KIP WACH!
Di Saiyantis Dem Spiid Op Di Taim Pan Di Sitn We Dem Kaal ‘Doomsday Clock’—Wa Di Baibl Av Fi Se Bout Dis?
Yu si di sitn we dem kaal di ‘Doomsday Clock,’ a di saiyantis dem muuv di taim pan it niera tu midnait pan Janiweri 24, 2023. Dat miin se dem tingk se di en a di worl get niera.
“Di ‘Doomsday Clock’ komiin laik wan waanin tu piipl, an pan Chuuzde dem muuv di taim pan it niera op tu midnait. Dis a kaaz a tingz laik di waar we a gwaan iina Yuukrien, an kaa piipl fried se nyuuklier waar mait brok out, an kaaz a aal a di prablem dem wid di weda.”—AFP International Text Wire.
“Pan Chuuzde, di saiyantis dem se dem muuv op di taim pan di klak tu bout minit an a aaf bifuo midnait. Dat miin se dis a di fos wi a kom so kluos tu Aamagedan.”—ABC News.
“Wan gruup a saiyantis fram aal uova di worl gi waanin se it luk laik a nou tingz kuda apm we kyan kaaz evribadi pan di ort fi dis ded aaf so.”—The Guardian.
Yu tingk wan taim a-go kom wen di ort an di piipl dem pan it an evriting els naa go de bout agen? Yu tingk wi afi fried se notn laik dat a-go apm iina di fyuucha? Wa di Baibl av fi se bout dis?
Wa riili a-go apm iina di fyuucha?
Di Baibl mek wi nuo se ‘di ort a-go de ya fi eva’ an it mek wi nuo tu se piipl a-go de pan di ort an “liv pan it fi eva.” (Iikliiziyastiiz 1:4; Saam 37:29) So piipl naa go get fi mash op di ort ar du notn tu it so dat nobadi kyaahn liv pan it.
Di Baibl tel wi se sitn a-go don we wid duo. It se “di worl an aal a di wikid sitn dem iina it a go we.”—1 Jan 2:17.
Ef yu waahn fi nuo wa di Baibl miin wen it se di worl a go we, riid dis: “Is the World Coming to an End? What Is the Apocalypse?”
Ef yu waahn fi nuo wa di Baibl av fi se bout wen sortn tingz a-go apm, riid dis: “When Will the World End?”
Tingz a-go get beta
Wid aal a di prablem dem we a gwaan roun wi, wi kyan stil luk fi tingz get beta. Wa kyan elp wi fi du dat?
Di Baibl tel wi wa fi du we kyan elp wi fi gwaan luk fi tingz get beta. (2 Timoti 3:16, 17) Fi si wan a di ting dem we di Baibl taak bout, riid dis: “How to Control Worry.” An dis a-go mek yu si ou di Baibl kyan elp yu fi no gi op wen yu a diil wid yu prablem dem.
Di Baibl mek wi nuo se wi kyan gwaan luk fi get di sitn dem we Gad pramis wi. (Ruoman 15:4) It mek wi nuo wa a som a di sitn dem we wi kyan luk fi si apm nou an iina di fyuucha so dat wi no afi fret an wori wori op wiself wen wi si sortn tingz a gwaan roun wi.
Wi wuda laik yu fi chrai out wi frii Baibl stodi we sumadi wi elp yu wid so dat yu kyan get fi si ou di Baibl kyan riili elp yu.
a “Di ‘Doomsday Clock’ a no wan riil klak. A sitn we di saiyantis dem kom op wid fi mek wi andastan se wi a du tingz we a kyari wi go niera an niera tu wan taim we wi en op a mash op di ort an evriting we liv pan it. It supuos tu elp piipl memba se dem fi diil wid di prablem dem we dem a kaaz ef dem no waahn dat fi apm.”—Bulletin of the Atomic Scientists.
You May Also Like
ESSENTIAL BIBLE TEACHINGS
Wa Mek Gad Lou Iivl An Sofarin Fi A Gwaan?
Uol iip a piipl aalwiez a aks wa mek so moch iivl an sofarin a gwaan. Di ansa we di Baibl gi kyan elp wi fi nuo wa mek dat a gwaan, an it kyan elp wi fi fiil beta.
ESSENTIAL BIBLE TEACHINGS
Wa Mek Gad Mek Di Ort?
Uol iip a priti tingz de pan di ort. It de a di rait distant fram di son, it set pan wan anggl, an it naa spin tuu faas ar tuu sluo. Wa mek Gad did work so aad fi mek di ort so nais?
BOUT WI
Aks Fi Wan Vizit Fram Di Jeuova Witnis Dem
Yu kyan get fi taak bout wan a di kwestiyan we di Baibl gi wi ansa fa, ar yu kyan lorn muor tingz bout di Jeuova Witnis dem.
