Fi di Olimpiks we a gwaan iina di soma fi 2024, dem ekspek se a bout faiv biliyan piipl a-go a wach piipl fram 206 difrant difrant konchri a tek paat iina di difrant difrant spuots dem we a-go gwaan. Thomas Bach, di prezident fi di Intanashinal Olimpik Komitii did se, “Olimpiks mek piipl fram aal uova di worl kom tugeda an liv iina piis. An wi fi api bout dis, kaa iivn duo wi difrant fram wi wan aneda, dis mek wi kyan kom tugeda az wan.”

 Bot yu tingk Olimpiks kyan riili du aal a dis? Yu tingk wan taim a-go kom wen evribadi a-go a liv iina piis wid dem wan aneda?

 A no dis spuots Olimpiks mek piipl taak bout. It mek dem a taak bout tingz laik ou piipl naa chriit dem wan aneda fier siek-a we dem kom fram ar siek-a wa dem biliiv iina an dem ting de. An dem a taak bout tingz we a gwaan iina govament tu we mek it aad fi piipl kom tugeda az wan.

 Piipl lov fi wach Olimpiks an dem ting de fi enjai demself. Bot wa wi si a dat dem ting ya kyan push piipl fi tingk an fi du tingz iina wan wie we muo fi plit plit op piipl dan fi mek dem kom tugeda an liv iina piis.

 Di Baibl mek wi nuo bout som a di wiez dem we piipl wuda av nowadiez we wuda mek it aada fi dem kom tugeda an liv iina piis. (2 Timoti 3:1-5) Fi lorn muor bout wa di Baibl did se, riid dis: “Did the Bible Predict the Way People Think and Act Today?”

 Di Baibl mek wi nuo se wan taim a-go kom wen evribadi a-go a liv iina piis wid dem wan aneda. It tel wi bout wan Govament we de a evn, dat a “Gad Kindom,” an wen it a ruul uova di ort, evribadi a-go kom tugeda az wan.—Luuk 4:43; Matyu 6:10.

 A Jiizas Krais a di King fi da Kindom Govament de an a im a-go mek shuor se piis de evriwe. Di Baibl se:

•   ‘Di piipl we du wa Gad se rait a-go get nofa an nofa an dem gweehn get nof blesn tu an piis a-go de evriwe an naa go en.’—Saam 72:7.

•   “Di puor piipl we a baal out fi elp im a-go siev dem . . . Im a-go siev dem fram wikid piipl uu a mek dem sofa an uu a chrai fi ort dem.”—Saam 72:12, 14.

 Bot a no jos iina di fyuucha dem ting ya a-go apm. Rait ya nou, di sitn dem we Jiizas tiich a elp uol iip a piipl we liv iina 239 difrant difrant konchri. Di Jeuova Witnis dem aal uova di worl a du di sitn dem we Jiizas tiich an dem a chrai aad fi liv iina piis wid piipl. Fi fain out ou dis a apm, chek out da Wachtowa ya we niem “Breaking the Cycle of Hatred.”