Wen yu luuz yu wok, it kyan schres yu out bad. Kaaz a no onggl se yu mait no av no moni fi spen, bot it put aal kain-a presha pan di fambili tu. Si som tingz ya we de iina di Baibl we kyan elp yu fi diil wid dis, an wa di Baibl se wok fi chuu.

•   Taak tu ada piipl bout ou yu a fiil.

   Dis a wa di Baibl se: “Wan chuu fren shuo lov aal di taim.”—Pravorbz 17:17.

   Wen yu luuz yu wok, it kyan mek yu fiil beks ar sad bad. Yu mait-a no nuo wa fi du ar yu mait-a aal staat fiil laik se yu woklis. Bot ef yu taak tu yu fambili ar yu gud fren dem bout ou yu a fiil, dem kyan elp yu fi staat fiil beta. An dem mait-a kyan tel yu tingz we yu kyan du wen yu a chrai fi get bak wan neda wok.

•   Chrai no fi wori wori op yuself tu moch.

   Dis a wa di Baibl se: “No bada wori an fret bout tumaro; tumaro wi tek kier a itself.”—Matyu 6:34.

   Di Baibl tel wi se wi fi mek shuor se wi plan gud bifuo wi du sitn. (Pravorbz 21:5) Bot it tel wi se wi no fi a fret an a wori wori op wiself bout tingz we a-go apm. Nof a di taim, wi wori wori op wiself bout tingz we no en op a apm. So jos tek wan die at a taim.

   Di Baibl tel wi som ada tingz we wi kyan du ef wi fiil schres out. Fi fain out muor bout dis, riid dis: “How to Deal With Stress.”

•   Chienj op di wie ou yu a spen yu moni.

   Dis a wa di Baibl se: “Mi lorn ou fi satisfai . . . weda mi av nof ar mi no av notn.”—Filipiyan 4:12.

   No eng yu at aiya dan yu kyan riich it. Dis miin se bies pan ou yu pakit tan ya nou, yu afi go chienj op ou yu du tingz. An ef yu no afi baro no moni, no dwi’it.—Pravorbz 22:7.

   Fi lorn bout som ada tingz we yu kyan du fi nuo ou fi chienj op ou yu a spen yu moni nou, riid dis: “How to Live on Less.”

•   No wies yu taim.

   Dis a wa di Baibl se: “Unu fi gwaan laik se unu av sens . . . . No wies no taim, evri chaans unu get unu fi du dat.”—Koloshan 4:5.

   Miebi yu a spen muor taim a yu yaad ya nou. Bot yu fi lain op tingz so dat yu av a set taim fi du sortn tingz evridie. Wen yu du dat it a-go elp yu so dat yu no fiil woklis an yu naa go fiil laik se yu no av no kanchuol uova yu laif.

•   Yu fi redi fi chienj ou yu du tingz an ou yu luk pan tingz.

   Dis a wa di Baibl se: “No fried fi wok aad, kaa sitn gud aalwiez kom fram dat.”—Pravorbz 14:23.

   No fried fi tek aan ada wok we difrant fram di kain-a wok we yu did a du. Di wok we yu kyan get ya nou, miebi a sitn we piipl no tingk impuotant ar dem mait-a luk dong pan it, ar it guda aal pie les tu.

•   No gi op.

   Dis a wa di Baibl se: “Plaant yu siid dem iina di maanin an no mek yu an res so til iina di iivnin; kaa yu no nuo wich wan a dem a-go gruo.”—Iikliiziyastiiz 11:6.

   Gwaan luk fi wok. No fried fi mek piipl nuo se yu a luk wok. Tel yu fambili, piipl we yu nuo, piipl we yu yuus tu wok wid, aal yu nieba dem tu. Chek di plies dem iina yu ieriya we di de fi mek yu nuo wich paat yu kyan fain wok fi du. Yu kyan luk iina di nyuuzpiepa, an yu kyan luk panlain tu. Bot memba se yu mait-a afi go a kopl intavyuu wel an sen out nof rezamie tu fi shuo umoch skuulin yu get ar di kain-a wok dem we yu du aredi.