Pan Mie 19, 2022, 75 tap piipl fram aal uova di worl did mek di Yuunaitid Nieshan Sikyorti Kounsil nuo se “siek-a KUOVID an jrout an dem ting de, nof piipl a fain it aad aredi fi fain fuud fi nyam, bot nou siek-a di waar we a gwaan a Yuukrien, tingz get wosara an uol iip muor piipl bout fi ded fi onggri kaaz dem kyaahn fain no fuud fi nyam.” Likl afta dat, wan magaziin we niem The Economist se: “Dis ya worl ya did don iina wan bag a prablem aredi, an da waar ya jos a-go mek it aada an aada fi uol iip muor piipl fain fuud fi nyam.” Di Baibl did mek wi nuo se iina dem taim ya fuud wuda shaat bot muor dan dat, it mek wi nuo tingz we kyan elp wi fi diil wid dem sitn ya.

•    Jiizas did se: “Wan set a piipl a-go waar gens wan neks set a piipl, an kindom a-go fait gens kindom. Fuud a-go shaat iina nof nof plies an uol iip a piipl a-go staav.”—Matyu 24:7.

•    Iina Revilieshan di Baibl tel wi bout fuo man we a raid aas. Wan a dem man de we de pan di aas tan fi di waar dem we a gwaan iina di worl. Di wan we kom afta im tan fi staavieshan kaaz fuud wuda shaat an piipl kyaahn go bai it kaaz a ou di fuud prais dem ai. “Mi si wan blak aas! Di wan we sidong pan it av wan skiel iina im an. Den mi ier sopm laik wan vais . . . a se, ‘Wan poun a biekin flowa a-go kaas wan uol die pie, an siks poun a kounta flowa a-go kaas wan uol die pie.’”—Revilieshan 6:5, 6.

 Dem sitn ya we di Baibl taak bout a dem wi si a gwaan rait ya nou kaa wi de iina di taim we di Baibl kaal “di laas die dem.” (2 Timoti 3:1) Fi fain out muor bout “di laas die dem” an di fuo man we a raid aas we Revilieshan taak bout, wach di vidiyo we niem Fram 1914 Til Nou, Di Worl A No Di Siem an riid dis: “The Four Horsemen—Who Are They?”

•    Di Baibl av uol iip a sitn iina it we kyan elp wi fi diil wid di prablem dem we wi av iina laif laik wen fuud a get tuu dier ar it shaat. Riid dis fi si som sitn we kyan elp yu fi diil wid dis: “How to Live on Less.”

•    Di Baibl mek wi nuo fi shuor se beta mos kom. It tel wi bout wan taim wen “uol iip a fuud a-go de pan di ort” an evribadi a-go av nof fuud fi iit. (Saam 72:16) Fi fain out muor bout di gud sitn dem we di Baibl se a-go apm iina di fyuucha an wa mek yu kyan nuo fi shuor se dem sitn de a-go apm, riid dis: “A Real Hope for a Better Tomorrow.”