Uol iip a rien a faal an a flod out uol iip a piipl aal uova di worl. Luk pan wa dem av fi se bout dis:

•   “A muo dan 140 ier nou so moch rien no faal iina di kyapital a Chaina. . . . Wen dem meja umoch rien faal fram Satde tu Wenzde, dem get 29.3 inch a waata.”​—AP News, Aagos 2, 2023.

•   “Wan big staam we niem Khanun did lik di sout paat a Japan an bai di sekan die a di staam, dat a Torzde, kaaz a di mount a rien we faal an briiz we bluo, at liis tuu piipl en op ded. . . . Bai di taim di staam fi don, di mount a rien we faal iina di migl paat a Taiwan we di mountn dem de a-go meja bout 2 fut a waata.”​—Deutsche Welle, Aagos 3, 2023.

•   “Di rien we did flod out di plies iina Nuova Skuosha pan di wiiken a did di eviyis rien eva faal iina da paat a Kyanada de fi bout 50 ier nou.”​—BBC News, Julai 24, 2023.

 Wa di Baibl av fi se bout dem sitn ya?

 Wi a liv iina wan taim we di Baibl kaal “di laas die dem.” (2 Timoti 3:1) Jiizas did mek wi nuo se iina dem taim ya, ‘som torbl sitn a-go kom an piipl a-go fried.’ (Luuk 21:11) Wi a-go si muo a dem ting ya a apm kaaz a ou tingz a chienj op chienj op wid di weda, an somtaim it mait-a apm wen wi no ekspek it fi apm.

 Di Baibl mek wi nuo se wen wi si aal a dem torbl sitn ya a apm, it miin se tingz suun get beta. Wa mek wi se so? Kaa Jiizas did se: “Enitaim unu si se aal dem sitn de a apm, unu nuo se Gad kindom suun kom.”​—Luuk 21:31; Matyu 24:3.

 Dem ting ya we a apm mek wi nuo se suun suun Gad Kindom govament a-go saat out aal a di ting dem we a gwaan wid di weda.​—Juob 36:27, 28; Saam 107:29.

 Fi fain out muo bout ou Gad Kindom govament a-go fiks bak evriting pan di ort, riid dis: “Who Will Save the Earth?”