Wen som piipl we stodi bout dem tingz ya luk pan wa a gwaan aal uova di worl, a dem get fi fain out se a wan outa evri fuor sumadi fiil sad kaa dem fiil laik se dem na’av nobadi roun dem we bizniz wid dem.

•   “It no mata uu yu bi, ou uol yu bi, ar wich paat yu kom fram. Ef wi naa get fi miit op wid piipl an spen taim wid dem, it kyan mek wi fiil sad.”​—Chido Mpemba, wan a di sumadi dem we inchaaj a di World Health Organization’s Commission on Social Connection.

 Wol iip a piipl a se a onggl uol piipl an piipl we de bai demself kyan sad kaa dem fiil laik se dem no av nobadi roun dem we bizniz wid dem. Bot di chuut a dat aal yong piipl, piipl we av moni, piipl we marid, an piipl we elti kyan fiil sad tu. Wen sumadi a kip we fram ada piipl ar wen dem sad kaa dem fiil laik se dem no av nobadi roun dem we bizniz wid dem, dat kyan mek it aad fi dem tingk chriet an aal mek dem badi pap dong tu.

•   Dakta Vivek Murthy, wan big taim dakta we wok wid di govament iina Merika, se dis: “Wen sumadi get sad kaa dem fiil laik se dem no av nobadi roun dem we bizniz wid dem, a no jos laik se dem fiil a wie. It biga dan dat kaa sumadi we naa miit op wid piipl an spen taim wid dem komiin laik sumadi we sumuok 15 sigaret a die. A so bad it bi.”

 Gad neehn mek wi fi kip we fram ada piipl an fi wi tan bai wiself. Gad did aalwiez waahn wi fi av gud fren an fi enjai wi wan aneda kompni.

•   Sitn we di Baibl se we yu kyan riizn pan: “Gad se: ‘Nuo sa, di man kyaahn tan bai imself. Dat naa go gud fi im at aal.’”​—Jenisiz 2:18.

 Gad waahn wi an im fi ton gud gud fren. Im se di wan dem we jraa nier tu im, im a-go jraa nier tu dem.​—Jiemz 4:8.

•   Sitn we di Baibl se we yu kyan riizn pan: “Di piipl dem we nuo se dem niid Gad iina dem laif, a dem Gad a-go bles, kaa dem piipl de a-go get Gad govament we de a evn.”​—Matyu 5:3, NWT.

 Gad waahn wi fi miit tugeda wid ada piipl wen wi a worship im. Wen wi du dat, it elp wi fi kip kaam an mek wi tingk chriet.

•   Sitn we di Baibl se we yu kyan riizn pan: “Mek wi tingk bout ou wi kyan gwaan push wi wan aneda fi shuo lov an fi du di gud sitn dem. Mek wi gwaan miit tugeda an kip choch . . . Mek wi kom tugeda an taak so wi wan aneda aat kyan get chrangga.”​—Iibruu 10:24, 25.

 It impuotant fi wi du di ting dem we kyan elp wi so dat wi no fiil sad kaa wi fiil laik se wi no av nobadi roun wi we bizniz wid wi. Ef yu waahn fi fain out muo bout dis, riid dis: “Loneliness in a World of Mass Connection.”