Janiweri 27, 2023 a di die we dem kaal ‘International Holocaust Remembrance Day.’ Wen di sitn we niem di ‘Holocaust’ did gwaan muor dan 75 ier ago, a uol iip a wikidnis did gwaan, a uol iip a piipl sofa, an dis mek som piipl wanda wa mek Gad did lou sitn laik dis fi gwaan.

•   Fi fain out wa di Baibl av fi se bout dat, riid dis: “Why Did the Holocaust Happen? Why Didn’t God Stop It?”

 A di Juu piipl dem did sofa di muos wen di ‘Holocaust’ did gwaan. Dem plan op an morda aaf kopl miliyan a di Juu dem wel. An yu av som ada gruup a piipl, laik di Jeuova Witnis dem, we dem luk fa an aal chrai kil aaf som a dem tu. Dem did mek di Jeuova Witnis dem sofa jos kaa di Witnis dem did a stik tu wa dem lorn fram di Baibl.

•   Fi lorn muor bout dat, riid dis: “What Happened to Jehovah’s Witnesses During the Time of the Holocaust?”

 Yu tingk sitn laik di ‘Holocaust’ mait apm agen? A dat som piipl fried se mait gwaan. Bot di Baibl mek wi nuo se wan taim a-go kom wen wi na’afi fried at aal se sitn laik dat mait apm agen.

•   “Jeuova se, ‘Mi nuo wa mi waahn fi gwaan fu’unu. Mi no waahn unu fi av no chobl—nuo sa, mi waahn unu fi av piis iina unu laif. Mi waahn fi mek unu nuo se tingz a-go get beta fi unu.’”—Jerimaiya 29:11. a

 Dis a-go gwaan wen Jeuova Gad get rid a wikidnis an fiks bak evriting. Dis a wa im a-go du likl fram dis:

•   Im a-go get rid a aal a di wikid piipl dem we a du tingz fi ort ada piipl.—Pravorbz 2:22.

•   Aal a uu a sofa nou kaaz a wikidnis we dem did go chuu, im a-go gi dem piis iina dem aat an main.—Revilieshan 21:4.

•   Di wan dem we ded, im a-go mek dem kom bak alaiv rait pan di ort ya.—Jan 5:28, 29.

 Yu kyan chos aal a Gad pramis dem we im mek gi wi we wi riid bout iina di Baibl. Fi si wa mek, wi waahn yu fi chrai out wi frii Baibl stodi we sumadi wi elp yu wid.