofa siek-a aal a di faitin-faitin an di waar dem we a gwaan aal uova di worl.

•   114 miliyan. Dat a umoch piipl afi ron we lef dem yaad siek-a waar an dem ting de aal uova di worl. A da nomba de dem get op tu Septemba 2023.

•   783 miliyan. Dat a umoch piipl a ded fi onggri aal uova di worl. “Di mien riizn wa mek so moch piipl na’av inof fuud fi nyam a kaaz a di iip a waar dem we a gwaan. Outa evri 10 sumadi we no av inof fuud fi nyam, 7 a dem liv iina wan ieriya we a bie waar an dem ting de a gwaan.”—World Food Programme.

 Yu tingk wan taim a-go eva kom wen wi no av no waar agen? Yu tingk wi kyan luk faawod tu wan taim wen evribadi a liv iina piis? Yu fiil se wan taim a-go kom wen evribadi a-go kyan av wa dem niid fi tek kier a demself an dem fambili? Wa di Baibl av fi se bout dis?

 Wen di Baibl did a taak bout di wol iip a waar dem we wudaana gwaan iina fi wi taim, it taak bout it laik se it de pan wan aas a raid.

•   “Den mi si wan sekan aas kom out, red laik faiya. Di sumadi we did a raid im did get powa fi mek di piipl dem pan ort ton gens dem wan aneda an kil aaf dem wan aneda iina waar. Im did get wan big suod tu.”—Revilieshan 6:4.

 Afta dat, it se tuu ada sumadi we de pan aas did de baka da wan de. Wan a dem av fi du wid staavieshan an di neda wan av fi du wid siknis we a kil aaf piipl. (Revilieshan 6:5-8) Fi fain out muo bout dis an wa mek wi shuor se dem sitn ya a gwaan ya nou, riid dis: “The Four Horsemen—Who Are They?”

 Likl fram dis, piipl naa go a yuuz di ting dem pan ort fi fait waar. Bot a no piipl a-go mek dat apm. Di Baibl se:

•   Gad “a-go tap di waar dem we a gwaan aal uova di ort.”—Saam 46:9.

•   Gad a-go mek tingz beta fi di piipl dem we sofa kaaz a waar. “Gad a-go waip dem fies an jrai op aal a dem yai-waata. Nobadi naa go ded agen, so nobadi naa go ala ar baal. An nobadi naa go fiil no pien, kaaz dem uol taim sitn de don we wid.”—Revilieshan 21:4.

•   Gad a-go mek shuor se evribadi a liv iina piis. “Fi mi piipl a-go get fi liv iina piis iina dem uona plies an nobadi naa go kyan ron dem we fram de; dem a-go fiil sief wen dem iina dem ous an dem naa go av notn roun dem fi mek dem fiil fried.”—Aizaiya 32:18.

 Bies pan wa di Baibl se, aal a di waar dem an ada sitn dem we wi si a gwaan ya nou a mek wi si se di taim wen evribadi a-go liv iina piis suun kom.

 Gad a-go yuuz im Kindom govament we de a evn fi du dis. (Matyu 6:10) Fi fain out muo bout wa da Kindom ya bi an ou it kyan elp yu, wach da likl vidiyo ya we niem Di Kindom A Gad—A Wa?