Aal uova di worl, piipl a du tingz fi ort di wan dem we iina palitiks an di wan dem we a bak dem tu.

•   Iina Meksiko, a wol iip a shuutin an dem ting de gwaan iina 2023 an 2024 siek-a di ilekshan an a uola 39 a di piipl dem we did a chrai get difrant difrant pozishan iina govament dem kil. Siek-a dat, di ilekshan neehn gwaan tuu gud at aal.

•   Iina Yuurop, fram di ada die a kopl taim wel piipl du tingz fi ort piipl we iina palitiks an di wan dem we a bak dem tu. An pan Mie 15, 2024, dem aal chrai fi kil di prai minista fi Slovakiya.

•   Pan Julai 13, 2024, di piipl dem iina Merika did shak wen dem ier se sumadi did chrai fi kil Donald Trump, we yuus tu bi di prezident fi di konchri.

 Wa mek aal a dem ting ya a gwaan? Yu tingk se tingz a-go gwaan so fi eva? Wa di Baibl av fi se bout dis?

 Di Baibl did taak bout fi wi taim an kaal it “di laas die dem,” an it se nof piipl wuda av som waar-buot wiez we wuda mek dem eva a fait gens dem wan aneda.

•   “Iina di laas die dem tingz a-go get aad aad. . . . Piipl naa go gi tangks fi notn an dem naa go av notn fi du wid Gad. . . . Dem a-go taak bad bout dem wan aneda tu . . . an dem a-go gwaan laik dem a wail daag. Dem a-go ton chrieta an dem a-go du bie kielis sitn. Piipl iina di laas die dem a-go gwaan laik dem beta dan evribadi els.”​—2 Timoti 3:1-4.

 Di Baibl did mek wi nuo tu se iina dem taim ya, piipl wudaana fait gens di wan dem we iina govament an aal a chrai fi tek uova fram dem tu. (Luuk 21:9) Bot tingz naa go gwaan so fi eva.

 Di Baibl mek wi nuo se Gad a-go get rid a aal a di govament dem we de pan ort ya nou an a fi im govament we de a evn a-go ron tingz.

•   “Di Gad we de a evn a-go set op fi’im King fi ruul fi’im govament we . . . a-go don aal a di ada govament dem, an it wan gweehn ruul fi eva.”—Daniyel 2:44.

 Gad Kindom govament a-go mek piis de evriwe pan di ort an it a-go mek piipl wok tugeda az wan.

•   A Jiizas Krais a-go ruul da govament de, an di Baibl kaal im “Di Wan We A-Go Mek Piis De Evriwe Wen Im a Ruul.” Im a-go mek shuor se “piipl a-go liv iina piis fi eva.”—Aizaiya 9:​6, 7.

•   Bot a no jos iina di fyuucha dis a-go gwaan. Gad Kindom govament a elp piipl fi liv iina piis rait ya nou. An a dat mek di Baibl se: “Dem a-go ton dem suod dem iina sitn we dem yuuz fi plou op lan, an dem a-go ton dem spier dem iina kotlis we faama yuuz. No konchri naa go waar gens no ada konchri, an dem naa go lorn ou fi fait waar no muor.”—Aizaiya 2:​3, 4.

 Fi fain out muo bout dis, riid dis: “What Will God’s Kingdom Accomplish?” an wach di vidiyo we niem Di Kindom A Gad​—A Wa?