Pan Mie 24, 2022, wan wikid an torbl sitn apm iina wan plies we niem Yuvalde iina Teksas iina Merika. Azkaadn tu wan nyuuzpiepa we niem The New York Times, “wan gonman go iin an kil aaf 19 a di pikni dem an tuu tiicha . . . a wan skuul we niem Rab Elimenchri Skuul.”

 It sad fi si se a wol iip a dem wikid sitn ya a gwaan iina dem taim ya. Wan nyuuzpiepa we niem USA Today se: “Laas ier a 249 difrant difrant taim piipl shuut op di skuul dem—dat a uol iip muor taim dan eni ada ier sins bout 1970.” An dem shuut op de a wa gwaan iina Merika aluon.

 Wa mek dem wikidnis ya a gwaan? Wa kyan elp wi fi diil wid dem torbl sitn ya wen dem apm? Wi a-go eva av wan taim wen non a dem wikid sitn ya naa go gwaan agen? Di Baibl mek wi nuo di ansa fi dem kwestiyan ya.

•    Di Baibl kaal di taim we wi a liv iina “di laas die dem” an it did mek wi nuo se iina dem taim ya piipl “naa go lov dem wan aneda ar notn we gud” an dem a-go “gwaan laik dem a wail daag.” So dem a-go du aal kain-a wikid an torbl sitn. An it mek wi nuo se di piipl dem we a du dem sitn ya “a-go get fram bad tu wos.” (2 Timoti 3:1-5, 13) Fi fain out muor, riid dis: “Did the Bible Predict the Way People Think and Act Today?”

 Wen piipl luk pan ou dem a shuut op shuut op di skuul dem, nof piipl wanda ‘Wa mek Gad no tap dem torbl sitn ya fram apm?’ Ef yu waahn nuo wa di Baibl av fi se bout dat, riid dis: “Bad Things Happen to Good People—Why?”

•    “Evriting we rait dong iina Gad wod, rait dong fi tiich wi . . . so dat wi kyan gwaan luk fi get di sitn dem we Gad pramis wi.”—Ruoman 15:4.

 Di sitn dem we wi lorn fram di Baibl kyan elp wi fi diil wid di wikid sitn dem we a gwaan iina da worl ya. Fi fain out muor bout dis, luk pan di Awake! magaziin we niem “Will Violence Ever End?”

 Fi si som sitn we di mada an faada dem kyan yuuz fi elp dem pikni dem wen dem si an ier di wikid sitn dem we a gwaan pan di nyuuz, riid dis: “Disturbing News Reports and Your Children.”

•    “Im a-go siev dem fram di piipl dem we a mek laif aad fi dem an fram aal a di piipl dem we a du tingz fi ort dem.”—Saam 72:14.

•    “Dem a-go ton dem suod dem iina sitn we dem yuuz fi plou op lan, an dem a-go ton dem spier dem iina kotlis we faama yuuz. No konchri naa go waar gens no ada konchri, an dem naa go lorn ou fi fait waar no muor.”—Maika 4:3.

 So man kyaahn get rid a dem wikid sitn ya. A Gad aluon a-go du dat. Gad Kindom govament we de iina evn a-go get rid a aal a di sitn dem laik gon an dem sitn de we piipl yuuz fi du wikidnis, an no muor wikidnis naa go gwaan. Fi fain out muor bout wa Gad Kindom a-go du, riid dis: “Under God’s Kingdom ‘Peace Will Abound.’”