Iina uol iip a konchri aal uova di worl, palitiks a kaaz piipl fi fait gens dem wan aneda. Iina 2022, wan ripuot we kom fram Pew Research Center shuo se “iina 19 konchri we dem stodi, likl muo dan aaf a di man an uman dem se iina dem konchri, wen it kom aan tu palitiks piipl fram wan paati kyaahn grii wid piipl we sopuot wan neda paati.”

 Iina fi yu ieriya we yu liv, yu si se a di siem ting a gwaan wid ou palitiks a mek piipl ton gens dem wan aneda, an dat it a get wos an wosara? Wa mek yu tingk dat a apm? Yu tingk it a-go eva tap wan die? Mek wi luk pan wa di Baibl av fi se bout dis.

 Di Baibl did taak bout fi wi taim an kaal it “di laas die dem,” an it se nof piipl neehn a-go kyan wok tugeda az wan siek-a som waar-buot wiez we dem wuda av.

•   “Iina di laas die dem tingz a-go get aad aad. Piipl onggl a-go bizniz wid demself an dem a-go . . . taak bad bout dem wan aneda tu.”​—2 Timoti 3:1-3.

 Iina di difrant difrant govament dem, yu av piipl we a wok aad fi mek tingz beta, bot di govament dem stil kyaahn du aal a wa dem wuda laik fi du. Wan set a piipl waahn du tingz wan wie difrant fram wan neda set a piipl we waahn du tingz wan neda wie an kaaz a dat, dem kyaahn wok tugeda az wan fi salv di prablem dem. An dis jos pruuv sitn we di Baibl did se lang bifuo fi wi taim.

•   “Piipl onggl a chrai fi kanchuol ada piipl an en op a du som wikid sitn tu dem.”​—Iikliiziyastiiz 8:9.

 Bot di Baibl tel wi ou da prablem ya a-go saat out. It tel wi bout wan govament wid wan ruula we a-go get rid a aal a di prablem dem we piipl av ya nou.

 Di Baibl tel wi bout wan liida uu a di onggl wan we kyan fiks di prablem dem we wi av ya nou​—dat a Jiizas Krais. Jiizas av di powa, an im av Gad bakitiv tu. Plos, im waahn fi si evribadi a liv iina piis an a wok tugeda az wan.

•   “Wen im a ruul, di piipl we du wa Gad se rait a-go get nofa an nofa an dem gweehn get nof blesn tu, an . . . piis a-go de evriwe an naa go en.”​—Saam 72:7.

•   “A im aal a di piipl dem iina evri konchri a-go sorv.”—Saam 72:11.

 Jiizas a di bes liida. Wa mek? Kaa im kier bout piipl an im riili waahn fi elp di wan dem we a sofa ya nou an naa go get no jostis.

•   “Di puor piipl we a baal out fi elp im a-go siev dem, an im a-go du sopm fi elp di ombl wan dem uu nobadi neehn bizniz wid. Im a-go fiil it fi puor piipl an fi di wan dem we a sofa, an im a-go siev dem laif. Im a-go siev dem fram wikid piipl uu a mek dem sofa an uu a chrai fi ort dem.”​—Saam 72:12-14.

 Lorn som muo bout Gad Kindom, dat a di govament we Gad set op iina evn we im pik Jiizas fi ruul iina. Fain out ou da govament de kyan elp yu an wa yu kyan du fi shuo se a da govament de yu a se.

•   Wach di vidiyo we niem Di Kindom a Gad—A Wa?

•   Riid dis: “God’s Kingdom—A Government With No Corruption.”